Rukaxi 23

1Hikɨ yunaitɨ mekananuku'uni mekaneihana mɨta'iwawiyarienikɨ Piratu hetsɨa. 2'Ana menitsutɨani me'ixanetatɨ mɨpaɨ me'utiyuatɨ:

—Te'iku'iwawiyatɨ 'ipaɨ tekatenimaika, kwamanarika wewietɨ tiniwa'ɨkitɨaka tateɨterima, pɨkawapitɨa memɨteyukutuayanikɨ Tsetsaxi kuwiyexinuya hetsiemieme, mɨpaɨ kanaineni kename heitserie 'upitɨarie Kɨritsitutɨtɨ, ti'aitame yuxatatɨ.

3Hikɨ Piratu mɨpaɨ katinita'iwawiya:

—¿'Ekɨ huriyutsixi teɨteriyari tiwa'aitɨwame petihɨkɨ?

Mɨkɨ mɨpaɨ katinita'eiya:

—'Ekɨtsɨ mɨpaɨ pekanaineni.

4Hikɨ Piratu mɨpaɨ katiniwarutahɨawe mawari wewiwamete tewa'aitɨwamete meta teɨteri memɨyukuxeɨri:

—Kenemɨtimate, tixaɨ pɨkareuyewetse 'ikɨ tewi mɨxanetsiekakɨ.

5Mɨkɨ matsi kwini mieme meniku'imawakaitɨni yame'utiyuatɨ:

—Kaniwaxamurieneni teɨteri, ti'ɨkitatɨ naitsarie Kureya kwieyaritsie, Karereya kwieyaritsie heitsutɨaka 'uwapaitɨta.

Ketsutsi kemɨtiutahɨawarie Herurexi hɨxie

6Merikɨtsɨ Piratu 'u'enaka kaniku'iwawakaitɨni xɨka karereyatanaka hɨkɨtɨkaitɨni tewi. 7Tiutamarieka Herurexi mehɨritɨariekaitsie mɨkiekametɨkaikɨ, hetsɨana neinɨ'ani, Herurexi Kerutsareme muyeikakaikɨ 'ana.

8Merikɨtsɨ Herurexi Ketsutsi xeiyatɨ kaniyutemawiekaitɨni waɨkawa, mɨixa kanixeiyamɨkɨkaitɨni mɨ'enakaikɨ hepaɨtsitana, mɨpaɨ katiniku'eriwakaitɨni, Ketsutsi tixaɨtɨ mɨtiyurienikekaikɨ 'inɨari, 'ixeiyamɨtɨ. 9Waɨkawa kaniku'iwawiyakaitɨni, peru Ketsutsi 'atsipɨkatita'ei. 10Manata mekaniku'ukaitɨni mawari wewiwamete tewa'aitɨwamete meta 'inɨarikɨ memɨte'ɨkitametetɨkai, mɨkɨ mepɨkatehayewakai me'ixanetatɨ. 11Hikɨ Herurexi yukuyaxima wahamatɨa tixaɨtɨ mekate'eyeitɨatɨ me'inanaimatɨ, 'ixuriki witsi'aneme me'enakuwirieka tawari mekaneinɨ'ani Piratu hetsɨa. 12Mɨkɨ tukaritsie Herurexi meta Piratu mekaniyutemawiekaitɨni, mepayuka'uniekai mɨixa, 'anake 'aixɨa mepɨteyuxeiyakai.

13Hikɨ Piratu warukuxeɨrieka mawari wewiwamete tewa'aitɨwamete, 'itsɨkate meta teɨteri yunaime, 14mɨpaɨ katiniwarutahɨawe:

—Nehetsɨa xepi'atɨa 'ikɨ tewi, kename kwamanarika wewietɨ tiwa'ɨkitɨa teɨteri xe'utiyuatɨ, kamɨ, xehɨxie ne'ita'iwawiyaka ne, kenemɨtimate, tixaɨ pɨkareuyewetse 'ikɨ tewi hetsie mɨrahɨiyanikɨ kexemɨte'ixaneta. 15Herurexi meta yaxeikɨa kaniutayɨni, nexe'utanɨ'aku hetsɨana, tawari nehetsɨa kaneiyenɨ'ani. 'Atsipɨkatiuyuri hetsiena mɨtinakenikɨ mɨmierienikɨ. 16'Ayumieme nepɨtita'aita mɨkuweiyaxɨanikɨ, 'arike nepixɨna.

17Merikɨtsɨ 'ixɨararipa kaneuyewekaitɨni xeime mɨwaxɨnirienikɨ 'anutahɨiyakame. 18'Ana yunaitɨ yaxeikɨa mekateniuhiwa mɨpaɨ me'utiyuatɨ:

—Keneumi'a mɨkɨ, ketaneuxɨniri Waxawaxi.

