San Marcos 2
2
Jesús qui³si³nta³ cho⁴ta⁴yo⁴ma⁴
(Mt. 9:1-8; Lc. 5:17-26)
1Xi³ coan³nchaon³ coan³jnqui³-ni³, ja³ˀa³sˀen³-nca¹ni³ ˀnte³ jña³ nca³ Capernaum ˀmi², ya⁴ tsa³ˀya³-le⁴ nca³ ti¹jna³ˀya³ ni³ˀya³. 2A³li² to⁴cˀoa⁴cji³ ncjin² cho⁴ta⁴ xi³ ja³ˀai³ ma³xco¹tˀa³-le⁴ Jesús, sa³ˀnta³ li²coi³ ti⁴ti³ˀnte²-ni³ ja⁴jčho³ xo⁴ntjoa⁴-le⁴ ni³ˀya³. Cˀoa⁴ ya⁴ qui³nchja⁴ya³jin³-le⁴ en¹-le⁴ Ni³na¹. 3Cˀia⁴ ja³ˀai³cao⁴ jnco³ cho⁴ta⁴yo⁴ma⁴. Ño³ cho⁴ta⁴ tsa³cˀa³ncˀa³. 4Li²coi³ qui³tjo³ˀnte²-le⁴ ji³cho²sˀen³con³-le⁴ Jesús, nca³ cˀoa⁴-sˀin² chon³ cho⁴ta⁴ncjin² xi³ qui³tse³ˀya² ni³ˀya³. Ya⁴ qui²xi⁴ jña³ nca³ ti¹jna³ Jesús, tsa³cja³ˀa¹xin² te²ja⁴-le⁴ ncˀa¹. Ya⁴ qui³sca³ni¹jen³ne²-ni³le⁴ na⁴chan³ xi³ tsa³ca³jna³ne² je² xi³ ti¹mˀen³. 5Cˀia⁴ nca³ tsa³ve³ Jesús jo³-sˀin² nca³ coan³cjain¹-le⁴, cˀoa⁴qui³tso²-le⁴ cho⁴ta⁴yo⁴ma⁴: ˀnti¹ mi²yo⁴-na⁴, i⁴² ca²cha³tˀa³-li² je¹-li⁴ ntˀai⁴. 6Ya⁴ tjio¹čhian³ cˀa³ cho⁴ta⁴ scribano xi³ tjio¹ma³ si¹cja³-ˀai³tsjen³jin³ ni⁴ma⁴-le⁴. 7Cˀoa⁴tso²: A¹-ni³ nca³ cˀoa⁴tso²-si¹ni³ je²-vi⁴, nca³ Ni³na¹ nchja⁴ˀaon³-ni³le⁴. ˀya¹-ni³ xi³ coan⁴-le⁴ si⁴²cha³tˀa³-na¹ je¹-na¹, a³ tsi² tsa² to⁴jnco³ Ni³na¹ xi³ coan⁴-le⁴. 8Jesús tsa³ve³ nti⁴ton⁴ ni⁴ma⁴-le⁴ nca³ cˀoa⁴-sˀin² cho⁴ta⁴-ve⁴ tjio¹ma³ si¹cja³ˀai³tsjen³jin³ ni⁴ma⁴-le⁴. Cˀoa⁴qui³tso²-le⁴: A¹-ni³ nca³ cˀoa⁴-sˀin² si¹cja³ˀai³tsjen³jin³-si¹ni³ ni⁴ma⁴-no³. 9Jña¹-le⁴ xi³ li²coi³ to⁴jo³ ñˀain³, tsa² cˀoa⁴xin¹-le⁴ cho⁴ta⁴yo⁴ma⁴-ve⁴: Je¹-li⁴ cha³tˀa³-li² ntˀai⁴, a³xo⁴ tsa² cˀoa⁴xin¹-le⁴: Ti²so⁴tjain⁴, chjoai¹³ na⁴chan³-li⁴, ti⁴to¹mjain³. 10To⁴nca³ coi³ cjoa⁴-vi⁴ jme¹-ni³ nca³ jcha⁴-si¹nio³ nca³ je² ˀnti¹-le⁴ cho⁴ta⁴ tjin¹-le⁴ ˀnte³ i⁴ son³ˀnte³-vi⁴ nca³ si¹cha³tˀa³ je¹-le⁴ cho⁴ta⁴, cˀia⁴ cˀoa⁴qui³tso²-le⁴ cho⁴ta⁴yo⁴ma⁴-ve⁴: 11Cˀoa⁴xin¹-le²³ nca³ ji³: Ti²so⁴tjain⁴, chjoai¹³ na⁴chan³-li⁴, tˀin³ ni³ˀya³-li⁴. 12Cˀia⁴ tsa³qui³so¹tjen⁴ cho⁴ta⁴yo⁴ma⁴-ve⁴, qui³scoe¹ nti⁴ton⁴ na⁴chan³-le⁴, ji³tjo³jin³ nqui³xcon⁴ nca³tsˀi³ cho⁴ta⁴. Nca³tsˀi³ to⁴coan³xcon¹-le⁴. Nˀion¹ ncˀa³ tsa³cˀa³sje³ Ni³na¹, cˀoa⁴qui³tso²: Ni⁴sa³jnco³-jin² ni⁴čhjin³ tsa³ˀya³² xi³ cˀoa⁴ma³.
