Simuluho 13

Abrame ni Lota ba kauhana

1Abrame h'a zwa mwa Egepita a liba kwa mutulo, kwa sibaka sa Negebe, ni musal'a hae ni ze ba na ni zona kaufela. Lota a ya ni yena. 2Abrame n'e li mutu ya n'a fumile hahulu lingu, lipuli ni likomu, hamohocwalo ni silivela ni gauda. 3A tuta-tuta cwalo mwa mafulo. A zwa kwa Negebe ku sutelela kwa Betele, mwa mafulo a hae a pili, mwahal'a Betele ni Ai. 4Kih'a ya mwa sibaka kw'a n'a yahile katala, mi koo a y'o lapela Muñ'a Bupilo.

5Lota, ya n'a zamaya ni Abrame, ni yena n'a na ni lingu, lipuli ni likomu, hamohocwalo ni batu b'a n'a zamaya ni bona. 6Ne ku si na mafulisezo hande ko ne ba ka fuliseza hamoho likomu za bona. Bubeli bwa bona ne ba na ni limunanu ze ñata hahulu. 7Cwale kwa ba ni lindwa mwahal'a balisana ba Abrame ni balisana ba Lota. Ka yona nako yeo, Makanana ni Maperizi ne ba sa yahile mwa naha moo.

8Cwale Abrame kih'a li ku Lota, “Luna, lu mba i liñwi. Ha ku lukeli kuli lifapahano li n'o banga teñi mwahal'a balisana ba hao ni ba ka. 9A lu kauhane. Mwanesu, u iketelele sibaka s'o lata kaufela mwa naha mo. U ni siye. Ha u ya ka fa, na, ni ka ya kwale.”

10 # Sim 2.10 Lota cwale a talima kafa ni kafa, mi a bona kuli libala la Nuka ya Jordani, mane ku y'o fita kwa Zoari, sibaka seo kamukana ne si na ni mezi a mañata, sina simu ya Muñ'a Bupilo, kamba sina naha ya Egepita. Foo, Muñ'a Bupilo n'a si ka sinya kale minzi ya Sodoma ni Gomora. 11Lota kiha s'a iketela libala kaufela la Nuka ya Jordani, mi a tutela kwa neku la kwa upa. Batu ba babeli bao ba kauhana cwalo. 12Abrame a siyala mwa naha ya Kanana, mi Lota a y'o ina mwahal'a minzi ye mwa libala, a yaha mafulo kwatuko a Sodoma. 13A ina mwahal'a batu ba ba maswe, ba ba ne ba foseza Muñ'a Bupilo ka sibi sa bona.

Abrame u tutela kwa Heberoni

14Lota ha s'a ile, Muñ'a Bupilo a li ku Abrame, “Ku zwa hona f'o yemi foo, u talime ka tokomelo mwa maneku kaufela. 15#Lik 7.5 Ni ta ku fa, wena ni baikulu ba hao, naha y'o bona yeo kaufela, mi i ta ba ya hao kuya kuile. 16Ni ka ku fa baikulu ba bañata. I ta ba buñata bo bu si ke bwa kona ku baliwa ki mutu konji ya kona ku bala liluli la lifasi. 17Cwale u itukise, mi u potolohe naha yeo kaufela, kakuli ni ta ku fa yona kamukana.” 18Abrame kiha s'a tuta foo, mi a y'o yaha fakaufi ni likota za Mamare kwa Heberoni, mi koo a y'o yahela Muñ'a Bupilo katala.

Currently Selected:

Simuluho 13: Lozi09

Highlight

Copy