Tsutɨarika 14
14
'Apɨrami Ruti hetsie kemɨtiutanua
1Hikɨ 'ana tukaritsie te'aitamete: 'Amɨxaperi Tsinaxi kiekame, 'Ariuki 'Eratsaxi kiekame, Keruxirahumexi 'Erami kiekame, Tirari Kuyetihimi kiekame, 2mɨkɨ mekaniwarutakwini te'aitamete: Wera Tsuruma kiekame, Wiritsa Kumuxa kiekame, Tsinawi 'Arimaha kiekame, Tsemewexi Tsewuhini kiekame, meta ti'aitame Tsuhaxi kiekame. 3Mɨkɨ meyu'auxɨwitɨ me'uyutinɨka mepɨwarukuxeɨri yukuyaxima mayeweritsie Tsirini mɨrayetewatsie, metatsiere Haramara Mɨmɨki mɨtimatiwatsie. 4Ti'aitame Keruxirahumexi tamamata heimana huta wiyari katiniwa'aitɨakaitɨni, tamamata heimana haika wiyaritsieke mewaraye'unietɨ mekanakɨne.
5Xeiwiyari 'anuyeyaku, Keruxirahumexi meta hipatɨ te'aitamete memitinɨkai mekanayekɨne, mekaniwaruka'una xepahitsixi 'Atsitaruti-Karinahini kwieyaritsie meta mekaniwaruka'una tsutsitsixi Kami kwieyaritsie meta 'emitsixi Tsawe-Kiriyatahini kwieyaritsie, 6yaxeikɨata hureutsixi Tsehixi hɨriyaritsie kiekatari, 'atsitapaitɨ Parani mekaniye'axɨani makumawe meuhuratsie. 7Me'akunuaxɨaka 'Enimitsipati paitɨ mekaniye'axɨani, tatsɨari Karetsi mɨtiyetewatsie, 'amarekitsixi wakwie naime mepɨwarunawairi, 'amuxeutsixi wakwietsie mekaniye'axɨani Katsetsuni-Tamaxi kwieyari mekaniwarunawairieni.
8Hikɨ Tsuruma te'aitamete, Kumuxa kiekame, 'Arimaha kiekame, Tsewuhini kiekame, meta Wera kiekame, tatsɨari Tsuhaxi manuyɨne, mekanayekɨne mayeweritsie Tsirini mɨtiuyetewatsie muwa mekaniwarutakwini, 9te'aitamete, Keruxirahumexi 'Erami kiekame, Tirari Kuyehini kiekame, 'Amɨxaperi Tsinaxi kiekame, meta 'Ariuki 'Eratsaxi kiekame. Mekaniyunaukakaitɨni yu'auxɨwime mewaraye'unietɨ. 10Mayeweritsie Tsirini putsu puxuawekai waɨkawa kwetsɨka mɨyɨwi 'uyemanetɨ, kepauka memeuyuta'unaxɨa te'aitamete Tsuruma kiekame meta Kumuxa kiekame, muwa mekaneukaxɨrieni, hipatɨ xeikɨa mekaniuyɨwekaxɨani mekaniuyuta'una hɨritsie paitɨ. 11Mɨkɨ memɨte'ayu'iwaxɨ, Tsuruma meta Kumuxa timieme mekateniunawani naime tewaxi, meta wa'ikwaite, mɨpaɨ mete'uyurieka mekanekɨne. 12Ruti mana mukateikɨ Tsuruma kiekariyaritsie 'Apɨrami matsuya, mɨkɨta mekanehana meta yunaime tewamama.
13Perutsɨ xewitɨ 'uyuta'unaka, 'Apɨrami hepɨrayu tewiyari katinekuxatɨani kemɨtiuyɨ, Mamɨre 'amuxeu tewiyari xiuya makuma mukateikɨ. Mamɨre pɨ'iwayatɨkai 'Etsikuri meta 'Anexi, mɨkɨ 'Apɨrami matɨa mekaniyu'eniekaitɨni. 14Hikɨ kepauka 'Apɨrami 'amɨtiutaxatɨarie kename matsuya hehanie, kaniwaruta'inieni haika tsienituyari heimana tamamata heimana 'atahaika teɨteri me'u'ixiparame kiena memutinunuiwaxɨ xeikɨa, hikɨ mekaniwaranukuweiya Rani kwieyaritsie paitɨ. 15Yɨwikɨta 'Apɨrami yuteɨterima yunaitɨ mekaniwarutakwini mekaniwara'iwa, mekaniwaranukuweiya Huwa mɨtiyetewatsie paitɨ Ramatsiku yeta. 16Mɨpaɨ mekateniwarunawairieni tinaime, metatsiere yumatsu Ruti kaniutawikweitsitɨani meta tinaime piiniteya, hipame 'ukarawetsixi meta hipame teɨteri.
17Kepauka 'Apɨrami makunua ti'aitame Keruxirahumexi ha'iwaka meta hipame te'aitamete memeweiyakai, ti'aitame Tsuruma kiekame neikunake mayeweritsie Tsawe meta Ti'aitame mɨrayetewatsie.
18Meta Merikitsereki, ti'aitame Tsareme kiekariyaritsie meta mawari wewiwame Kakaɨyari 'Amutewi hetsiemieme, paa meta winu kanimini. 19Hikɨ Kakaɨyari kaniutawawirieni 'Apɨrami 'aixɨa muyurienikɨ, mɨpaɨ 'utaitɨ:
«Kakaɨyari 'Amutewi, muyuawi mutawewi meta kwie,
'Apɨrami 'aixɨa keyurieka.
20Kakaɨyari 'Amutewi naimekɨmɨyɨwe pamɨpariyutsi nekanipitɨaka,
mɨmatsi'uparewi memɨmatsi'aye'unie pemɨwara'iwakɨ».
Hikɨ 'Apɨrami pɨtiyetuiri, tamamatatsie timieme xeime naime.
21Ti'aitame Tsuruma kiekame, mɨpaɨ 'Apɨrami katiniutahɨawe:
—Neteɨterima keneneyetuiri, piinite ketinapitɨ.
22'Apɨrami mɨpaɨ katinita'eiya:
—Yawé hɨxie mɨpaɨ neputayɨ, Kakaɨyari 'Amutewi, muyuawi mutawewi meta kwie, 23kename nitixaɨtɨ nekaranupini mɨti'apiini, hiru tɨma, nawi kakaitsie mieme tɨma. Mɨpaɨ hatsuaku pepɨkayɨwe mɨpaɨ pemɨtayɨni: “Ne 'Apɨrami xiku nepeyeitɨa”. 24Ne tixaɨtɨ nepɨkareuyehɨwa nehetsiemieme, hɨrixɨatsɨ neteɨterima memɨte'utikwai. Meta memɨnetsi'aweiya 'Anexi, 'Etsikuri meta Mamɨre, mɨkɨ hɨrixɨa mekete'utipini yuhetsiemieme.
Currently Selected:
Tsutɨarika 14: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
