LUKAS 6
6
Yeesus rì kìɓan ki Saɓàt
(Mt. 12:1-8; Mk. 2:23-28)
1Ŋwosi Saɓàt àdɛŋ, Yeesus à ghaghàghìyà ɓi dɛmi nyas, ɓɛ̀yilàg ɓii ɓɛ kɛɛnkɛ̀n di ɓɛɛ sòsori nyas, ɓɛ pyepyèg rì ɓyàg di ɓɛɛ ɗiɗì. 2Fɔɔnnɛ Ɓɛ̀fàrìzyɛŋ ɓɛdɛŋ ɓɛ tɔkà ɓɔ lɛ: Ɓisuucɛ nnɛ ɓi kìki ɓìɓan ɓi mum à ghɛ̀ɛ̀sɛɛ ɓi ki kìi ŋwosi Saɓàt? 3Nni Yeesus à ɓàkà ɓɔ lɛ: Ɓì ka ɓalà ɓi kiɓan ki Davit a kìghà ŋwos adɛŋ di zày ì kɔ̀ni lɛ, rì nyi rì ɓum ɓii? 4Yɛ̀ɛ Davit à ɗiŋìghà ɓi naà-Bɛ̀ll à teɗ bìrɛs yi ɓɛ faghà ɓisuu Bɛ̀ll ɓɛ ɗi yɔ rì ɓum ɓii, kɔm̀ lɛ ɓɛ̀pìrɛɛtìrɛ̀ cɛ̀ncaa ɓɛɛ ɓaghà lɛ, ɓɛ ɗi bìrɛs yiǹ. 5Fɔɔnnɛ Yeesus à kpaatìghà ɓɔ lɛ: Man à mum à làmii Saɓàt.
Ŋwaànɛ à ɓaghà rì kìɓɔmà ki càg
(Mt. 12:9-14; Mk. 3:1-6)
6Ɓi gòn i Saɓàt ìdɛŋ, Yeesus à ɗiŋìghà ɓi naà-bɔ̀ŋzɛ̀n ìdɛŋ, à tum ɗì rèsàg ɗi ɓum; nni ŋwaàdɛŋ à ɓaghà wɔɔ, càg ki weèlem kìɓɔmɛn. 7Ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ fifìɓìghà nyi lɛ fyɛɛyi, lɛ ɓɛɛ ghɛǹ ǹkòo à ɓiì wɔ̀ɔ̀zii mum ŋwosi Saɓàt, lɛ ɓɛ kaakààghà kìɓan ki ɓɛɛ ɓanɛn mii lɛ ɓɛɛ sɔmɛn nyi. 8Kìɓan kifog, Yeesus à yighà ɓɛ̀fèg ɓaa, nni à kpaaghà ŋwaà càg kiɓɔmà lɛ: Pɛ̀sɛn aɗyòò, u rɛli fɛ̀ ɓi nyìinyìm à ɓum; nni ŋwaànɛ̀n à pɛ̀sɛ̀ngà aɗyòò, à rɛlì wɔɔ. 9Fɔɔnnɛ Yeesus à tɔkà ɓɔ lɛ: Kaliina ɓà mɛ, ɓìdɔ̀gsɛna ɓis ɓi kalii lɛ, ɓi gòn i Saɓàt, mum a ki kìɓe gìn kìrɔɔ? Lɛ a ghɛɓsi mum gìn, a caɗ nyi lɛ a wu? 10Nni Yeesus a seesèèghà ɓɔɔ̀cèm, à kpaa min ŋwaànɛ̀n lɛ: Nàma càg kɔɔ, ŋwaà nàm, càg ki ghàs kì ɓaà lɛ syeesyee. 11Fɔɔnnɛ ɓumɓɛ̀n ɓɛ wokà bim, ɓɛ tumɛ̀n rìnyoònyòlɛ̀n ɓi com ki ɓɛ rì ɓiì kìi Yeesus.
Yeesus à ɓɔ̀ni ɓɛ̀yilàg ǹtɛ̀ɗ rì ɓɛɓɛɛ̀, lɛ ɓɛɛ ɓa ɓɛ̀kɛ̀nì-fìtom
(Mt. 10:1-4; Mk. 3:13-19)
12Ɓi cààmɛ̀n kiǹ innɛ Yeesus à ɓɔkà ki ɓɔ̀ŋzaagh ɓi dòn aɗyòò, à ghagsì ìru wùcèm ɓi rìɓɔ̀ŋzì ɗi Bɛ̀ll. 13Ɓi duri tana, à reŋìghà ɓɛ̀yilàg ɓiì, à ɓɔ̀n ɓum miì ǹtɛ̀ɗ rì ɓɛɓɛɛ̀, à ròò ɓɔ ɗii lɛ, ɓɛ̀kɛ̀nì-fìtom.
