लूका 18
18
पुंइचा मप्रोंइचा, दे शेंशो
1मिनु येसुमी आ शेंसीब आन कली “परमप्रभु यावे कली पुंइचा नु ‘गे रिम्शो पाइब बाक्नीनी’ देंचा गेनायो मप्रोंइचा” दे रुप्पाइक्चा कली कथा सेला बाक्त। १थिस्सलोनिकी ५:१७ 2मिनु मेकोमी “सहर कामी निसाफ पाइब का बाक्माक्त। मेको सुइ नु महिंब बाक्माक्त। परमप्रभु यावे कली ममिम्थु, मुर आन लोव़ यो मनेंथु, आ थुंमी मार पिमे में ला पाइबाक्माक्त। 3मेको सहरमी आ वोंइश बेक्शो मीश मुर का बाक्माक्त। मेको मीश मुर मेको निसाफ पाइब आ बाक्तीके जाक्ना जाक्न ‘आं कली दोस गेब आन कली सजाइ गेशा, आं कली ग्रापाइय्यीनी’ देंबाक्माक्त। 4शुश नाक्ती सम्म निसाफ पाइबमी मेको कली आ पुंइशो मगेवा बाक्त। 5काबु चहिं ‘परमप्रभु यावे कली मान पा महिंथु, मुर आन लोव़ यो मनेंथु, आं थुंमी मार पिमे में ला पा बाक्ती। तन्न मेको मीश मुरुम नाक्त किंत किंत जाक्शा, श्येत गेती। मुल आ लोव़ नेंचा ब्रीताक्ङ, नेंने यो मदाक्ङ। आ देंशो मपाता हना, जाक्स ङा जाक्स पाइब। मोपतीके मेको आ देंशो मपथु मप्रोंइनुङ’ दे मिम्ता बाक्त। लूका ११:७-८ 6मेको निसाफ पाइब आ मिम्शो मिम्तीने। 7मारदे हना निसाफ पाइब आ पशो खोदेंशो पा परमप्रभु यावेमी आ योव़शो आन कली आन पुंइशो मगेबा ङा? मेकोपुकीमी नाक्त किंत किंत पुंइचा मप्रोंइथु बाक्नीम। मुल मगेप्तु हना, काबु ङा काबु गेब। मिनु ग्रापाइक्ब। 8रागीम जरमेशो तपांइसेनु, थमा सुइश्शा, परमप्रभु यावे कली पुंइशा ‘गे रिम्शो पाइब बाक्नीनी’ देंस ङा देंस बाक्शोपुकी ताइबा कों?” दे येसुमी देंमाक्त।
ठेयब मसुंइसीचा, दे शेंशो
9काबु येसुमी अरु आन कली महिंथु, ठेयब सुंइसीशो आन कली लोव़ पवा बाक्त। मेकोपुकीमी “गो आंम पचा माल्शो पा ठीक दुम्तक” दे मिम्शो बाक्मा बाक्त। रोमी १०:३ 10मोदेंशो ठेयब सुंइसीब आन कली “मुर निक्शी परमप्रभु यावे आ खिंमी परमप्रभु यावे कली प्रार्थना पथ लसा बाक्त। का फरिसी बाक्माक्त, का तिरो पोक्ब बाक्माक्त। 11फरिसीमी मुर नेल्ल आन कली तपांइसीशा, चढ़ेतीक आ नेक्था राप्शा ‘परमप्रभु यावे, गे रिम्शो पाइब बाक्नीनी। मारदे हना गो अरु मुर खोदेंशो पा मुर आन मार मार रोइक्ब मनङ। गो जोल पाइब यो मनङ। मीश वोंइश आस नाता ख्रोइक्ब मनङ। मेरे तिरो पोक्ब खोदेंशो पापी मनङ। यसैया ५८:२-३ 12साता कामी खेयप निक्शी माइजा बाक्नुङ। क्येट ताक्गुनु, १० भाग ङा भाग का योक्शा