MARK 15
15
Jesu a̧a̧ ti Pilat
(Zɔk Mt 27.1-2,11-26; Lk 23.1-5,13-25; Jn 18.28—19.16)
1Mɛ́ tutuyɛ sut, o gasa wan-ɗafi-sɔ̧ baa keta, o kuti-wi, bá nɛ̀ o wi-usi-heembea in gasa-gɔna-kita nɛ̀ oi-aa lɛŋ. Wa hɛra Jesu kaɗi, ɓɛɛ wa mgbɔ a̧ yaknɛ, nɛ́ɛ̀ e er Pilat. 2Pilat aka a̧: «Mɛ́ nɛ́ Wannu ko o Juif nde?» Ɓɛɛ Jesu tɔ̧: «Nɛ́ mɛ́ a̧ tɔ̧.» 3Nɛ́ mɔ'ɔ nɛ̀ o gasa wan-ɗafi-sɔ̧ ɓira wen e nú-a nɛ̀ dɔka-a. 4Ɓɛɛ Pilat ak a̧ woyo: «Mɛ́ kifi ŋma nú-wen na nde? Mɛ́ zii gba wen nɛ̀ wa ɓir e nú mɛ'ɛ na?» 5Ɓɛɛ Jesu kifi ŋma nú-wen ɓukui na. Mɔ‘i gɔna ɗɛɗɛ Pilat batɛ.
6Tɛ́ wese gbaŋa lɛŋ, Pilat gbo nɛ́ ŋma wi-zɔɓɔ kpɔk pi̧ nù, wan nɛ̀ o bíí kɔ̧a̧. 7Ŋma bíí nin-a'e Barabas a̧a̧ kɔ̧ zɔɓɔ in o wi nɛ̀ gbɛɛ so bíí tɛ ŋgimbi báá-zu nɛ̀ ŋgɔn in o gasawi. 8Nɛ́ mɔ'ɔ nɛ̀ giiwi nɛ̀ɛ̀ tɛ́ Pilat, ɓɛɛ ak a̧ ha̧ a̧ mɛ gbo ŋma wi-zɔɓɔ kpɔk pi̧ nù ha̧ wa, hee mɔ'ɔ n'aa de ɓɔnsɛnɛ ga. 9Ɓɛɛ a̧ kifi nú ha̧ wa: «Ɛ́nɛ́ kɔ̧ɔ̧ a̧‘m gbo nɛ́ Wannu ko o Juif h’ɛ́nɛ́ nde?» 10Wen a̧ iŋa nɛ̀ de-a'e o gasa wan-ɗafi-sɔ̧ aa nɛ́ see mɔ in Jesu, e nɛ̀ a̧ er a̧, 11ɓɛɛ o gasa wan-ɗafi-sɔ̧ a wen ha̧ giiwi mɛ ak Pilat mɛ gbo nɛ́ Barabas pi̧ nù ha̧ wa. 12Ɓɛɛ Pilat ak wa woyo: «Nɛ́ ge ɛ́nɛ́ kɔ̧a̧ ha̧‘m mɛ de in wi n’ɛnɛ sa'e Wannu ko o Juif ge nde?» 13Ɓɛɛ wa gai mɔ woyo: «Ɛ̀nɛ̀ mgbóí nɛ́ a̧ zu te-diŋa.» 14Ɓɛɛ Pilat tɔ̧ ha̧ wa: «Nɛ́ ge ɗaŋmɔ ge á̧ a̧ dee bɔɔ ge?» Ɓɛɛ wa gai mɔ nɛ̀ ŋgaya-a siti gan kuti-a: «Ɛ̀nɛ̀ mgbóí nɛ́ a̧ zu te-diŋa wa!» 15Nɛ́ mɔ'ɔ nɛ̀ Pilat gboo Barabas pi̧ nù ha̧ wa, wen ha̧ see-wa mɛ ga̧. A̧ ha̧a̧ nú, ɓɛɛ wa gusi Jesu, ɓɛɛ a̧ e a̧ er o wi-biro ha̧ wa mɛ nɛ̀ɛ́ mgboi a̧ zu te-diŋa.
