LUKASI 13

Po pʉɔtʉm tə byap

1A lə pɑ pɑ́ cwə o bɔ, shɑ pɔ sɔ' siŋ e ywə yə a lə təm nə pɑ Galilea pyə Pilato lə lɑ mcyə map ŋi'nyə myə́ tsəpwɔ' tsap a. 2E ghɔm bi pu gɑ: Po kwɛ gɑ pɑ Galilea bɔ̌ bɑ wap lə hɔnwə shyə guŋ pyə shɑ pɑ Galilea awɛ tə jɔgo' tiŋ po' a? 3Gɑ siŋ wɔ gɑ gɛ̌. Tə́ po pɑ tə pʉɔtʉm tsɔ, bɑ ba wɔ yɔ gɔ sɔ' pfʉ pɑ po'o awɛ. 4Kɑ po kwɛ gɑ pɔ shwɔp hɔm mgham pyə sʉəsʉə pa' Siloe lə vʉ̀ nə pu jwə́ wap a, lə bɑ wap hɔnwə shyə guŋ pɑ Yerusalɛm a? 5Gɑ̌ siŋ wɔ gɑ gɛ̌; tə́ po pɑ tə pʉɔtʉm tsɔ, bɑ ba wɔ yɔ gɔ sɔ' pfʉ pɑ po'o awɛ.

Ghɔm tə tútə thə nthɔm nthə́

6É lə́ ghɔ́m ghɔ̀m tə́ tútə gɑ. Mu' mo lə ghə́ ta' thə́ nthɔmmthə pe e bɑ e tsə ka e. E lə́ sɔ' de nthɔm myə́, e lə yɔ sɔmywə nə. 7E lə́ ghɔ́m bi byap ka ga: Yəŋ gɑ si bɑ batə́ gu'dzʉ́ tsɑtá pa' bǎ sɔ' nə le nthɔm nə thə nthɔmmthə́ yəŋ gɑ, ŋ də yɔ sɔmywə a. Nwə ka e lɑ yəŋ gɑ tsʉ' ca' néné? 8Byap kà pa' bi e gɑ: Ta: Kwi' nthak e nəŋ gu' ɔ, po'o gɑ̀ nthəŋ giŋnyə e, nyəŋ dziak nə, 9pɑtyɛ' a yam nthɔm; tak po'o, o ko' e ma' si.

Nə yɛ̀ mu' ŋkhʉm mjwǐ tyɛ' Sabat

10Yeso lə pɑ̌ ji'tə ywə bi pɔmnəŋ sinagogə tyɛ' Sabat. 11Mu' mjwǐ pɑ dyə o bɑ mú' zhwenyə lɑ é gə ŋkho'tə tə fɑ nə gu' shwɔp hɔm mgham. Bɑ e lě bɔnyə, la' e pɑ bʉ' nɑ́ e jyə́ 12Yeso lə yɔ e gɔm bi e gɑ: Mɑmjwi, o vɔk po'tə o. 13Gɔm po'o jap bu myə́ nə e; e wuŋ bʉ' nɑ e, go'tə Si. 14Tə tadyə Sinagogə yɛluŋ pa' Yeso jɛ mo po'o tyɛ' Sabat a, gɔm bi pɔmnəŋ gɑ: Mtyɛ'dzʉ fa' wə nthɔkə, po sɔ' pu yɛ wɔ tyɛ' o bɔ. Ka po sɔ' m tyɛ' sabat. Cyəpɔ pà' bi e gɑ: 15Mlǎbu! Bǎ ya mo lə nə po tə bɑ tyɛ' sabat ŋkhyɛ' nɔmna' e kɑ jakasi e lə́ dɑ e gɔ e nwə́ shyə a? 16Tə mɑmjwi yəŋ gɑ, yə e bɑ go Abraham a, yə sata bɑ e le shəŋ e tə fɑ nə gu' shwɔp hɔm mgham a, a ké tə puŋ gɑ pu kyɛ' e tyɛ' sabat a? 17E lə pɑ gɔm po'o, sǒ pɑ ŋkhú mghɛ bo pyə; tə pɔmnəŋ pɑ ŋwɛnyə nə mnwə pɑpuŋ myə e lə́ gə a.

Ghɔm tə tutə msɔm sɔk

(Mt 13.31-32; Mk 4.30-32)

18E lə kwi' gɔm gɑ: Nəfo Si hwə́ kɑ, bi a pɑ ŋ də kɑ fǒ'? 19A hwə́ pá' sɔm sɔk yə mo dzə ka é: A ŋkwyɛe, ji ta' thə́, pǒmsəŋ to kɛbəŋ pɑ ba' mkɔ map nə bu myə́ a.

