Mat 13
13
Nkuma ya mukuni
(Mal 4.1-9; Luk 8.4-8)
1Mu kiluumbu kikyo, Yesu kapalaa mu nzo, weedzakala ha simu dya mubu. 2Mampuumbu malaka makutukina mu mpele nde, kuri nde nweeti mu bwaatu, dzakiri, na mpuumbu yoyinso yisiiri ha simu. 3Nde wabadzoonsolo kwalaka mu mankuma. Nde ti: «Mukuni wayende mu kweenyaka. 4Mu ntaangu yi kaba mu kwenyaka, nsaangi dzamosi dzabwa ha luteembu lwa nzila. Banoni bayisa, na badzitootiri. 5Dzakaka dzabwa ha matari, haho hahele butoto bwalaka. Dzo dzamene mu mawasu; ngo mu ntoono butoto bwaba bwahele na musundu, 6ntaangu bu yatoomboko, mitwiikila myababuka, na bu myaba myahele na myaansi, myo myakana. 7Dzakaka dzabwa ha yulu manseende, na manseende bu matoomboko madziswetekese. 8Dzakimi dzabwa ha butoto bwabubwete na dzabuta. Miti myamosi myaha nkama bimbutu; myakaka makuumi masaamunu, na myakimi makuumi matatu. 9Wunde wuri na makutu, hemese kayuka!»
Bukuri nki Yesu kari mu kwesalila mankuma?
(Mal 4.10-12; Luk 8.9-10)
10Bayiki baandi bu bakokosolo kuri nde, bamufuula ti: «Mu nki ye wuri mu kwebadzoonsolo mu mankuma?» 11Nde wabvutula kuri bo ti: «Bukuri, kuri beenu baheeri kiteesu kya kuyaaba mpaanu dza Kimfumu kya mayulu; ngo kuri bo, bahele kuha. 12Mukwongo, kuri wunde wuri na kitotolo, sa bamuha, na sa kaba wabuukila mu bitotolo; ngo kasi, kuri wahele na kitotolo, sa bamuyisila na kikari na kyo.» 13Hango nkuumbu, me nyiri mu kwebadzoonsolo mu mankuma, kuri heki baba bu bari mu kutala, bahele kumono, bu bari mu kuyuka, bahele kubakula, 14na mbikukulu dza Esaya mu bo dzeensi mu mana; dzileele bu:
"Beenu sa luyuka, ngo lubakula ko.
Kutala, sa lwatala, ngo lumono ko.
15Mukwongo mutima kaanda dimadi wayeki wakuba;
bo bayeki bakiindisa makutu maaku,
na bayeki bakaanga miisu myaaku,
mu kubata ti bee bamwiini mu miisu,
bee bayukiri mu makutu maaku,
na kubata ti bee babakuri mu mutima,
na kuyiinga madyeele;
na ti me bee nyibatsinikisi."
16«Kiminu kiri na beenu bukuri miisu myeenu mikwemono, na makutu meenu makweyuka. 17Mukwongo, ngwanwa me nyiluleele ti: Babikiri balaka na baatu basuunguma se balaka baba batya kumono, ma lukwemono beenu, ngo basii mono ko; na kuyuka ma lukweyuka beenu, ngo basii yuka ko.»
