Salmos 27
27
Salmo 27
Su'si ma kúu iya xtnuu nuu o te sa'a ya ja kaku o nuu ja u'vi ma
1Iya Tátnuni ma kúu ñu'u xtnuu nuu sa a ja ndása'a sa kuenda,
te maa ya sa'a ja kaku sa nuu ja u'vi ma,
te ñatuu na in sa'a ja koyu'u sa.
Vaa Iya Tátnuni ma kúu iya táa tnu'u ndee tnu'u ndatnu
ja koteku sa.
Chukan kúu ja masu na in sa'a ja koyu'u sa.
2Ndaka jichi ja ka ndatna'a ñayii ka sa'a ja u'vi ma
ja ñatuu ka kunimani i nuu sa a,
ka sa'a i ja kúxii ini sa, vaa ka kuni i ja jin xnaa ña'a i.
Kovaa maa i ni ka ndani'i, ni ka ndatna'a, te ni ka kotuu i,
te ni ka skenaa i maa i.
3Kovaa saña, visi ni ka ndakonduu ña'a soldado ma
ja jin ka'ni ña'a de,
kovaa masu koyu'u ini anua sa a.
Te visi ndaka ñayii ñuu ma, jin ndokuiñi i ja jin kanaa i ji'in sa,
kovaa saña chi kukanu ini sa Su'si ma ja maa ya chindee ña'a.
4In‑ni ja ni jikan‑ta'vi sa nuu Iya Tátnuni ma,
te chukan kúni sa ja na kuu sa'a sa:
Ja na koo sa ve'e Iya Tátnuni ma ndaka kivi koteku sa a,
te konde'ya konde'ya‑ni sa ya,
te kuni sa sukan vii sukan luu kaa ya ma,
te kakan‑tnu'u kakan‑tnu'u sa ya naxe ko sa'a ko kuu sa ma.
5Vaa maa ya chu'u ña'a ini ve'e nuu iyo ya ma
kivi kenda ja u'vi ma,
vaa nuu iyo ya ma koo va'a sa te kaku sa nuu tnundo'o ma,
vaa in nuu toto sukun sunkani ña'a ya.
6Sani te ndonenuu sa, sukan‑va'a jin kuni ña'a
ñayii ñatuu ka kunimani nuu sa ma
ja ni kaku sa nuu tnundo'o tnuneni ma,
te saña chi kivi sa nuu iyo Iya Tátnuni ma,
te sii ini ndakua'a sa ya kiti ka'mi sa nuu ya ma,
te kata sii ini sa, te ndachiñu'u sa Iya Tátnuni ma.
7Iya Tátnuni, koniniso'o ni ja jikan‑ta'vi jikan‑ta'vi sa nuu ni a,
te kunda'vi ini ña'a ni,
te ndakone'e ni ja jikan‑ta'vi sa nuu ni a, vi Su'si.
8Vaa ini anua sa ya sa'a ká'an:
“Va'a‑ka ja na ndanduku o Su'si ma”,
kúu sa ká'an sa.
Te chukan kúu ja ndánduku ña'a sa a, vi Su'si Iya Tátnuni.
9Máko chu'u ni ja ma ndani'i ña'a sa.
Máko ndakiti ini ni te xtandiyo ña'a ni nuu iyo ni a,
saña ja jinukuechi sa nuu ni a.
Vaa maa ni kúu iya chíndee chítuu ña'a,
te máko xndoo maa in‑ni ña'a ni, vi Su'si iya sa'a ja kaku sa ma.
10Visi na jin xndoo ña'a yuva sa ma ji'in si'i sa ma,
kovaa maa ni, vi Iya Tátnuni,
chi ndakuan‑ta'vi ña'a ni nuu iyo ni a.
11Iya Tátnuni, kaxtnu'u ni ichi ni ma, te skaka ña'a ni ichi ndaa ma,
sukan‑va'a ñayii ñatuu ka kunimani nuu sa ma,
máko jin kundee i nuu sa.
12Máko kua'a ni tnu'u ja ñayii ñatuu ka kunimani nuu sa ma,
te jin sa'a ña'a i sukan ka kuni maa i ma,
vaa ni ka kenda koo kua'a ñayii ka ka'an tnu'u,
kovaa masu ja ndaa kúu ja ka ka'an i ja kuu sa a,
te jin sa'a ndeva'a ña'a i ka kuni i.
13Nute ma kukanu ini sa Su'si ma chi xtaya sa,
kovaa kúkanu ini sa ya ja nani ka iyo o ñuu ñayivi a
chi kuni sa sukan kútoo ña'a ya ma te kúnda'vi ini ña'a ya ma.
14Kukanu ini ni Iya Tátnuni ma,
te ndani'i ni tnu'u ndee tnu'u ndatnu,
te máko xtaya ini anua ni a.
Saa vi, kondetu ni Iya Tátnuni ma.
Currently Selected:
Salmos 27: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
