Maki 13

Jezu ɖɔ è nǎ gba sinsɛnxɔ ɔ́

(Matíe 24.1-2; Luki 21.5-6)

1Hwenu e Jezu ɖo sinsɛnxɔ ɔ́ mɛ tɔ́n sín wɛ ɔ́, ahwanvú tɔn lɛ́ɛ ɖokpó ɖɔ n'i ɖɔ: “Mɛ̌si, kpɔ́n awǐnnya ɖagbe ɖagbe élɔ́ lɛ́ɛ, bó kpɔ́n lě e xɔ ɔ́ sá vɔ gbɔn é.” 2Jezu ka yí gbe n'i ɖɔ: “A ma mɔ xɔ ɖaxó élɔ́ lɛ́ɛ a? Awǐnnya e è dó mɛ yě ná ɔ́, ɖě sɔ́ ná kpo ɖo ɖě jí ǎ; yě bǐ wɛ è nǎ flí gba.”

Jezu ɖɔ xó dó nǔ nyanya e ná wá jɛ lɛ́ɛ wú

(Matíe 24.3-14; Luki 21.7-19)

3Jezu ka wá yi jínjɔ́n olívutín só ɔ́ jí, ɖo sinsɛnxɔ ɔ́ nukɔn. Piyɛ́ɛ kpódó Jaki kpó, kpódó Jǎan kpó, kpódó Andlé kpán ká wá yi mɔ ɛ, ɖo vo, bó kanbyɔ́ ɛ ɖɔ: 4“Đɔ hwenu e nǔ énɛ́ lɛ́ɛ bǐ ná jɛ dó ɔ́ nú mǐ; ani wɛ ka ná ɖe hwenu e nǔ énɛ́ lɛ́ɛ bǐ ná jɛ dó ɔ́ xlɛ́ mǐ?”

5Jezu ka jɛ ɖiɖɔ nú yě jí ɖɔ: “Mi hɛn ayi mitɔn bónú mɛɖé ma wá flú mi ó. 6Đó mɛ gěgé ná sɔ́ nyǐkɔ ce bó ná wá xwetɔ́n bó ɖɔ: ‘Nyɛ wɛ nyí Klísu ɔ́,’ lobo ná flú mɛ gěgé. 7Hwenu e mi ná se ɖɔ è ɖo ahwan fun wɛ, bó ɖo ahwan xó ɖɔ wɛ ɔ́, ado ní má hu mi ó; nǔ wɛ nyí bó ɖó ná jɛ; lo ɔ́, é ka ko nyí ɖɔ gbɛ ɔ́ wɛ ko ɖo nǎ vɔ wɛ nɛ́ ǎ. 8Akɔta ɖě ná sí te dó ɖě jǐ, axɔ́súɖuto ɖě ná sí te dó ɖě jí, ayǐkúngban ná dán wǔ gbɔn fí tɛnmɛ tɛnmɛ, adɔ ná tɔ́n. Nǔ énɛ́ lɛ́ɛ wɛ ná nyí bǐbɛ́ wǔvɛ́mimɔ lɛ́ɛ tɔn.

9 “Amɔ̌, midɛɛ lɛ́ɛ ɔ́, mi hɛn ayi mitɔn, bó nɔ acéjí, ɖó yě ná wá dó tagba nú mi, bó ná nɔ́ kplá mi yi hwɛ nukɔn; yě ná nɔ́ xo mi ɖo kplɔ́ngbasá lɛ́ɛ, yě ná nɔ́ kplá mi yi axɔ́sú lɛ́ɛ kpódó tokpɔngán lɛ́ɛ kpó nukɔn, ɖó nyɛ wú, bónú mi ná nɔ́ ɖe kúnnu nú mì ɖo nukɔn yětɔn. 10Đó è ɖǒ ná jlá Wɛn Ɖagbe Mawu tɔn ɔ́ akɔta lɛ́ɛ bǐ hwɛ̌. 11Ényí è ka wá wlí mi xwe hwɛ nukɔn hǔn, mi ma ɖo tamɛ gba wɛ, bó ɖo nǔ e mi ná yi ɖɔ ɖo dɔ̌n, bó ná dó hwlɛ́n miɖée ɔ́ linkpɔ́n wɛ ó; nǔ e Mawu ná sɔ́ dó ayi mɛ nú mi hwenɛ́nu ɔ́ wɛ mi ná ɖɔ, ɖó mi wɛ ɖo xó ná ɖɔ wɛ ǎ, Yɛsinsɛn wɛ. 12Nɔví ná jó nɔví tɔn, bɔ è nǎ hu; tɔ́ ná jó vǐ tɔn bɔ è nǎ hu; vǐ lɛ́ɛ ná fɔ́n gǔ dó mɛjitɔ́ yětɔn lɛ́ɛ jí, bó ná zɔ́n ɖɔ è nǐ hu yě. 13 Mɛ bǐ ná gbɛ́ wǎn nú mi ɖó nyɛ wú; lo ɔ́, mɛ e ná dɛ ɖo ya énɛ́ lɛ́ɛ nu káká yi fó ɔ́, è nǎ hwlɛ́n ɛ gán.