14Ɓɛ ɓaghà lɛ: Rì Simɔn ànɛ à roòghà lɛ Pyɛɛri, rì Andire à geni, rì Zyag, rì Zyaŋ, rì Filiɓ rì Batelemi, 15rì Matyoo, rì Tomas, rì Zyag à man à Alfe, rì Simɔn ànɛ à ɓaghà Zelot 16rì Zyudɛ à man à Zyag, rì Zyudas Iskariyot ànɛ à ki ghalà lɛ à tɔ̀kɛɛ Yeesus.
Yeesus a rèeresàg gwìy ɓìɓan ɓi Bɛ̀ll ɓi dòn à ki wɔ̀ɔwɔɔ̀zì ɓɛ̀roroɓ
(Mt. 4:23-25)
17Nni Yeesus à sɛngày rì ɓɔ, à rɛlì ɓi lɛ̀gsì, jàŋ inɛ coo gwìy ì ɓɛ̀yilàg ɓii i ɓaghà, rì gɛ mum ànɛ à pɛ̀sɛ̀ngày a Zyude, rì a Yorisalɛm, rì ɓi bèn ì rìɓày ànɛ a Tiir, rì Sidɔŋ. 18Ɓumɓɛ̀n ɓɛ yughày lɛ ɓɛɛ wowog ɓìtòkì ɓi Yeesus, à ki wɔ̀ɔ̀zi ɓɔ tìroɓ tyaa, fɔɔnnɛ ɓɛ̀roɓɛ ɓìɓeɓtàg ɓi mɛghay ɓi yeèyèèsìghà, ɓɛ wɔngà girig. 19Ɓum ɓɛ̀cèm ɓɛ kaakààghà lɛ ɓɛɛ kòm nyi, ɓisuulɛ ìtèɗ wudɛŋ wu kpaŋkpàŋgày nyi ɓi nyoo, wu wɔɔ̀wɔ̀ɔ̀zì ɓɔɔ̀cèm.
20Fɔɔnnɛ Yeesus à pɛɓsɛ̀ngà ɓɛ̀yilàg ɓii, à kpaa ɓɔ lɛ: Mààgh rì mìni ɓɛ ɓì rì ɓɛ̀soghàsogha ɓisuulɛ kìlɔ̀ŋ ki Bɛ̀ll ki ri kiŋkìn.
21Mààgh rì mìni ɓɛ ɓi wowog zày ɓigomìnɛ, ɓisuulɛ ɓì ɓiì wurii! Mìni ɓɛ ɓi rènɗen ɓigomìnɛ, mààgh rì mìni lɛ ɓì rì ɓiì wɔ̀li. 22I ɓum ɓɛ ɓeèzɛɛ mìni, ɓɛ ɓèn mìni, ɓɛ sɛmgì mìni, ɓɛ ki ren mini ɗii ɓi ǹɗaŋ waa, ɓisuu Man à mum, ɓì ɓiì ɓaa rì ɓɛ̀mààgh. 23Nyàànyaana, ɓì ki sànsam ɓi ŋwos anɛ̀n, lɛ mɛ̀lèɓ min mɛ aɗyoo mɛ teghɛɛ lɛɛ̀gwey; lɛ fɔlɔɔ nnɛ ɓɛ̀seŋi ɓaa ɓɛ ɓɛsɛ̀ɛ̀mɛn ɓɛ tɔtɔ̀ɓkà ɓɛ̀kpaŋzì-ɓìɓan.
24Wɔ̀lɛ nyìighnyìg rì mìni ɓɛ̀guŋgum, lɛ mìnii ti rì gàɓ yìn i kìnyàà! 25Nyìighnyìg rì mìni ɓɛ ɓì mɛ wuràg ɓigomìnɛ, lɛ ɓì rì wog zày! Nyìighnyìg rì mìni ɓɛ ɓi wɔ̀wɛy ɓigomìnɛ, lɛ ɓì biì ɓaa rì ǹɗemi-kɛŋɛn ɓì ki rèn. 26Nyìighnyìg rì mìni, di ɓum ɓɛ̀cèm ɓɛɛ̀ sɛsɛg mini, lɛ fɔlɔɔ nnɛ ɓɛ̀seŋi ɓaa ɓɛ ɓɛsɛ̀ɛ̀mɛn ɓɛ sɛsɛ̀kà ɓɛ̀pwààpwaà ɓɛ ɓɛkpaŋzì-ɓìɓan.
