Mututo 18

Jetero u potela Mushe

1Jetero muprisita wa Midiani, ya n'a li mukwenyan'a Mushe, a utwa seo Mulimu n'a si ezelize Mushe ni sicaba sa hae sa Isilaele, ni mw'a n'a ba zwiselize Muñ'a Bupilo mwa Egepita. 2#Mut 2.21-22 Cwale a tisa musal'a Mushe, yena Zipora, ya n'a kutiselizwe kwa hae. 3#Lik 7.29 Jetero a tisa cwalo ni bana ba hae ba babeli, bo Gerishomi ni Eliezere. Mushe n'a ize, “Ni kile na ba muzwahule mwa naha i sili.” Kih'a beya mwan'a hae yo muñwi libizo la Gerishomi. 4Mi hape n'a ize, “Mulimu wa bo ndate u kile a ba mutusi wa ka, mi a ni pilisa kwa sabule ya Faro.” Kih'a beya yo muñwi libizo la Eliezere. 5Jetero a taha ni musali ni bana ba Mushe mwa naheñi, mw'a n'a tibelezi Mushe, kwa Lilundu la Mulimu. 6N'a s'a zibisize Mushe, a li, “Na, Jetero, mukwenyan'a hao, na taha ni musal'a hao ni bana ba hae ba babeli.” 7Mushe a y'o mu katanyeza, a inama fapil'a hae, mi a mu tubeta. Ba buzana ka mw'a zuhela yo muñwi ni yo muñwi, kiha ba kena mwa tende. 8Mushe a mu taluseza lika kaufela z'a n'a ezize Muñ'a Bupilo ku Faro ni kwa Maegepita ku tusa Maisilaele. A mu bulelela ka butata bo ne ba fumani mwa nzila, ni mw'a n'a ba piliselize Muñ'a Bupilo. 9Jetero n'a tabile hahulu kabakala bunde bw'a n'a ezize Muñ'a Bupilo ka ku ba pilisa kwa Maegepita. 10A li, “Ku lumbwe Muñ'a Bupilo, ya mi pilisize kwa Maegepita ni ku Faro. Ku lumbwe Muñ'a Bupilo ya pilisize sicaba sa hae kwa butanga bwa Maegepita. 11Cwale na ziba hande kuli Muñ'a Bupilo ki yo mutuna kwa milimu kaufela, kakuli u ezize cwalo kanti Maegepita bona ne ba nyandisa Maisilaele ka sitoyo feela.” 12Jetero kih'a tiseza Mulimu limpo ni sitabelo sa ku cisa. Aruni ni bahulu ba Isilaele kamukana ba taha ni mukwenyan'a Mushe ku t'o cela lico fapil'a Mulimu.

Ku ketiwa baatuli

(Mul 1.9-18)

13Habusa, Mushe a inela ku atula batu, mi fapil'a hae kwa ba ni batu ku zwa kakusasa mane ku y'o fita busihu. 14Jetero, mukwenyan'a Mushe, ha s'a boni ze ne swanezi ku eziwa ki Mushe kaufela, a buza, a li, “Zeo kaufela z'o ezeza batu ki lika mañi? Kiñi s'o inezi u nosi fa, u nz'o yemelezwi ki batu kamukana ku zwa kakusasa mane li y'o likela?”

15Mushe a alaba, a li, “Ni swanezi ku eza cwalo kakuli batu ba nze ba taha ku t'o ni buza ze batiwa ki Mulimu. 16Batu ba babeli ha ba kananisana, ba taha ku na, ni batisisa ya foselizwe, mi ni ba bulelela litaelo ni milao ya Mulimu.”

17Jetero kih'a mu bulelela, a li, “Ha u ezi hande. 18U ta ikatalisa wena ni b'o inzi ni bona. U ikimelisa musebezi. Ha u koni ku u eza u li nosi. 19Cwale, u ni teeleze, ni ku fe kelezo ye nde, mi Mulimu u ka ku tusa. I ne ka ba hande ha u ka yemela batu ku Mulimu, ni ku fitisa lipilaelo za bona ku yena. 20Wena u swanezi ku ba luta litaelo ni milao, ni ku ba taluseza mo ba swanela ku pilela ni ze ba lukela ku eza. 21Kono u kete batu ba ba butali, mi u ba eze bahulu ba sicaba, ili bazamaisi ba batu ba likiti, ba mianda, ba mashumi a ketalizoho ni ba lishumi cwalo. Ba swanezi ku ba batu ba ba saba Mulimu, ba ba sepahala, ba ba si na ketululo ni ba ba sa lekiwi. 22Ba be baatuli ba batu nako kaufela. Ba tisanga feela litaba ze tata ku wena, kono haili bona, ba ta fezanga litaba ze nyinyani. Ku ta ku nolofalela, ha ba ka ikabela mulwalo ni wena. 23Haiba u ka eza cwalo, ka mw'a laelela Mulimu, ha u na ku imelwa hahulu, mi batu ba, ba ka kona ku kutela kwa mandu a bona, litaba za bona ha li se li felile.”

24Mushe a utwa kelezo ya Jetero, mi a eza mw'a n'a mu bulelezi. 25Kiha s'a keta batu ba ba butali mwahal'a Maisilaele, mi a ba eza bahulu ba sicaba, bahulu ba likiti, mianda, mashumi a ketalizoho ni mashumi a batu. 26Ba ba baatuli ba batu nako kaufela. Ba tisa feela litaba ze tata ku Mushe, bona ba nze ba felelezanga ze bunolo, ze nyinyani.

27Mushe a laezana ni yena, mi Jetero a kutela kwa naha ya habo.

Currently Selected:

Mututo 18: Lozi09

Highlight

Copy

Compare