LUKASI 6

Yeso pu Sabat

(Mt 12.1-8; Mk 2.23-28)

1A lə pɑ̌ mu' tyɛ'dzʉ Sabat, Yeso pu a pɑkhʉ pyə pɑ́ shyə nə mu' pé msɛtʉɔ, pɑkhʉ̌ pyə po' mcɛ̌ msɛtʉɔ, si'nyə pu pú pfɑ. 2Shɑ pɑ Farisai ghɔm bi pu gɑ: Nwə kɑ́ po ghə ywə yə a bɑ pu ka piŋ nə ghə tyɛ'dzʉ Sabat a? 3Yeso pa' bi pu gɑ: Po la m ŋkhe ywə yə jikǔ' lə yɛ David pu a pɔ pyə́ pu a pu lə́ bɑ́ a, e ghə a? 4Pa' e lə ko dyə Si, be msɛ myə pu hɑ nə nə gamtə Si a pfɑ, biŋ hɑ myə́ pɔ pyə pu a pu lə bɑ a? A nə pɑ po'o da' mkamsi nə pɑ pfɑ a? 5Yeso lə kwi' gɔm bi pu gɑ: Mú mo bɑ Ta Sabat.

Yeso yɛ gɛ po'tə

(Mt 12.9-14; Mk 3.1-6)

6A lə kwi' bɑ mu' tyɛ'dzʉ Sabat Yeso ko sinagogə, bɑ́ ji'tə pɔmnəŋ ywə. Mu' mo pɑ sinagogə bɔ bɑ pu tʉɔ e cwyəm, 7pɑ Farisai pu a pɑ zhyə mco' pɑ́wə byap nə yɔ bya Yeso gɔ yɛ mo bɔ tyɛ'dzʉ Sabat a; wap ho ywə nə nthé bya nə é. 8Yeso zhyə mkwɛnyə map; gɔm bi mo bɔ gɑ: Lusi nthiŋnyə tùŋ; e lusi nthiŋnyə thə́. 9Yeso ghɔm bi pu gɑ: Pu bíŋ tyɛ'dzʉ Sabat nə ghə nwə pɑpuŋ kɑ nə ghə nwə cwəpuŋ? Nə vɔk mo kɑ nə zhwə mo? 10E lə lě wap, dzam shu' gɔm bi mo bɔ gɑ: Siŋ pu o; e siŋ pu é, a tʉɔ. 11Luŋ yap sə, wap sɛ kwa' pa' wap gɔ ghə nə Yeso a.

Yeso cwɔ' mghɛ nthəm shwɔppʉə mghǎm

(Mt 10.1-4; Mk 3.13-19)

12Yeso lə lǔ cwə o bɔ gɔ dəm kuŋgǒ nə cwyɛ'nyə Si. E lə ti pɑ nə cwyɛ'nyə Si tə dzʉ̌ lɔ́. 13Dzʉ lə lɔ, e cu'tə pɑkhʉ pyə, shwɔ' pɔ shwɔppʉə mgham cəcɑ̌ pu, ŋkhe wap gɑ mghɛ nthəm; wap lə bɑ: 14Simon yə e lɑ ke e gɑ Pɛtrɔ a, pu fɑ e Andreya; Yakop, Yohane, Filipo pu Batəlemi 15Matio pu Tomasi. Yakop mu Alfeo pu Simon mu e guŋ. 16Yuda mu Yakop pu Yuda Iskariɔt yə e gɔ sɔ' tɛ mnɛ Yeso a.

Yeso ji'tə pɔmnəŋ biŋ jɛ mgho

(Mt 4.23-25)

17Pu a pu lə fi' fɑ kúŋgǒ, tə ŋkho nə tsʉ' ŋkhʉ'kʉ̌', e tiŋnyə tsʉ'u pu a pɑkhʉ pyə, ba vəŋ pɔ: Fɑ́ nə́ guŋ mtsʉ' awɛ, pɑ Yudea, pɑ Yerusalɛm, pɑ giŋnyə shyə Tiro ba Sidon. 18Sɔ' nə yu' nwə é, e piŋ jɛ wap nə mgho map; pɔ pyə́ mzhwenyə cwəpuŋ lə bɑwə baknyə wap a pɑ jɛ. 19Guŋ pɔ awɛ lə́ bɑ́wə shəŋ nə kwak e, nə pa' mu' gʉ' lə bɑwə nthəm nə é bɑ jɛ wap.