19Mɨkɨ mɨyumienekaikɨ kiekaritsie, meta xeime mumikɨ katsariyanata kananutahɨiyakaitɨni. 20Piratu tawari kaniwarutahɨawe, Ketsutsi xɨnamɨtɨ. 21Mɨkɨ matsi mekaniutihiwakaitɨni mɨpaɨ me'utiyuatɨ:

—Kuruxitsie keneukawi, Kuruxitsie keneukawi.

22Hairieka mɨpaɨ katiniwarutahɨawe:

—¿Titakɨ 'axatiuyuri 'ikɨ tewi? Kenemɨtimate ne, tixaɨtɨ 'atsipɨkatiuyuri pɨkaheuyewetse mɨmierienikɨ, 'ayumieme kuweiyaxɨayu nepixɨna.

23Mɨkɨ matsi karima mekaniwawiriekaitɨni kuruxitsie mɨmierienikɨ. Teɨteri meta mawari wewiwamete memɨhɨritɨariekai hiwarikɨ mekane'iwa. 24Hikɨ Piratu mɨpaɨ katiniuta'aita yamɨtiyɨnikɨ kememɨte'iwawiriekai mɨkɨ. 25Kanixɨna kemɨ'ane memɨwaukai, kemɨ'ane manutahɨiyakai katsariyanata mɨyumienekaikɨ meta xeime mumikɨ, meta Ketsutsi kaniyetuani wahetsɨa kemɨtiwanakekai.

Ketsutsi kemɨtiukawiya kuruxitsie

(Ruk 23:33-43 – Mat 27:33-44, Mar 15:22-32, Wa 19:17-24)

26Merikɨtsɨ kepauka memiwitɨximekai meheimienike, xeime mekaniuwiya Tsimuni titewakame Tsirenetanaka, mɨkɨ xaɨtsie hanuyaka kiekaritsie kanaye'aximekaitɨni, hikɨ mekanititɨtɨani kuruxi Ketsutsi 'utɨma menutɨnikɨ. 27'Ana yumɨiretɨ teɨteri meniweiyakaitɨni, 'ukari meta me'utitsuatɨ me'itsuariwiyatɨ. 28Hikɨ ta'aurie 'aweka mɨpaɨ Ketsutsi tiniwarutahɨawe:

—Xeme 'ukari Kerutsaremetari xepɨka'utitsuanani nehepaɨtsita, yuhepaɨtsita pɨta meta yuniwema wahepaɨtsita xekeneutitsuanani. 29Tukari kanaye'amɨkɨ kepauka mɨpaɨ memutiyuaneni: “Mɨkɨ memɨkayɨwawe tɨɨri memɨwarexeiyanikɨ, mɨkɨ 'aixɨa mepɨ'itɨarie, mɨkɨ memɨkatiniwewawe mɨkɨ memɨkatetsitsitɨawawe 'aixɨa mepɨ'itɨarie”. 30'Anari mekanitsutɨakuni:

»“Mɨpaɨ meteniwatahɨawikuni hɨrite: ‘Taheima kenanakaxɨri’,

yemurite meta mɨpaɨ meteniwatahɨawikuni: ‘Xeketaneuti'awieta’ ”.

31Hikɨ mɨpaɨ xɨka mete'uyurieni kɨye yurikaku, ¿ketsɨ tiyɨni tawayu?»

32Hipatɨta yuhutatɨ mepehapanie 'axateyuruwamete memɨkwi'iwakɨ hepaɨna. 33Merikɨte kepauka memu'axɨa Mɨki Mu'uya Manuka mɨrakutewatsie, mana kuruxitsie mekanikawieni meta tenawayamete wahamatɨa, tserietana xeime meta 'utatana xeime.

34Hikɨ Ketsutsi mɨpaɨ kaniutayɨni:

—Ne'ukiyari, ketiniwareuyehɨwirieka, 'atsimemɨkatematekɨ kememɨteyurie.

'Ana kuyaxi mekaniyuta'iwa 'ixurikiteya meyutahuritɨanike.

35Teɨteri mana mekaniti'ukaitɨni metanenieretɨ, 'itsɨkate mekanitawe'eriekaitɨni mɨpaɨ me'utiyuatɨ:

—Hipame waniu kaniwatawikweitsitɨwakaitɨni, yɨkɨmana keyutawikweitsitɨani xɨka 'aku Kɨritsitu hɨkɨtɨni Kakaɨyari hetsɨa mieme, kemɨ'ane manayexeiyarie.

36Meta kuyaxi yaxeikɨa mekaninanaimakaitɨni hurawa me'ukɨneka, matsina mekanixatɨakaitɨni menu'ienikɨ, 37mɨpaɨ me'utiyuatɨ:

—'Ekɨ huriyutsixi tiwa'aitɨwame xɨka pehɨkɨtɨni, keneu'atawikweitsitɨa.

