Genesis 11
11
Nuvuguseᴋsoaᴋ Babeleme. Oᴋautsit adsigêngititauningat. Semib kinguvângit.
1Nunamiullo ilûnamatsiatik ingmigolingajunik oᴋauseᴋaratik oᴋauseᴋarput adsigêktunik.
2Paungale aularamik, naternaᴋ tikipât nuname Sineareme; tamanna nunagilerpât.
3Oᴋaᴋatigêkpullo: Attê, ivitânik sanalauᴋta ikkomamut sittijorortilugit. Tagva ivitât ujararivait, kutsorlo macharivlugo.
4Oᴋarpullo: Attê, iglugasaksoarnik sanalauᴋta nuvuguseᴋsoarmiglo, nuvua aktuatilugo ᴋilangmut, erᴋanartiluta, siamartitautailivlutalo nunanut tamainut.
5Tagva Nâlegaᴋ aᴋᴋarpoᴋ, iglugasaksuit nuvuguseᴋsoarlo takojartorlugit, inuit ᴋitorngangita senajangit.
6Nâlegarlo oᴋarpoᴋ: Tagga, inugasaksuit atausiovut adsigêktuniglo oᴋauseᴋarlutik; tamannauvoᴋ piniarningita pigiarningat, mânamillo pinasuarningit agviarlugit ajornarniarpoᴋ.
7Attê, aᴋᴋalauᴋta kanunga, oᴋausingit adsigêgungnairtilugit, aipâ aipame oᴋausinginik tukkisijungnairᴋovlugo.
8Nâlekablo inuit tagvangat siamartipait nunanut tamainut, igloliorungnairpullo iglugasaksoarnik.
9Tamanna pivlugo Bâbelemik atteᴋarput, Nâlekab tagvane inuit ilûnatik oᴋausingit adsigêgungnairtingmagit, tagvangallo Nâlekab siamartingmagit nunanut tamainut.
10Tamadja Semib kinguvângit: Jâreᴋarlune 100nik Semib Arpagsad ernertârivâ, jârik magguk ullitornivaksûb kingorngane,
11Kingorngagullo sulle jârinik 500nik inôvoᴋ, ernertârlune panniktârlarmelo.
12Jâreᴋarlune 35nik Arpagsadib Sala ernertârivâ,
13Kingorngagullo sulle jârinik 403nik inôvoᴋ, ernertârlune panniktârlarmelo.
14Jâreᴋarlune 30nik Salab Eber ernertârivâ,
15Kingorngagullo sulle jârinik 403nik inôvoᴋ, ernertârlune panniktârlarmelo.
16Jâreᴋarlune 34nik Eberib Peleg ernertârivâ,
17Kingorngagullo sulle jârinik 430nik inôvoᴋ, ernertârlune panniktârlarmelo.
18Jâreᴋarlune 30nik Pelegib Regu ernertârivâ,
19Kingorngagullo sulle jârinik 209nik inôvoᴋ, ernertârlune panniktârlarmelo.
20Jâreᴋarlune 32nik Regub Serug ernertârivâ,
21Kingorngagullo sulle jârinik 207nik inôvoᴋ, ernertârlune panniktârlarmelo.
22Jâreᴋarlune 30nik Serugib Nahor ernertârivâ,
23Kingorngagullo sulle jârinik 200nik inôvoᴋ, ernertârlune panniktârlarmelo.
24Jâreᴋarlune 29nik Nahorib Tara ernertârivâ,
25Kingorngagullo sulle jârinik 119nik inôvoᴋ, ernertârlune panniktârlarmelo.
26Jâreᴋarlune 70nik Tarab ernertârivait Abralo Nahorelo Haranelo.
27Tamadja Tarab kinguvângit: Tarab ernertârivait Abralo Nahorelo Haranelo. Haranible Lot ernertârivâ.
28Haranele toᴋovoᴋ atâtame Tarab takoane, inûlervingmine Ureme, Kaldearit nunangane.
29Abralo Nahorelo nulianikpuk. Abrab nulianga Saraimik atteᴋarpoᴋ, Nahorible nulianga Milkamik atteᴋarpoᴋ, Haranib panninga; tâpsomale Milkalo Jiskalo pannigivak.
30Saraile ᴋitorngisuiname, ᴋitorngaᴋangilaᴋ.
31Tarablo ernine Abra, ernimelo Haranib erninga Lot, ukkoanelo Sarai, ernime Abrab nulianga, illagivlugit aulaᴋatigivait Uremit, Kaldearit nunanganit, ingergajomavlune Kânaanib nunanganut; Haranelo tikkinamitsuk, tagvane nunaᴋalerput.
32Taralo jâreᴋarpoᴋ 205nik, toᴋovorlo Haraneme.
Currently Selected:
Genesis 11: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