Wa guu tɛnmɔ zu Jesu
(Zɔk Mt 27.27-31; Jn 19.2-3)
16Nɛ́ mɔ'ɔ nɛ̀ o wi-biro mgbɔɔ Jesu si bee-gara, kɔ̧́ tua ko Pilat, ɓɛɛ wa mɔi̧ oi o dɔka wi-biro lɛŋ. 17Wa pi̧i̧ gasa gbɛ̧ laa tɛ-a, kar tɛnmɔ gu zu-a, 18ɓɛɛ zɛkɛɗ‘a'e: «Ɛ̀nɛ̀ wór mɔ wa, wannu ko o Juif!» 19Wa gusa zu-a nɛ̀ tia, wa aa sap tɛ-a, ɓɛɛ wa gbɛ zugur nù ti a̧ gasi nɛ̀ a̧. 20Wa zɛkɛɗa a̧ kaɗi, ɓɛɛ wa kpɔ̧i̧ gbɛ̧ laa yinɛ, pi̧ nɛ́ laa kɔ̧-a̧ tɛ-a woyo, ɓɛɛ wa mgbɔ a̧ si zan mɛ mgboi a̧ zu te-diŋa.
Wa mgboia Jesu zu te-diŋa
(Zɔk Mt 27.32-44; Lk 23.26-43; Jn 19.17-27)
21Wa baa Simɔŋ be Sirɛn, dáà ko Alɛkzandrɛ in Rufus nɛ̀ pii kɔ‘i pii nɛ nú fɔ nɛ̀ mgbánà, ha̧ a̧ mɛ tui te-diŋa ko Jesu.#Rɔm 16.13 22Ɓɛɛ wa mgbɔ Jesu nɛnɛ si fara nɛ̀ wa sa'e Gɔlgɔta, mɛ̀ nɛ́ wen nɛ̀ tɔ̧: «Fara Koŋgoi-zu». 23Wa kɔ̧ɔ̧ so mɛ ha̧ dɔ̧ɔ̧ nɛ̀‘i zaŋa nɛ̀ ŋma siɗi-te ha̧ Jesu mɛ nɔ, ɓɛɛ a̧ nɔ na. 24Nɛ́ mɔ'ɔ nɛ̀ wa mgboia a̧ zu te-diŋa, ɓɛɛ wa bi mbaɗi, kɛ̧ nɛ̀ laa kɔ̧-a̧ nɛ̀ er ŋmaa.#Gima 22.19 25Ŋgimbi nɛ̀ wa mgboia nɛ̀ a̧ zu te-diŋa'i, ká wese daŋa ŋgai kaɗi. 26Wa yɔra gba̧a̧ wen fio kɔ̧-a̧ e zu a̧, hee mɔ'ɔ ga: «Wi’ɛ nɛ́ Wannu ko o Juif.» 27Wa hɛra o kpɔ̧i̧-gba̧a̧-nin yiitoo katɛ a̧, kpɔk nɛ̀ war wii-er-a, ɓii-aa nɛ̀ war gale, kóó o ndé zu te-diŋa kɔ‘i.