Yesu wusundula nkuma ya mukuni
(Mal 4.13-20; Luk 8.11-15)
18Ha yukee buri nkuma ya mukuni: 19«Mpisi wuyuka maampu ma Kimfumu, ngo wahele kubakula, lo muutu wuri, ngaa-bubi bu kiisiri, dzikiri ma bakuninyee mu mutima waandi. Wunde ngo wuri bunu luteembu lwa nzila lubwiiri nsaangi. 20Wuri bunu butoto bwa matari bu bwiiri nsaangi, ngo muutu wuri kayukaa maampu, hanaho, wumataambiri mu kiminu, 21ngo maampu mahele kubaka myaansi mu nde; nde muutu wa mwaa-ntaangu yantele. Manyoongi bunu pe nkwamusunu bu biisiri mu ntoono ya Maampu, hanaho nde bwiiri. 22Wuri bunu butoto buri na manseende, bu bwiiri nsaangi, ngo muutu wuri kayukaa Maampu, ngo minyoongi mya nsi, na mawunu ma busina biswetikisi Maampu, na mo mahele kubuta bimbutu. 23Bari bunu butoto bwabubwete, bu bwiiri nsaangi, ngo babo bari bayuka Maampu, na bamabakula; bo ngo bari babuta bimbutu: bamosi nkama, bakaka makuumi masaamunu, bakimi makuumi matatu.»
Nkuma ya looso bo na lukengisi
24Yesu wabweese kubateele nkuma yikimi. Nde ti: «Kimfumu kya mayulu kyafwanikina na muutu wunyaka nsaangi dza looso mu nseke yaandi. 25Mu ntaangu yiri baatu bari tolo, mutaatu waandi wiisiri, nyakini nsaangi dza lukengisi munsa nseke, na weensi. 26Looso dyamene na dyabuta, lukengisi se lupala. 27Bangaamba ba muutu ngaa-nzo bu bakokosolo, bamuleele ti: "Mfumu, buri ye kari looso wanyakini mu nseke yaaku ko? Hango, lukengisi kuri lufumini?" 28Nde wabvutula kuri bo ti: "Mutaatu wayirikiri mya bubwo." Bangaamba baleele kuri nde ti: "Buri ye tiiri ti beetu tutsumuna lukengisi luri munsa nseke?" 29Nde waleele ti: "Pele! Bee lutsumini lukengisi na looso ha kimosi. 30Hemese byobyoolo byebuuka natee ku batolo. Tumi mu ntaangu ya kutolo, me mbasi-tsuku ndeele kuri babo batolo ti: Tekeselee kuyisila lukengisi, lukaanga lwo mu biko na kuyoko; tumi lukutikisa looso mu matalaka."»
Nkuma ya lusaangi lwa muti wuri nkuumbu sinapi
(Mal 4.30-32; Luk 13.18-19)
31Yesu wabweese kubateele nkuma yikimi ti: «Kimfumu kya mayulu kyafwanikina na lusaangi lwa muti wuri nkuumbu sinapi, luri muutu kaholaana, kunini munsa nseke yaandi. 32Lwo lubvuriri buntele mu nsaangi dzodzinso; ngo habaanaa lumwaabuuka, lo lubvuriri kudzaangama mu binkoolo byobinso, lo weki muti, wuri banoni ba yulu bakwiisa na batuunga madzaansa kunsa bimpaala byaandi.»
Nkuma ya lufunusu
(Luk 13.20-21)
33Yesu wabweese kubateele nkuma yikimi ti: «Kimfumu kya mayulu, kyafwanikina na lufunusu, luri mukyeetu bu kaluhoriri, yitiri biteesu bitatu munsa fufu, natee kuditoomboko dyodinso.»
Bukuri nki Yesu kakwedzoonsolo mu mankuma
(Mal 4.33-34)
34Myominso mimyo, Yesu mu mankuma kaba dzoonsaana kuri mampuumbu. Na nde ka kaba badzoonsolaana kwahele kusalila mankuma ko. 35Mpisi heki maleele mubikiri, meende mu mana. Nde waleele ti:
«Me sa dzoonsolo mu mankuma;
me sa nyaabisa myasweeke kuholosono kunu nyirikulu [nsi].»