Mpuŋtse pu a ghɛ ghəghʉɔ

(Mt 5.1-12)

20Yeso lə pu' mnyə myə́, de pɑkhʉ pyə gɔm gɑ:

Mpuŋtsé bɑ́ wɔ mpə́ŋ

nə pa' Nəfo si bɑ bi po.

21Mpuŋtsé bɑ́ wɔ pyə jikǔ' wə jɛ wɔ cwəlɔ a,

pǒ gɔ sɔ' zhwyə́.

Mpuŋtsé bɑ wɔ pyə po wə dɔ̌ cwəlɔ a,

po gɔ sɔ' wí.

22Po bɑ mpuŋtsé, nə cwə yə pɔmnəŋ gɔ pɑ

pɔ wɔ́, wa' wɔ́, pɑ́ yəmtə

wɔ́, pɑ́ wak wɔ́, pɑ pɔptə mtso mɔ pa' pɔ bɔkpɔk a,

nə Mu mo a.

23Po ŋwɛnyə nə cwə bɔ,

po ŋwɛnyə nə pa' mcwɔ'fa' gwyə wə byap wɔ thə́ kɛbəŋ.

Ba mtá pap lə lɑ̌ mghɔm ghɔ̀m Si jɔgo' pɑ po'o.

24Tə ghəghʉɔ yɔ, wɔ mghɛ tsə́.

Po bɑ po e da' gə yɔ nə puŋ.

25Ghəghʉɔ yɔ, wɔ pyə po wə jwyə cwəlɔ

ji gɔ ti yɛ́ wɔ;

ghəghʉɔ yɔ, wɔ pyə po wə gwi cwəlɔ a,

po gɔ ti lɔ̀.

26Ghəghʉɔ yɔ́ nə cwə yə guŋ pɔ awɛ gɔ pɑ gho'tə wɔ a;

mta pap lə gə pɑ po'o

nə mghɔm ghɔm Si cwanwə̀.

Nə kuŋ mghɛ bò

(Mt 5.38-48; 7.12)

27Tə gǎ wə gɔm bi po pyə pó wə ju' a gɑ́ pò kuŋ mghɛ bo pɔ; po ghə nwə pɑpuŋ bi pɔ pyə wap bɔ wɔ́ a 28po nyəŋ byanyə́ nə pɔ pyə wap nyəŋ do nə po a, po cwyɛ'nyə Si nə thə pɔ pyə wap nthɛmnɛ mɔ a. 29Mo cwɔ pǔ nə́ mu' ghəŋ təŋ o, o nya yə mu' ghəŋ bi. Mo lɑ dzə fɔk o, o kɑ kɔ gɑ e kɑ lə yə nthʉm o. 30Mo kwi ywə bu, o hɑ bi e. Mo lɑ ywə ó, o tak bi e. 31Ywə yə pǒ shəŋ gɑ pɔmnəŋ ghə nə po a, po ghə ywə bɔ nə pu.

32Po pɑ ŋkhuŋ pɑ́ pɔ pyə wap ŋkhúŋ wɔ a, bɑ pu gɔ gho'tə wɔ nə kɑ́ ywə? Ba pɔ cwəpuŋ ŋkhuŋ pɔ pyə́ wap ŋkhuŋ wap a. 33Po pɑ gə nwə pɑpuŋ pɑ bi pɔ pyə wap gə nwə pɑpuŋ bi po a, bɑ pu gɔ gho'tə wɔ nə kɑ́ ywə? Ba pɔ cwəpuŋ gə yap pɑ́ po'o. 34Po pɑ hu pɑ bi pɔ pyə wap gɔ ti pa' bi po a, bɑ pu gɔ piŋ gho'tə wɔ nə kɑ ywə? Ba pɔ cwəpuŋ hu ywə bi pɔ cwəpuŋ, po'o gɑ wap ti ba' bi pu. 35Sɔ' m̀ nə po, po kuŋ mghɛ bo pɔ́, gə́ nwə pɑpuŋ bi pu, bɑ hu tə pyap gɑ pu gɔ ti pa' bi po. Po gɔ sɔ' ghə mcwɔ'fa' gwyə́, po gɔ sɔ' pɑ pó Si yə e shɔm ba pɔ cwəpuŋ a.