Rìkeesì ɗi ɓɛ̀bènàbena
(Mt. 5:38-48; 7:12)
27Wɔ̀lɛ, ǹkalii mìni ɓɛ ɓi wowog mɛ lɛ, keesiina ɓɛ̀bènàbena ɓin, ɓì kì ɓumɓɛ ɓɛɛ̀ ɓèeɓeèzɛ̀n mìni kìrɔɔ. 28Màŋina ɓumɓɛ ɓɛ ti ɓɛ cɛmgì mìni, ɓì ɓɔ̀ŋzàg ɓisuu ɓɛroɓɛ ɓɛɛ̀ tɔtɔɓ mini. 29I mum à ɓoogh wɔ̀ ɓi rìtam ɗi kimɛŋ, fati nyi ɗi weèlem; i ŋwaà ɓàtɛɛ wɔ̀ rìga, càra nyi a teèti bùɓi yɔ̀ɔ̀. 30Mum ǹcèm ànɛ à lɔni wɔ̀ com, faa nyi kɔ̀, fɔɔnnɛ ŋwaànɛ à ɓàtɛɛ wɔ̀ com, kɔ̀ɔ tɔg nyi lɛ a pɛɛ̀zi wɔ̀ kɔ. 31Kìɓan ki ki kɔni wɔ̀ lɛ ɓum ɓɛɛ kilag wɔ̀, wɔ̀ kìlàg girig ɓɔ kɔ̀. 32I ɓi keesii lɔŋ lɛ ɓumɓɛ ɓɛ keesii mìni, kìɓan ki kuurakɛn kaa ɓa ɓi a lɔ̀ŋkin, lɛ ɓɛ̀kìì-kìɓe ɓɛ ti ɓɛ keesàg girig ɓumɓɛ ɓɛ keesii ɓɔ. 33I ɓumɓɛ ɓɛ ti ɓɛ kilàg mìni kìrɔɔ ɓɛɛ̀ɓɛ ɓì ti ɓì kìlàg kìrɔɔ, di ɓì ka ki ɓi kiɓan ki kuurakɛn, lɛ ǹsoò ɓɛ̀kìì-kìɓe, ɓɛ ti ɓɛ kilàg fɔlɔɔ. 34I ɓumɓɛ ɓì yii lɛ ɓɛ ri lɛ ɓɛ leɓ mìni pon ɓɛɛ̀ɓɛ ɓì ti ɓì ɓɔ̀ràg ɓyom, kìɓan kidɛŋ ki kuurakɛn ki yin foo, lɛ ɓɛ̀kìì-kìɓe ɓɛ ti ɓɛ ɓɔràg ɓɛ̀ro ɓɛ̀kìì-kìɓe ɓyom lɔŋ lɛ ɓɛ ri ɓɔ ɓyɔ ɓiì pɛ̀ɛ̀zii. 35Kìɓan kifog, keesiina ɓɛ̀bènàbena ɓin, ɓì kìkì ɓɔ kìrɔɔ, ɓì ki ɓɔ̀rag ɓum ɓyom, kɛ̀ ɓi mìngi tityɛɛ lɛ, ɓɛ ri mìni ɓiì pɛ̀ɛ̀zii ɓyɔ. I ɓì kìi fɔlɔɔ, mɛ̀lèɓ min mɛ ri ɓiì tèghɛɛ, ɓì ki ɓa ɓɔn ɓɛ Bɛ̀ll ànɛ à teŋmɛɛ kɛ̀ɛ̀ vèg ɓisuulɛ, nyii rilàg rì geesɛ̀n ɓi ɓɛg ànɛ a ɓɛ̀tènteǹ rì ɓɛ̀kìì-rìgɛn. 36Ɓaana rì ǹɗem wu nyìighnyìg lɔŋ yɛ̀ɛ Seŋi wìn a rì rì ǹɗem wu nyìighnyìg.
Kɛ̀ ɓi yɔ̀mgi ɓɛro ɓum
(Mt. 7:1-5)
37Kɛ̀ ɓi ɓa ɓɛ̀yɔ̀mì ɓum fɔɔnnɛ Bɛ̀ll àa yɔ̀m ɓì mini; kɛ̀ ɓi fa ɓum zɔɔ, fɔɔnnɛ Bɛ̀ll àa fa ɓi mini zɔɔ; cenɛɛna ɓɛ̀geni ɓin, fɔɔnnɛ Bɛ̀ll à rì mìni ɓiì cenɛɛ. 38Faana ɓum ɓyom fɔɔnnɛ Bɛ̀ll à rì girig mìni ɓiì faà ɓi coo vèg ìnɛ ì rì ǹɗonɛn lɛ pisa, ì ki ɓa ǹnɔ̀rakɛn, ì rààràà; vèg ìnɛn yɛɛ̀nɛ ɓɛ ri wɔ̀ ɓiì sùùrii ɓyom ɓi ɓàm à kìlàà kɔɔ; ɓisuulɛ vèg ìnɛ ù ti ù fèkì ɓɛ̀ro ɓyom miì, yɛ̀ɛnɛ ɓɛ ri girig wɔ̀ ɓyɔ ɓiì fèegh miì.
39Nni Yeesus à teetìghà ɓɔ dàɗkì ìdɛŋ lɛ: Ɗyaŋɗyàŋ à rì nya lɛ à ɓan roɗyaŋɗyàŋ ɓi kìgeŋ, ɓɛ rɔɓ lɛ ɓɛ kpii ɓi ɓɛsɛ̀ɛ̀ ɓɛ̀cèm ɓi rìɓee?
40N-yilàg à yin lɛ à cee ǹɗèsàg wìì, kìɓan kifog, i à kpaŋzɛɛ cilag kii, à rì lɛ à ɓa yɛ̀ɛ ǹɗèsàg wìì.
41Ɓisuucɛ nnɛ ù ghɛɛ kìfɛfɛy ki ki ri ɓi ɗis ɗi goni, kɔ̀ɔ ghɛn ǹwɔ̀g wu wu ri ɓi ɗiǹkɔ̀ɔ̀? 42Nsoò lɛ: Lannɛ ù rì lɛ ù kpaa goni lɛ, maasòŋ, kìya m̀pisi wɔ̀ kìfɛfɛy ki wɔ̀ ɓi ɗis, kɔm̀ lɛ ù ghɛɛ ɓi nwɔ̀g wu wu ri ɓi ɗiǹkɔ̀ɔ̀?
Wɔ̀ ŋwaà fyɛy fyɛy ɓi ŋwɔm ìghèy ɓi ɗùm! Ka pisi ǹwɔ̀g wu wu ri wɔ̀ ɓi ɗis, di fɔlɔɔ nnɛ u konag kì ghɛɛ̀ yɛ̀ɛ u pisi kìfɛfɛy ki ki ri ɓi ɗis ɗi goni.
Kìte ki yin lɛ ki wum ɓiɗùn ɓidɛŋ
(Mt. 7:16-20; 12:33-35)
43Syeesyee à kìte a maà wum ɓi ɓiɓeɓtàg ɓi ɓiɗùn, ǹsoò kìɓeɓtàg ki kite, ki yin lɛ ki wum ɓìsyeesyee ɓi ɓiɗùm. 44Lɛ ɓɛɛ̀ yilag kite kicèm ɓi ɓìɗùn ɓi kɔ. Ŋwaà yin lɛ à kɔs dii ɓi ǹɗyèm wu gay, ǹsoò lɛ à kɔs gin ɓi nɗyèm wu keŋ. 45Syeesyee à mum à ti à kìlàg ɓìɓan ɓi syeesyee lɛ, à rì rì syeesyee à ǹɗem; kìɓeɓtàg ki mum ki kilàg ɓìɓan ɓi ɓeɓtɛn lɛ, ki ri rì kìɓeɓtàg ki ǹɗem, lɛ ŋwɔm wu mum wɛɛ̀ kpaakpaa kiɓan ki ki roni nyi ǹɗem.
46Ɓisuucɛ nnɛ ɓi rereŋi mɛ lɛ Kan, Kan, kɛ̀ ɓi ki kì com ki ǹkpaa mìni? 47Ǹɗì lɛ ǹkpaa mìni lɛ, mum bimiɗ ànɛ à yùu a lɔ̀ŋkɛm̀, à wog rìrèsàg ɗyɛm̀, à ki nɔ̀ɔ̀ti ɗyɔ, 48à pisɛɛ ŋwaànɛ à ɓaghà ɓi kìtoŋ ki mɛɛ; à timgà zi, à kpaŋ ɓi rìɓan à ghɛ̀lɛ̀n yì kìtoŋ miì aɗyòò; yɛ̀ɛ don yi mɛnig yi kpagà, poɓɓo à yù kì roŋdɛɛ ɓi mɛɛ mɛǹ, kìɓan kifog, mɛ̀ kɛɛ̀ nyɛ̀ŋɗɛn, lɛ mɛ ɓaghà mɛ̀ toŋɛn lɛ syeesyee. 49Nni wɔ̀lɛ ŋwaànɛ à woogh rìrèsàg ɗyɛm̀, kɛ̀ɛ nɔ̀ɔ̀ti ɗyɔ, à pisɛɛ ŋwaànɛ à saghìghà mɛɛ mii ɓi m̀bume aɗyòò, kɛ̀ɛ tim lɛ a ghɛlɛn yì kìtoŋ ɓi zi i nteɗ. Yɛ̀ɛ poɓɓo à roŋɗɛ̀ngà miì, mɛ ghas kì kpìlaagh, mɛ waàrɛ̀n mɛ̀cèm.
Currently Selected:
LUKAS 6: BAFNT
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.
