Salmos 31
31
Salmo 31
Sukan kuña'a o Iya Tátnuni ma ja kúkanu ini o ya ma
1Iya Tátnuni, nuu maa in‑ni ni kúkanu ini sa,
te ni masu sanuu sa nawa jin ka'an maa ñayii ma,
vaa maa tnu'u ndaa tnu'u ndija ni a sa'a ja kaku sa.
2Su'si maa sa, koniniso'o ñukuun ni ja jikan‑ta'vi sa nuu ni a,
te kii ni ki chindee kunu ña'a ni,
sukan‑va'a kaku sa nuu tnundo'o tnuneni ma.
Vaa maa ni kúu kuenda kúu in toto núkuiñi vava'a ma,
te chukan kúu ja kúkanu ini ña'a sa,
te nuu maa ni iyo ndaka tnu'u ndee tnu'u ndatnu
ja sa'a ja kuu kaku sa nuu tnundo'o tnuneni ma.
3Vaa maa ni kúu kuenda kúu in toto núkuiñi vava'a ma,
te maa ni kúu sukan kúu in ve'e sukun sukun
nuu kuu kaku sa ma,
vaa maa ni skaka ña'a ichi va'a ma,
te ja sukan sa'a ni ma, te jin ndachiñu'u ña'a ñayii ma.
4Ndatava ña'a ni nuu yo'o ni ka satu'va i ja ni ka tnii ña'a i ma,
vaa nuu maa ni kúu nuu kuu kaku sa, vi Su'si.
5Te nuu nda'a maa ni ndásonee sa ini anua sa ya,
vaa maa ni ni chunaa ja ni kaku sa nuu ja u'vi ma.
Iya Tátnuni, maa ni kúu Su'si ndija.
6Saña, vi Su'si, chi ñatuu játna ini sa ndaka ñayii
ka kukanu ini tna'a ja masu Su'si ka kuu ma.
Vaa saña chi maa ni, vi Iya Tátnuni, kúkanu ini sa.
7Te koo sii ini xen‑xeen sa,
vaa maa ni kúnda'vi ini ña'a,
vaa ni jini ni ja kúxii ini sa ma,
te ni jini maa ni ja ini anua sa ya, ndó'o néni i ma.
8Te ñatuu ni wa'a ni tnu'u
ja suchi ñatuu ka kunimani nuu sa ma, te jin ni'i ña'a i
chi su'va ni ndasunkani ña'a ni nuu nune kua'a‑ka ma.
9Kunda'vi ini ña'a ni, vi Iya Tátnuni, vaa ndó'o néni sa,
te ve jin kuita‑nka nduchinuu sa ya, ji'in anua sa ya,
ji'in ni‑ka'nu yikikuñu sa ya, ja kúxii ini sa.
10Ndaka kivi vee sa ñuu ñayivi a,
ve ndi'i sa sa'a maa tnundo'o tnuneni kénda nuu sa a,
te ñatuu‑ka na tnu'u ndee tnu'u ndatnu neva'a sa
ja sa'a ña'a maa ja u'vi ma,
te yiki sa ya chi ve jin kuita i.
11Te ndaka ñayii ñatuu ka kunimani nuu sa ma
chi kuenda tnu'u ja in mi'i‑nka‑ni kúu sa nuu i ma,
te ñayii iyo yatni ji'in sa ma, vi'i‑ka ka sa'a ña'a i,
te ñayii ka jini ña'a nde kua'an nde vee sa ma
chi ka jinu ndee ña'a i kuan koo i.
12Te ni ka ndunaa ña'a i, kuenda tnu'u ja in ñayii jâ ni ji'i kúu sa,
te sukan kúu in vasu jâ ni ta'vi,
sukan‑nka kúu sa nuu i ma.
13Vaa jiniso'o sa ja kua'a ñayii ma, ka ka'an i tnu'u sa ma,
te ka xsiu'u ña'a i nde kua'an nde vee sa ma.
Te nú ka ndatna'a i, te ka ndatnu'u tna'a i ja jin ka'ni ña'a i,
vaa ñatuu nde ka kunimani i nuu sa.
14Kovaa saña chi maa ni kúkanu ini sa, vi Iya Tátnuni,
te ká'an sa nuu ni ja maa ni kúu Su'si sa.
15Nuu nda'a maa ni iyo sa, te máko kua'a ni tnu'u
ja jin tnii ña'a ñayii ñatuu ka kunimani nuu sa ma
te ka sondikin ña'a i ma.
16Te saña ja jinukuechi sa nuu ni a,
sa'a ni ja jin kuni i ja iyo ni ji'in sa.
Te ja nda'vi ini ni a, te sa'a ni ja kaku sa.
17Te máko kua'a ni tnu'u ja tna'a sa ja kan‑nuu, vi Iya Tátnuni,
vaa nuu maa in‑ni ni ni jikan‑ta'vi sa ma.
Te tetniñu ni ñayii ka sa'a ja u'vi ma
nuu kuan koo ñayii ni ka ji'i ma,
sukan‑va'a máko jin ka'an‑ka i.
18Sa'a ni ja jin nduñi'i ñayii ka ka'an tnu'u
ñayii ka sa'a ja va'a ja ndaa ma.
Vaa másu nde ka tnii i kuenda, te ka ka'an ndeva'a i,
te ka saxiko i ñayii ka sa'a ja va'a ja ndaa ma.
19Ja vava'a kúu ndaka ja sa'a ja kúu ni
ja jin kuu ndaka ñayii ka sa'a sukan tátnuni ni ma,
vaa maa ni chi sa'a ni ja jin kuni ndaka‑ka ñayii ma
sukan vivii chíndee ni ñayii ka kukanu ini ña'a i maa ni ma,
vi Su'si.
20Te maa ni, jasi ndee jasi ndoso ni i nuu ja u'vi ma,
vaa iyo ni ji'in i, te sa'a ni ja ka kaku i
nuu ñayii ka kuni ja jin sa'a ndeva'a ña'a i ma.
Te ini ve'e ni ma ka yinee va'a i,
te sa'a ni ja ñatuu ka jiniso'o i ja ka ka'an ndeva'a ñayii
ñatuu ka kunimani nuu i ma.
21Iya sa'a ja vii ja va'a kúu Iya Tátnuni ma, vaa ni kutoo ña'a ya,
te kua'a xeen ja vii ja va'a ni sa'a ya ja kuu sa
ora nuu ni ndo'o ni neni sa ma.
22Kovaa ni kenda ja ni jani ini sa ja jâ ni xndoo ña'a ni
te kúu maa kúu in‑nka sa nkuu.
Kovaa nuu ni ndakune'e ña'a sa ja na chindee ña'a ni ma,
te maa ni chi ni jiniso'o ni ja ni ka'an sa ma.
23Ndaka ni ja ñatuu‑ka na ja u'vi ka sa'a‑ka ni a,
jin kutoo ni Iya Tátnuni ma chi jito va'a ya ñayii
ja ni‑yu'u ni‑ini i ndáchiñu'u i ya ma.
Kovaa ñayii ka jani ini ja maa i ka kuu‑ka ma
chi sa'a ya ja jin ndando'o jin ndaneni i
ndaka ja ka sa'a ka kuu i ma.
24Jin ku'un vava'a ini ni,
te jin ndatnii ni tnu'u ndee tnu'u ndatnu ini anua ni a,
ndaka ni ja ka kukanu ini ni Iya Tátnuni ma.
Currently Selected:
Salmos 31: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