Nə cyətə́ té bya

(Mt 7.1-5)

36Po pɑ mghɛ cɔmmtso dəŋdəŋ pa' Tá yɔ bɑ gɛ cɔmmtso a! 37Ka po pɑ nthé bya nə pɔmnəŋ, Si kɑ sɔ' nthé bya nə po. Ka po pɑ nyəŋ shɛ thə́ pɔmnəŋ, Si kɑ sɔ' nyəŋ shɛ thə po! Po pɑ dɑ mhɔ pɔ shwyɛ' wap, Si sɔ' dɑ mhɔ mɔ nə shwyɛ' wɔ. 38Po pɑ hɑ ywə bi pyə shɑ́ pɔ, Si sɔ' hɑ ywə bi po; pu gɔ sɔ' nyəŋ pʉə dzə́ yɔ, hya, cʉ'nyə, a lo tə pfyə. Si gɔ sɔ' lɑ pɑ fo' yə po nə fo' pɔ a nə fo' wɔ.

39Yeso lə kwǐ' gɔm ghɔm tə tutə bi pú gɑ: Bi a pɑ́ fʉ̀ tɔm pǔ mu' fʉ a? Bɑ wap tə gɔ pəmtə vʉ tɔm a lə́? 40Bi a pɑ́ mukhʉ̌ lə cyə Tap e. Tə bǎ yɑ mukhʉ lə yə pu cəŋtə ŋkwyə e a gɔ sɔ' pɑ pa' tap é a.

41Nwə kɑ o yɔ sisya ghe bɛtsə fɑ o tə́ bi a pɑ o lə yɔ nthyə̌ yə a bɛtsə o a? 42Bi a pɑ o ghɔm bi fɑ o gɑ: Cʉ' nthe sisya ywə bɛtsə o m gɑ kɑ, wə yə o tə bɑwə́ jɔ gak bɛtsə o a? Dabǔ, te gak tsə o, tə jyə nə te sisya ghe tsə fɑ o.

Mukhʉ̌ yə nyənyɔ

(Mt 7.16-20; 12.33-35)

43Thə́ nthʉɔ tə jam nthɔm cwəpuŋ pɑ; thə́ cwəpuŋ lə pɑ́ jam nthɔm pɑpuŋ. 44Pú jyə ba ya ta' thə́ lə pɑ nə nthɔm myə́. Bi a pɑ pu lə kap nthɔm thə́ nə mka'tə, kɑ nə kap nthɔm thə mlu' nə jǔŋ lɑ? 45Mo pɑpuŋ nthé nwə pɑpuŋ nə nthɛ nwə pɑpuŋ yə a bɑ nthʉm tʉ́m tsyə́ a, mo cwəpuŋ pɑ nthé go' nə nthɛ go' e. Nə pa' ywə yə mo gɔm a bɑ ywə yə a fɑ nthʉm tʉm e a.

Mpa' məbʉ́ə

(Mt 7.24-27)

46Nwə kɑ po pɑ ŋkhe a gɑ Cyəpɔ, Cyəpɔ, tə́ tə pɑ̌ gə ywə yə gɑ gɔm a? 47Gɑ̌ gɔ siŋ wɔ nthi mo yə́ mo yə́ é ju' ghɔm tsǎ giŋ nə a, hwə́ e a. 48E bɑ pa' mo yə e pɑ gɔ kwɑ pa' pe é, nthəŋ cyə e təŋ tə ji to pa' nə wǔ gwɔ' a; bəŋ sɔ' dú, shyə sa gʉ̀ə, dzə́ŋ ŋkho nə pa', a lə ghə sɔmywə nə́ pa' bɔ, nə pá' a bɑ pu kwɑ a lɛtə a. 49Mo yə e ju' ghɔm tsɑ, la' e ghiŋ nə a shwə pa' mo yə e kwɑ pa' e tə təŋ cyə e a; shyə cwə tə ŋkho nə a wuŋ bvʉ, sa'tə awɛ a.

Currently Selected:

LUKASI 6: NTGomala

Highlight

Copy