MATIO 24

Yeso siŋ gɑ́ pu gɔ sɔ' sa'tə Yerusalɛm

(Mk 13.1-2; Lk 21.5-6)

1Yeso lə təm Dyə Si cwəlɔ bɑ́ gɔ̌. Pɑkhʉ̌ pyə lə sɔ̌' bəŋ e bɑ da'tə e nthi pa' pu nə bəm Dyə Si a. 2Yeso lɑ ghɔm gɔm bi pu gɑ: Po ka yɔ guŋ e bǎ awɛ a? Kwa' nyənyɔ gɑ siŋ wɔ gɑ́ sɔm gwɔ' tə gɔ sɔ' cwə dəm mu' tsɔ'ɔ pɑ. Pu gɔ sɔ' sa'tə guŋ e awɛ.

3Cwə yə e lə́ cwə́si kuŋ mthə bɛ a, pɑkhʉ̌ pyə sɔ' bəŋ é m càm gɔm bi e gɑ: Siŋ wɔk cwə yə a gɔ sɔ' pɑ́ po' a, ba mtiŋ myə a gɔ sɔ' la'tə yù cwə a, ba cwə yə dzʉ̌ gɔ mi a.

Ghəghʉɔ yə a gɔ sɔ' təm tə́ dzʉ̌ mi a

4Yeso pa' bi pu gɑ: Po pɔmtə gɑ́ ka sɔmmo kɑ̀ ghə po hɔ́jyə̀ 5Nə pa' pɔ̀ tə jɔm gɔ sɔ' lɑ tso tsɑ̌ nə sɔ' pɑ̀ ghɔm gɑ: Myə̀ nə́ bɑ Kristo. Wap gɔ sɔ' ghə pɔ jɔmyɔm hɔ́jyə̀. 6Po gɔ sɔ' yu' shù, pú piŋ bɑ gɔmnwə nə shù. Po kɑ pwɔk. A puŋ gɑ tsə bɔ təm awɛ, da' gɑ a lə wuŋ bɑ́ nə́ miŋ. 7Nə pa' mu' guŋ gɔ sɔ' pɑ lo' yə mu' guŋ. Mu' Nəfo pɑ do' tsyə mu' nəfo; kəya' gɔ sɔ' təm bapbǎp, ba cǎ' cʉ'nyə bapbǎp. 8Guŋ e bɔ awɛ gɔ sɔ' pɑ́ pɑ nə to' go' nə dzə. 9Pu gɔ sɔ' nyeŋ wɔ nə gǒ', pɑ zhwətə wɔ, guŋ pɑ́ tə pɑ pɑ Yudea pɑ bