Simuluho 8
8
Mafelelezo a muunda
1Kono Mulimu a hupula Nuwe ni lifolofolo kaufela ni limunanu z'a n'a inzi ni zona mwa sisepe. Kih'a fukisa moya fafasi, mi mezi a kala ku wa. 2Mawelu-welu a mwa buliba bwa mawate ni masuba a kwahalimu a kwaleha. Pula ya yema kwahalimu. 3Mi mezi a zwelapili ku kala. A kalelela mwamulaho a mazazi a mwanda ka a mashumi a ketalizoho. 4Ka la bulishumi ka a supile mwa kweli ya busupa, sisepe sa t'o fuama fa Lilundu la Ararati. 5Mezi h'a nz'a kala, cwale ka lizazi la pili la kweli ya bulishumi, lingo za malundu za kala ku bonahala.
6Hamulaho a mazazi a mashumi a mane, Nuwe a kwalula lihaulo. 7A zwisa liñwalala. La zwa mi la fufa-fufa li nze li potoloha ku fitela lifasi li oma. 8Cwale Nuwe a zwisa liiba kuli a bone kamba mezi s'a kalile. 9Kono kakuli mezi n'a si ka kalelela, liiba ha li si ka fumana hande malulelo. Cwale Nuwe a li swala, mi a li kutiseza mwa sisepe. 10A litela sunda mutumbi, kih'a li zwisa hape mwa sisepe. 11La y'o kuta manzibwana, mi Nuwe a fumana kuli li na ni litali le linca la kota ya olive mwa mulomo wa lona. Cwale a ziba kuli mezi n'a s'a kala. 12Nuwe a ina sunda hape, mi a zwisa liiba. Cwale foo la yelela.
13Ka lizazi la pili la kweli ya pili, Nuwe ha s'a na ni lilimo ze mianda ye silezi ka si li siñwi, naha ne i se i omile. Ha s'a zwisize situwa fa sisepe, Nuwe a talima kwande, mi a bona kuli lifasi li omile. 14La bumashumi a mabeli ni a supile, kweli ya bubeli, naha i ne i se i omile luli.
15Mulimu a li ku Nuwe: 16“U zwe mwa sisepe, wena ni musal'a hao, hamohocwalo ni bana ba hao ni basali ba bona. 17U kwalulele lifolofolo z'o na ni zona, linyunywani, limunanu ni libupiwa ze zamaya ka mba kamukana kuli li kone ku y'o zwala mi li tale lifasi kaufela.” 18Cwale Nuwe a zwa mwa sisepe ni musal'a hae, ni bana ba hae, ni basali ba bona. 19Lifolofolo kaufela, limunanu, linyunywani ni libupiwa ze zamaya ka mba kamukana, ni zona za zwa mwa sisepe ka mishobo ya zona.
Nuwe u fitisa mpo
20Nuwe a yahela Muñ'a Bupilo katala. A nga i liñwi kwa lifolofolo ze kenile za mifuta-futa, ni kwa linyunywani, mi a li fitisa ku Mulimu ili mpo ye ciselizwe fa katala. 21Muñ'a Bupilo ha s'a utwile muunko o munde, kih'a ipulelela, a li, “Ha ni sa tola ni kuta lifasi hape kabakala likezo za mutu. Ni ziba kuli ku zwa nako y'a s'a li mwanana mihupulo ya hae i maswe. Ha ni sa tola ni sinya ze pila kaufela, sina mo ni ezelize ka nako ye.
22“Lifasi ha li sa nze li li teñi,
ku ta ba ni nako ya ku cala ni nako
ya ku kutula,
nako ya ku bata ni nako ya ku
futumala,
nako ya mbumbi ni nako ya litabula,
busihu ni musihali.
Ze, ha li na ku fela.”
Currently Selected:
Simuluho 8: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