38Meta mu'uya heima mekaneimani 'utɨarika, mɨpaɨ pɨre'ukai: «'Ikɨ Huriyutsixi Tiwa'aitɨwame Kanihɨkɨtɨni».

39Hikɨ teyukwikate mana memutiwɨkai xewitɨ 'axakatinikɨhɨawekaitɨni, mɨpaɨ 'utaitɨ:

—¿'Ekɨ pekatihɨkɨ Kɨritsitu? Merikɨte, kene'atawikweitsitɨa, meta tame ketaneutawikweitsitɨa.

40Xewitɨ pɨta tapa mutiwiekai nitatieni mɨpaɨ 'utaitɨ:

—¿Kari 'ekɨ Kakaɨyari pepɨkamakaxe tsepa hepaɨna pemɨ'itɨariene yaxeikɨa petiutahɨawarieka? 41Peru kaniheitserietɨni tahetsie kemɨtiunakixɨ, kemɨreuyewetse xeikɨa tepɨ'itɨarietɨwe yatemɨteyuriekaikɨ. 'Ikɨ matsi tixaɨ 'atsipɨkatiyuriewe.

42Mɨpaɨ meta kaniutayɨni:

—Ketsutsi 'aku, kenena'eriwani kepauka pemunuani ti'aitame pehɨkɨtɨtɨ.

43Hikɨ Ketsutsi mɨpaɨ katinitahɨawe:

—Yurikɨ mɨpaɨ nepɨmarahɨawe, hikɨtɨtɨ nehetsɨa pepeyeikani witsimɨraku'anetsie.

Ketsutsi kemɨtiyetua yu'iyari

(Ruk 23:44-49 – Mat 27:45-56, Mar 15:33-41)

44Merikɨte tuka kaniukuyɨre yemekɨ naitsarie kwiepa tau kɨa kawiekakuke kaniukuhekɨare. 45Tau 'uyɨreku 'ixuriki meuwiekai tuki 'amɨpata hixɨata kanitsane. 46Hikɨ Ketsutsi karima 'utahiwaka mɨpaɨ kaniutayɨni:

—Ne'ukiyari, ne'iyari nepɨmatsihɨritɨa.

Mɨpaɨ 'utayɨka kaniumɨni.

47Xeitsienituyari kuyaxi tiwa'aitɨwame 'uniereka kemɨtiuyɨ 'aixɨa kaniutayɨni Kakaɨyari hepaɨtsita, mɨpaɨ 'utaitɨ:

—Yurikɨ 'ikɨ tewi heitserie pexeiyakai.

48Yunaitɨ teɨteri meneniereke memɨyukuxeɨri, me'uneniereka kemɨtiuyɨ, yu'utɨma mekanekɨne yutawitsie meyukuhutsunatɨ hiwerikakɨ. 49Peru yunaitɨ memimatekai mana mekaniti'ukaitɨni yatewa, meta 'ukari hamatɨana memeyekɨ Karereyatsie, mɨkɨ mana mekaniti'ukaitɨnita menenieretɨ.

Ketsutsi kemɨtiuteukie

(Ruk 23:50-56 – Mat 27:57-61, Mar 15:42-47, Wa 19:38-42)

50-51Merikɨtsɨ tewi 'akaniuyeikakaitɨni Kutse titewatɨ, 'itsɨkate muwanɨ'ɨ kanihɨkɨtɨtɨkaitɨni, 'aixɨa pɨtiuka'iyarikai heitseriemekɨ yapɨtikamiekai, mɨkɨ yapɨkara'eriwakai kememɨteyu'eni kememɨte'uyuri. 'Arimateya kanikiekametɨkaitɨni Kureya kwieyaritsie, yuri katini'eriekaitɨni ta'ikwewatɨ Kakaɨyari mitsutɨanikɨ ti'aitatɨ. 52Mɨkɨ Piratu hetsɨa nuaka kanitawawirieni Ketsutsi kaxarieya. 53Hekakweka kanita'eima rinu tsawanayarikɨ, kaneikuteuku teukiyapa 'aitɨa muwaye'inieriekaitsie hakewa tewi hatsuaku mɨkaheutatekiewekaitsie. 54Merikɨtsɨ pɨpienixitɨkai 'ana, 'uxipiya tukari pɨtsutɨarieximekai.

55Mekaneiweiya 'ukari Karereyatsie memeyekɨ 'utɨmana, mekanixeiya teukiya, meta kaxarieya mekaniuxeiya kemɨtiutekie. 56Yu'utɨma mehekɨneka 'aixɨa meniyurieni witsimu'ɨa mixaxi nɨkame 'uaye.

Merikɨtsɨ 'uxipiya tukaritsie mekani'uxipiekaitɨni 'aitsika kemaine.

Currently Selected:

Rukaxi 23: hch

Highlight

Copy