San Mateo 28

Jo³-sˀin² nca³ ja³ˀa¹ya³-le⁴ Jesús

(Mr. 16:1-8; Lc. 24:1-12; Jn. 20:1-10)

1Cˀia⁴ nca³ coan³njion² nca³ xo³to², cˀoa⁴ nca³ qui³sˀe³sen¹ ni⁴čhjin³ tai²nco⁴ nca³ to²tsˀin³ xo³ma²na⁴, ja³ˀai³ María Magdalena, cao⁴ je² xi³ nqui²jnco³ María, ja³ˀai³ co³tsen³ tsjo¹.

2Coe⁴-ni³ ja³ˀa³ jnco³ chaon¹ xi³ nˀion¹, nca⁴ jnco³ a²ncje⁴-le⁴ Nai³-na¹ xi³ ji³tjo³jen³-ni³ ncˀa³jmi³, ji³cho² qui³sca³ni¹ti¹cja¹ tˀa³xin² la⁴jao⁴-ve⁴, cˀoa⁴ tsa³cˀe²jna³son². 3Sen¹-le⁴ cˀoa⁴cji³ jo³-ni³ lˀi¹chaon⁴, cˀoa⁴ na³jño³-le⁴ čhoa³ jo³-ni³ nchˀan¹. 4Qui³tsa³cjon¹ je² xi³ tjio¹si¹coi²nta⁴, jo³ nca³ ja³tse³, cˀoa⁴ jo³-ni³ cˀen³ coan³ cjoan³. 5Qui³nchja⁴ je² a²ncje⁴, qui³tso²-le⁴ ya¹nchjin¹-ve⁴: A³li² vi³jcon³-jion²³ nca³ jon², nca⁴ an³ ˀve³ nca³ ti³ma³fa³sjai³-nio¹³ Jesús xi³ qui³sˀe³jna³tˀa³ cro². 6A³li² i⁴ ti¹jna³, nca⁴ ca²fa³ˀa¹ya³-ni³le⁴ jo³ qui³tso²: Nčhoao¹³, cho¹tsaon³ ˀnte³ jña³ nca³ qui³sˀe³jna³. 7Ta⁴nquin¹ nti⁴ton⁴³, cˀoa⁴tˀin²-lao⁴³ cho⁴ta⁴-le⁴ nca³ je³ca²fa³ˀa¹ya³jin³-ni³le⁴ cˀen³. Cˀoa⁴ coe⁴-ni³ fi²ti¹tjon²-no³ ya⁴ Galilea, ya⁴ jchao⁴³ nca³ je². Coe⁴-ni³ an³ xi³ je³cˀoa⁴qui³xin³-no³. 8Cˀia⁴ ya¹nchjin¹-ve⁴, nca³ qui³-ni³ tsjo¹cˀen³ tjio¹tsa³cjon¹, cˀoa⁴ nˀion¹ tsjoa³-le⁴. Qui³to²ca³ nca³ qui³ si¹qui³nčhˀoe² cho⁴ta⁴-le⁴. 9Coe⁴-ni³ Jesús qui³sa³te³cjao³ qui³tso²: Ti²ˀnta³-li². Cˀoa⁴ ya¹nchjin¹-ve⁴ ji³cho²tˀa³-le⁴ qui³tsoa³cja¹ ntso⁴co⁴, tsa³ca³sen²xco¹nchˀin³tˀa³-le⁴. 10Cˀia⁴ Jesús qui³tso²-le⁴: A³li² vi³jcon³-jion²³, ta⁴nquin¹ ni²qui³nčhˀoao¹³ ntsˀe³, jme¹-ni³ nca³ coai⁴-si¹ni³ ya⁴ Galilea, cˀoa⁴ ya⁴ scoe⁴-na³. 11Cˀia⁴ nca³ tjio¹fi² nca³ je², coe⁴-ni³ tjio¹ cˀa³ so³nta²do⁴ xi³ tjio¹si¹coi²nta⁴, xi³ ja³ˀai³ ya⁴ na⁴xi⁴na³nta¹-ve⁴, qui³si³qui³nčhˀoe¹ cho⁴ta⁴ti¹tjon²-le⁴ na⁴ˀmi³ xi³ tˀa³tsˀe⁴ nca³yi³je³ cjoa⁴ xi³ cˀoa⁴-sˀin² coan³. 12Cˀia⁴ nca³ coan³xco¹ cao⁴ cho⁴ta⁴jchi¹nca³, tsa³cjao¹ya³-ni³, cˀoa⁴ tse³ taon⁴ qui³tsjoa³-le⁴ je² so³nta²do⁴, 13qui³tso²-le⁴: Cˀoi⁴tˀin²-lao⁴³: Je² cho⁴ta⁴-le⁴ ja³ˀai³ nca³ njion², cˀoa⁴ qui³si³che¹ cˀia⁴ nca³ ti³sa³yo³fai²⁴-jin⁴. 14Cˀoa⁴ tsa² je²-vi⁴ cjoi⁴nčhˀoe¹ gobernador, jin⁴-jin⁴ si⁴cˀe¹jyo¹ˀai³⁴-jin⁴, cˀoa⁴ si⁴ca³tio¹nta³-lai²⁴jin⁴ nca³ jon². 15Cˀia⁴ je² qui³scoe¹ taon⁴-ve⁴, cˀoa⁴qui³sˀin³ jo³-sˀin² nca³ tsa³ca³co¹ya³-le⁴. Cˀoa⁴ je² en¹-ve⁴ qui³son² jin³-le⁴ cho⁴ta⁴ judíos sa³ˀnta³ ntˀai⁴-vi⁴.

