Rukaxi 17
17
'Axaxɨkatiuyurieni, yuri kemɨti'erieka meta kemɨreuyewetse
1Mɨpaɨta katiniwarutahɨawe yuhetsɨa miemete teyɨ'ɨkitɨwamete:
—Peuyewetse teɨteri memɨkunuitɨarienikɨ, peru xɨa'ui kemɨ'ane mɨwakunuitɨani. 2Hetsiena mieme matsi 'aixɨa pɨyɨni xɨka matá 'akatɨtɨarieme yukɨipitɨa, xɨka haramaratsie heukahɨiyanike, kapa 'ikunuitɨanikɨ xeime 'ikɨ tsepa waɨkawa memɨkamamariwawe. 3Xekeneyɨ'ɨwiyani xeme.
»Xɨka 'a'iwa 'axatiuyurieni, keneutati'a, xɨka tiuhayewa kemɨtiyurienekai, ketineuyehɨwiri. 4Tsepa xeitukaritsie mɨixa 'axamatsi'uyurieni 'atahutamexɨa, tawarita xɨka 'atahutamexɨa nuanike 'ahetsɨa, mɨpaɨ 'utaitɨ: “Nepɨtihayewa kenetineuyehɨwiri”, 'ekɨta ketineuyehɨwiri».
5Hikɨ nɨ'ariekate Ti'aitame mɨpaɨ mekatenitahɨawe:
—Ketanepitɨaka matsi waɨkawa yuri temɨte'eriekakɨ.
6Ti'aitame mɨpaɨ katiniwarutahɨawe:
—Xɨka xeme mutsitatsa 'imɨariyari hepaɨ 'etsipemekɨ yuri xete'eriekake, xepɨyɨwawenike mɨpaɨ xemɨte'itahɨawe 'ikɨ xapa mana muwe: “Keniwatihuni, haramaratsie pɨta keneuka'iteɨtsie”, yapɨtikamienikeyu kexemutiyuane.
7»Xewitɨ xeme xɨka ti'uximayatame hexeiyani mukwietsanane, yamuxatsi mɨwahɨne, xɨka nuani ti'uximayatame retahayewame, ¿mɨpaɨ titahɨawe: “Kenaye'a xeiya, ketinekwaka”? 8Pɨkatixaɨ, ¿mɨpaɨ matsi kutsiyari katitahɨawe: “'Aixɨa ketineuyuri para nemɨtikwanikɨ ne, kene'atikemaritɨa kena'ahɨa kenetineumikwa mexi netikwa'a mexi neti'ie, hikɨ 'ariketa pepɨtikwani pepɨti'ieni 'ekɨtari? 9¿Pamɨpariyutsi tipitɨani ti'uximayatame yatiyurienekaku kemɨtiu'aitɨarie? Tixaɨ xɨari. 10Xemetari yaxeikɨa, kepauka yaxemɨteyurieka naime kexemɨte'u'aitɨarie, mɨpaɨ xekeneutiyuaneni: “Te'uximayatamete tekanihɨkɨtɨni xeikɨa, tixaɨtɨ tahetsie pɨkatinake, kemɨreuyewekai xeikɨa tepɨte'uyuri”».
Tamamata kememɨte'u'itiya kwiniyakɨ
11Merikɨtsɨ Kerutsareme tamietɨ, Tsamariya kwieyari Karereya kwieyari mayunakekaitsie kaniuyemiekaitɨni. 12Xeime kiekaritsie ta'aximekaku tamamata teɨteri menenukunake kwiniyakɨ memɨka'itiyatɨkatei. Tewa meti'utɨ 13mekaniutihiwakaitɨni mɨpaɨ me'utiyuatɨ:
—Ketsutsi 'aku, Ti'ɨkitame 'aku, ketaneutinenimayata.
14Waruxeiyaka mɨpaɨ katiniwarutahɨawe:
—Xekenehu mawari wewiwamete memɨxexeiyakɨ.
Hikɨ me'uhutɨ me'itiyatɨkaitɨ mekanakɨne.
15Hikɨ xewitɨ mɨkɨ 'uniereka kemɨranayehɨiya, pukunua 'aixɨa 'utaitɨ Kakaɨyari hepaɨtsita, karima 'utaniutɨ. 16Kaniutihɨximakeni Ketsutsi hetɨa pamɨpariyutsi 'ipitɨatɨ, mɨkɨ Tsamariya kanikiekametɨkaitɨni.
17Hikɨ Ketsutsi mɨpaɨ kaniutayɨni:
—¿Tamamata mekate'u'itiya? ¿'Atanaukatɨ kemeteheuyunixɨ? 18¿Xewitɨ tawari katiukunua para 'aixɨa mɨtayɨnikɨ Kakaɨyari hepaɨtsita, 'ikɨ xeikɨa xaɨtsie kiekametɨtɨ?