LUKAS 6
6
Yeesus rì kìɓan ki Saɓàt
(Mt. 12:1-8; Mk. 2:23-28)
1Ŋwosi Saɓàt àdɛŋ, Yeesus à ghaghàghìyà ɓi dɛmi nyas, ɓɛ̀yilàg ɓii ɓɛ kɛɛnkɛ̀n di ɓɛɛ sòsori nyas, ɓɛ pyepyèg rì ɓyàg di ɓɛɛ ɗiɗì. 2Fɔɔnnɛ Ɓɛ̀fàrìzyɛŋ ɓɛdɛŋ ɓɛ tɔkà ɓɔ lɛ: Ɓisuucɛ nnɛ ɓi kìki ɓìɓan ɓi mum à ghɛ̀ɛ̀sɛɛ ɓi ki kìi ŋwosi Saɓàt? 3Nni Yeesus à ɓàkà ɓɔ lɛ: Ɓì ka ɓalà ɓi kiɓan ki Davit a kìghà ŋwos adɛŋ di zày ì kɔ̀ni lɛ, rì nyi rì ɓum ɓii? 4Yɛ̀ɛ Davit à ɗiŋìghà ɓi naà-Bɛ̀ll à teɗ bìrɛs yi ɓɛ faghà ɓisuu Bɛ̀ll ɓɛ ɗi yɔ rì ɓum ɓii, kɔm̀ lɛ ɓɛ̀pìrɛɛtìrɛ̀ cɛ̀ncaa ɓɛɛ ɓaghà lɛ, ɓɛ ɗi bìrɛs yiǹ. 5Fɔɔnnɛ Yeesus à kpaatìghà ɓɔ lɛ: Man à mum à làmii Saɓàt.
Ŋwaànɛ à ɓaghà rì kìɓɔmà ki càg
(Mt. 12:9-14; Mk. 3:1-6)
6Ɓi gòn i Saɓàt ìdɛŋ, Yeesus à ɗiŋìghà ɓi naà-bɔ̀ŋzɛ̀n ìdɛŋ, à tum ɗì rèsàg ɗi ɓum; nni ŋwaàdɛŋ à ɓaghà wɔɔ, càg ki weèlem kìɓɔmɛn. 7Ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ fifìɓìghà nyi lɛ fyɛɛyi, lɛ ɓɛɛ ghɛǹ ǹkòo à ɓiì wɔ̀ɔ̀zii mum ŋwosi Saɓàt, lɛ ɓɛ kaakààghà kìɓan ki ɓɛɛ ɓanɛn mii lɛ ɓɛɛ sɔmɛn nyi. 8Kìɓan kifog, Yeesus à yighà ɓɛ̀fèg ɓaa, nni à kpaaghà ŋwaà càg kiɓɔmà lɛ: Pɛ̀sɛn aɗyòò, u rɛli fɛ̀ ɓi nyìinyìm à ɓum; nni ŋwaànɛ̀n à pɛ̀sɛ̀ngà aɗyòò, à rɛlì wɔɔ. 9Fɔɔnnɛ Yeesus à tɔkà ɓɔ lɛ: Kaliina ɓà mɛ, ɓìdɔ̀gsɛna ɓis ɓi kalii lɛ, ɓi gòn i Saɓàt, mum a ki kìɓe gìn kìrɔɔ? Lɛ a ghɛɓsi mum gìn, a caɗ nyi lɛ a wu? 10Nni Yeesus a seesèèghà ɓɔɔ̀cèm, à kpaa min ŋwaànɛ̀n lɛ: Nàma càg kɔɔ, ŋwaà nàm, càg ki ghàs kì ɓaà lɛ syeesyee. 11Fɔɔnnɛ ɓumɓɛ̀n ɓɛ wokà bim, ɓɛ tumɛ̀n rìnyoònyòlɛ̀n ɓi com ki ɓɛ rì ɓiì kìi Yeesus.
Yeesus à ɓɔ̀ni ɓɛ̀yilàg ǹtɛ̀ɗ rì ɓɛɓɛɛ̀, lɛ ɓɛɛ ɓa ɓɛ̀kɛ̀nì-fìtom
(Mt. 10:1-4; Mk. 3:13-19)
12Ɓi cààmɛ̀n kiǹ innɛ Yeesus à ɓɔkà ki ɓɔ̀ŋzaagh ɓi dòn aɗyòò, à ghagsì ìru wùcèm ɓi rìɓɔ̀ŋzì ɗi Bɛ̀ll. 13Ɓi duri tana, à reŋìghà ɓɛ̀yilàg ɓiì, à ɓɔ̀n ɓum miì ǹtɛ̀ɗ rì ɓɛɓɛɛ̀, à ròò ɓɔ ɗii lɛ, ɓɛ̀kɛ̀nì-fìtom.
