MATYOO 16

Ɓɛ̀fàrìzyɛŋ rì Ɓɛ̀sàdùsyɛŋ ɓɛ tɔɔgh Yeesus lɛ, a ki dàm, ɓɛɛ ghɛǹ

(Mk. 8:11-13; Lk. 12:54-56)

1Ɓɛ̀fàrìzyɛŋ rì Ɓɛ̀sàdùsyɛŋ ɓɛ yughày yɛ̀ɛ Yeesus lɛ ɓɛɛ feèghrɛn nyi. Fɔɔnnɛ ɓɛ tɔkà nyi lɛ, a ki dàm ìnɛ yɛ̀ɛ resi ɓɔ lɛ ìtèɗ wii wu riì yɛ̀ɛ Bɛ̀ll. 2Nni à ɓàkà ɓɔ lɛ: Ɓì rì làg lɛ, i cɛŋkò ki kpaŋi ɓì kpaa lɛ, ɗyoo ɗi ɓiì rɔɔtɛɛ, lɛ ɗi ri lɛ bɔŋbɔ̀rɔɔŋ. 3Yɛ̀ɛ duri i rì ɓiì tanì, ɓì kpaa lɛ, bwey ì ɓiì nɔɔ̀ gɛɛ̀nɛ, ɓisuulɛ, ɗyoo ɗi ri rìɓàŋ ɗyɔ tì birìm; ɓì yii rìrèmì ɗi riɓa ɗi yɛ̀ɛ ɗyoo ɗi ri ɓi mis, kìɓan kifog, kɛ̀ ɓi yi rirèmì ɗi ɓirèmzɛnà ɓi ɓi ɓyààmɛ̀n ɓi. 4Gbàà ì ɓum ì gɛɛ̀nɛ ìnɛ ì rì lɛ yɔ̀ ɓìɓeɓtàg ɓi ɓum, ì ki keesi tisɔ̀mɔ̀g, yɛɛ̀ tɔtɔg kìrèmzɛnà; ɓaa rèsi ɓi yɔ̀ kìrèmzɛnà kidɛŋ, i ki yin lɛ, ki Zyonas. Fɔɔnnɛ à càɗkà ɓɔ, à ghaàgh.

Dɔgtɛ̀n ì Ɓɛ̀fàrìzyɛŋ rì ì Ɓɛ̀sàdùsyɛŋ

(Mk. 8:14-21)

5Yɛ̀ɛ ɓɛ syaàsyààghà cɛcɛɗ ki riɓày, ɓɛ̀yilàg ɓɛ ɗimzɛ̀ngà rìteɗ ɗi bìrɛs. 6Yeesus a kpaa ɓɔ lɛ: Konaaghna syeesyee à rìkonàg rì nwìɗ a Ɓɛ̀fàrìzyɛŋ rì à Ɓɛ̀sàdùsyɛŋ. 7Nni ɓɛ̀yilàg ɓɛ fefèkà ɓi mɛ̀rem maa lɛ: Ɓaà yi ɓi à kpaa fɔlɔɔ lɛ yɛ̀ɛ tyàa teriì ɓi bìrɛs. 8Yeesus à yighà com ki ɓɛ fefèkà kiǹ, nni à kpaaghà lɛ: Ɓisuucɛ nnɛ ɓi fèfeg ɓi mɛ̀rem min lɛ, yɛ̀ɛ ɓyàa teriì ɓi bìrɛs innɛ ǹkpaa fɔlɔɔ, mìni ɓum ɓɛ maa rìgherɛ̀n lɛsàg ɓɛ? 9Yɛɛ lɔɔ lɛ ɓì ka konag ɓi ki woògh? Ɓi yitii tì ɓi kitaǹ ki bìrɛs ki ɓum ɓɛ̀tɔɔsìm ɓɛtaǹ ɓɛ nɗii, rì bàlì ì ɓìkàɗ ɓi bìrɛs ɓi ɓìi ǹtɛ̀ɛgh di ì mɛ rɔ̀ɓtàg? 10Nsoò lɛ kìtaàɓɛ̀ɛ̀ ki bìrɛs ki ɓum ɓɛ̀tɔɔsìm ɓɛnin ɓɛ nɗii, rì bàlì ì ɓìkàɗ ɓi ɓìi ǹtɛ̀ɛgh di ì mɛ rɔ̀ɓtàg? 11Nni lannɛ ɓì woogh ɓi lɛ, àa kìɓan ki bìrɛs kɛɛ̀ki màa kpaà? Konaaghna rì nwìɗ a Ɓɛ̀fàrìzyɛŋ rì Ɓɛ̀sàdùsyɛŋ. 12Nni ɓɛ̀yilàg ɓɛ wokà min lɛ, àa nwìɗ anɛ ɓɛɛ̀ fogi ɓi bìrɛs lɛ yɛ̀ɛ nurɛn innɛ a kalàg lɛ ɓɛɛ konag rì nyi, lɔŋ dɔgtɛ̀n ìnɛ Ɓɛ̀fàrìzyɛŋ rì Ɓɛ̀sàdùsyɛŋ ɓɛɛ̀ rèrèsì yɛɛ̀nɛ a kalag lɛ ɓɛɛ konag rì yɔ̀.