Jesús qui³nchja⁴ le⁴ Leví
(Mt. 9:9-13; Lc. 5:27-32)
13Jesús ji³tjo³-ni³ ni³ˀya³. Qui³-nca¹ni³ ja⁴ntai³ nta¹chi³con³. Ya⁴ ja³ˀai³con²-le⁴ nca³tsˀi³ cho⁴ta⁴. Cˀoa⁴ tsa³ca³co¹ya³-le⁴. 14Cˀia⁴ nca³ Jesús ja³ˀa³to³, tsa³ve³ Leví, ti³-le⁴ Alfeo, xi³ ti¹jna³ ya⁴ jña³ nca³ vˀe¹ña³ taon⁴va³sen³. Cˀoa⁴qui³tso²-le⁴: Nčhoa¹tjen⁴nqui³-nai¹³. Je² Leví tsa³ca³sen²nto³, cˀoa⁴ qui³tjen⁴nqui³-le⁴. 15Cˀoa⁴ xi³ coan³-ni³ cˀia⁴ nca³ Jesús ti¹jna³tˀa³ ya¹mi²xa⁴ ya⁴³ ni³ˀya³-le⁴ Leví, ncjin² cho⁴ta⁴ xi³ vˀe¹ña³ taon⁴va³sen³, cˀoa⁴ ncjin² cho⁴ta⁴tsˀen⁴, ya⁴ ña³tjen⁴ tjio¹tˀa³ ya¹mi²xa⁴ cao⁴ Jesús, cˀoa⁴ cao⁴ cho⁴ta⁴ xi³ tsˀe⁴, nca⁴ li²to⁴ ncjin² cho⁴ta⁴ xi³ ja³ˀai³tjen⁴nqui³-le⁴. 16Cˀia⁴ nca³ cho⁴ta⁴ scribano cao⁴ cho⁴ta⁴ fariseos tsa³ve³ nca³ Jesús ti¹cjen²cao⁴ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴tsˀen⁴, cˀoa⁴qui³tso²-le⁴ cho⁴ta⁴-le⁴: A¹-ni³ nca³ je² cjen²cao⁴-si¹ni³, cˀoa⁴ nca³ je² ˀvi³cao⁴-si¹ni³ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴tsˀen⁴. 17Cˀia⁴ nca³ Jesús qui³nčhˀoe¹ je²-vi⁴, qui³tso²-le⁴: Je² cho⁴ta⁴ xi³ nta³, a³li² chji⁴ne⁴xqui³-jin² ma³chjen¹-le⁴, to⁴je² xi³ tjio¹mˀen³ xi³ ma³chjen¹-le⁴ chji⁴ne⁴xqui³. A³li²coi³ je²ˀe⁴ nca³ an³ nca³ coi³nchja²³-le⁴ cho⁴ta⁴ xi³ tjin¹-le⁴ cjoa⁴qui²xi⁴, to⁴je² cho⁴ta⁴je¹ xi³ coi³nchja²³-le⁴.
