Mututo 12

Paseka

1 # Malivi 23.5; Lipa 9.1-5; 28.16; Mul 6.1-2 Muñ'a Bupilo a bulelela Mushe ni Aruni mwa naha ya Egepita, a li, 2“Kweli ye ki yona kweli ye ka ba ya pili ya silimo ku mina. 3Mu zibise sicaba kaufela sa Isilaele, mu li, ‘Yona kweli ye ha i ka eza mazazi a lishumi, mutu ni mutu a ketele lubasi lwa hae ngunyana kamba pulinyana. Ku ketwe i liñwi mwa ndu ni ndu. 4Haiba lubasi ki lo lunyinyani, mi ha lu koni ku celela folofolo yeo, batu ba kona ku ikopanela ni ba ba bapani ni bona. Mu swanezi ku lela ka palo ya batu ba ba ka ca folofolo yeo ka mw'a konela mutu ku ca. 5I swanezi ku ba folofolo ye sa cuñuti, kamba ye si ka holofala. Hape, i be ye tunanyana ya silimo si li siñwi. Mu ka na mwa keta ngu kamba puli. 6Mu i beye kwatuko cwalo ku fitela kweli ha i eza mazazi a lishumi ka a mane, sicaba sa Maisilaele kamukana ha si ta bulaya lifolofolo manzibwana ka swalala. 7Kiha ba ta nga mali a mañwi, ba a toze fa likota ze kwa munyako ni fahalimw'a ona munyako wa mandu mo li ka celwa lifolofolo zeo. 8Bona busihu bo, nama i ta beswa fa mulilo, mi i shomekiswe ka linkwa ze si ka beiwa mumela, ni miloho ye baba. 9Mu si ke mwa i ca butala kamba ku i apeha, kono i beswe kaufel'a yona ni toho, mahutu ni za mwa mba cwalo. 10Mu si ke mwa buluka nama ye ñwi ku fitela kakusasa, mi haiba i palile kaufela, i swanezi ku ciswa ka mulilo. 11Mu ka i ca ka mukwa wo. Mu ka tama liapalo za mina mwa teka, ni makatulo kwa mahutu, mu nze mu sweli milamu mwa mazoho, mi mu i ce ka ku akufa. Ki Mukiti wa Paseka ya Muñ'a Bupilo.

12“‘Ka bona busihu bo, ni ta zamaya mwa naha ya Egepita, ni bulaye baeli ba batu ni maizibulo a lifolofolo mwa naha kaufela. Ni ta utwisa milimu ya Egepita kamukana butuku. Ki na Muñ'a Bupilo. 13Mali a ta ba poniso fa mandu mo mu pila. Ha ni ta bona mali, ni ta mi fitelela, mi sinyehelo ha i na ku t'o fita ku mina ha ni nata Egepita. 14#Mut 23.15; 34.18; Malivi 23.6-8; Lipa 28.17-25; Mul 16.3-8 Le, i ta ba lizazi la kupuzo ku mina. Mu swanezi ku ezeza Muñ'a Bupilo mukiti ka lona. I be mukiti o ta eziwa ki masika a mina kuya kuile.’

15“Mu si ke mwa ca lico ze umezwi mwa mazazi a supile. Ka lizazi la pili, mu zwise mumela kaufela mwa mandu a mina, kakuli haiba yo muñwi wa mina a ca lico ze umezwi, ku kala ka lizazi la pili mane ku y'o fita ku la busupa, u ta kauhanywa kwa Maisilaele. 16Ka lizazi la pili, mi hape ka la busupa, mu kopanele ku sebeleza Muñ'a Bupilo. Mu si ke mwa sebeza ku ona mazazi ao, konji feela ku lukiseza yo muñwi ni yo muñwi lico. 17Mu buluke mukiti wo wa lico ze si na mumela, kakuli ki ka lona lizazi leo, le ni zwisize limpi za mina mwa naha ya Egepita. Masika a mina kamukana a buluke lizazi leo la mukiti kuya kuile. 18Mu swanezi ku ca lico ze si ka umelwa ku kala manzibwana kweli ha i eza mazazi a lishumi ka a mane, mane ku y'o fita manzibwana kweli ha i eza mazazi a mashumi a mabeli ka li li liñwi. 19Ku si ke kwa fumaneha mumela mwa mandu a mina ku ona mazazi ao a supile, kakuli yo muñwi wa mina h'a ka ca lico ze umezwi u ta kauhanywa kwa sicaba sa Maisilaele, niha i ka ba muzwahule kamba wahabo mina. 20Mu si ke mwa ca lico ze na ni mumela. Mu ce feela lico ze si ka umelwa mwa mandu a mina kamukana.

21Mushe a biza bahulu ba Isilaele kaufela, mi a li ku bona, “Mu y'o ketela mabasi a mina ngunyana kamba pulinyana, mi mu i bulaele Paseka. 22Mu nge katainyana ka sicacani sa hisopa, mu ka cupwe mwa mali a mwa mukeke, mi mu sase likota ze kwa muyako ni fa libala le li fahalimw'a sikwalo. Ku si ke kwa ba ni ya ka zwela kwande busihu, konji kakusasa. 23#Maheb 11.28 Muñ'a Bupilo h'a ka zamaya mwa naha ku bulaya Maegepita, u ta bona mali a fa libala la sikwalo ni a fa likota za kwa munyako, mi h'a na ku tuhela mubulai a kena mwa mandu a mina ku t'o mi bulaya. 24Mu buluke milao yeo. Ki taelo ku mina ni kwa bana ba mina kuya kuile. 25Mi ha mu ta y'o fita mwa naha y'a ka mi fa Muñ'a Bupilo, sina mw'a sepiselize, mu buluke sebelezo yeo. 26Bana ba mina ha ba ka mi buza, ba li, ‘Kanti sebelezo ye i talusañi?’ 27Mu ba alabe, mu li, “Ki sitabelo sa Paseka se si ezezwa Muñ'a Bupilo, kakuli u fitelezi mandu a Maisilaele, ba ba ne ba li mwa Egepita, h'a bulaya Maegepita kono a siya mandu a luna.”