Yesu wasundula nkuma ya looso bo na lukengisi
36Yesu wasisa mampuumbu, wayende ku nzo. Bayiki baandi bakokosolo na bamuleele ti: «Sundukila beetu nkuma ya lukengisi lwa manseke.» 37Yesu wabvutula kuri bo ti: «Wunde wukwenyaka nsaangi dza looso ngo Mwaana muutu, 38nseke ngo nsi; nsaangi dzadzibwete ngo baala ba Kimfumu, lukengisi ngo baala ba Ngaa-bubi, 39mutaatu wukwenyaka nsaangi dza lukengisi, ngo dyabulu; ntolulu ngo nsukulu ntaangu, batori ngo bambasi. 40Hango, bunu bu bayisila lukengisi na kuluyoko [lwolunso] bunubwo se buba ku nsukulu ntaangu. 41Mwaana muutu sa kaheeke bambasi baandi, na sa bapalisa mu Kimfumu kyaandi, bobanso bakwebwiisa bambaasi mu masumu, na bakwesalila bubayi, 42Sa babalooso ku munyeenge mbaawu, kukwo kuba bidilu na nkweetulu miinu. 43Haho, basuunguma mbasi-tsuku baseme bunu ntaangu, mu Kimfumu kya Taayi dya bo. Wuri na makutu hemese kayuka!»
Busina bwasweeku na musaanga.
44«Kimfumu kya mayulu kyafwanikina, na busina bwasweeku munsa nseke, ngo muutu kamwiini, sweekiri. Mu ntoono kiminu ki kari na kyo, nde weensi yarikiri byobinso bikari na byo, na wiisiri kusuumba nseke yiyo.»
45«Kimfumu kya mayulu kyabweese kufwanikina na muutu ngaa-mumbungu wukwesaka misaanga myamibweete. 46Bu kadzuukiri musaanga mosi wantalu, weensi yarikiri byobinso bi kari na byo, na wiisiri kusuumba musaanga wunde.»
Nkuma ya siinga
47«Kimfumu kya mayulu kyabweese kufwanikina na siinga di batubiri mu mubu, ditolo bya bitsuumbu ngo bitsuumbu. 48Bu diluuriri, baditoombiri ku nkoto. Na baatu bu badzakiri, basooriri byabibwe basokiri mu mansakasa, byabibi baloosiri. 49Bunubwo se mbasi-tsuku buba ku nsukulu ntaangu. Bambasi sa biisa, sa bayisila bababi ha kakati dya basuuguma, 50sa batuba bababi ku munyeenge mbaawu. Kukwo mbasi-tsuku kuba bidilu na nkweetulu miinu.»
Bitotolo byamoono na byabikulu
51«Buri beenu lubakula momanso mamo?» Bo babvutula ti: «Heehe». 52Yesu waleele kuri bo ti: «Hango-nkuumbu, mpisi mutini mangisi weki muyiki wa Kimfumu kya mayulu, wafwanikini na muutu ngaa-nzo, wupalisa mu kisweekulu kyaandi, bitotolo byamoono na byabikulu.»
Yesu bamubele ku Nadzareti
(Mal 6.1-6; Luk 4.16-30)
53Yesu kamanaa kuta mankuma mamo, ha kayende.
54Bu katubuka ku nkoonsi ya nde-meene, nde wabayikisa mu nzo-nkutukunu ya bo-meene, mu kiteesu kiri bo bakimuka na baleele ti: «Kuri kabakiri madyeele ma, na bimaangu bi? 55Buri wu kari mwaana mutuungi manzo ko? Buri nguri yaandi kari Mariya ko, na bampaangi baandi, kari Yakobo, Yosefi, Simoni na Yuda ko? 56Na bibusi byaandi byobinso, buri bahele na beetu? Kuri, kabakiri momanso ma?» 57Bo babumina makya mu ntoono ya nde. Yesu waleele kuri bo ti: «Mubikiri, bahelaa kumukiinsa, bani ba ha bula bwaandi na bari mu kaanda dyaandi.» 58Yesu kasii yirika bimaangu byalaka kukwo ko, bukuri bo baba bahele na kanyi.
Currently Selected:
Mat 13: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.