गेनुङ’ दे प्रार्थना पवा बाक्त। मत्ती २३:२३ 13तिरो पोक्ब चहिं हारे बाक्शा, शुर खुक्शा ‘परमप्रभु यावे, गो पापी नङ। शिशी पाइयीनी’ दे प्रार्थना पवा बाक्त। भजन संग्रह ५१:१३,१९ 14परमप्रभु यावेमी मेको कली आ पाप क्याम्शा, ठीक दुम्पाइक्तु। मिनु ठीक दुम्शा, आ खिं लेत्त। फरिसी चहिं पाप क्याम्चा मतव। मारदे हना सुमी ठेयब सुंइसीबा, मेको महिक्शो दुम्ब। ठेयब मसुंइसीब कली चहिं परमप्रभु यावेमी ठेयब सेल्ब” दे येसुमी माइक्मी बाक्त। मत्ती २१:३१; लूका १४:११; मत्ती २३:१२
आल आन कली आसीक गेशो
15मिनु मुरपुकीमी येसुमी आल आन कली थिवल, दे चाक्ग्मेनु, शेंसीबपुकीमी आल चाक्ब आन कली हुइक्तमे बाक्त। 16तन्न येसुमी मेको आन कली ब्रेश्शा “आल आन कली आं बाक्तीके चाक्चा मतेक्कीन। मारदे हना परमप्रभु यावे आ राज्य आल आन केन बाक्ब। 17नोफा दाइश्शा नेनीने, मुरपुकीमी आल आन थुं ङा मिम्शो खोदेंशो पा ममिम्ताक्म हना, परमप्रभु यावे आ राज्यम ओव़चा मताइनीम” दे माइक्मी बाक्त।
शोंप आ पर्बम लोव़
मत्ती १९:१६-२६; मर्कूस १०:१७-२७
18मिनु ठेयब मुर कामी येसु कली “गे रिम्शो शेंब बाक्नीनी। गेना हना यो ब्रोंइशा बाक्चा कली मार पचा माल्नुङा?” दे हिल्लो पवानु, लूका १०:२५-२८ 19येसुमी “मारदे आं कली रिम्शो मुर, दे माइय्यीनी? सुइ रिम्शो मनमी। परमप्रभु यावे ला रिम्शो बाक्ब। 20परमप्रभु यावेम ब्रेक्पाइश्शो लोव़ तुइक्नीनी ‘वोंइश मीश आस नाता मख्रोइक्चा, मसाइक्चा, खुइ मपचा, सांकछी बाक्शोनु जोल मपचा, आम आफ आस कली मान पचा’ ” दे मदा बाक्त। प्रस्थान २०:१२-१६ 21मिनु मेकोमी “आल रेन मोदेंशो पा पिशो नङ” देंमाक्त। 22मिनु येसुमी “नेल्ल पाप्तीवी, का चहिं मपवी। इ शोंप नेल्ल लेयशा, क्येट मथीब आन कली योक्शा गेमी। मिनु आं नोले खोइय्यी। मिनु इ शोंप स्वर्गम बाक्ब” देंमाक्त। मत्ती ६:२० 23मिनु येसु आ लोव़ नेंशा, आ थुं खाइक्माक्त। मारदे हना मेको शुश शोंप पाइश्शो मुर बाक्माक्त। 24येसुमी मेको आ थुं खाइश्शो तुइश्शा, मिक्च मयाक्थु कोव़शा “शुश शोंप पाइश्शो मुर परमप्रभु यावे आ राज्य ओव़चा गिश श्येत बाक्मे। लूका १९:९ 25शोंप पाइश्शो मुर परमप्रभु यावे आ राज्य ओव़ने चाप्चा क्येङा दालओंठ लूजे आ पोलाम ग्रीने चाप्ब” देंमाक्त। 26येसु आ लोव़ नेंबपुकीमी “मो हना सु ओव़चा ताइबा ङा?” देंमा बाक्त। 27मिनु येसुमी “मुर आन पने मचाप्शो परमप्रभु यावेमी पने चाप्ब” दे माइक्मी बाक्त।
