Tsutɨarika 33
33
Kememɨte'anuyukunakixɨ Kakuwu 'Etsahu matɨa
1Kepauka Kakuwu 'Etsahu muxei 'a'amiekame teɨteri nauka tsienituyari warawitɨkɨme, yu'ɨitama waniwema me'ayenaukame kaniwarayeitɨani Reya, Xakeri meta te'uximayatamete memuyuhuta. 2Mɨkɨ 'ukarawetsixi memuyuhuta te'uximayatamete kaniwaranuyeyatsa yuniwemakame, wa'utɨmata Reya yuniwemakame, 'imatɨrieka Xakeri yuniwe Kutse matɨa. 3Hikɨ Kakuwu meri nanuyeyerɨni, 'atahutamexɨa 'umietɨ kananakatutsitakaitɨni kwiepa paitɨ yu'iwa 'anukunakirɨmetɨ. 4Peru 'Etsahu kaniutanautsa 'enukunakeke, 'itapaka kani'itseni. Hikɨ yuhutatɨ mekaniutitsuani. 5Kepauka 'Etsahu 'ukarawetsixi mɨwaruxei meta tɨɨri, mɨpaɨ katiniuta'iwauni:
—¿Kemɨ'aneta 'ikɨ mepɨyɨa, memɨmatsi'aweiya?
Kakuwu mɨpaɨ katinita'eiya:
—Mɨkɨ tɨɨri mepɨhɨkɨ Kakaɨyari ti'a'uximayatsiriwame meyenɨ'airi.
6Mɨkɨ yuhutatɨ te'uximayatamete 'ukarawetsixi 'amenakɨne yuniwema mewaruwitɨtɨ 'Etsahu hɨxie mekanakatutsitaxɨani. 7Kwitɨta Reya meta niwemama yaxeikɨata mekaniuyɨni, 'imatɨrieka Kutse Xakeri matɨa yaxeikɨata mekaniutihɨxima'uni.
8'Etsahu mɨpaɨ katiniuta'iwauni:
—¿Kepaɨtɨtɨri mɨkɨ tewaxi pemɨnetsihenɨ'airi?
Kakuwu mɨpaɨ katinita'eiya:
—Kɨmana 'aixɨa pemɨneranunakekɨ nepɨtiuyuri.
9'Etsahu mɨpaɨ kaniutayɨni:
—Neuxeitsɨ, nemuta, matsi neta waɨkawari nepɨrexeiya. Ketinapitɨ 'apiinite.
10Kakuwu mɨpaɨ kaniutayɨni:
—Neuxeitsɨ hawaikɨ, xɨkari 'aixɨa 'anemekɨ penetsi'utahɨawe, ketineutanaki'eri tita nematimikwa. 'Aixɨa 'anemekɨri pekaneniutahɨawe, 'anierika nexeiyatɨ Kakaɨyari nemɨxeiyani hepaɨ nekatinimaika. 11Ketineutanaki'eri 'imikieri nemɨmati'atɨiri. Kakaɨyari 'aixɨa pɨtiuka'iyari nehetsiemieme, waɨkawa matsi nepɨrexeiya tita nemɨreuyehɨwa.
Mɨya tikɨhɨawetɨ Kakuwu 'ameteneutere, 'imatɨrieka 'Etsahu yakatiniutanaki'erieni. 12'Arikekeri 'Etsahu mɨpaɨ katinitahɨawe:
—Kɨmɨtsɨari tekaniyehuni, ne nekamenanuteɨtamɨkɨ.
13Peru Kakuwu mɨpaɨ kaniutayɨni:
—Neuxeitsɨ, nematsika meta neti'aitɨwame, tɨɨri mepɨka'ɨkɨniwawe meta muxatsi wakaitsixi meputiniwexɨa, nepɨwata'ɨwiya. Xɨka xeiya neware'arieni yunaitɨ xeitukaritsie mepɨkwini. 14'Ayumieme peuyewetse pemanuyeyerɨni mati'uximayatsiriwame hɨxie, ne'anɨkai nepɨyemie netewama wahamatɨa meta tɨɨri, Tsehixi paitɨke tekaneyukaxeiyakuni.
15'Etsahu mɨpaɨ kaniutayɨni:
—'Aixɨa kani'aneni, peru neteɨterima nekaniwaku'eirimɨkɨ yayupaɨmeme memɨmatsi'anuteɨtakɨ.
Kakuwu mɨpaɨ katinita'eiya:
—Neuxeitsɨ pepɨka'a'iyaritɨaka, matsi 'aixɨa 'anemekɨri tepuyutahɨawixɨ, mɨkɨ matsi waɨkawa peuyewekai.
16Mɨkɨ tukaritsie kwitɨwa 'Etsahu kanakunuani Tsehixi paitɨ. 17Kakuwu, kaneyani Tsukuti 'erietɨ, mana kaniuyutakitɨani meta kuraru kaniutiwewieni yutewama wahetsiemieme. 'Ayumieme mana pɨtiuterɨwarie Tsukuti.
18Kepauka Kakuwu makunua Parani-'Arami, 'aixɨa 'anemekɨ meta 'aixɨa reu'erietɨ Tsikeni kiekariyaritsie kaninuani, Kanani kwieyaritsie, mɨkɨ hɨxie kaniutayerɨni. 19Hikɨ xeitsienituyari pɨrata tuminiyarikɨ kwie kaniunaneni, Kamuxi niwemama kaniwarunanairieni Tsikeni paapaya mana kaniyutaxamarutɨani. 20Metatsiere mana mawari taiyame kaniutawewieni, 'Eruhe-'Ixaheri katiniterɨwa.
Currently Selected:
Tsutɨarika 33: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
