Salmos 36
36
Salmo 36
Sukan kúnda'vi ini ña'a Su'si ma
1Maa ja u'vi sa'a ñayii játna ini ja sa'a i ja u'vi ma,
jiña'a i ini anua ñayii ma
ja máko ku'un ini i ja koyu'u i Su'si ma.
2Te jani ini i ja va'a‑ni kúu ja sa'a i ma,
te másu nde ndása'a i kuenda
ja saxiko Su'si ma ja u'vi sa'a i ma.
3Vaa ndimaa tnu'u kini tnu'u ndeva'a ká'an i,
te xnda'vi i in‑ka ñayii ma,
te jâ ni skenaa i maa i,
vaa jâ ni ndunaa i ja sa'a i ja va'a ma.
4Te nú kátuu i nuu jito kixi i ma,
te yikuu i jani ini i naxe sa'a‑ka i ja u'vi ma.
Ûni játna ini xeen i ja sa'a i ja u'vi ma.
Chukan kúu ja ñatuu kúu xndoo i ja u'vi sa'a i ma.
5Kovaa maa ni, vi Iya Tátnuni, chi ja nda'vi ini ni a
chi ka'nu xen‑xeen, sukan ka'nu andivi a.
Te sukan sukun nuu iyo viko ma,
sukan ndija ni ja ni skuiso ni
ja sa'a ni ja vii ja va'a nuu ñayii kándija ña'a ma.
6Te sukan ka'nu sukun yuku ma,
sukan kúu ja sa'a ndaa sa'a ndija ni
ja kuu ñayii iyo va'a nuu ni a.
Te sukan kunu ka'a ndute mar ma,
sukan iyo tnu'u tátnuni ni ma,
vaa ni masu kuu jin jaku'ni ndi'i ini sa
nawa kúu ja jani ini ni ja sa'a ni ma.
Saa vi, Su'si Iya Tátnuni, jito va'a ni ñayii ma ji'in kiti ma.
7¡Naka vii naka luu kúu tnu'u nda'vi ini ni a, vi Su'si!
Te chukan kúu ja ka kukanu ini ña'a ñayii ma
ja jin koo va'a i nú iyo ni ji'in i ma,
sukan ka kuu chili ma ja chii ndijin si'i ti ma
kúu nuu kuu jin kaku ti ma.
8Te ka iyo sii ini xen‑xeen ñayii ma ja ka iyo i ve'e ni a,
vaa masu nawa ja'ni ña'a i ja jin kaa i,
te maa ni wa'a ndute asi asi jika yute nuu iyo ni a ja jin ko'o i.
9Vaa maa ni kúu iya sa'a ja jin koteku ini anua sa a,
sukan sa'a ndute ma ja jin koteku yikikuñu sa a.
Saa vi, Su'si, te maa ni xtnuu ñu'u nuu sa a,
te ka kundijin nuu sa naxe jin sa'a jin kuu sa.
10Ndimaa kúnda'vi ini ni ñayii ka jini ña'a i maa ni a,
te sa'a ndaa sa'a ndija ni ja jin kuu i,
vaa ka iyo vii ka iyo ndaa ini anua i ma.
11Su'si maa sa, máko kua'a ni tnu'u ja jin kuiñu ndoso ña'a
ñayii ka jani ini ja maa i ka kuu‑ka ma,
te ni a kenda sa nuu nda'a ñayii ka sa'a ja u'vi ma
te jin ko sa'a ndeva'a ña'a i.
12Jín konde'ya o sukan ka kotuu maa ñayii ka sa'a ja u'vi ma
ñuu ñayivi a, te yukan chi másu jin ndakoo‑ka i.
Currently Selected:
Salmos 36: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