[ 28Hegɔ, Yɔramɔ nɛ tɔ̧ɔ̧ so'e: «Wa tɔra a̧ mgbara o ɗaŋwi» wó‘i, hɔɔ gba̧a̧.]#Es 53.12
29O wi nɛ ɓir yak fara'i da̧a̧ a̧, wa mi̧a zu-wa, ɓɛɛ wa tɔ̧: «A̧i̧yoo! Mɛ́ yàá-gbin-tua ko Sɔ̧ yinɛ, ɓɛɛ mɛ mboo mbe-a zaŋ zɛ taar wó'ɛ,#Gima 22.8; Gima 109.25; Mk 14.58; Jn 2.19 30mɛ̀ kpásí tɛ-mɛ nɛ̀ tɛ-mɛ, a̧ mɛ̀ zír zu te-diŋa’ɛ!» 31Nɛ́ mɔ'ɔ nɛ̀ o gasa wan-ɗafi-sɔ̧ in o wi-usi-heembea zɛkɛɗa a̧ mbɛt, tɔ̧ nɛnɛ ha̧ o ŋmaa'e: «A̧ baa kpasi so o ŋma bíí, ɓɛɛ sa a̧ nyɛm mɛ kpasi tɛ-a náà, hee ge? 32Mɛsii, Wannu Israɛl a̧ zír zu te-diŋa kinii, h’ɛ́ɛ́ zɔk, ɛ̀ɛ̀ kɔ̧́ ɗɔaa ha̧ a̧ gɔ!» Ɓɛɛ o wi nɛ̀ wa hɛra zu te-diŋa katɛ a̧ da̧ a̧ mbɛt.
Fio ko Jesu
(Zɔk Mt 27.45-56; Lk 23.44-49; Jn 19.28-30)
33Ŋgimbi nɛ̀ wese hɔɔ see zu, tum baa nù fara lɛŋ, hɔ gira-wese. 34Mɛ́ gira-wese, Jesu hiɗa mɔ nɛ̀ ŋgaya-a tɔ̧ nɛnɛ‘e: «Eloi, Eloi, lama sabaktani.» Mɛ̀ nɛ́ wen nɛ̀ tɔ̧: «Sɔ̧ kɔ‘m, Sɔ̧ kɔ‘m wa! Wen ge s’ɛnɛ ea'm duk ge?»#Gima 22.2 35O ŋma bíí nɛ̀ yaa so hi̧i̧, zia mɔ‘i, ɓɛɛ tɔ̧: «Ɛ̀nɛ̀ zíí, a̧ sa nɛ́ Elii.» 36Ŋma bíí mgbara wa maa yì, nɛ́ɛ̀ pi̧ saala ɗɔɔ kpa̧i̧a̧ dɔ̧ɔ̧, sɔk nú tia, ɓɛɛ nyɛi̧ e nú Jesu mɛ zɔɓi, ɓɛɛ wi’ɛi tɔ̧: «Ɛ̀nɛ̀ é kaŋ; ɛ̀ɛ̀ zɔ́k kà Elii nɛ́ tɛ̀ɛ́ tɛ, mɛ́ zir a̧ zu te-diŋa e nù!»#Gima 69.22 37Nɛ́ mɔ'ɔ nɛ̀ Jesu hiɗa mɔ nɛ̀ ŋgaya-a, ɓɛɛ fe. 38Ɓɛɛ babir-laa kɔ̧́ Tua ko Sɔ̧ mbaŋ nɛ̀ ŋgɔn hɔ ɗɔɔ.#Gboa-a 26.31-33 39Wi-duk-zu o wi-biro gɔmŋmaa nɛ̀ yora ti Jesu, zɔka fea-a n'aa fea'i, ɓɛɛ tɔ̧: «Nɛ́ kpasawen, wi’ɛ duka so nɛ́ Bem ko Sɔ̧!» 40O ŋma okoo yaa so sɛn hi̧i̧ nɛ̀ nyɛi̧a-a mbɛt, zɔk nɛ̀ mɔ. Marii Magdala, Marii nàà ko Jak geɗek-a in Jozɛs, ká bá nɛ̀ Salomee a̧a̧ so mgbara wa mbɛt.#Lk 8.2-3 41Wa duka so nɛ́ ɗoŋ Jesu, de nɛ̀ tom ha̧ a̧, ŋgimbi n'aa duka so nú Galilee mɛ. O ŋma okoo nɛ̀ dɔka-a, nɛ̀ daŋa so in a̧ si Jerusalɛm, yaa hi̧i̧ mbɛt.
