Genesis 12
12
Abra annerijauvoᴋ. Ingergavoᴋ Kânaanemut Egiptenemullo.
1Nalekablo Abra oᴋautivâ: Aularit nunangnit illangnillo atâtavillo iglunganit nunamut unertûtigijaksamnut illingnut.
2Inugasaksoangortitsomavagit saimauserlutillo, attillo nertornartitsomavara saimanartitsomavlutillo.
3Illingnik saimausêjut saimauseromavakka, illingniglo oᴋarnerlûtjijut oᴋarnerlûtijomavakka, illikullo kinguvârêt ilûnamatsiatik nuname saimausertaujomârput.
4Tagva Abra aularpoᴋ, sôrlo Nâlekab oᴋautingmago, Lotiblo aulaᴋatigivâ. 75nik Abra jâreᴋarpoᴋ, Haranemit aularame.
5Tagva Abrab illagivait nuliane Sarai Lotelo ᴋangiane, perᴋutitiglo tamaita kattersortatik, tarnelîllo tamaita pigijatik Haraneme, aularpullo ingergavlutiglo nunamut Kânaanemut, tikkipâlo nuna Kânaane.
6Abralo ingergalerpoᴋ nunakut Sikkememut Moriblo napârtunginut. Taipsomane Kânaanikut tagvane nunaᴋarput.
7Nâlekablo Abra saᴋᴋervigivâ oᴋautilâlo: Kinguvâksarnut nuna manna tunijomârpara. Tagva tunerguserviliorpoᴋ tagvane Nâlekamut saᴋᴋervigijiminut.
8Tagvangallo aularivoᴋ ᴋaᴋᴋamut Bêtelib kangianut, tagvanelo tupertilerpoᴋ Bêtele killerivlugo Ailo kangilerivlugo. Tagvanelo Nâlekamut tunerguserviliorpoᴋ, Nâlekablo attinga tuksiarvigivâ.
9Abra tagvangat amma aularivoᴋ ingergarlunelo seᴋᴋernganut.
10Tagvanele kângnartoᴋsoaᴋalermat, Abra attersarpoᴋ Egiptenemut, taikane tujormiangojartorlune, kângnartoᴋsoaᴋ angidlarmat nuname.
11Pijoᴋarporlo, Egiptene ᴋanileramiuk, nuliane Sarai oᴋautivâ: Takuit, ᴋaujimavagit arnaujotit kênatsiariktoᴋ.
12Imaᴋâ, Egiptenemiut takogunitit, oᴋarniarput: Tagga nulianga; uvamniglo toᴋotsiniarput igvillo inôtilutit.
13Oᴋalauniarpotit taimaimat najagigapkit, ᴋanoerᴋonanga pivlutit, tarnigalo inôrᴋovlugo illikut.
14Abrale Egiptenemut tikkingmat, Egiptenemiut arnaᴋ takovât, ânanaugidlarlugo.
15Angajoᴋâᴋsuillo Fâraomêtut takovât nertorlugolo Fâraomut. Arnarlo tigujauvoᴋ Fâraub iglunganut.
16Abralo ajungitulivigivâ, taimna pivlugo perᴋuteᴋalertilugo saukanik, tuktuvangniglo, siuterᴋortojuniglo angutinik, kivganiglo angutinik, kivganiglo arnanik, siuterᴋortojuniglo arnanik, kamêleniglo.
17Kissianele Nâlekab Fârao sugiarpâ sugiarnermik angijomik inuᴋotingillo Sarai Abrab nulianga pitjutigalugo.
18Tagva Fâraub Abra ᴋairᴋovâ oᴋautilâlo: Sôᴋ taimailiorvigivingâ? Sôᴋ oᴋautingilarma nuliarigangne?
19Sôᴋ najagivlugo oᴋautigiviûk? Tiguvaralo nuliarijomavlugo. Taggale nuliat, tiguguk aularlutillo.
20Fâraublo anguteᴋotine perᴋovait ᴋanilârlugo nuliangalo perᴋutigijangillo tamaita.
Currently Selected:
Genesis 12: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
