San Juan 18
18
Títecapanapa ena ticaratacanaya ema Jesús
(Mt 26.47-56; Mr 14.43-50; Lc 22.47-53)
1Te títapiricapa ema Jesús eta mayujarasirahi, tiyanapa tiámamurihahavipa te apachara eta tatavarapi ticaijare Cedrón. Ánaqui tatiarihi eta huerta ticaijare Getsemaní. Visiapapa tayehe. 2Tacahe, ema Júlasi máimatihi eta juca viávirarehi taicha ichapemurihi eta vicachanerahi ema Jesús tayehe eta huerta. 3Tacahe, te jena yátiquenehi, títecapapa ema Júlasi. Mámamurihapaipahi ena oficialeana énapa ena camuriqueneanahi suntaruana romanoana, vanairucanahi éna nayehe ena tuparairucana, taicha napamicavacahi ena fariséoana. Ticamicahuanapaipahi. Ticaepuchiriquianapaipa, étapa eta nayehe espada. 4Émasera ema Jesús máecharipa eta nacaratasirayarehi. Tacahe, mácapavacapa éna. Máichavacapa:
—¿Nájaha etánuca?
5Ena najicapapa:
—Ema Jesús Nazareno vitanucapahi.
Éma máichavarepa:
—Nútira etánurepahi.
Ema Júlasi mapauchapa, máetserarecapa. Tásiha, titupihachaha te machacaya. 6Eta majicapirahi ema Jesús, máichirahi: “Nútira etánurepahi”, tiáquipaimuriavanapa ena suntaruana te apaquehe. 7Tásiha, mayaserecavarepa ema Jesús:
—¿Nájaha ema etánucapahi?
—Ema Jesús Nazareno —najicapavarepa.
8Éma, máichavarepa:
—Cápachi numetacaheripahi nútihira etánurepahi. Te nútichucha etánucanupahi, ísapayare nayana ena nani —máichavacapa.
9Étapaichuhi eta máechajiriruvahi ema Jesús te tiyujaracaipa nájina émanainahini náemitiacahini te namuri ena máijararuanahi ema Maiya. 10Tacahe, ema Pedro, tatiarihihi eta mayehe espada te mañahe. Mavehapa, máechuchacachapa eta machaca te vaure ema achane ticaijare Malco, mavanarahi ema aquenuca Caifás. 11Émasera ema Jesús macahepa:
—Pinaca te tatumaramuhi eta piyehe espada. Vahi pihapapicaimahi eta táitauchiravaya eta mavarahaquenehi ema Tata, taicha nutuparahaichuhi mayehe eta juca nucatajivairaya —macahepa.
Nacaratacapa ema Jesús, námapa te mamirahu ema corregidor
(Mt 26.57-58; Mr 14.53-54; Lc 22.54)
12Tacahe, ena suntaruana émapa ema comandante nacaratacapa ema Jesús, náitijivauchapa. 13Tiyananapa námapa te mapena ema Anás. Étarichu mapena ema Caifás, taicha ema maca Anás máimachucahi ema Caifás, émapasera tuparairucahi te jena áñohi máitsivaequenehi ema máimachuca. 14Ema maca Caifás, émarichuvare ticaechajiriruvahi eta máepenirainahini ema émana achane tivachachayarehi eta náitaresirana namutu ena achaneana.
Ema Pedro tépiyacavapa vahi máimati ema Jesús
(Mt 26.69-70; Mr 14.66-68; Lc 22.55-57)
15Ema Pedro, nútipa nuti Juan viyanapa véhiequenehapaipa ema Jesús. Nusiapapa núti te tajuhe eta canchón mapenahi ema aquenuca Anás, taicha náimaticasarenuhi ena mavanarana. 16Émasera ema Pedro manasipa te aneca te tapajachacaya. Tásiha, néchajiacapa esu vanaracahi téchahi eta tapaja, sucasiapahini ema Pedro. 17Tásiha, esu suyaserecapa ema Pedro, ánipa suicha:
—¿Pítirichu jácani apanava ñímiture eñi ñica Jesús?
Ema Pedro majicapapa:
—Vahi nútina.
18Tásiha, eta jena yátiquenehi táetaviuchahi eta tacasaraivahi. Ena mavanaranahi ema Anás, énapa ena suntaruana ticamururecanapa eta yucu, násasiavayarehi. Eta náurujiasiraipahi eta yucu, titupihaipavare ema Pedro te nachacaya, másasiavahivare.
Ticayaseserehipa ema Jesús te mamirahu ema Anás
(Mt 26.59-66; Mr 14.55-64; Lc 22.66-71)
19Tacahe, ema Anás mayaserecapa ema Jesús áyananapuca ena téhicanahi éma, tájahahivarepuca eta máimiturapihi eta nayehe. 20Ema Jesús majicapapa, ánipa macahe:
—Núti vahi nuyumurucavahini eta nímituresirahi. Nímerecavahi te namuri namutu ena achaneana te viúrujisirarevana, étapa te Templo. Éta nímituresirareanahi. 21¿Tájaha tacayema piyaserecanu núti? Piyaserecapaini ena tisamararacanuanahi. Énaina nametacavi eta nímiturapianahi núti —macahepa.
22Matiarihihi ema émana suntaru te machacaya. Eta masamirahi eta máechajiriruvahi ema Jesús, máehamirahapa éma. Tásiha, máichapa:
—¿Tájaha tacayema tíñemahi eta pijicapirahi ema aquenuca macapicahuquenehi? —máichapa.