Guna Jesu
(Zɔk Mt 27.57-61; Lk 23.50-56; Jn 19.38-42)
42Mɔ ga̧a̧ kaɗi, ɓɛɛ hee mɔ'ɔ nɛ̀ wese'i duka nɛ́ wese-ɗafi-mɔ ga, mɛ̀ nɛ́ wen nɛ tɔ̧, ɔɔ-zɛ kpɔk nɛti ha̧ wese-ɔm-tɛ, 43Jozɛf be Arimatee, ŋma gasa wi-gɔn-kita ko o Juif, nɛ̀ pɛm nɛ́ Wan ko Sɔ̧ mbɛt, nɔɔ ŋgiɗi mɛ nɛ̀ɛ́ ak wɔr Jesu er Pilat. 44Ɗɛɗɛ Pilat gɔna wen n'aa zia'e Jesu fee kaɗi, ɓɛɛ a̧ sa ŋma wi-duk-zu o wi-biro gɔmŋmaa, ɓɛɛ ak a̧ kà Jesu nɛ́ fee nɛ̀ mbetɛ. 45Ɓɛɛ gasawi'i tɔ̧ ha̧ Pilat'e, Jesu fee kaɗi, ɓɛɛ Pilat e war ha̧ Jozɛf mɛ ba wɔr-aa. 46Nɛ́ mɔ'ɔ nɛ̀ Jozɛf hi̧fa bu-ndɔmbɔ, ɓɛɛ zir Jesu zu te-diŋa, ye a̧ nɛ̀ bu-ndɔmbɔ‘i, ɓɛɛ nɛ́ɛ̀ gun a̧ sɛn kɔ̧́-fio nɛ̀ wa za̧a̧ so kɔ̧́ ta, ɓɛɛ a̧ kin ta kpe nɛ̀ nú-a. 47Marii Magdala in Marii nàà ko Jozɛs yaa zɔk nɛ̀ fara nɛ̀ wa guna a̧ sɛnɛ‘i.
Currently Selected:
MARK 15: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
MARK 15
15
Jesu a̧a̧ ti Pilat
(Zɔk Mt 27.1-2,11-26; Lk 23.1-5,13-25; Jn 18.28—19.16)
1Mɛ́ tutuyɛ sut, o gasa wan-ɗafi-sɔ̧ baa keta, o kuti-wi, bá nɛ̀ o wi-usi-heembea in gasa-gɔna-kita nɛ̀ oi-aa lɛŋ. Wa hɛra Jesu kaɗi, ɓɛɛ wa mgbɔ a̧ yaknɛ, nɛ́ɛ̀ e er Pilat. 2Pilat aka a̧: «Mɛ́ nɛ́ Wannu ko o Juif nde?» Ɓɛɛ Jesu tɔ̧: «Nɛ́ mɛ́ a̧ tɔ̧.» 3Nɛ́ mɔ'ɔ nɛ̀ o gasa wan-ɗafi-sɔ̧ ɓira wen e nú-a nɛ̀ dɔka-a. 4Ɓɛɛ Pilat ak a̧ woyo: «Mɛ́ kifi ŋma nú-wen na nde? Mɛ́ zii gba wen nɛ̀ wa ɓir e nú mɛ'ɛ na?» 5Ɓɛɛ Jesu kifi ŋma nú-wen ɓukui na. Mɔ‘i gɔna ɗɛɗɛ Pilat batɛ.