Cjoa⁴ xi³ Jesús tsa³cˀe¹ne²-le⁴ cho⁴ta⁴-le⁴

(Mr. 16:14-18; Lc. 24:36-49; Jn. 20:19-23)

16To⁴nca³ je² xi³ te³jnco³ cho⁴ta⁴-le⁴ Jesús qui³ ya⁴ Galilea, ya⁴ ni³nto³ jña³ nca³ Jesús tsa³cˀe¹ne²-le⁴. 17Cˀia⁴ nca³ tsa³ve³ Jesús, tsa³qui³ncha³xco¹nchˀin³tˀa³-le⁴, to⁴nca³ tjin¹ cˀa³ xi³ jao² tsa³ca³tio²con³. 18Cˀia⁴ nca³ Jesús ji³nčhoa³tˀa³čhian³-le⁴, tsa³cja¹cao⁴: Nca³yi³je³ cjoa⁴te¹xo³ma³ qui³tsˀai²-na³ ncˀa³jmi³, cˀoa⁴ i⁴ son³ˀnte³. 19Ta⁴nquion¹³, ti⁴ncha³ˀao³ nca³tsˀi³ na⁴xi⁴na³nta¹, ti⁴qui³njaon³ cho⁴ta⁴ tˀa³tsˀan⁴, ta⁴te²ntao¹³ cao⁴ jan³ˀain¹-le⁴ Nˀai³, cao⁴ tsˀe⁴ ˀnti¹, cˀoa⁴ cao⁴ tsˀe⁴ Espíritu Santo. 20Ta⁴co²ya³-lao⁴³ nca³ ca²ta³si¹tjo³son² nca³yi³je³ cjoa⁴ xi³ an³ tsa³cˀe³ne²³-no³. Coe⁴-ni³ an³ ti²jna⁴cao⁴-no³ nca³ jon² nca³ntsjai² ni⁴čhjin³, sa³ˀnta³ nca³ cjoe⁴tˀa³ son³ˀnte³-vi⁴. Cˀoa⁴ ca²ta³ma³.

Currently Selected:

San Mateo 28: mauDBL

Highlight

Copy