Salmos 18
18
Salmo 18
Sukan ndakuan‑ta'vi o nuu Su'si ma ja ni chindee ña'a ya ja ni kaku o nuu ja u'vi ma
1Iya Tátnuni, kútoo xeen ña'a sa,
vaa maa ni kúu iya táa tnu'u ndee tnu'u ndatnu.
2Iya Tátnuni, maa ni kúu toto nuu kuu konukuiñi va'a sa,
te maa ni kúu ve'e sukun sukun nuu kuu chu'u sa.
Te maa ni kúu iya sa'a ja kaku sa.
Maa ni kúu Su'si maa sa.
Maa ni kúu iya táa tnu'u ndee tnu'u ndatnu.
Nuu maa ni kúkanu ini sa,
vaa maa ni kúu iya jasi ndee jasi ndoso ña'a,
ja ni‑in ja u'vi ma másu kaki'i ña'a,
te maa ni chíndee ña'a ja na kaku sa
nuu ndaka ñayii ñatuu ka kunimani nuu sa ma,
vaa maa ni kúu ve'e sukun sukun nuu kuu chu'u sa ma.
3Ndakune'e sa Iya Tátnuni ma,
vaa maa ya iyo ja ndachiñu'u o ya ma.
Te kaku sa nuu ñayii ñatuu ka kunimani nuu sa ma.
4Nuu ndó'o néni sa ma, ni jani ini sa ja kûu sa nkuu,
vaa ni ka ndakonduu ña'a ja u'vi ma, ja jin ka'ni ña'a i,
te ni yu'u sa.
5Ni ka jani ini i ja jin ka'ni ña'a i,
te ni kenda sa nuu kûu sa ma nkuu.
6Te maa ora nuu yikuu sa ndó'o néni sa ma,
te ni ndakune'e sa Su'si Iya Tátnuni ma,
te káyu'u sa jiña'a sa ya,
te maa ya ja iyo ya onde ini veñu'u ka'nu ya ma,
te ni jiniso'o ya ja jiña'a sa ya ma.
7Sani te nuu ñu'ú ya ni tnaa,
te onde ja'a yuku ma ni ka ndakanda.
Te ndaka tu'u ni ka kanda,
ja ni ndakiti xen‑xeen ini Iya Tátnuni ma.
8Te xitni ya ma ni kee ñu'ma ma ni tetniñu ya ma,
te yu'u ya ma ni tetniñu ya ñu'u ndu'va ma,
sukan‑va'a jin kayu jin koko ñayii ka sa'a ja u'vi ma.
9Ni sa'a ya ja ni kuxiñi andivi ma, te ni nuu ya vee ya,
te nee ñu'ú kuiti chii ja'a ya ma.
10Te ni jakoxtnee ya siki in ángel nani querubín,
te ni ndava i kua'an i, te sukan kua'an vee ya kúu ya.
11Te ni sa'a ya ja viko ni ndutnuu kuiti ma,
ja sani te kuun savi ma,
ni jasi i nuu iyo ya onde andivi ma.
12Te ja ye'e ni'ni nuu iyo ya ma,
te viko ma, ni ka yanduu i kuan koo i,
te ni sa'a ya ja ni kuun ñiñi ma
te sakanuu i ji'in ñu'u ka kanda'a ka kanda'a‑nka.
13Te ni sa'a ya ja ni kana savi ma,
te ja ni ka'an Iya Tátnuni ma,
te ni kuun tuku ñiñi ma te sakanuu i
ji'in ñu'u ka kanda'a ka kanda'a‑nka.
14Ni kani ya flecha ya ma, te ni jandute,
te ni jatenuu ya ndaka ñayii
ñatuu ka kunimani nuu sa ma,
te ni xnaa ya i.
15Te ja ni tutachi ya ji'in xitni ya ma,
sani te ni ka ndatuu ja'a yuku ka iyo nuu mar ma,
te ja ni ka'an nini'i ya ma,
te ni ndatuu ni‑ka'nu ñuu ñayivi a.
16Onde sukun ma iyo ya, te ni skuili ya nda'a ya ma,
te ni ndatava ña'a ya onde ka'a ndute mar ma.
