MFA' MGHƐ NTHƏM 2

Pa' Zhwenyə Dɔlɔ̌ lɑ sɔ' a

1Tyɛ'dzʉ Pantekɔtə lə nə sɔ', bɑ guŋ yap awɛ cu'tə́ nə ta' tsʉ', 2pu lə wuŋ nə yu' ywə zhwyanyə kɛbəŋ pa' mɑ fəfa gwyə a: Dyə tsʉ' yə wap lə bɑ nə a lo ywə bɔ̌, 3a ŋwa' pa' mgwa mɔk a, gaptə bɔnyə ba a nə ya mo lə́ nə pu. 4Zhwenyə Dɔlɔ̌ lo nə guŋ yap awɛ. Wap pɑ gɔm shɑ́ mghɔm dyɛ', myə Zhwenyə Dɔlɔ̌ hɑ gɑ wap ghɔm a.

5A lə nə pɑ̌ po'o bɑ pɑ Yudea, pɑ lə mku' biŋ Si pɑ bɑ wap fɑ nə guŋ mguŋ to kɛbəŋ awɛ bɑ Yerusalɛm. 6Pɔmnəŋ lə nə yu' zhwyanyə sɔ' kwa' vəŋ e. Nwə pɑ shyə wap nə pa' bǎ ya mo lə lə bɑwə ju' ywə yə wap lə bɑwə gɔm a pɑ nə ghɔm tsyə. 7Nwə pɑ shyə wap bɑ jʉm wap wap pɑ́ gɔm gɑ: Guŋ pɔ pɔ́ gɑ pyə wap bɑwə gɔm a tə bɑ pɑ Galilea a lə? 8Tə a shyə m gɑ kɑ tə ba a ya mo lə nə pɑ̀ pɑwə ju' wap pɑ nə ghɔm tsyə? 9Pɑ Parta, pɑ Mɛdo, ba pɑ Elamita, ba pɑ Mesopotamia, pɑ Yudea ba pɑ Kapadokia, pɑ Ponto ba pɑ Azia 10pɑ Frugia ba pɑ Pamfilia; pɑ Egipto ba pɑ ghəŋ Libia, pɑ Kirena ba pɑ Roma pyə wap tsɔ' a. 11Guŋ pɔ awɛ, pɑ Yudea ba pɑ piŋ nwə yap; pɑ Kreta ba pɑ Arabya, pɑ si bɑwə ju' pa' wap wə gɔm msya Si a nə ghɔm tsɔk pɑ̀. 12Nwə pɑ shyə wap, wap yak ywə yə wap ghɔm a gɔm cəcɑ̌ pu gɑ: yəŋ kɑ nthi nwə? 13Shɑ pɔ pɑ gwi wap gɔm gɑ: pyanyə́ mlu' bɑ a lo nə pu.

Ghɔm Pɛtrɔ

14Pɛtrɔ yə pu a pɔ shwɔp ya mu' mgham lə bɑ a lə ghɔm tə thə gɑ: Wɔ pɑ Yudea, ba guŋ yɔ awɛ pyə pǒ shwə Yerusalɛm a, po cəŋtə ju' ywə yə a wə shyə a, biŋ nthéŋ mtəŋ nə mghɔm mə̌. 15Gɛ̌! Pɔ pɔ gɑ ka nwə́ pa' pǒ wə ŋkwɛ a, nə pa' pɑ jɑ pɑ́ fɔkdzʉ̌, nə mnam vʉ̌'. 16Ywə yə a bɑwə shyə a, bɑ ywə yə gɔm mghɔm Si Yoɛl lə la' gɔm a:

17Nə pa' Si lə ghɔ̌m gɑ:

A gɔ sɔ' pɑ nə jyɔjʉm tyɛ'dzʉ

a sɛ Zhwenyə a nə guŋ bapnɑ pɔ awɛ.

Pó pɔ́ pyə pɑ bɛ ba pyə pɑ jwǐ

cʉ' mghɛ ghɔm ghɔ̀m Si.

Mŋkhɛ mo pɔ́ pɑ jɔ nə yɔ m nthʉm zhwenyə,

mvo pɔ pɔ́ pɑ jɔjʉm.

18Əŋ, gɑ gɔ sɔ' sɛ Zhwenyə a

nə mghɛ fa' pɑ̌ pyə pɑ bɛ bɑ pyə pɑ jwǐ,

nə Tyɛ'dzʉ bɔ a sɛ Zhwenyə a nə pu,

wap cʉ' mghɛ ghɔm ghɔ̀m Si

19Gɑ̌ gɔ sɔ' te msya kɛbəŋ

piŋ la'tə mtiŋ dəmcǎ',

a pɑ mcyə, mɔ̌k ba dhə mɔk.

20Nam gɔ sɔ' kwyəpnyə cʉ' jʉ́m.

Mɑŋwə́ cʉ' mcyə.

Tə tyɛ'dzʉ Cyəpɔ sɔ', tyɛ'dzʉ gwyə́,

tyɛ'dzʉ ghu'tə.

21Po'o bǎ ya mo lə yə é gɔ sɔ' ké tso Cyəpɔ a

gɔ sɔ' vɔk.

22Pɑ Israɛl po yu' mghɔm mɔ gɑ: Yeso yə Nazarɛt, bɛ yə̌ŋ yə Si lə cwɔ' e nthəm e bəŋ po, shyə́ m nə e gə nthinthi msya pu a nthinthi mtiŋ cəcɑ́ po pa' po zhyə a, nə da'tə mtʉ̀ɔ myə́. 23Bɛ bɔ, pa' Si lə tsə zhyə biŋ jap a, po le fiŋ e, nə zhwə e, gə pɔ cwəpuŋ kam e thə bɛnyəpɛnyə, 24da' gɑ́ Si lé jam e nə vʉ̌, ŋkwi e bi gǒ' vʉ̌, nə pa' a lə bɑ́ bi a pɑ́ vʉ̌ lə lɑ́ gʉ' e nə nthɔm e pɑ.

25David gɔm nə e gɑ:

Ŋ də́ bɑ́wə jɔ Cyəpɔ pɑ dzə̌ m̀

nə pa' e bɑ́ nə ghə̌ŋ pu a yə tʉɔ

po'o gɑ ka lam tsɑ̌ sɔ.

26A pɑ́ po' o tʉm tsɑ pɑ nthʉm ŋwɛ́nyə̀,

shwə̀ a pɑ jwɔp mŋwɛ́nyə̀.

A kwi' bɑ́ pó'o gɑ́ ŋ sɔ' bɑ shwə nə mɔktə nə bapnɑ a.

27Nə pa' o tə gɔ sɔ' tak vɔk á bi vʉ̌ pɑ,

o lə nəŋ bíŋ gɑ mo dɔlɔ̌ o pi.

28A bɑ o la'tə á məjyə̀ vɔk

o gɔ sɔ' lə pa' o gɔ pɑ bəŋ m̀ a nə nyəŋ ŋwɛ́nyə̀ nə m̀ tə a ló.

29Mfɑ́mfɑ́, a puŋ nə siŋ wɔ sɔ́sɔ̌ gɑ́ ta yɔk pɑ David bɑ e lě pfʉ́, pú lé nthəŋ e, thəsì é nəŋ jɑ pɑ́ cəcɑ̌ pɑ. 30Tə é lə bɑ gɔm ghɔ̀m Si, jyə gɑ ɑ́ bɑ Si lě ŋkha' bi é, biŋ ŋkhɔ mkɔ gɑ é gɔ sɔ' yap mo nə kwɔ' é, e təm pɑ nə ŋkhənyə e, bɑ́ gwya é. 31E lɑ́ ləŋdzə jɔ nə́ yam nə vʉ̌ Kristo, tə́ gɔm nə́ é gɑ:

Pu lé tə wa' é guŋ a vʉ̌,

la' nɑ é nəŋ bǐ pɑ́

32Yeso bǎ, Si lé jam é nə vʉ̌. Guŋ yɔk pɑ awɛ nəŋ bɑ́ mkwinthɛ́. 33Pú tʉɔ Si lé ŋa' é hɑ thə́, Tá hɑ́ Zhwenyə Dɔlɔ̌ yə é lə ka' á bi e, e sɛ pa' po wə jɔ biŋ ju' a. 34David lě tɑ́ kwɔ' kɛbəŋ, da' gɑ e le gɔm gɑ:

Cyəpɔ ghɔm bì Cyəpɔ a gɑ:

cwə nə ghəŋ pu a yə tʉɔ.