Xi³ tˀa³tsˀe⁴ cjoa⁴vi³jna³nchjan³
(Mt. 9:14-17; Lc. 5:33-39)
18Cho⁴ta⁴-le⁴ Juan cao⁴ cho⁴ta⁴-le⁴ cho⁴ta⁴ fariseos va³tio²nchjan³. Cˀoa⁴ ja³ˀai³ xi³ qui³tso²-le⁴ Jesús: A¹-ni³ nca³ va³tio²nchjan³-si¹ni³ cho⁴ta⁴-le⁴ Juan cao⁴ cho⁴ta⁴-le⁴ cho⁴ta⁴ fariseos, cˀoa⁴ tsi² tsa² va³tio²nchjan³ cho⁴ta⁴ xi³ tsi⁴. 19Jesús cˀoa⁴qui³tso²-le⁴: A³ ma³² nca³ va³tio²nchjan³ mi²yo⁴-le⁴ xˀin⁴ xi³ ti¹vi³xan³, tjen⁴ nca³ to⁴jo³ ti¹jna³ xi³ xˀin⁴. Tjen⁴ nca³ ti¹jna³cao⁴ xi³ xˀin⁴ li²coi³ ma³ va³tio²nchjan³. 20To⁴nca³ cjoa⁴ˀai¹ ni⁴čhjin³ cˀia⁴ nca³ je² xˀin⁴ coi⁴tjo³tˀa³xin²-le⁴. Cˀia⁴ je² ni⁴čhjin³-ve⁴ coa⁴tio²nchjan³ mi²yo⁴-le⁴. 21Li²ˀya³ xi³ na³jño³ cho⁴tse⁴ vˀe¹jčho³ya³-ni³ na³jño³ jchi¹nca³. Tsa² tjin¹ xi³ cˀoa⁴-sˀin² sˀin¹ je² na³jño³ cho⁴tse⁴ fa³ˀai³xco¹, cˀoa⁴ to⁴xi³jnta²-sa³ na³jño³ jchi¹nca³. 22Li²ˀya³ xi³ vino cho⁴tse⁴ vˀe¹ya³ čhjoa⁴ jchi¹nca³. Tsa² tjin¹ xi³ cˀoa⁴-sˀin² sˀin¹, va³sen¹jnta³-ni¹ čhjoa⁴-ve⁴, cˀoa⁴ vi³tjo³xi¹jten³ vino-ve⁴. Ya⁴² si¹cha³ čhjoa⁴-ve⁴. To⁴nca³ vino cho⁴tse⁴ ma³ sˀe³ya³ čhjoa⁴ cho⁴tse⁴.
Ni⁴čhjin³ ni²cja¹ya³ qui³sco³ne² na⁴tin¹-le⁴ trigo
(Mt. 12:1-8; Lc. 6:1-5)
23Cˀia⁴ ni⁴čhjin³ ni²cja¹ya³, Jesús ja³ˀa³ ya⁴ jña³ nca³ tji¹ntje² trigo. Cˀoa⁴ nca³ tjio¹fi² cho⁴ta⁴-le⁴ tsa³cˀe¹tsˀia⁴cao⁴ nca³ qui³sco³ne² na⁴tin¹-le⁴ trigo. 24Cˀia⁴ cho⁴ta⁴ fariseos cˀoa⁴qui³tso²-le⁴: Ne²-ni³ntai⁴, a¹-ni³ nca³ cˀoa⁴sˀin¹-si¹ni³ jnco³ cjoa⁴ xi³ tsi² tjo³ˀnte³ coi³ ni⁴čhjin³-vi⁴ nca³ ni²cja¹ya³². 25Jesús qui³tso²-le⁴: A³ tsi² tsa³cˀe²xquiao⁴³ jme³ xi³ qui³sˀin³ David cˀia⁴ nca³ coan³vao³-le⁴ cao⁴ je² xi³ ña³tjen⁴ tsa³ca³tio², 26jo³-sˀin² nca³ ja³ˀa³sˀen³ David ya⁴ ni³ˀya³-le⁴ Ni³na¹ cˀia⁴ nca³ Abiatar coan³ na⁴ˀmi³ti¹tjon². To⁴je² na⁴ˀmi³-ve⁴ xi³ tjin¹ ˀnte³ nca³ cjen² nio⁴xti²la⁴ xi³ ya⁴ ncha³tsen³ nqui³xcon⁴ Ni³na¹. To⁴nca³ je² David tsa³cjen² nio⁴xti²la⁴-ve⁴, cˀoa⁴-ti⁴ qui³tsjoa³-le⁴ je² xi³ ña³tjen⁴ tsa³ca³tio². 27Jesús qui³tso²-sa³: Je² ni⁴čhjin³ ni²cja¹ya³ qui³ni²nta³ xi³ tˀa³tsˀe⁴ cho⁴ta⁴. A³li² cho⁴ta⁴-jin² xi³ qui³ni²nta³ xi³ tˀa³tsˀe⁴ coi³ ni⁴čhjin³-vi⁴. 28Cˀoa⁴-sˀin² nca³ je² ˀnti¹-le⁴ cho⁴ta⁴ Nai³-le⁴ ma³ ni⁴čhjin³ ni²cja¹ya³.
Currently Selected:
San Marcos 2: mauDBL
Highlight
Share
Copy
Want to have your highlights saved across all your devices? Sign up or sign in
© 1960, Wycliffe Bible Translators, Inc. All rights reserved.