Pyɛɛri à kalii lɛ, Yeesus à rì Kiris

(Mk. 8:27-30; Lk. 9:18-21)

13Yɛ̀ɛ Yeesus à kpagà ɓi kòdò ànɛ à ɓaghà jàŋbog rì bàn ì Sezare ìnɛ a Filiɓ, nni à tɔkà ɓɛ̀yilàg ɓii lɛ: Ɓum ɓɛɛ̀ kpaaghi ɓaà lɛ, mɛ̀ Man à mum mɛ̀ ǹɗì ghɛn? 14Ɓɛ̀yilàg ɓɛ ɓakà lɛ: Ɓum ɓɛdɛŋ ɓɛɛ̀ kpaaghi lɛ, ù rì Zyaŋ Bàɓtis, ɓɛmbog lɛ, Eli, ɓɛdɛŋ tì lɛ, Zyeremii nsoò lɛ ǹkpaŋzì-ɓìɓan adɛŋ. 15Yeesus à tɔg ɓɔ lɛ: Mìni yòg? Ɓi kalag lɛ mɛ̀ nɗi ghɛn? 16Simɔn Pyɛɛri à ɓàg lɛ: U rì Kiris, Man à Bɛ̀ll ànɛ à rì cem. 17Nni Yeesus à teɗtìghà jɛ̀ɛ̀, a kpaa nyi lɛ: Wɔ̀ Simɔn, man à Zyonas, ù rì m̀màŋɛn, ɓisuulɛ, àa mum à mɛ̀mùù rì bwaɓ yɛɛ resii wɔ̀ kìɓan kiǹ, lɔŋ Seŋi wɛ̀m ànɛ à rì ɓi ɗyoo ɓi ɗùm nnyɛɛ resii wɔ̀ kɔ. 18Nni mɛ̀ ǹkalii wɔ̀ lɛ, ù rì gɔ̀g, nni mɛ̀ m̀ɓiì toŋì kìseŋi kɛ̀m ɓi gɔ̀g ìnɛ̀n aɗyòò. Fɔɔnnɛ ìtèɗ wu riwù waa ɓa ɓi ri bee ì ǹkìyɛn com ɗì kìseŋi kìn. 19Nɗì wɔ̀ ɓiì faà tìɗìɓà ti ɓi kìlɔ̀ŋ ki aɗyòò, fɔɔnnɛ com ki ù kàŋi fɛ ɓi ziinɛ, kɛɛ̀ki ɓɛ ri kàŋ aɗyòò, ki ù fumii fɛ ɓi ziinɛ, kɛɛ̀ki ɓɛ ri fùmi aɗyòò. 20Nni à rɔ̀gsɛ̀ngà min ɓɛyilàg syeesyee à rìrɔ̀gsɛ̀n lɛ ɓɛ̀ kɛɛ̀ kali ŋwaàdɛŋ lɛ nyii ri Kiris.