23Tacahe, ema Jesús majicapapa:
—Váhira táiñemahihini eta nujicapirahi ema aquenuca eta taviuchanuhini. ¿Tájaha tacayema péhanu? —macahepa.
24Tacahe, ema Anás máevatacapa mayehe ema Caifás, émarichuhi corregidor. Ticaitihapaipahi eta námirapahi éma.
Ema Pedro tiápechavavare tépiyacava vahi máimati ema Jesús
(Mt 26.71-75; Mr 14.69-72; Lc 22.58-62)
25Tacahe, ema Pedro manasirichuhi titupihahi te tachacaya eta yucu, tiásacavahi éma. Nayaserecavarepa nápechahi:
—¿Pítirichu jácani máimiture ema maca achane? —náichapa.
Ema Pedro majicapapa:
—Vahi nútina —macahepa.
26Tásiha, matiarihihivare titupihahi ema mavanarahi ema aquenuca, macheji ema máechatichacaruhi ema Pedro. Tacahe, éma téchajicapa, máichapa:
—Núti németeaca nímahavihi picachanehi éma tayehe eta huerta te vicaratasinehi ema maca —máichapa.
27Émasera ema Pedro macahevarepa:
—Váhiquene nímati éma —macahepa.
Tásiha, enurujipa téchajicanecha eta varayu.
Ema Jesús námapa te mamirahu ema Pilato
(Mt 27.1-2, 11-14; Mr 15.1-5; Lc 23.1-5)
28Te jena yáticarahi, te tijararahipa, nacuchucapa ema Jesús te mapena ema Caifás. Námapa tayehe eta palacio mávihahi ema Pilato. Váipasera nasiapahini ena tuparairucana. Náimichuhahi ema Pilato. Nanasipa te aneca, namavarairahi náechipejicavahini eta nanisirayarehi eta cordero pascual te jena sache. 29Tacahe, ema Pilato tiúchucapa, máechajimurihapa éna. Máichavacapa:
—¿Tájaha eta maviurevahi ema maca achane iámaquenepahi eta ani nuyehe? —macahepa ema Pilato.
30Éna najicapapa:
—Jucarihi eta maviurevahi. Eta tacahe, viámapahi eta piyehe.
31Tásiha, ema Pilato, máichavacapa:
—Eyana iama. Étina ícuñaca ema maca, taicha jararihi eta eyeherepichuhi eti israelítana —máichapa.
Éna najicapapa:
—Étasera víti, vaipa ísapahavihini vítaucha eta viyeherepi vímicapaca mácani ticaviurevahi, vitupisica te márijahi. Émasera ema maca vivaraha máepena. Vivaraha pémetatacaini te crusu —nacahepa.
32Tacahehi eta táitauchiravapaipa tamutu eta máechajiriruvanapahi ema Jesús eta máepenirayarehi te crusu.
33Tisiapavarepa ema Pilato te tajuhe. Máichuhapa ema Jesús. Tacahe, mayaserecapa:
—¿Yátupisareji réyvihi píti nayehe ena pijaneanana israelítana? —macahepa.
34Ema Jesús máichapa:
—¿Pitupiruvahipuca eta juca píchiranuhi, pivarairahi pecha te yátupihipuca eta nurreyvahi? ¿Pitanucahipucasera eta nuviurevayare, picutihipuca eta napanereruhi ena nujaneanana israelítana? —máichapa ema Jesús.
35Ema Pilato majicapavarepa:
—Vahi nímati eta epanereruana eti israelítana. Énarichuhi ena pijaneanana ena tuparairucana, éna tiámavianapahi eta ani nuyehe. ¿Tájaha eta piviurevahi eta nayehe? —máichapa.
36Tásiha, ema Jesús majicapavarepa:
—Jéhesare, jararihi eta návacurehi; váhisera étaina te juca apaquehe. Te étainahini te juca apaquehe eta návacurehi, téhacacauchanuanaripahini ena nímitureanahi, váhivare nacucaratacanuhini ena ticatianacanuanahi. Taicha yátupiquenehi eta návacurehi, vahi étaina te juca apaquehe —macahepa.
37Tacahe, ema Pilato mápechavarepa mayasereca:
—Tacahe, ¿yátupihi eta pirreyvahi? —máichapa.
Ema Jesús majicapapa:
—Yátupi réynuhi núti. Eta núcupaisirahi, núchucahi te juca apaquehe, nímiturecayarehi eta yátupiqueneana. Nácani tisuapajirahianayare, nasamararacayare eta yátupiqueneana —macahepa.
38Tacahe, ema Pilato macahevarepa:
—¿Píti pímijachava pímati eta yátupiqueneana? Núti, németeaca nájina narataha náimatimahi eta yátupiqueneana —macahepa.
Ema Pilato macavanairipipa náetataca ema Jesús te crusu
(Mt 27.15-31; Mr 15.6-20; Lc 23.13-25)
39Te tamutupa eta mayaseresirahi, tiúchucavarepa ema Pilato. Máechajimurihapa ena ticatianacanahi ema Jesús:
—Tájina maviurevaina ema maca achane eta nímairahi núti. Étisera jucarihi eta eyeherepi te Páscuamuhuana eta nucaitisirayare ema émana presu. ¿Evarahapuca nucaitica ema eyehe Rey, iáquenumuri eti israelítana? —máichavacapa éna.
40Énasera tipiararecanapa eta najicapirahi:
—¡Vahi vivaraha picaitica ema maca! ¡Émaina picaitica ema Barrabás! —nacahepa.
Ema Barrabás táemerataruhi eta máetaviuchirahi eta mámeraivahi.
Currently Selected:
San Juan 18: ign
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