नेल्ल प्रोंइबम मार ताइनीमी
मत्ती १९:२७-३०; मर्कूस १०:२८-३१
28मिनु पत्रुसमी “गोपुकी आंइ खिं प्रोंइशा, इन नोले खोइक्तक” देंमाक्त। 29मिनु येसुमी “नोफा दाइश्शा नेनीने, सुमी आ खिं, आ मीश, आ वोंइश, आ लोक्बपुकी, आम आफ, तमी तौ नु मारेइ मारेइ नेल्ल परमप्रभु यावे आ राज्य आ पर्बम प्रोंइबा, मेकोमी मुल एको रागीम बाक्मेनुन आ प्रोंइशो क्येङा शुश ताइब। 30मोशो ला ममाइ, नोले गेना हना यो परमप्रभु यावे नु बाक्चा ताइब” देंमाक्त।
रागीम जरमेशोम साइक्चा पुंइसीब
मत्ती २०:१७-१९; मर्कूस १०:३२-३४
31मिनु येसुमी आ १२ जना शेंसीब आन कली “नेनीने, मुल यरूसलेम लाइनय। मेकेर जाक्दीश्शो नोले रागीम जरमेशो आ पर्बम साइ परमप्रभु यावे आ लोव़ पाइबपुकीम ब्रेक्शो लोव़ नेल्ल थमा दुम्ब। 32रागीम जरमेशो अर्को जात ङा मुर आन गुइमी गेचा पुंइसीब। मिनु मेकोपुकीमी शुक्शी पा, मेको आ कुलुम तोक्नीम। 33मिनु युक्शा, हुश यिपाइक्नीम। मिनु नोले साइक्नीम। साइश्शो आ नित्थ नाक्त बेक्शो रे सेंसीब” दे शेंदीमी बाक्त। 34आ लोव़ नेंशा, मारेइ मरुप्मे बाक्त। मारदे हना ख्रुइश्शो लोव़ बाक्माक्त।
मिक्च मताइब कली सापाइश्शो
मत्ती २०:२९-३४; मर्कूस १०:४६-५२
35मिनु यरीको सहर आ नेक्था जाक्दीम्मानु, लांमी मिक्च मताइब पुंइब मुर का बाक्माक्त। 36मेको मिक्च मताइबमी शुश मुर लोव़सी पा पिशो नेंशा “सु ननी? ते लनी? मार माल्नी?” दे हिल्लो पवानु 37“नासरथ ङा येसु एको लां पित” देंमा बाक्त। 38मिनु मिक्च मताइबमी “हे येसु, दाऊद आ तौ, शिशी पाइय्यी” दे ब्रेम्माक्त। 39मिनु येसु आ ङोंइती गाक्बपुकीमी “सिक्सी पावो” दे हुइक्तमे बाक्त। आं चहिं वाइ ब्रेश्शा “दाऊद आ तौ, शिशी पाइय्यी” देंमाक्त। 40मिनु येसु ख्रा दिक्शा “मेरे मिक्च मताइब कली एक चाक्कीन” देंमाक्त। मिनु चाक्ग्मेनु 41“इ कली मार पङ? मार पुंइनेवे?” दे हिल्लो पवानु “प्रभु, मिक्च ताइब सेल्यीनी” दे पुना बाक्त। 42मिनु “इ मिक्च साल। इ थमा सुइश्शोमी साते” दे मदा बाक्त। 43मो मदानु, आ मिक्च ब्रा साशा, मिक्च ताइब दुम्शा, येसु आ नोले खोइश्शा, परमप्रभु यावे कली मान पवा बाक्त। मेको कली मिक्च ताइब दुम्शो तशा, मुर नेल्लेमी यो परमप्रभु यावे कली ठेयब सेल्मे बाक्त।
Currently Selected:
लूका 18: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
