SAN MARCOS 4
4
1Te yumar ni quejéé tucu Jesús steén yā jnūhun. Te ni cutútú cuéhē ndasɨ́ ñáyuu nuū yā, te jeē yúcuan ní quɨ̄vɨ ya ni cucōo ya ini ɨɨn barco nuū mar. Te tāca ñáyuu un cáyūcú i yumar. 2Te jíín jnúhun yátá ni steén yā cuehē jnūhun nuū i, te súcuan ni cahān yā:
3Cuni nahín jíjnáhan ró: ɨɨn tēe cate trigo, ni quenda de jeē cáte de. 4Te ná ni quejéé de jéte de, te jecu trigo ni jitē yuhíchi. Te ni quecoo saa, ni cayeji tɨ̄. 5Te jecu gā trigo ni jitē nuū ñúhun yuū, nuū tú cuehē ñuhun. Te yachī‑ni ni cane, chi tu cóquin ñuhun. 6Te nuū ní cane niāndii, te ni ichī‑ni, te ni casun, chi tu ní níhín nuū quihín yoho. 7Te jecu gā trigo ni jitē nuū náne iñu. Te ni jehnu iñu ún, te ni jesɨ nuū, te tu ní jéhe nunī. 8Te jecu ni jitē nuū ñúhun váha. Te ni cane, te ni jehnu, te ni jēhe cuehē nunī. Sava ni jēhe ocō uxī jeē ɨ́ɨn ɨɨn nunī, te sava ga ni jēhe unī xico, te sava ga ni jēhe ciento. Achí yá.
9Yūcuán na te ni cahān yā jiín de:
Tāca róhó jéē jíni sōho, na chúsóhó ró. Achí yá.
Najehē cahán yā máni jnūhun yátá
(Mt. 13.10‑17; Lc. 8.9‑10)
10Yūcuán na te ni quendōo máá na yā, jiín ndɨhúxí uū tēe cáscuáha jíín yá, jiín jecu gā ñayuu cáhīin jíín de. Te ni cacajnūhún de ya na vé cuní cahān jnūhun yátá un. 11Te ni cahān yā jiín de:
Róhó, chi sáha Yaā Dios jeē cájecūhun ni rō jnūhun ni yɨsāhi yáha, ndese quɨ́vɨcoo ñayuu ndaha ya ndacu ya jniñu nuū i. Te ñayuu jeē cáhīin sɨ́ɨn sɨquɨ̄, chi máni jíín jnúhun yátá cáhán rī tāca jnúhun jíín i. 12Súcuan cáhán rī návāha vēsú cájito i, te quendōo i nájnūhun jeē tú na vé ni cájito i. Te vēsú cájini sōho i, te ma jécūhun ni i, te ma násāma ini i quɨ̄vɨcoo i nuū rī, te ma cóo jnūhun cáhnu ni nuū cuéchi i, áchí yá.
Jeē ní castūhun cájí yá jnūhun yátá tée jéte trigo
(Mt. 13.18‑23; Lc. 8.11‑15)
13Te ni cahān gā yā jiín de jíjnáhan de:
Núu tu cájecūhun ni rō jnūhun yátá yáha, ¿te ndese jecūhun ni rō tāca gá jnūhun yátá núu súcuan? 14Tēe jéte trigo cúu tēe scuíté núu jnūhun Yaā Dios. 15Te trigo jeē ni jítē yuhíchi cúu nájnūhun ánuá sava ñayuu. Chi cájini nahín i jnūhun ya, te ná ni cajini i, te quíji‑ni Satanás te quénde‑ni jnūhun ini anuá i. 16Te trigo jeē ni jítē nuū ñúhun yuū, chi cúu nájnūhun ánuá sava ñayuu cájini nahín jnúhun, te yachī‑ni cájetáhú i te cácusɨɨ̄ ni i jíín. 17Te tu cúcutú jnúhun ún ini anuá i, te jecu‑ni quɨvɨ̄ cájetáhú i. Te núu ni quejéé jnúndóho, chí jíto xeēn ñayuu i sɨquɨ̄ jnúhun ún, te quéjéé nácani yátá ni i. 18Te jeē ni jítē nuū náne iñu cúu nájnūhun jecu gā ñayuu. Chi vēsú ni cajini sōho i, 19te cándɨhvɨ̄ ni i sɨquɨ̄ jeē iyó ini ñayɨ̄vɨ yáha. Te cácuni i cucúcá i, te stáhú un i jeē cutóó ni i sɨquɨ̄ tācá ndajníñu. Te ndɨhɨ jeē yáha cácujnéñu i jíín, te jésɨ nuū jnúhun ya, te tu íje i jíín jnúhun ya. 20Te trigo jeē ni jítē nuū ñúhun váha cúu nájnūhun ñayuu cájini nahín jnúhun, te cájetáhú i, te cáhije i jíín jnúhun ya. Te sava i cúu nájnūhun nunī jeē jéhe ocō uxī jeē ɨ́ɨn ɨɨn, te sava i jéhe unī xico, te sava ga i jéhe ciento. Achí yá.