17Ni sa'a ya ja ni kaku sa nuu nda'a ñayii
ñatuu ka kunimani nuu sa ma,
te vitna ja kua'a xeen‑ka i ka kuu
ja ka saxiko ña'a i ma sana saña ma.
18Kivi ndó'o néni sa ma, te ni kenda koo i ni ka kani ña'a i,
kovaa maa Iya Tátnuni ma chi ni chindee ña'a ya.
19Te ni ndene'e ña'a ya, te ni jan xsia'a ña'a ya nuu nune ma,
te ni sa'a ya ja ni kaku sa,
vaa ni jatna ini ya ja masu na ja u'vi sa'a sa ma.
20Te maa Iya Tátnuni ma, ni ndataa ya ja vii ja va'a,
vaa maa ya jini ja ni sa'a ndaa, ni sa'a ndija sa ma,
te ñatuu na ja u'vi ni sa'a sa ji'in nda'a sa a.
21Vaa maa sa chi kándija sa ja ká'an káchi Iya Tátnuni ma,
te ñatuu na nde ni xndoo sa tnu'u tátnuni Su'si o a
te ki'in sa ichi u'vi ma.
22Su'va ndaka ja va'a ja ndaa ja tátnuni ya ma
ñu'u ini sa te sa'a sa,
te ñatuu nde ndúnaa sa ja ko sa'a sa
sukan ká'an tnu'u tátnuni ya ma.
23Ni yo nukuiñi va'a, ni yo nukuiñi ndaa sa nuu ya,
te ni yo jito va'a sa maa sa
ja ni‑in ja u'vi ñatuu nde ni sa'a sa.
24Te chukan kúu ja sukan ni iyo va'a sa nuu Iya Tátnuni ma,
te ni skuta'vi ña'a ya ja vii ja va'a,
vaa ni jini ya ja ni‑in ja u'vi ñatuu ni yo sa'a sa.
25Maa ni chi kúnda'vi ini ni ñayii nda'vi ini ma,
te ni‑yu'u ni‑ini ni jito va'a ni ñayii ni‑yu'u ni‑ini i
jinukuechi i nuu ni a, vi Su'si.
26Te vivii ko kuu ni ji'in ñayii vivii kúu i ji'in ni ma,
kovaa xndo'o xneni ni ñayii sa'a ndeva'a tna'a i ma.
27Vaa maa ni chi sa'a ni ja jin kaku ñayii
ka kuxii ka kunda'vi ini i ma,
kovaa sa'a ni ja jin ndakukan‑nuu ñayii ka jani ini
ja maa i ka kuu‑ka ma.
28Vaa maa ni sa'a ja tnúu ñu'u ini anua sa a,
te maa ni, vi Iya Tátnuni, ora ñatuu ní'i ini sa
nawa sa'a sa ma,
xtnuu ni ñu'u ni a nuu sa ma.
29Ja iyo ni ji'in sa, te kundee sa nuu ndaka ñayii
ka kanaa ji'in sa ma,
te ja maa ni, vi Su'si maa sa,
te kandava sa te kuiso sa ja ka ndesi yu'u ñuu ma, vi Su'si.
30Ichi káxtnu'u Su'si ma chi ichi va'a ichi ndaa kúu,
te tnu'u káxtnu'u ya a chi tnu'u ndaa tnu'u ndija kúu,
te ndaka ñayii ka kukanu ini ya ma
chi maa ya kasi ndee kasi ndoso
ja ñatuu ni‑in ja u'vi kaki'i ña'a.
31Vaa maa in‑ni Iya Tátnuni ma kúu Su'si o a,
te ñatuu na in‑ka ya iyo,
nú masu ja maa in‑ni ya kúu toto
nuu kuu koxtnee va'a o.
32Maa ya kúu iya táa tnu'u ndee tnu'u ndatnu,
te maa ya kúu iya chíndee ña'a ja jika va'a sa ichi ya a.
33Vaa maa ya sa'a ja kúñama ja'a sa
sukan kúñama ja'a isu ma,
te maa ya sa'a ja núkuiñi va'a sa onde sukun ma.
34Vaa maa ya kúu iya satu'va ña'a naxe sa'a sa
ja ki'in sa kanaa sa ma,
te maa ya káxtnu'u naxe tnii sa kuji kaa ma.