19Hikɨ mɨpaɨ katinitahɨawe:
—Kenanukukexi kenemie, yuri pemɨtiuta'erikɨ 'ayumieme peputawikweitsitɨarie.
Kepauka tukari maye'ani Kakaɨyari mitsutɨani ti'aitatɨ
(Ruk 17:26-27 – Mat 24:37-39)
20Merikɨtsɨ paritseutsixi mekaniku'iwawiyakaitɨni kepauka maye'anikekai tukari para Kakaɨyari mitsutɨanikɨ ti'aitatɨ. Mɨpaɨ katiniwarutahɨawe:
—Tanieretɨ xeikɨa 'atsipɨkaretimani kepauka mitsutɨani ti'aitatɨ Kakaɨyari. 21Pɨkayɨweni mɨpaɨ mɨtayɨni: “Kamɨ 'ena. Kamɨ huma”. Kemɨti'ane Kakaɨyari ti'aitametɨkaku, 'ari xetsata kanitsutɨani ti'aitatɨ.
22Hikɨ mɨpaɨ katiniwarutahɨawe teyɨ'ɨkitɨwamete:
—Tukari kanaye'amɨkɨ kepauka mɨpaɨ xemutiyuaneni: “Xɨka tɨma 'aye'anike Yuri Tewi tukarieya tsikere xewitɨ”. Peru xepɨka'ixeiya mɨkɨ tukari. 23Mɨpaɨ mepɨtexetahɨawe: “Kamɨ huma peyeika. Kamɨ 'ena”. Muwa xepɨkaheuhuni, xepɨkawareweweiyani. 24Merɨkariya muyuawitsie naitsarie kemɨtihekɨariwie 'umerɨkatɨ tatserieta ta'utata paitɨ, mɨpaɨta yaxeikɨa nepɨtimatsiɨkɨre naitsarie netukari 'aye'ayu ne Yuri Tewi. 25Perutsɨ kaneuyeweka meri waɨkawa nemɨtikwinekɨ, memɨnetsitixani'erienikɨ hikɨ miemete teɨteri. 26Kemɨtiuyɨ kepauka Nuhexi 'amuyeikakaitsie, mɨpaɨta yaxeikɨa katiniyɨmɨkɨ kepauka Yuri Tewi munuani. 27'Ana mepɨtekwatɨwekai, mepɨ'ietɨwekai, mepɨneɨketɨwekai meta mepɨtewikitɨatɨwekai, kepauka Nuhexi meutaha kanuwatsie, 'ana haa tiyaka yunaime katiniwareuyehɨani.
28»Mɨpaɨrita kemɨtiuyɨ kepauka Ruti 'amuyeikakai yapɨtiyɨni: 'Ana mepɨtekwatɨwekai meta mepɨ'ietɨwekai, mepɨtenanekai meta mepɨtetuakai, mepuka'etsakai meta mepɨkitɨwekai. 29Tukari 'aye'aku kepauka Ruti meyetɨa Tsurumatsie, 'ana muyuawitsie tai 'atsupɨreyari kaniukawiye, yunaime kaniwareuyehɨani.
30»Mɨpaɨta katiniyɨmɨkɨ kepauka nematsiɨkɨtɨ nemayani, Yuri Tewi kenemɨtitewa. 31'Iya tukaritsie, kemɨ'ane yukii heima makakani, yupiinite yukiita xɨka tiyepika, mɨkɨ 'anakayame pɨkatiwayepineni. Yaxeikɨata kemɨ'ane yuwaxata meyeika yu'utɨma pɨkahakununuwani. 32Xekena'eriwani Ruti 'ɨyaya kemu'itɨarie. 33Kemɨ'ane yutukari yemekɨ mɨwikweitsitɨamɨkɨ kanitatɨmaiyamɨkɨ, kemɨ'ane mitatɨmaiya, mɨkɨ kanitawikweitsitɨariemɨkɨ. 34Mɨpaɨ nepɨxerahɨawe, 'iya tɨkaritsie yuhutatɨ mepɨkahini xei'utayaritsie: xewitɨ kananutiwitɨkiemɨkɨ, xewitɨta kaniku'eiriwamɨkɨ. 35Yuhutatɨ 'ukari mepɨtɨxɨni 'axeikɨa: xewitɨ panutiwitɨkieni xewitɨta kaniku'eiriwamɨkɨ. 36Yuhutatɨ waxata mepe'uwani: xewitɨ panutiwitɨkieni, xewitɨta pɨku'eiriwa».
37Mɨpaɨ mekatenitahɨawe:
—Ti'aitame, ¿hakewa mɨpaɨ pɨreyɨni?
Mɨpaɨ katiniwarutahɨawe:
—Kanimatsiɨkɨni kaxari tsepa hakewa meka, mana mekaniyukuxeɨrikuni wirɨkɨxi.
Currently Selected:
Rukaxi 17: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