Suɖunú

(Matíe 24.15-28; Luki 21.20-24)

14 “Hwenu e mi ná wá mɔ suɖunú baɖabaɖa ɔ́ ɖo tɛn e mɛ é ma ɖó ná nɔ ǎ ɔ́, (mɛ e xa nǔ énɛ́ ɔ́ ní mɔ nǔ jɛ wú); mɛ e ɖo Judée yíkúngban jí lɛ́ɛ ní hɔn yi sókan lɛ́ɛ mɛ. 15 Mɛ e ɖo xɔ ta ɔ́ ní ma jɛ te wá sɔ́ nǔɖé ɖo xɔ mɛ ó. 16Mɛ e ka ná ɖo gle mɛ ɔ́ ní má ɖɔ émí ná lɛ́ kɔ wá zé awu émítɔn ɖaxó ɔ́ ɖo xwé gbe ó. 17Azǎn nyanya wɛ azǎn énɛ́ lɛ́ɛ ná nyí nú nyɔ̌nu e ná ɖo xo, kpódó ée ná ɖó vǐ ɖo anɔ̌nu hwenɛ́nu lɛ́ɛ kpó. 18Mi sa vo nú Mawu, bónú nǔ énɛ́ lɛ́ɛ ní má jɛ ɖo avivɔ mɛ, ɖo jǐ hwenu ó. 19 Đó azǎn énɛ́ lɛ́ɛ mɛ ɔ́, adǎn e ná gbo gbɛtɔ́ lɛ́ɛ ɔ́ ná syɛ́n káká, bɔ è ko mɔ mɔ̌hunkɔtɔn kpɔ́n gbeɖé sín hwenu e Mawu ko ɖó gbɛ ɔ́ dó ɔ́ káká jɛ din é ǎ; è ka sɔ́ lɛ́ ɖo mɔ̌hunkɔtɔn ɖě ná mɔ wɛ gbeɖé ǎ. 20Ényí Aklúnɔ ma ko ɖe azǎn énɛ́ lɛ́ɛ kpo wɛ ǎ ɔ́, mɛ ɖěbǔ ná gán ǎ; lo ɔ́, é ɖe azǎn énɛ́ lɛ́ɛ kpo, ɖó mɛ e é cyán ɖó vo lɛ́ɛ wú.

21“Nú mɛɖé wá ɖɔ nú mi ɖɔ: ‘Kpɔ́n, Klísu ɖíe ɖo fí e,’ abǐ: ‘Kpɔ́n, énɛ́ ɖo dɔ̌n nɛ́’ hǔn, mi ma ɖi nǔ n'i ó. 22Đó mɛ e nɔ sɔ́ yěɖée dó ɖó Klísu ná lɛ́ɛ kpódó mɛ e nɔ sɔ́ yěɖée dó ɖó gbeyíɖɔ Mawu tɔn ná lɛ́ɛ kpó ná wá xwetɔ́n. Yě ná nɔ́ jlɛ́ nǔ, bó ná nɔ́ ɖe nǔdábaɖa lɛ́ɛ xlɛ́, bónú yě sixú kpé wú wɛ ɔ́, yě ná flú mɛ e Mawu cyán lɛ́ɛ. 23Midɛɛ lɛ́ɛ ɔ́, mi bo ɖó ayi te, nǔ lɛ́ɛ bǐ nɛ́ un ko ɖɔ nú mi nɛ́.