14Ɓɛ ɓaghà lɛ: Rì Simɔn ànɛ à roòghà lɛ Pyɛɛri, rì Andire à geni, rì Zyag, rì Zyaŋ, rì Filiɓ rì Batelemi, 15rì Matyoo, rì Tomas, rì Zyag à man à Alfe, rì Simɔn ànɛ à ɓaghà Zelot 16rì Zyudɛ à man à Zyag, rì Zyudas Iskariyot ànɛ à ki ghalà lɛ à tɔ̀kɛɛ Yeesus.
Yeesus a rèeresàg gwìy ɓìɓan ɓi Bɛ̀ll ɓi dòn à ki wɔ̀ɔwɔɔ̀zì ɓɛ̀roroɓ
(Mt. 4:23-25)
17Nni Yeesus à sɛngày rì ɓɔ, à rɛlì ɓi lɛ̀gsì, jàŋ inɛ coo gwìy ì ɓɛ̀yilàg ɓii i ɓaghà, rì gɛ mum ànɛ à pɛ̀sɛ̀ngày a Zyude, rì a Yorisalɛm, rì ɓi bèn ì rìɓày ànɛ a Tiir, rì Sidɔŋ. 18Ɓumɓɛ̀n ɓɛ yughày lɛ ɓɛɛ wowog ɓìtòkì ɓi Yeesus, à ki wɔ̀ɔ̀zi ɓɔ tìroɓ tyaa, fɔɔnnɛ ɓɛ̀roɓɛ ɓìɓeɓtàg ɓi mɛghay ɓi yeèyèèsìghà, ɓɛ wɔngà girig. 19Ɓum ɓɛ̀cèm ɓɛ kaakààghà lɛ ɓɛɛ kòm nyi, ɓisuulɛ ìtèɗ wudɛŋ wu kpaŋkpàŋgày nyi ɓi nyoo, wu wɔɔ̀wɔ̀ɔ̀zì ɓɔɔ̀cèm.
20Fɔɔnnɛ Yeesus à pɛɓsɛ̀ngà ɓɛ̀yilàg ɓii, à kpaa ɓɔ lɛ: Mààgh rì mìni ɓɛ ɓì rì ɓɛ̀soghàsogha ɓisuulɛ kìlɔ̀ŋ ki Bɛ̀ll ki ri kiŋkìn.
21Mààgh rì mìni ɓɛ ɓi wowog zày ɓigomìnɛ, ɓisuulɛ ɓì ɓiì wurii! Mìni ɓɛ ɓi rènɗen ɓigomìnɛ, mààgh rì mìni lɛ ɓì rì ɓiì wɔ̀li. 22I ɓum ɓɛ ɓeèzɛɛ mìni, ɓɛ ɓèn mìni, ɓɛ sɛmgì mìni, ɓɛ ki ren mini ɗii ɓi ǹɗaŋ waa, ɓisuu Man à mum, ɓì ɓiì ɓaa rì ɓɛ̀mààgh. 23Nyàànyaana, ɓì ki sànsam ɓi ŋwos anɛ̀n, lɛ mɛ̀lèɓ min mɛ aɗyoo mɛ teghɛɛ lɛɛ̀gwey; lɛ fɔlɔɔ nnɛ ɓɛ̀seŋi ɓaa ɓɛ ɓɛsɛ̀ɛ̀mɛn ɓɛ tɔtɔ̀ɓkà ɓɛ̀kpaŋzì-ɓìɓan.
24Wɔ̀lɛ nyìighnyìg rì mìni ɓɛ̀guŋgum, lɛ mìnii ti rì gàɓ yìn i kìnyàà! 25Nyìighnyìg rì mìni ɓɛ ɓì mɛ wuràg ɓigomìnɛ, lɛ ɓì rì wog zày! Nyìighnyìg rì mìni ɓɛ ɓi wɔ̀wɛy ɓigomìnɛ, lɛ ɓì biì ɓaa rì ǹɗemi-kɛŋɛn ɓì ki rèn. 26Nyìighnyìg rì mìni, di ɓum ɓɛ̀cèm ɓɛɛ̀ sɛsɛg mini, lɛ fɔlɔɔ nnɛ ɓɛ̀seŋi ɓaa ɓɛ ɓɛsɛ̀ɛ̀mɛn ɓɛ sɛsɛ̀kà ɓɛ̀pwààpwaà ɓɛ ɓɛkpaŋzì-ɓìɓan.
