Mataio 14

Yoane misa-lowac weibong

Mrk 6:14-29; Luk 3:19-20; 9:7-9

1Dameng iwa Yesule siducti ngictau Herode, yele hedecka haume 2ye ngagelu bole-ngicfocine edocebawec, “Yoane misa-lowacti homackacni gboliye fangkelu gagac, ye Yesu. Ilec ailu tapili facnogacte pasi damuineholec balu gagac.”

3-4I yangucte, Herodedi Yesule siduc mi ngagelu esecne gbaine Filipte ngigac Herodias ye hise balu gawec. Aibaba yogolec ailu Yoanedi Herode yanguc edowec, “Ga ngigac yogo balu yeholec gagic, yogo yefe monic mi fagac.” Inguc mime Herodedi Yoane balu hefelu muc-macka lolu#Dep 18:16; 20:21; Luk 13:19-20 5wehomanogale ngagesiwec. Aime ngic-ngigac yenge ye Wapongte siduc-mimi ngic, inguc ngageibongte ailu hangocebawec.#Mat 21:26

6Aime Herodele fike-fike dameng kwesime, ngic-ngigac yenge yela habu balu ngiyeebongka Herodias aduinedi yengele hewacka fangkelu gee wewec. Weme Herodedi ngani-angac aicnolu 7Wapongte wacka yowa sanangkenale yanguc mipangkewec, aduine ye wiyac monicte aicnome yogo nalic lacnodaicte. 8Mipangkeme adu ye nenggacinedi ngage-ngage lacnome Herode yanguc edowec, “Ga Yoane misa-lowacte hodoc welockebong pelewa lolu bawelelu neledamec.”#14:8 Herodias ye Yoane homanale ngagewecte ailu hodocine nganilu ngagewec, Yoane ye homawec. 9Inguc mime ngictaudi ngagelu kwele-umac ngagewec. Ailu ngic ngiyeibong, yengele haicka yowa biyac mime sanangkewec. Ilec ailu aduinele yowa ngagewec, Yoanele hodoc yogo lacnonale mipangkelu 10hudu-baba ngic monic saleme lelu Yoane muc-macka ngiyewec, ye ubeine welockewec. 11Welockelu hodocine pelewa lolu bawelelu aduine lacnome adudi nenggacinela balewec. 12Aime Yoane mic-tengtengfocine yenge hikelu kponggbongine bahikelu longkeibong. Longkebong motome hikelu Yesu siduc yogo edoibong.

Nosing gumecebawec

Mrk 6:31-44; Luk 9:10-17; Yoa 6:1-13

13Edobong Yesu ye siduc yogo ngagelu mac-himong yogo hegilelu gombawa felu mic-tengtengfocine yengeholec mac-himong monic ngic mikacka, iwa yeicnac ganale hikewec. Aime ngic-ngigac habutowadi yenge yogo biyac ngagelu taonngineng hegilelu hige-yefe balaibelu hikeibong. 14Hikebong Yesu ye gombawacni walu ngic-ngigac habutowa inguc nganicebalu kweleine sowaleme ngic-ngigac hucnginengkolec bamadicebawec.

15Bamadicebalu gacgume mac aweleme mic-tengtengfocine yengi yela lelu yanguc miibong, “Himong yago ngic mikac, aime wenac haume mac biyac awelegac. Ilec ailu ga ngic-ngigac habutowa yago salecebang mac-aling gocna hikening. Yenge hikelu yengung nosing fuli banoc aining.”

16Inguc mibong yedi yanguc edocebawec, “Yenge hike-hikelesoc mi aigaing, ngenge ngengung nosing yelebong noning.”

17Inguc mime yengi miibong, “Nonge bret 5 nga misa-sic yaeckang sugu balu gagabeleng.”