Ghɔm tə tútə ywə kwɔ' msɛ

(Mt 13.33)

20E lə kwi' gɔm gɑ: Nəfo Si bɑ pa' kɑ a? 21Nəfo Si bɑ pa' ywə nə gə msɛ kwɔ', yə mjwǐ nyə́ŋ muywə nə msɛ bǔ ntha nə gə a cəŋtə ŋkwɔ' a.

Israɛl la' ko nə́ nəfo lə̀

(Mt 7.13-14,21-23)

22Yeso lə pɑ gɔ m Yerusalɛm, nə cyə́ mla' ba mtisuŋ, giŋ ji'tə pɔmnəŋ ywə́. 23Mu' mo ghɔm bi é gɑ: Cyəpɔ, jyə gɑ́ da' pó mduŋ pɔ nə gɔ sɔ' vɔk lə? Yeso pa' bi pu gɑ: 24Po kaktʉɔ nə cyə m nə jyədyə̌ ŋkho dyə́. Nə pa' gɑ̌ siŋ wɔ gɑ pɔ tə jɔ́m gɔ sɔ' cəŋ nə ko dyə, wap lə ku' nə ko.

25Cwə yə gɛ la' gɔ sɔ' lusi yo' jyədyə̌ nə cɑ wɔ dzʉ a, po to' nə pɑ ŋkho'tə jyədyə̌ bɑ gɔm gɑ: Cyəpɔ hé jyədyə̌ bi pyə. E pa' bi po gɑ: ŋ kha zhyə́ wɔ. 26A po to' nə ghɔm gɑ: Pyə lə tsʉ́ biŋ nwə dzə o. O lə ji'tə ywə guŋ pyə. 27E piŋ ba' bi po gɑ: Ŋ kha zhyə wɔ. Po lu bəŋ m̀ wɔ mghɛ ghə nwə cwəpuŋ.

28Po gɔ sɔ' pɑ lɔ piŋ pɑ pfɑ msuŋ mɔ nə tyɛ'dzʉ yə po gɔ sɔ' yɔ Abraham, yɔ Isak ba Yakop ba guŋ mghɔ́m ghɔm Si awɛ nthʉm Nəfo Si, bɑ pu wa' wɔ m pé a. 29Pu gɔ sɔ' fɑ ghəŋ nthəmnam, ba m ghəŋ binam, fɑ shyə́dzʉ̌ ba m mto dzʉ pɑ tsʉ́ nthʉm Nəfo Si. 30A po'o tə́ shɑ pɑ jʉm gɔ sɔ' cʉ' pɑ dzə̀, shɑ́ pɑ dzə cʉ' pɑ jʉm.

Yeso dzə vʉ̌

(Mt 23.37-39)

31A lə pɑ̌ pɑ́ cwə o bɔ, shɑ́ pɑ Farisai sɔ' gɔm bi e gɑ: Ghɔ̌! Lu si tsɔ'ɔ nə pa' Herode bɑwə shəŋ nə zhwə o a. 32E ghɔm bi pu gɑ: Po ghɔ gɔm bi sʉ́sʉm bǎ gɑ: Yɔ: Gɑ wə jəŋ mzhwenyə cwəpuŋ, biŋ bɑwə jɛ mgho tyɛ' ɔ ba m yǒ. A piŋ bɑ nə batə tyɛ' ta, á yɑ dəŋ ku'u. 33Tə', a puŋ gɑ giŋ tyɛ' ɔ, ba m yǒ, ba m yəmu' yo, nə pa' a ka puŋ gɑ sɔm gɔm ghɔm Si pfʉ́ tə pfʉ́ pɑ Yerusalɛm pɑ.

34Yerusalɛm, Yerusalɛm, wə yə o jwə mghɔm ghɔ̀m Si, bɑ dɑ mwɔ' nthamtə pɔ pyə pu nthəm wap bu a, ŋ də cəŋ nə cu'tə pó pǔ pa' mɑgɔp shu'tə po pyə bap e a la' po kuŋ. 35Tə́ pú gɔ sɔ' tak la' tsɔ bi po. Po lə nəŋ biŋ jɔ a tə ŋkhəm cwə yə po gɔ sɔ' ghɔm gɑ: Byanyə nə tso Cyəpɔ bi mo yə e wə sɔ' a.

Currently Selected:

LUKASI 13: NTGomala

Highlight

Copy