Gbɛtɔ́ví ɔ́ ná lɛ́ kɔ wá

(Matíe 24.29-31; Luki 21.25-28)

24 “Lo ɔ́, azǎn énɛ́ lɛ́ɛ gbe, ɖo yajiji énɛ́ gúdo ɔ́, hwesivɔ́ ná dó zǐnflú; bɔ sun sɔ́ ná ná wěziza tɔn ǎ, 25 bɔ sunví lɛ́ɛ ná jɛ ayǐ sín jǐnukúnsin, bɔ è nǎ húnhún acɛkpikpa e ɖo jǐnukúnsin lɛ́ɛ. 26 Énɛ́ ɔ́, è nǎ mɔ Gbɛtɔ́ví ɔ́ ɖo akpɔ́kpɔ́ jí jǎwe, kpódó hlɔ̌nhlɔ́n ɖaxó kpó, kpódó susu kpó. 27É ná sɛ́ wɛnsagun tɔn lɛ́ɛ dó, bɔ yě ná kplé mɛ e é cyán lɛ́ɛ gbɔn wɛ̌kɛ́zo ɛnɛ lɛ́ɛ mɛ, sín fí e ayǐkúngban ɔ́ kponu ɖó é, káká yi jɛ fí e jǐnukúnsin kponu ɖó é.

Jezu kplɔ́n nǔ mɛ dó fígitín wú

(Matíe 24.32-35; Luki 21.29-33)

28“Mi kpɔ́n nǔ dó fígitín wu: ényí ala tɔn lɛ́ɛ jɛ mǔ dó jí, bo jɛ ama zɔ́n jí ɔ́, mi nɔ tunwun ɖɔ xwejí ɔ́ wɛ ko ɖo nǎ wɔ̌ wɛ nɛ́. 29Mɔ̌ ɖokpó ɔ́, nú mi wá mɔ nǔ énɛ́ lɛ́ɛ ɖo jijɛ wɛ hǔn, mi nywɛ́ ɖɔ nyɛ Gbɛtɔ́ví ɔ́ kó sɛ yá bǐ, bó ɖo hɔn jí. 30Má ɖɔ nǔgbó nú mi: mi mɛ e ɖo gbɛ din lɛ́ɛ bǐ ná kó kú cóbónú nǔ énɛ́ lɛ́ɛ bǐ ná jɛ ǎ. 31Jǐnukúnsin kpódó ayǐkúngban kpó ná vɔ, amɔ̌, xó ce lɛ́ɛ ná vɔ gbeɖé ǎ.

Mawu ɖokpónɔ géé wɛ tunwun gbe e gbe gbɛ ɔ́ ná vɔ é

(Matíe 24.36-44)

32 “Mɛ ɖé tunwun azǎn ɔ́ ǎ; mɛɖé ka tunwun gan ɔ́ mɛ ǎ; wɛnsagun Mawu tɔn lɛ́ɛ tunwun ǎ; nyɛ Mawu ví ɔ́ ɖésú tunwun ǎ; Tɔ́ ɔ́ ɖokpónɔ géé wɛ tunwun. 33Mi cɔ́ miɖée, bó ɖo acéjí, ɖó mi tunwun hwe ɔ́ nu ǎ. 34 È hɛn ɔ́, è nǎ jlɛ́ dó dǎwe e xwe tomɛ, bó sɔ́ xwé tɔn dó alɔ mɛ nú mɛsɛntɔ́ tɔn lɛ́ɛ ɔ́ wú; é má azɔ̌ yětɔn yětɔn nú yě, bo ka zɔ́n hɔnjínɔtɔ́ ɔ́ ɖɔ é ní nɔ wunzɛn. 35Hǔn, mi bo nɔ acéjí, ɖó mi tunwun hwenu e xwétɔ́ ɔ́ na lɛ́ kɔ wá dó ɔ́ ǎ; é sixú nyí gbadanu, é sixú nyí zǎnxwete, é sixú nyí kokló kɔ́ así, abǐ zǎnzǎn tɛɛn. 36Mi ma lɔn nú é wá fyán mi, bó mɔ mi ɖo amlɔ mɛ ó. 37Nǔ e ɖɔ nú mi wɛ un ɖe ɔ́, mɛ bǐ ɖɔ ná wɛ un ɖe; mi bo nɔ acéjí.”

Currently Selected:

Maki 13: Fon13

Highlight

Copy