6Tɛ́ wese gbaŋa lɛŋ, Pilat gbo nɛ́ ŋma wi-zɔɓɔ kpɔk pi̧ nù, wan nɛ̀ o bíí kɔ̧a̧. 7Ŋma bíí nin-a'e Barabas a̧a̧ kɔ̧ zɔɓɔ in o wi nɛ̀ gbɛɛ so bíí tɛ ŋgimbi báá-zu nɛ̀ ŋgɔn in o gasawi. 8Nɛ́ mɔ'ɔ nɛ̀ giiwi nɛ̀ɛ̀ tɛ́ Pilat, ɓɛɛ ak a̧ ha̧ a̧ mɛ gbo ŋma wi-zɔɓɔ kpɔk pi̧ nù ha̧ wa, hee mɔ'ɔ n'aa de ɓɔnsɛnɛ ga. 9Ɓɛɛ a̧ kifi nú ha̧ wa: «Ɛ́nɛ́ kɔ̧ɔ̧ a̧‘m gbo nɛ́ Wannu ko o Juif h’ɛ́nɛ́ nde?» 10Wen a̧ iŋa nɛ̀ de-a'e o gasa wan-ɗafi-sɔ̧ aa nɛ́ see mɔ in Jesu, e nɛ̀ a̧ er a̧, 11ɓɛɛ o gasa wan-ɗafi-sɔ̧ a wen ha̧ giiwi mɛ ak Pilat mɛ gbo nɛ́ Barabas pi̧ nù ha̧ wa. 12Ɓɛɛ Pilat ak wa woyo: «Nɛ́ ge ɛ́nɛ́ kɔ̧a̧ ha̧‘m mɛ de in wi n’ɛnɛ sa'e Wannu ko o Juif ge nde?» 13Ɓɛɛ wa gai mɔ woyo: «Ɛ̀nɛ̀ mgbóí nɛ́ a̧ zu te-diŋa.» 14Ɓɛɛ Pilat tɔ̧ ha̧ wa: «Nɛ́ ge ɗaŋmɔ ge á̧ a̧ dee bɔɔ ge?» Ɓɛɛ wa gai mɔ nɛ̀ ŋgaya-a siti gan kuti-a: «Ɛ̀nɛ̀ mgbóí nɛ́ a̧ zu te-diŋa wa!» 15Nɛ́ mɔ'ɔ nɛ̀ Pilat gboo Barabas pi̧ nù ha̧ wa, wen ha̧ see-wa mɛ ga̧. A̧ ha̧a̧ nú, ɓɛɛ wa gusi Jesu, ɓɛɛ a̧ e a̧ er o wi-biro ha̧ wa mɛ nɛ̀ɛ́ mgboi a̧ zu te-diŋa.
Wa guu tɛnmɔ zu Jesu
(Zɔk Mt 27.27-31; Jn 19.2-3)
16Nɛ́ mɔ'ɔ nɛ̀ o wi-biro mgbɔɔ Jesu si bee-gara, kɔ̧́ tua ko Pilat, ɓɛɛ wa mɔi̧ oi o dɔka wi-biro lɛŋ. 17Wa pi̧i̧ gasa gbɛ̧ laa tɛ-a, kar tɛnmɔ gu zu-a, 18ɓɛɛ zɛkɛɗ‘a'e: «Ɛ̀nɛ̀ wór mɔ wa, wannu ko o Juif!» 19Wa gusa zu-a nɛ̀ tia, wa aa sap tɛ-a, ɓɛɛ wa gbɛ zugur nù ti a̧ gasi nɛ̀ a̧. 20Wa zɛkɛɗa a̧ kaɗi, ɓɛɛ wa kpɔ̧i̧ gbɛ̧ laa yinɛ, pi̧ nɛ́ laa kɔ̧-a̧ tɛ-a woyo, ɓɛɛ wa mgbɔ a̧ si zan mɛ mgboi a̧ zu te-diŋa.
