Marikuxi 16

'Umierieka kemɨranukuke

(Mar 16:1-8 – Mat 28:1-8, Ruk 24:1-10)

1Merikɨtsɨ 'uxipiya tukari 'utaxɨku, Mariya Mararatanaka meta Mariya Kakuwu maamaya meta Tsarume yunaitɨ, 'uaye witsimu'ɨa mekaniunaneni, memɨyehukɨ Ketsutsi kaxarieya mehetawirienike. 2Ximeri kwitɨwa tau 'anatineku tsemana mexɨakame tukaritsie, teukiyapa mekanekɨne. 3Mɨpaɨ mekateniyuku'iwawiyakaitɨni: «¿Kemɨ'ane tete pɨtatsiheuhɨwirieni teukiyata kitenie meuma?»

4Mɨkɨtsɨ teté 'akaninekaitɨni. Peru kepauka memunenierixɨ mekanixeiya teté heuhɨiyakame. 5Hikɨ teukiyapa mekaneutahaxɨani, watserieta 'akaime temaikɨ mekaniuxeiya, mutuxa 'amɨtewi 'anakatɨkɨme, hikɨ mekaniutimamani.

6Mɨkɨ mɨpaɨ katiniwarutahɨawe:

—Xepɨkamamaka. Xeme Ketsutsi xepɨkuwautɨwe natsaretitanaka kuruxitsie mukawiya. Kananukuketɨarieniri, 'uwa pɨkayeka. Paratsɨ xekeneutanenieri hakewa meutatekie. 7Hikɨ xekenehu, mɨpaɨ xeketeniwaretahɨawi teyɨ'ɨkitɨwametemama meta Pekuru: “Mɨkɨ petɨari Karereyatsie paitɨ. Mana xekaneixeiyakuni, yemekɨ kemɨtixe'utahɨawixɨ”.

8Hikɨ teukiyapa mewayekɨneka mekaniyuta'una, me'utiyɨyɨakatɨ meta memamatɨ. Xeimetɨma 'atsimepɨkate'utahɨawixɨ memɨmamakaikɨ.

Ketsutsi matsiɨkɨtɨ kemɨrayuyeitɨa meta kemɨranutitɨa

9Hikɨ tsemana mexɨakame tukaritsie 'anutaniereka Ketsutsi ximeri, matsiɨkɨtɨ kanayuyeitɨani meri Mariya Mararatanaka 'ixeiyakaku. Meripaitɨ kakaɨyarixi 'axamemɨ'anene 'atahutatɨ memiwiyakai, Ketsutsi mɨwarayenɨ'a, mɨkɨ Mariya kanihɨkɨtɨkaitɨni mixei. 10Mɨkɨ heyaka, yakatiniwarutaxatɨani mɨkɨ hamatɨana memu'uwakai, memuyuhiweriekai meta memutitsuanakai. 11Peru mɨkɨ me'u'enanakatɨtɨ kename 'ayenierekai, kename mɨkɨ 'ixeiyakai, yuri mepɨkate'ita'eriri.

12'Arike matsiɨkɨtɨ yɨkɨ'anetɨ kanayuyeitɨani, yuhutatɨ mɨkɨ yeutapai me'uyehukaku wahɨxie. 13Mɨkɨ yu'utɨma mekanekɨne, hipame teyɨ'ɨkitɨwamete mekateniwarutaxatɨani kemɨtiuyɨ. Mɨkɨta 'akuxi yuri mepɨkatewaruta'eriri.

14'Imatɨriekata matsiɨkɨtɨ kanayuyeitɨani tamamata heimana xewi teyɨ'ɨkitɨwamete me'ixeiyakaku metekwakaku. Kaniwarutatieni yuri memɨkate'eriekaikɨ, yu'iyaritsie memɨtsetse'ikaikɨ, yuri memɨkatewaruta'eririkɨ mɨkɨ memixei 'anukukeku.

15Hikɨ mɨpaɨ katiniwarutahɨawe: «Naitsarie kwiepa xekeneutayeixɨa, niuki 'aixɨa manuyɨne xekeniwakuxaxatɨwani yunaime keyupaɨmetɨ memunetɨarie. 16Kemɨ'ane yuri mɨtita'erieni mɨka'ɨyarieni, mɨkɨ kanitawikweitsitɨariemɨkɨ, kemɨ'ane yuri mɨkati'erie, 'itsɨkame kanitakwewimɨkɨ hetsiena mɨrahɨiyanikɨ. 17'Ipaɨ 'anenetɨ 'inɨarite kanitixuawerimɨkɨ hakewa meme'uwa mɨkɨ yuri memɨte'erie, nehetsɨa memɨmiemetekɨ mekaniwarayenɨ'axɨakuni kakaɨyarixi 'axamemɨ'anene, mekanitiniukuni niuki mɨhehekwakɨ, 18kuterixi xɨka mewaranuku'ɨni, mɨmɨya xɨka me'anu'ieni, tixaɨtɨ 'atsipɨkatiwayurieni, tekwikwikate wahetsie xɨka me'utimeni mɨkɨ 'aixɨa meteheu'erietɨ mepakɨne».

19Merikɨtsɨ Ti'aitame Ketsutsi mɨpaɨ tiwarutahɨaweka, taheima kananutiwitɨkieni, Kakaɨyari tserieta kanayerɨni. 20Naitsarie mekaneutayeixɨani mɨkɨ metekuxatatɨ, Ti'aitame waɨkawa kaniwaparewiekaitɨni kememɨte'uximayakai waniuki tseiriyatɨ 'inɨari kemɨtiwapitɨakai. Mɨpaɨ xeikɨa kani'aneni.

Currently Selected:

Marikuxi 16: hch

Highlight

Copy