Mututo 4

Mushe u fiwa maata a ku eza limakazo

1Mushe a alaba, a li, “Kono haiba Maisilaele ba sa kolwi, mi ba sa lumeli ze ni ba bulelela, mi ba li, ‘Muñ'a Bupilo h'a si ka iponahaza ku wena,’ fo ni ka eza cwañi?”

2Muñ'a Bupilo a mu buza, a li, “U sweliñi mwa lizoho?”

Yena a li, “Ni sweli mulamu.”

3Muñ'a Bupilo a li, “U latele fafasi.” Mushe ha s'a u latezi fafasi, mulamu wa fetuha noha, mi a i saba. 4Cwale Muñ'a Bupilo a li ku Mushe, “Inama, u i swale kwa muhata.” Mushe a inama, a i swala, mi hape ya fetuha mulamu mwa lizoho la hae. 5Muñ'a Bupilo a li, “U ke u eze cwalo, kuli ba lumele kuli Muñ'a Bupilo, Mulimu wa bo kukw'a bona, yena Mulimu wa Abrahama, Mulimu wa Isaka ni Mulimu wa Jakobo, u iponahalize ku wena.”

6Muñ'a Bupilo a bulelela Mushe hape, a li, “Beya lizoho fa sifuba sa hao.” A eza cwalo, mi h'a y'o li zwisa fateñi, ne li tezi mibala-bala ye misweu sina muzilili ili mbingwa kaufela. 7Muñ'a Bupilo a li, “Kutiseza lizoho la hao fa sifuba hape.” A eza cwalo, mi h'a li zwisa fateñi, ne li iketile hande, li folile, li swana ni mubili wa hae kaufela. 8Muñ'a Bupilo a li, “Haiba ba sa lumeli kamba ku kolwiswa ki poniso ya pili, ba ta lumela kabakala poniso ya bubeli. 9Mi haiba ba sa lumeli ka liponiso zeo ze peli, mi ba sa kolwi z'o bulela, u y'o ka mezi kwa nuka, mi u a sulelele fafasi. Mezi ao a ta fetuha mali.”

10Mushe a li ku Muñ'a Bupilo, “Ni swalele Mulen'a ka. Ha ni sikwala se si kona ku bulela mwa nyangela, mi ha ni si ka ba cwalo ha u sa li u kalela ku bulela ni na, Muñ'a ka. Ni lisafa kwa ku bulela, mane ni bulela ka moombela.”

11Muñ'a Bupilo a li ku yena, “Ki mañi ya ezize mulomo wa mutu? Ya mu ezize susu kamba simumu? Ya mu bonisa kamba ya mu eza sibofu? Ki na, na, Muñ'a Bupilo. 12Cwalehe, zamaya. Ni ta ku tusa kwa bu bulela, mi ni ta ku zibisa z'o ta bulela.”

13Kono Mushe a li, “U ni swalele Mulena. Shangwe, ni kupa kuli u lume u sili y'o ta keta.”

14Muñ'a Bupilo a nyemela Mushe, mi a li, “Muhulwan'a hao bo, Aruni wa Mulivi? Ni ziba kuli u kona ku bulela hande hahulu. Mane u s'a li mwa nzila ku t'o ku katanyeza. U ka taba hahulu h'a ta ku bona. 15U bulele ni yena, u mu taluseze z'a swanezi ku bulela. Ni ta mi tusa sibeli sa mina kwa ku bulela, ni mi lemuse ze mu ta eza. 16I ka ba yena ya ta bulela ni batu, i be yena mutoloki wa hao. Mi wena, u ta eza sina Mulimu, u nz'o mu taluseza z'a ta bulela. 17U nge mulamu wo kakuli u ta eza limakazo ka ona.”

Mushe u kutela kwa Egepita

18Mushe a kutela ku Jetero, mukwenyan'a hae, mi a li ku yena. “U ni lumelele ku kutela kwa banabahesu kwa Egepita, ni y'o bona kamba ba sa pila.” Jetero a mu laeza.

19Muñ'a Bupilo a li ku Mushe, h'a li mwa Midiani, “Kutela kwa Egepita cwale, kakuli ba ba ne ba bata ku ku bulaya kaufela ba shwile.” 20Mushe kiha s'a nga musal'a hae ni bana, a ba pahamisa fa mbongolo, mi a kutela kwa Egepita. A lwala ni ona mulamu w'a n'a filwe ki Mulimu.

21Muñ'a Bupilo a li ku Mushe, “Ha u s'o kutela kwa Egepita cwana, u be ni niti ya ku y'o ezeza fapil'a Faro limakazo kamukana ze ni ku file maata a ku eza. Ni ta mu eza mahañi, mi h'a na ku lumelela batu kuli ba zamaye. 22Cwale u y'o li ku Faro, ‘S'a bulela Muñ'a Bupilo ki se. Isilaele ki mwan'a ka wa mweli. 23#Mut 12.29 Ni ku bulelezi kuli u lumelele mwan'a ka, a zamaye a y'o ni lapela, kono u hanile. Cwalehe, ni ta bulaya mwan'a hao wa mweli.’ ”

24Ha ba li mwa nzila, mwa mafulo, Muñ'a Bupilo a katana Mushe, mi a bata ku mu bulaya. 25Zipora a nga licwe le li buhali, mi a isa mwan'a hae kwa mupato ka lona. Kih'a nga litalo, mi a li nepela mwa mahutu a Mushe, a li, “Wena cwale u s'o li munn'a ka, ka mali.” 26Muñ'a Bupilo kih'a sa pilisa Mushe. Kihona fo Zipora ha n'a ize, “Munn'a ka, ka mali” kabakala mupato.

27Muñ'a Bupilo a li ku Aruni, “Zamaya mwa naheñi, u y'o katanyeza Mushe.” Kih'a y'o mu katanyeza kwa Lilundu la Mulimu, mi h'a t'o kopana ni yena, a mu tubeta. 28Mushe a taluseza Aruni z'a n'a bulelezwi kaufela ki Muñ'a Bupilo, h'a mu luma, ni limakazo kamukana z'a n'a laezwi ku eza. 29Mushe ni Aruni ba y'o kopanya bahulu ba Isilaele kaufela hamoho. 30Aruni a ba taluseza litaba kamukana z'a n'a bulelezwi Mushe ki Muñ'a Bupilo, mi a eza limakazo kaufela fapil'a batu. 31Ba kolwa, mi ha ba utwa kuli Muñ'a Bupilo u tile ku bona, ni kuli u boni mo ba nyandisezwa, ba kubama mi ba lapela.

Currently Selected:

Mututo 4: Lozi09

Highlight

Compare

Copy