SAN MATEO 13:44

Te Jèsús xǎhaⁿ tùcu‑gá xii‑güedé: —Na càni tucu‑í ɨngá cuèndú núú‑ndó nàcuáa tecú tnùní‑ndó nàcuáa cada‑xi òré ndɨ́hu ndaha ñàha Yá Ndiǒxí xii ñáyiu. Ɨɨⁿ tée ní naníhí‑dě ɨɨⁿ sá ǐo ndèyáhu yɨ̀ndúxi ɨɨⁿ xichi, te ní nachindúxi tucu‑dé dɨu‑ni núú nǐ naníhí‑dě‑áⁿ, te ío ní cudɨ́ɨ́ ìní‑dé sá dúcáⁿ nǐ naníhí‑dě xíǎⁿ. Te ní xica‑dé cuánuhú‑dé te ní nadico‑dě nchaa sá ndécú ndɨ̀hɨ‑dé, te ní nacuaaⁿ‑dé ñuhu núú dúcáⁿ nǐ naníhí‑dě xíǎⁿ.