“Batu kiha ba kubama, mi ba lapela. 28Maisilaele ba ya, mi ba eza sina mo ne be laelezwi bo Mushe ni Aruni ki Muñ'a Bupilo.

Lifu la baeli

29 # Mut 4.22-31 Malungasiku, Muñ'a Bupilo a bulaya baeli ba bashimani kaufela mwa Egepita, ku kala ka mweli wa Faro, yena ya n'a ta ba shwana, ku y'o fita ku mweli wa mupantiti ya mwa tolongo. Ni lifolofolo za maizibulo kaufela za bulaiwa. 30Faro, manduna ba hae kaufela, ni Maegepita kamukana ba zuha bona busihu bo, mi kwa ba ni sililo se situna mwa Egepita, kakuli ne ku si na ndu mo ne ku si ka shwa mwana. 31I sa li ka bona busihu bo, Faro a biza Mushe ni Aruni, a li, “Mina ni Maisilaele, mu eze kapili, mu zwe, mu siye batu ba ka. Mu zamaye mi mu y'o lapela Muñ'a Bupilo sina mo mu kupezi. 32Mu nge lingu, lipuli ni likomu za mina, sina mo mu kupezi, mu funduke. Mu y'o ni kupela limbuyoti ni na cwalo.”

33Maegepita ba hapeleza batu ku akufa ni ku zwa mwa naha, ba li, “Lu ta shwelela kamukan'a luna haiba mu sa funduki kapili.” 34Cwale batu ba nga sitipwi-tipwi sa bona se si butala, se si si ka ya mumela, ba si lwala fa maheta a bona, si beilwe mwa mikeke ye tamezwi mwa masila. 35#Mut 3.21-22 Maisilaele ba eza mw'a n'a ba bulelezi Mushe, mi ba kupa lika za silivela, gauda ni liapalo kwa Maegepita. 36Muñ'a Bupilo n'a ezize cwalo kuli Maegepita ba kuteke Maisilaele, mi ba ba fa ze ne ba kupa kaufela. Batu bao ba putelela cwalo Maegepita bufumu.

Maisilaele ba zwa mwa Egepita

37Maisilaele ba zwa mwa Ramisese ku ya kwa Sukoti. Banna ba ba ne ba zamaya ka mahutu ne ba eza likiti ze mianda ye silezi ku sa balwi basali ni banana. 38Batu ba bañwi ba bañata, hamoho ni lingu ze ñata, lipuli ni likomu, ba zamaya ni bona. 39Ba besa mañende a si na mumela a sitipwi-tipwi sa lico ze ne ba lwezi ha ba zwa mwa Egepita. Ne li si ka umelwa, kakuli ne ba lelekilwe ka sipundumukela mwa Egepita. Ne ba si ka fumana nako ya ku itukiseza mifaho.

40 # Sim 15.13; Magal 3.17 Maisilaele ba pilile mwa Egepita lilimo ze mianda ye mine ka mashumi a malalu. 41Ka lona lizazi le li feleleza silimo sa mianda ye mine ka mashumi a malalu, sicaba kaufela sa Muñ'a Bupilo sa zwa mwa Egepita. 42Busihu bo, bu swanezi ku bulukelwa Muñ'a Bupilo kakuli u zwisize sicaba sa hae mwa naha ya Egepita. Ki busihu bo bu swanezi ku bulukelwa Muñ'a Bupilo ki masika kaufela a Isilaele kuya kuile!

Milao ya Mukiti wa Paseka

43Muñ'a Bupilo a li ku Mushe ni Aruni, “Ki ye milao ya Paseka. Ha i na ku ciwa ki bazwahule. 44Kono mutanga kaufela ya lekilwe a ka na a i ca, ha mu se mu mu isize kwa mupato. 45Mutu ya til'o ina nakonyana ni mina, kamba ya tezi feela peleko a si ke a i ca. 46#Lipa 9.12; Joa 19.36 I swanezi ku celwa mwa ndu i liñwi. Mu si ke mwa zwiseza nama kwande, mi mu si ke mwa lobaka ni masapo a folofolo. 47Sicaba kamukana sa Isilaele si swanezi ku ezanga mukiti wo. 48Haiba mu inzi ni muzwahule, mi u bata ku ezeza Muñ'a Bupilo mukiti, pili mu swanezi ku isa batu ba hae ba bashimani kwa mupato, mi fohe u ta kopana ni mina mwa mukiti. A ngiwe inge mutu ya pepezwi mwa Isilaele. Kono munna kaufela ya si ka ya kwa mupato a si ke a eza mukiti. 49Ona mulao wo, u sebeza ni kwa batu ba ba pepezwi mwa Isilaele ni bazwahule ba ba til'o yaha ni mina.” 50Maisilaele kamukana ba utwa, mi ba eza ka mw'a n'a laelezi Muñ'a Bupilo ka Mushe ni Aruni. 51Ka lona lizazi leo Muñ'a Bupilo a zwisa sicaba sa Isilaele kaufela mwa Egepita ka makolo a sona.

Currently Selected:

Mututo 12: Lozi09

Highlight

Copy

Compare