35Te maa ni kúu iya jasi vava'a ña'a,
sukan‑va'a kaku sa nuu ja u'vi ma,
te nda'a kua'a ni a chíndee ña'a, te iyo va'a sa,
te ja va'a xeen ini ni a,
te ni sa'a ni ja ni nduu sa ñayii kanuu xeen‑ka.
36Te maa ni sa'a ja ichi jika sa a, masu tnundo'o xeen,
te ñatuu nde kéndeka ja'a sa a.
37Ni sondikin sa ñayii ñatuu ka kunimani nuu sa ma,
te ni jan tna'a sa i, te onde ni xnaa sa i,
sana ni ndakokuiñi sa ma.
38Vaa ni xtnakue'e sa i, te ñatuu ni ka ndakoo‑ka i,
te ni ka kotuu‑nka maa i nuu ja'a sa a.
39Te maa ni ni taa tnu'u ndee tnu'u ndatnu ja ni kanaa sa ma.
Ni sa'a ni ja ñayii ñatuu ka kunimani nuu sa ma,
ni ka ndatna'a maa i ja kan‑nuu ja ni kundee sa nuu i ma,
te ni ka kotuu maa i nuu ja'a sa ma.
40Te ni sa'a ni ja ñayii ñatuu ka kunimani nuu sa ma,
ni ka ndakunu i kuan koo i,
te sukan, te ni kundee sa ni xnaa sa ndaka i,
ja ñatuu ka kuni va'a i nuu sa ma.
41Ni ka kayu'u i ka kana i na in chindee ña'a,
kovaa ñatuu na in ni chindee ña'a.
Ni ka ndakune'e i Iya Tátnuni ma,
kovaa masu nde ni yo niniso'o ya ja ka ka'an i ma.
42Te ûni ni xnaa sa i, sukan sa'a tikachiyaa ma,
te ni jiñu sa i sukan jiñu o nde'yu ichi ma.
43Ni sa'a ni ja ni kaku sa nuu ñayii ñuu ni kanaa ji'in sa ma,
te ni sa'a ni ja ni nduu sa in ñayii tátnuni nuu ndaka ñuu a,
te ni sa'a ni ja ñayii ñuu masu jini ña'a i ma,
te ni ka jinukuechi i nuu sa a.
44Ja ni ka jiniso'o i ja ká'an sa ma,
te ni ka kandija i ja ni tatnuni sa ma,
te sa'ya ñayii ñatuu jini ña'a ma,
ni ka kandija i ja ká'an sa ma.
45Ñayii in‑ka ñuu ma, ni ka yu'u i ja ni kundee sa ma,
te ka ni'i ka ni'i‑nka i ni ka nde koo i
nuu ka yinee va'a i ka chu'u i ma.
46Jayiñu'u kóo nuu ni, Iya Tátnuni.
Iya va'a xeen ini kúu ni,
vaa suu ni kúu toto nuu yoxtnee va'a sa a.
Te jayiñu'u kóo nuu ni ja kúu ni iya ni sa'a ja ni kaku sa ma.
47Vaa maa ni kúu iya sa'a ja jin ndachunaa ñayii ma
ndaka ja ka sa'a ka kuu ña'a i ma,
te maa ni sa'a ja ka kandija ñayii ndaka ñuu ma ja ká'an sa ma.
48Te maa ni ni sa'a ja ni kaku sa nuu ñayii
ñatuu ka kunimani nuu sa ma,
te maa ni sa'a ja tátnuni sa nuu ñayii
ni ka ndokuiñi ja jin kanaa i ji'in sa ma.
Saa vi, Su'si, te ni sa'a ni ja ni kaku sa nuu ñayii
ka kuni ja jin sa'a ndeva'a ña'a i ma.
49Te chukan kúu ja ndaka'an ndakachi sa
na in kúu ni nuu ñayii ka iyo ndaka ñuu a,
te kata sa te ndachiñu'u ña'a sa, vi Iya Tátnuni.
50Ndimaa ni kundee rey ni sunkani maa ni ma,
vaa ni kunda'vi ini ni de,
vaa maa ni ni sunkani de ja ko kuu de rey.
Ndaka sa'ya tata sa ja kúu sa David ma,
kunda'vi ini ni ni‑kani ni‑jika, vi Su'si maa sa.
Currently Selected:
Salmos 18: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