35Tɑ̌ ŋ də mghɛ bò pǔ nə gə kwɔ̀' tʉ mkwə mǔ.

36Guŋ tuŋdyə́ Israɛl zhyə́ nyənyɔ: Si bɑ é lé dɑ Yeso bɔ yə po lə kwé é thə́ bɛnyəpɛnyə a nə gə Cyəpɔ ba Kristo!

Dzə pɑ pʉɔtʉm

37Wáp lə yú' mghɔm bɔ̌ á paknyə tʉm tsap. Wap hə́ŋtə̀ Pɛtrɔ, ba pyə shɑ mghɛ nthəm gɑ: Mfɑ̌mfɑ́ pyə gɔ́ ghə̀ gɑ́ kɑ? 38Pɛtrɔ pa' bi pu gɑ: Po kwyəpnyə́ bǎ ya mo lə́ nə po kwishyə nə tso Yeso Kristo nə lɑ mhɔ myə́ shwyɛ́' é, po piŋ kwi Zhwenyə Dɔlɔ̌. 39Nə pa' mka'nyə bɔ bɑ̀ bi po ba m bi pó pɔ́, ba m bi pɔ pyə wap tə gʉə sʉəsʉə a nə dəŋ pa' Cyəpɔ Si yɔk pɑ gɔ sɔ' nə kè wap a. 40Pɛtrɔ lə́ lɑ shɑ nthinthi mghɔm nyəŋ gʉ' nə pu biŋ bɑ ŋkwinthɛ̌ bɑ gɔm gɑ: Po vɔk nɑ tsɔ nə yəŋ wɔ̌ dzʉ cwəpuŋ. 41Pɔ pyə wap lə piŋ ghɔm tsyə́ a, lə kwishyə, pɔ gwɛ a sha'tá piŋ nthamtə nə pu tyɛ'dzʉ bɔ.

Dzə cu'tə pɔ Kristo

42Wap lə bɑ si guŋ mcwə awɛ bɑ ŋkhaktʉɔ nə jí' nwə mghɛ nthəm, bɑ nthamtə́ nə dzʉ̌nyə́ mfɑ̌mfɑ́, ba nə po'nyə msɛ̌, ba nə cwyɛ'nyə Si. 43Pwɔk lɑ bɑ́ nə gúŋ pɔ̀ awɛ: mghɛ nthəm pɑ gə msya pwa mtiŋ nthinthi. 44Guŋ pɔ pyə wap lə piŋ a lə bɑ́ pɑ́ ŋkwishwə, bɑ nthamtə guŋ tsə tsap tamtə. 45Wap lə bɑ fiŋ mbé map ba tsə́ tsap, gaptə ŋkhap cəcɑ̌ guŋ yap awɛ, hɑ bǎ yə wɑlɑ nə dəŋ mnwə myə́. 46Wap lə bɑ guŋ mtyɛ'dzʉ awɛ bɑ gɔ Dyə Si, bɑ bo'tə msɛ mdyə map, bɑ dɑ ŋwɛ́nyə̀ dzʉywə, tə ŋa'nɑ. 47Wap lə bɑ go'tə Si, guŋ pɔ awɛ pɑ dɑ wap kwá' pɑpuŋ. Cyəpɔ pɑ guŋ mtyɛ'dzʉ awɛ ŋkwi' pɔ pyə wap kwi ywə vɔk a nə cu'tə pɔ pyə.

Currently Selected:

MFA' MGHƐ NTHƏM 2: NTGomala

Highlight

Copy