Wa mgboia Jesu zu te-diŋa
(Zɔk Mt 27.32-44; Lk 23.26-43; Jn 19.17-27)
21Wa baa Simɔŋ be Sirɛn, dáà ko Alɛkzandrɛ in Rufus nɛ̀ pii kɔ‘i pii nɛ nú fɔ nɛ̀ mgbánà, ha̧ a̧ mɛ tui te-diŋa ko Jesu.#Rɔm 16.13 22Ɓɛɛ wa mgbɔ Jesu nɛnɛ si fara nɛ̀ wa sa'e Gɔlgɔta, mɛ̀ nɛ́ wen nɛ̀ tɔ̧: «Fara Koŋgoi-zu». 23Wa kɔ̧ɔ̧ so mɛ ha̧ dɔ̧ɔ̧ nɛ̀‘i zaŋa nɛ̀ ŋma siɗi-te ha̧ Jesu mɛ nɔ, ɓɛɛ a̧ nɔ na. 24Nɛ́ mɔ'ɔ nɛ̀ wa mgboia a̧ zu te-diŋa, ɓɛɛ wa bi mbaɗi, kɛ̧ nɛ̀ laa kɔ̧-a̧ nɛ̀ er ŋmaa.#Gima 22.19 25Ŋgimbi nɛ̀ wa mgboia nɛ̀ a̧ zu te-diŋa'i, ká wese daŋa ŋgai kaɗi. 26Wa yɔra gba̧a̧ wen fio kɔ̧-a̧ e zu a̧, hee mɔ'ɔ ga: «Wi’ɛ nɛ́ Wannu ko o Juif.» 27Wa hɛra o kpɔ̧i̧-gba̧a̧-nin yiitoo katɛ a̧, kpɔk nɛ̀ war wii-er-a, ɓii-aa nɛ̀ war gale, kóó o ndé zu te-diŋa kɔ‘i.
[ 28Hegɔ, Yɔramɔ nɛ tɔ̧ɔ̧ so'e: «Wa tɔra a̧ mgbara o ɗaŋwi» wó‘i, hɔɔ gba̧a̧.]#Es 53.12
29O wi nɛ ɓir yak fara'i da̧a̧ a̧, wa mi̧a zu-wa, ɓɛɛ wa tɔ̧: «A̧i̧yoo! Mɛ́ yàá-gbin-tua ko Sɔ̧ yinɛ, ɓɛɛ mɛ mboo mbe-a zaŋ zɛ taar wó'ɛ,#Gima 22.8; Gima 109.25; Mk 14.58; Jn 2.19 30mɛ̀ kpásí tɛ-mɛ nɛ̀ tɛ-mɛ, a̧ mɛ̀ zír zu te-diŋa’ɛ!» 31Nɛ́ mɔ'ɔ nɛ̀ o gasa wan-ɗafi-sɔ̧ in o wi-usi-heembea zɛkɛɗa a̧ mbɛt, tɔ̧ nɛnɛ ha̧ o ŋmaa'e: «A̧ baa kpasi so o ŋma bíí, ɓɛɛ sa a̧ nyɛm mɛ kpasi tɛ-a náà, hee ge? 32Mɛsii, Wannu Israɛl a̧ zír zu te-diŋa kinii, h’ɛ́ɛ́ zɔk, ɛ̀ɛ̀ kɔ̧́ ɗɔaa ha̧ a̧ gɔ!» Ɓɛɛ o wi nɛ̀ wa hɛra zu te-diŋa katɛ a̧ da̧ a̧ mbɛt.