Jnūhun yátá sɨ́quɨ̄ lámpara
(Lc. 8.16‑18)
21Suni ni cahān yā jiín de:
Núu nástɨ́ɨn ñayuu ɨɨn lámpara, ¿a chúne i chīji ɨɨn cajón chí chíji jīto? Tuú, chi jéni i nuū sucún návāha cundijin. 22Te suni súcuan, tu íyó ni ɨɨn jnūhun sāhi jéē ma cúni ñayuu, chi ndɨhɨ tāca jnúhun natūu ndijin te cuni ñayuu. 23Tāca róhó jéē jíni sōho, na chúsóhó ró, áchí yá.
24Te suni ni cahān yā jiín i:
Cuni sōho vāha ró. Chi cūhva jeē chusóhó ró jnúhun Yaā Dios, suni cūhva un cuáha ya nuū rō, te víhyá gā cuāha ya nuū maá ró jeē chusóhó váha ró. 25Chi ñayuu je jécūhun ni, stéén gā yā nuū i. Te ñayuu tu cándíje, máá jecu jeē jiní i ún, sa suhva naa. Achí yá.
Jnūhun yátá sɨ́quɨ̄ trigo jeē jéhnu
26Te ni cahān gā yā:
Súcuan cúu jeē ndácu Yaā Dios jniñu nuū ñáyuu: Cúu nájnūhun trigo jeē ní jete ɨɨn tēe. 27Yūcuán na te quíxí de te ndónda de, te súcuan jíca quɨvɨ̄ cuahān. Te trigo un cáne te jéhnu. Te máá de tu jíní de ndese cúu jeē jéhnu. 28Chi máá ñuhun sáha jeē jéhnu trigo, xīhna gā yucū, sáá te cáne yoco, yūcuán na te íje máá núnī. 29Te núu ni cuaan trigo un, te quéjéé ñáyuu cájehnde i, chi je ni jinū quɨvɨ̄ tahndé. Achí yá.
Jnūhun yátá sɨ́quɨ̄ ndɨquɨn mostaza
(Mt. 13.31‑32; Lc. 13.18‑19)
30Te suni ni cahān yā:
Na cáhán rī ɨɨn jnūhun yátá návāha cuni rō ndese ndúcuehē ñayuu jeē ndácu Yaā Dios jniñu nuū. 31Ndúcuehē i nájnūhun jéhnu ɨɨn ndɨquɨn mostaza jeē jéquin i nuū ñúhun. Te yūcuan cúu ɨɨn ndɨquɨn lúlí gá vēsú tācá ndɨquɨn jeē iyó. 32Te ná ni jequin i, te cáne te jéhnu ga vēsú tāca gá yucū, te cúnáhnu ndaha. Te tācá saa chi sáha tɨ tacā tɨ̄ nuū cuándahū xinī ún. Achí yá.
Jeē máni jnūhun yátá cáhán yā jiín i
(Mt. 13.34‑35)
33Te cuehē jnūhun yátá súcuan ni cahān yā jiín ñáyuu, núu nasaa cánda i jecūhun ni i. 34Te tāca jéē ni stéén yā, máni máá jnúhun yátá ní cahān yā jiín i. Te nuū tēe cáscuáha jíín yá chi ni nacastūhun cájí yá jnūhun ún.
Jeē ní jecuɨñɨ̄ tachī níhin jíín mar ni sáha ya
(Mt. 8.23‑27; Lc. 8.22‑25)
35Te jeē cuácuaa quɨvɨ̄ ún, te ni cahān yā jiín tée cáscuáha jíín yá:
Na yáha yó quíhīn yō ɨnga lado mar, achí yá.
36Te ni casquéndōo de ñayuu cuehē ún, te ni quɨ̄vɨcoo de ini barco nuū je íne Jesús, cuangoo de jíín yá. Te suni cuangoo jecu gā barco jiín de jíjnáhan de. 37Te ni jequɨ̄hɨ ɨɨn tachī níhin, te ni stónda ndute mar, te ni quɨ̄vɨ ini barco. Te je yajni chitú ndute ini barco. 38Te Jesús cátú yá yatā de ini barco, quíxí yā te yɨ́hɨ ɨɨn sahma cástíhi xinī yā. Te ni castónda de ya, te ni cacahān de:
Maestro, ¿á tu sáha ní cuenta jeē quēe yó chíji ndute te cuu yō? achí de.
39Te ni ndocuɨñɨ̄ yā, te ni cahān yā nuū tachí níhin un jíín núū mar:
Jecuɨñɨ̄ te nayúú‑ni coo ró, áchí yá.
Te ni jecuɨñɨ̄ tachī, te ni cuu nayúú íī‑ni. 40Te ni cahān yā jiín de jíjnáhan de:
¿Naun cáyūhú ndasɨ́ ró? ¿Naun tu cácandíje ró jéē cācu ró sáha ri?
41Te yōhyo ni cayūhú de, te ni cacahān de jíín jnáhan de:
¿Ndé ɨɨn ga cúu tēe yáha jéē nde tachī níhin jíín mar cájetáhú jéē cahán de? áchí de.
Tēe Gadara jeē ndóho tachī
(Mt. 8.28‑34; Lc. 8.26‑39)
Currently Selected:
SAN MARCOS 4: mibDBL
Highlight
Share
Copy
Want to have your highlights saved across all your devices? Sign up or sign in
© 1973, Wycliffe Bible Translators, Inc. All rights reserved.