Rìkeesì ɗi ɓɛ̀bènàbena
(Mt. 5:38-48; 7:12)
27Wɔ̀lɛ, ǹkalii mìni ɓɛ ɓi wowog mɛ lɛ, keesiina ɓɛ̀bènàbena ɓin, ɓì kì ɓumɓɛ ɓɛɛ̀ ɓèeɓeèzɛ̀n mìni kìrɔɔ. 28Màŋina ɓumɓɛ ɓɛ ti ɓɛ cɛmgì mìni, ɓì ɓɔ̀ŋzàg ɓisuu ɓɛroɓɛ ɓɛɛ̀ tɔtɔɓ mini. 29I mum à ɓoogh wɔ̀ ɓi rìtam ɗi kimɛŋ, fati nyi ɗi weèlem; i ŋwaà ɓàtɛɛ wɔ̀ rìga, càra nyi a teèti bùɓi yɔ̀ɔ̀. 30Mum ǹcèm ànɛ à lɔni wɔ̀ com, faa nyi kɔ̀, fɔɔnnɛ ŋwaànɛ à ɓàtɛɛ wɔ̀ com, kɔ̀ɔ tɔg nyi lɛ a pɛɛ̀zi wɔ̀ kɔ. 31Kìɓan ki ki kɔni wɔ̀ lɛ ɓum ɓɛɛ kilag wɔ̀, wɔ̀ kìlàg girig ɓɔ kɔ̀. 32I ɓi keesii lɔŋ lɛ ɓumɓɛ ɓɛ keesii mìni, kìɓan ki kuurakɛn kaa ɓa ɓi a lɔ̀ŋkin, lɛ ɓɛ̀kìì-kìɓe ɓɛ ti ɓɛ keesàg girig ɓumɓɛ ɓɛ keesii ɓɔ. 33I ɓumɓɛ ɓɛ ti ɓɛ kilàg mìni kìrɔɔ ɓɛɛ̀ɓɛ ɓì ti ɓì kìlàg kìrɔɔ, di ɓì ka ki ɓi kiɓan ki kuurakɛn, lɛ ǹsoò ɓɛ̀kìì-kìɓe, ɓɛ ti ɓɛ kilàg fɔlɔɔ. 34I ɓumɓɛ ɓì yii lɛ ɓɛ ri lɛ ɓɛ leɓ mìni pon ɓɛɛ̀ɓɛ ɓì ti ɓì ɓɔ̀ràg ɓyom, kìɓan kidɛŋ ki kuurakɛn ki yin foo, lɛ ɓɛ̀kìì-kìɓe ɓɛ ti ɓɛ ɓɔràg ɓɛ̀ro ɓɛ̀kìì-kìɓe ɓyom lɔŋ lɛ ɓɛ ri ɓɔ ɓyɔ ɓiì pɛ̀ɛ̀zii. 35Kìɓan kifog, keesiina ɓɛ̀bènàbena ɓin, ɓì kìkì ɓɔ kìrɔɔ, ɓì ki ɓɔ̀rag ɓum ɓyom, kɛ̀ ɓi mìngi tityɛɛ lɛ, ɓɛ ri mìni ɓiì pɛ̀ɛ̀zii ɓyɔ. I ɓì kìi fɔlɔɔ, mɛ̀lèɓ min mɛ ri ɓiì tèghɛɛ, ɓì ki ɓa ɓɔn ɓɛ Bɛ̀ll ànɛ à teŋmɛɛ kɛ̀ɛ̀ vèg ɓisuulɛ, nyii rilàg rì geesɛ̀n ɓi ɓɛg ànɛ a ɓɛ̀tènteǹ rì ɓɛ̀kìì-rìgɛn. 36Ɓaana rì ǹɗem wu nyìighnyìg lɔŋ yɛ̀ɛ Seŋi wìn a rì rì ǹɗem wu nyìighnyìg.
Kɛ̀ ɓi yɔ̀mgi ɓɛro ɓum
(Mt. 7:1-5)
37Kɛ̀ ɓi ɓa ɓɛ̀yɔ̀mì ɓum fɔɔnnɛ Bɛ̀ll àa yɔ̀m ɓì mini; kɛ̀ ɓi fa ɓum zɔɔ, fɔɔnnɛ Bɛ̀ll àa fa ɓi mini zɔɔ; cenɛɛna ɓɛ̀geni ɓin, fɔɔnnɛ Bɛ̀ll à rì mìni ɓiì cenɛɛ. 38Faana ɓum ɓyom fɔɔnnɛ Bɛ̀ll à rì girig mìni ɓiì faà ɓi coo vèg ìnɛ ì rì ǹɗonɛn lɛ pisa, ì ki ɓa ǹnɔ̀rakɛn, ì rààràà; vèg ìnɛn yɛɛ̀nɛ ɓɛ ri wɔ̀ ɓiì sùùrii ɓyom ɓi ɓàm à kìlàà kɔɔ; ɓisuulɛ vèg ìnɛ ù ti ù fèkì ɓɛ̀ro ɓyom miì, yɛ̀ɛnɛ ɓɛ ri girig wɔ̀ ɓyɔ ɓiì fèegh miì.