Fio ko Jesu
(Zɔk Mt 27.45-56; Lk 23.44-49; Jn 19.28-30)
33Ŋgimbi nɛ̀ wese hɔɔ see zu, tum baa nù fara lɛŋ, hɔ gira-wese. 34Mɛ́ gira-wese, Jesu hiɗa mɔ nɛ̀ ŋgaya-a tɔ̧ nɛnɛ‘e: «Eloi, Eloi, lama sabaktani.» Mɛ̀ nɛ́ wen nɛ̀ tɔ̧: «Sɔ̧ kɔ‘m, Sɔ̧ kɔ‘m wa! Wen ge s’ɛnɛ ea'm duk ge?»#Gima 22.2 35O ŋma bíí nɛ̀ yaa so hi̧i̧, zia mɔ‘i, ɓɛɛ tɔ̧: «Ɛ̀nɛ̀ zíí, a̧ sa nɛ́ Elii.» 36Ŋma bíí mgbara wa maa yì, nɛ́ɛ̀ pi̧ saala ɗɔɔ kpa̧i̧a̧ dɔ̧ɔ̧, sɔk nú tia, ɓɛɛ nyɛi̧ e nú Jesu mɛ zɔɓi, ɓɛɛ wi’ɛi tɔ̧: «Ɛ̀nɛ̀ é kaŋ; ɛ̀ɛ̀ zɔ́k kà Elii nɛ́ tɛ̀ɛ́ tɛ, mɛ́ zir a̧ zu te-diŋa e nù!»#Gima 69.22 37Nɛ́ mɔ'ɔ nɛ̀ Jesu hiɗa mɔ nɛ̀ ŋgaya-a, ɓɛɛ fe. 38Ɓɛɛ babir-laa kɔ̧́ Tua ko Sɔ̧ mbaŋ nɛ̀ ŋgɔn hɔ ɗɔɔ.#Gboa-a 26.31-33 39Wi-duk-zu o wi-biro gɔmŋmaa nɛ̀ yora ti Jesu, zɔka fea-a n'aa fea'i, ɓɛɛ tɔ̧: «Nɛ́ kpasawen, wi’ɛ duka so nɛ́ Bem ko Sɔ̧!» 40O ŋma okoo yaa so sɛn hi̧i̧ nɛ̀ nyɛi̧a-a mbɛt, zɔk nɛ̀ mɔ. Marii Magdala, Marii nàà ko Jak geɗek-a in Jozɛs, ká bá nɛ̀ Salomee a̧a̧ so mgbara wa mbɛt.#Lk 8.2-3 41Wa duka so nɛ́ ɗoŋ Jesu, de nɛ̀ tom ha̧ a̧, ŋgimbi n'aa duka so nú Galilee mɛ. O ŋma okoo nɛ̀ dɔka-a, nɛ̀ daŋa so in a̧ si Jerusalɛm, yaa hi̧i̧ mbɛt.
Guna Jesu
(Zɔk Mt 27.57-61; Lk 23.50-56; Jn 19.38-42)
42Mɔ ga̧a̧ kaɗi, ɓɛɛ hee mɔ'ɔ nɛ̀ wese'i duka nɛ́ wese-ɗafi-mɔ ga, mɛ̀ nɛ́ wen nɛ tɔ̧, ɔɔ-zɛ kpɔk nɛti ha̧ wese-ɔm-tɛ, 43Jozɛf be Arimatee, ŋma gasa wi-gɔn-kita ko o Juif, nɛ̀ pɛm nɛ́ Wan ko Sɔ̧ mbɛt, nɔɔ ŋgiɗi mɛ nɛ̀ɛ́ ak wɔr Jesu er Pilat. 44Ɗɛɗɛ Pilat gɔna wen n'aa zia'e Jesu fee kaɗi, ɓɛɛ a̧ sa ŋma wi-duk-zu o wi-biro gɔmŋmaa, ɓɛɛ ak a̧ kà Jesu nɛ́ fee nɛ̀ mbetɛ. 45Ɓɛɛ gasawi'i tɔ̧ ha̧ Pilat'e, Jesu fee kaɗi, ɓɛɛ Pilat e war ha̧ Jozɛf mɛ ba wɔr-aa. 46Nɛ́ mɔ'ɔ nɛ̀ Jozɛf hi̧fa bu-ndɔmbɔ, ɓɛɛ zir Jesu zu te-diŋa, ye a̧ nɛ̀ bu-ndɔmbɔ‘i, ɓɛɛ nɛ́ɛ̀ gun a̧ sɛn kɔ̧́-fio nɛ̀ wa za̧a̧ so kɔ̧́ ta, ɓɛɛ a̧ kin ta kpe nɛ̀ nú-a. 47Marii Magdala in Marii nàà ko Jozɛs yaa zɔk nɛ̀ fara nɛ̀ wa guna a̧ sɛnɛ‘i.
Currently Selected:
:
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.