Yeesus à ɓùŋi kìɓan ki riwù ɗii, ɗì rìghèmɓɛ̀n ɗii

(Mk. 8:31—9:1; Lk. 9:22-27)

21Ɓi cààmɛ̀n kiǹ innɛ Yeesus à tumɛ̀ngà rìkakàlì ɗi ɓɛyilàg ɓii lɛ: Ki ghɛɛ̀sɛɛ lɛ, a kɛǹ a Yorisalɛm, a ghɛǹ mɛ̀tɔɓ lɛɛ̀gwey, ɓi ɓyàg ɓi ɓɛsɛ̀ɛ̀mɛn ɓɛ kilɔ̀ŋ, rì ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna. Ɓɛ ri wey nyi, à ki ghèmɓɛn ɓi ŋwos a kìraa. 22Fɔɔnnɛ Pyɛɛri à tekà nyi a dwìɗ à tumɛ̀n nyi rìreɓ di a kpaakpaa lɛ: Kan, Bɛ̀ll àa gherɛn ɓi; com kidɛŋ yɛ̀ɛ kiǹ kaa kì ɓi wɔ. 23Kìɓan kifog Yeesus à lɔ̀ɔ̀ghrɛ̀ngày à kpaa Pyɛɛri lɛ: Pɛ̀sɛn mɛ̀ ajɛ̀m Satàn, u kìki lɛ, u kɛɓti mɛ̀ fìɓàg, ɓisuulɛ mɛ̀yitì mɔɔ mɛ yin mɛyitì mɛ Bɛ̀ll, mɛ ri lɔŋ mɛyitì mɛ ɓum.

24Fɔɔnnɛ Yeesus à kpaaghà ɓɛ̀yilàg ɓii lɛ: I ki kɔ̀ni mum lɛ a nɔɔ̀ti mɛ̀, à ghɛ̀ɛ̀sɛɛ kì roòzɛɛ nyimiɗ, à tɛ̀g kɔrɔs wìì, à ki nɔ̀ɔ̀ti mɛ. 25Mum ǹcèm ànɛ à ɓiì kɔ̀ni lɛ a kamɛn rì cɛɓ kii, a rì kɔ ɓiì ɗimzii; wɔ̀lɛ ŋwaànɛ à ɓiì ɗimzii cɛɓ kii lɛ mɛ̀, nnyɛɛ ri kɔ ɓiì tanɛɛ ti. 26Nni ki ghɛɓsii mum cɛ lɛ a fɔǹ ziinɛ bimiɗ, di à ɗimzii cɛɓ kii? Cɛ ŋwaà rì lɛ à làg cɛɓ kii ri kɔ? 27Lɛ Man à mum à ɓiì yùu ɓi rìkem ɗi Seŋi rì ɓum ɓii ɓɛ titom, nni fɔɔnnɛ à ɓiì lèɓi mum ǹcèm lɔŋ yɛ̀ɛ rìkì ɗii ɗi ri. 28Ǹkalii mìni ɓi saaɗ lɛ, ɓum ɓɛdɛŋ ɓi ɓumɓɛ ɓɛ ri fɛ, ɓaa cuu ɓi, di ɓɛ ka ghɛn ɓi yɛ̀ɛ Man à mum a yùyuiy ɓi rìlàmì ɗii.

Currently Selected:

MATYOO 16: BAFNT

Highlight

Copy

Want to have your highlights saved across all your devices? Sign up or sign in

Bafia Nouveau Testament © Bible Society of Cameroon, 2019.

Learn More About Bafia Nouveau Testament