39Nni Yeesus à teetìghà ɓɔ dàɗkì ìdɛŋ lɛ: Ɗyaŋɗyàŋ à rì nya lɛ à ɓan roɗyaŋɗyàŋ ɓi kìgeŋ, ɓɛ rɔɓ lɛ ɓɛ kpii ɓi ɓɛsɛ̀ɛ̀ ɓɛ̀cèm ɓi rìɓee?
40N-yilàg à yin lɛ à cee ǹɗèsàg wìì, kìɓan kifog, i à kpaŋzɛɛ cilag kii, à rì lɛ à ɓa yɛ̀ɛ ǹɗèsàg wìì.
41Ɓisuucɛ nnɛ ù ghɛɛ kìfɛfɛy ki ki ri ɓi ɗis ɗi goni, kɔ̀ɔ ghɛn ǹwɔ̀g wu wu ri ɓi ɗiǹkɔ̀ɔ̀? 42Nsoò lɛ: Lannɛ ù rì lɛ ù kpaa goni lɛ, maasòŋ, kìya m̀pisi wɔ̀ kìfɛfɛy ki wɔ̀ ɓi ɗis, kɔm̀ lɛ ù ghɛɛ ɓi nwɔ̀g wu wu ri ɓi ɗiǹkɔ̀ɔ̀?
Wɔ̀ ŋwaà fyɛy fyɛy ɓi ŋwɔm ìghèy ɓi ɗùm! Ka pisi ǹwɔ̀g wu wu ri wɔ̀ ɓi ɗis, di fɔlɔɔ nnɛ u konag kì ghɛɛ̀ yɛ̀ɛ u pisi kìfɛfɛy ki ki ri ɓi ɗis ɗi goni.
Kìte ki yin lɛ ki wum ɓiɗùn ɓidɛŋ
(Mt. 7:16-20; 12:33-35)
43Syeesyee à kìte a maà wum ɓi ɓiɓeɓtàg ɓi ɓiɗùn, ǹsoò kìɓeɓtàg ki kite, ki yin lɛ ki wum ɓìsyeesyee ɓi ɓiɗùm. 44Lɛ ɓɛɛ̀ yilag kite kicèm ɓi ɓìɗùn ɓi kɔ. Ŋwaà yin lɛ à kɔs dii ɓi ǹɗyèm wu gay, ǹsoò lɛ à kɔs gin ɓi nɗyèm wu keŋ. 45Syeesyee à mum à ti à kìlàg ɓìɓan ɓi syeesyee lɛ, à rì rì syeesyee à ǹɗem; kìɓeɓtàg ki mum ki kilàg ɓìɓan ɓi ɓeɓtɛn lɛ, ki ri rì kìɓeɓtàg ki ǹɗem, lɛ ŋwɔm wu mum wɛɛ̀ kpaakpaa kiɓan ki ki roni nyi ǹɗem.
46Ɓisuucɛ nnɛ ɓi rereŋi mɛ lɛ Kan, Kan, kɛ̀ ɓi ki kì com ki ǹkpaa mìni? 47Ǹɗì lɛ ǹkpaa mìni lɛ, mum bimiɗ ànɛ à yùu a lɔ̀ŋkɛm̀, à wog rìrèsàg ɗyɛm̀, à ki nɔ̀ɔ̀ti ɗyɔ, 48à pisɛɛ ŋwaànɛ à ɓaghà ɓi kìtoŋ ki mɛɛ; à timgà zi, à kpaŋ ɓi rìɓan à ghɛ̀lɛ̀n yì kìtoŋ miì aɗyòò; yɛ̀ɛ don yi mɛnig yi kpagà, poɓɓo à yù kì roŋdɛɛ ɓi mɛɛ mɛǹ, kìɓan kifog, mɛ̀ kɛɛ̀ nyɛ̀ŋɗɛn, lɛ mɛ ɓaghà mɛ̀ toŋɛn lɛ syeesyee. 49Nni wɔ̀lɛ ŋwaànɛ à woogh rìrèsàg ɗyɛm̀, kɛ̀ɛ nɔ̀ɔ̀ti ɗyɔ, à pisɛɛ ŋwaànɛ à saghìghà mɛɛ mii ɓi m̀bume aɗyòò, kɛ̀ɛ tim lɛ a ghɛlɛn yì kìtoŋ ɓi zi i nteɗ. Yɛ̀ɛ poɓɓo à roŋɗɛ̀ngà miì, mɛ ghas kì kpìlaagh, mɛ waàrɛ̀n mɛ̀cèm.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.