LUKASI 3

Mghɔm Yohane nu' pɔ shyə́

(Mt 3.1-12; Mk 1.1-8; Yhn 1.19-28)

1Kasa Tibɛrə lə nə ghə gu' shwɔptɔ mghǎm dəm nəfo, cwə yə Pontio Pilato lə́ bɑ́ gɔpna' pɑ Yudea; cwə yə Herode lə́ bɑ́ fo Galilea; cwə yə Filipo fɑ Herode lə́ bɑ́ fo Trashonitə, cwə yə Lizanias lə́ bɑ́ fo Abilena a; 2gu' yə Ana pu Kaifa lə́ bɑ́ mtadyə mkamsi a. Ghɔm Si sɔ' bi Yohane mú Sakaria e pɑ ghakgo. 3E ghɔ nə mguŋ giŋnyə Yurdɛŋ bɑ shyanyə nwə nə kwishyə pʉɔtʉm, po'o gɑ si lɑ mhɔnwə mo nə shwyɛ' e.

4Dəŋdəŋ pa' a bɑ̀ pu və nthʉm ŋwa'nyə mghɔm Esaya gɔm ghɔ̀m Si gɑ:

Gi mo ghakgo shwe gɔm gɑ:

po nyaptə məjyə Cyəpɔ.

Siŋ mpim jyə

5pú gɔ sɔ' lonyə msʉ̀m,

sɛtə́ mkǔŋgó sʉəsʉə

ba myə ŋkho'ŋkho',

siŋ mtsìŋ a tiŋnyə,

ghə mlo'mló' jyə sɛ́tə́.

6Guŋ pɔ awɛ yɔ ywə vɔk Si.

7Pɔmnəŋ lə sɔ' tə jɔm gɑ é nu' wap shyə. E pɑ́ gɔm bi pu gɑ: Gwya nɔk mtiŋ. Wɑ̌ da'tə́ wɔ nə ŋkhʉ yɛluŋ Si yə a wə sɔ' a? 8Po yam nthɔm myə a ku'nyə nə pɔ pyə wap pʉɔtʉm tsap a. Ka po pɑ́ gɔm pɑ́ gɑ́ pǒ bɑ́ po Abraham, gɑ̌ wə siŋ wɔ gɑ́ bi a pɑ́ Si lɑ mwɔ' mɔ nə gə po Abraham. 9Po zhyə gɑ́ jɔm é da' bɑ to mthə. Yə́ ta'thə yə a tə́ jam nthɔm pɑpuŋ a pɑ, pu gɔ ko' to mɔk.

10Pɔmnəŋ lə bɑ həŋtə Yohane gɑ: Pyə gɔ ghə m gɑ́ kɑ?

11E ghɔm bi pu gɑ: Mo yə e ghə dzə́ yɑpʉə a e ghap hɑ́ yə mo yə e ka ghə ywə a. Mo yə e ghə ywətsʉ a ghə pɑ po'o.

12Shɑ mghɛ kwishwɔp lə sɔ'yap nə kwishyə gɔm bi e gɑ: Ta tə pyə gɔ ghə yɔk gɑ́ ka?

13E ghɔm bi pu gɑ: Ka po kwi' dəŋ ywə yə pu gɑ po kwi a.

14Msə̌ŋwi lə həŋtə e yap gɑ: Pyə gɔ ghə yɔk gɑ ka? E ghɔm bi pu gɑ: Ka po hya mo, kɑ nə fʉtə é lɑ. Po wuŋ yo da' nə dəŋ ŋkhap fa' yɔ.

15A lə́ bɑ́ cwə o bɔ guŋ pɔmnəŋ awɛ pɑwə byap Kristo. Pu zhi nə pɑ həŋtə gɑ́ jyə gɑ Yohane tə bɑ́ Kristo a kilɑ́? 16Tə́ Yohane pɑ ba' bi guŋ pɔ awɛ gɑ: Ŋ gɑ̌ bɑwə nu' wɔ pɑ shyə; Mu'mo jʉ̌m m̀ bɑwə sɔ̌', bɑ e tʉɔ shyə a, bɑ ŋ kha ku'nyə nə kyɛ' ŋkhə mthap myə́. E gɔ sɔ' pɑ nu' wɔ nthʉm Zhwenyə Dɔlɔ̌ pu mɔk. 17A bɑ ě wim ywə nə nthya pu é. E gɔ tya mduŋ tsə́ pɑpuŋ nyəŋ ŋkhiŋ. A cʉ' mgha' tsə e su mɔk tə la' bi nə́.

18Yohane lə lɑ̌ nthinthi mghɔm sə́sò nə siŋ Cùŋ pɑpuŋ bi pɔmnəŋ. 19A lə pɑ̌ po'o fo Herode yə Yohane lə bɑwə shɔk e, bɑ e té Herodia jwi fɑ́ e nə gə jwǐ e, ba nə shɑ́ mbɔkbɔk nwə tə a yɔm a 20nə miŋ ma'nə, gəm Yohane nyəŋ e dyəcɛ̌.

Kwǐshyə́ Yeso

(Mt 3.13-17; Mk 1.9-11)

21Pa' guŋ pɔmnəŋ awɛ lə pɑ̌ ŋkwishyə á, ba Yeso lə kwi yə shyə tə bɑ́ shwyɛ'nyə Si, 22kɛbəŋ ghyɛ' Zhwenyə Dɔlɔ̌ fi' sɔ' nə e pa' səŋgɔp fo a: Pu yu' gi mo fɑ kɛbəŋ gɔm gɑ: O bɑ mú a yə gɑ ŋkhuŋ e te' a, gɑ cwɔ' o tyɛ' ɔ.

Ŋkhənyə Yeso

(Mt 1.1-17)

23Yeso lə nə to' fa' bɑ é ghə gu' mghǎm nthá. E lə bɑ mu Yosɛp pa' pu lə ŋkwɛ á, mu Heli 24mú Mata, mú Levi, mú Meleki, mú Yanái, mú Yosɛp, 25mú Matatias, mú Amɔs, mú Naum, mú Esli, mú Nagai, 26mú Maat, mú Matatias, mu Semei, mu Yosɛk, mú Yoda, 27mú Yohanan, mú Resa, mú Zorobabɛl, mú Salatiɛl, mú Neris 28mú Meleki, mú Addi, mú Kosam, mú Elmadam, mú Er 29mú Yeso, mú Eliezer, mú Yorim, mú Mata, mú Levi 30mú Simeon, mú Yuda, mú Yosɛp, mú Yonam, mú Eliakim, 31mú Melea, mú Meŋna, mú Matata, mú Natam, mú David, 32mú Esaya, mú Yɔbɛd, mú Boos, mú Sala, mú Naasɔm, 33mú Aminadab, mú Admiŋ, mú Arni, mú Esrom, mú Farɛs, mú Yuda 34mú Yakop, mú Isak, mú Abraham, mú Tara, mú Nakor, 35mú Seruk, mú Rago, mú Falek, mú Ebɛr, mú Sala, 36mú Kainam, mú Arfatsad, mú Sem, mú Noe, mú Lamek 37mú Matusala, mú Enɔk, mú Yaret, mú Malelɛl, mú Kainam 38Enɔs, mú Sɛt, mú Adam, mú Si.

Currently Selected:

LUKASI 3: NTGomala

Highlight

Copy