18Inguc mibong yedi yanguc miwec, “Ngenge nosing yogo nala bawelening.” 19Yesu ye inguc milu ngic-ngigac habutowa kpindingka wangiyeningte edocebawec. Edocebalu bret 5 ailu misa-sic yaeckang, yogo balu dongeine hilame honocmengka feme Wapong kwele-madic micnowec. Micnolu bret yogo bauckelu mic-tengtengfocine yeleme yengi balu ngic-ngigac habutowa yelebong noibong.#Mat 15:35-39; Mrk 8:6-10 20Aime yenge sasawadi nogebec ailu nosing tofaine notiwa aibong ngiyewec, yogo kpaduckebong haulu damba 12 wakewec. 21Ngic-ngigac nosing noibong, yogo yengelacni ngic yengele dzalengineng yogo 5 taosen ngama ingucne. Nga ngigac adu-madec noibong, yengele dzalengineng yogo monic mi wafeibong.

Lifuc feina hikewec

Mrk 6:45-52; Yoa 6:16-21

22Damba wakeme Yesu ye mic-tengtengfocine salecebame yenge gombawa felu misa lifuc nebocina molickelu hikeibong. Hikebong ye yeicnac galu ngic-ngigac habutowa locebame hikeyackeibong. 23Hikeebongka ye milockenale kupicka feme mac deboleme yeicnac ngiyewec.#Luk 6:12; 9:28 24Ngiyeme yenge gombawa biyac lifuc hewacina hikeebongka gbelong sugucnedi yenge hikedaingtewa, yefe kwesilu dibongti gomba welu bafangkeme fec-wac aiwec.

25Inguc aime mac biyac saenogale aiyemewa Yesu ye lifuc feina edela edela mic-tengtengfocine yengela hikewec. 26Ye lifuc feina edela edela hikeme mic-tengtengfocine yenge nganilu yanguc miibong, “Ilucti welegac.” Inguc milu hangocebame aukweibong.#Luk 24:37

27Aukwebong Yesudi ngagelu iwahac yanguc edocebawec, “Nani welegabac.#14:27 Grik yowawa yogolec fungine “Na gagabachac.” Yogo Wapongte wac monic, Wapongte angelodi Moses edowec. Ngenge ngageboc mikac sanangne domadaing. Ngenge mi hangocngebana.”

Pita misa feina hikewec

28Inguc mime Pitadi hefaliyelu miwec, “Sugucne, gageicne welegic ingucnehac, na misa feina edela edela gala fubele minelec.”

29Inguc mime Yesudi miwec, “Ga welec.”

Inguc mime Pita ye gombawacni walu misa feina edela edela Yesula lewec. 30Leemewa dibong gbelong sugucne weme nganilu hangockewec. Inguc aime misawa haunogale ailu hangockeme aukwelu miwec, “Sugucne, ga baficnunong.”

31Inguc mime Yesu ye moleine biyac sungkelu Pitale mole balu bafangkelu yanguc edowec, “Ga ngage-ngagesinggone kpisicnemac, ga omale ngageboc aigic?” Inguc micnowec.#Mat 8:26; Mrk 4:39

32Micnome yeke gombawa feebocka iwahac gbelong miyac aiwec. 33Aime gombawa ngiyeibong, yenge Yesu afeelu yanguc miibong, “Foinac, ga Wapongte Madec.”

Ngic-ngigac hucnginengkolec

Mrk 6:53-56

34Aime yenge lifuc falockelu Genesaret himongka hike sulumeibong. 35Iwa hikebong himong yogolec ngic yengi Yesu biyac ngani-motolu yowa lobong hikeyackeme yenge ngic-ngigac hucnginengkolec yela bacebalu kwesiibong. 36Kwesilu hucnginengkolec yenge ngakpi daleinele muc susucine sugu oiyaningte dogbac ailu micnoibong. Aime oiyaibong, yenge sasawadi madickeibong.#Mat 9:20-21

Currently Selected:

Mataio 14: MigNT

Highlight

Copy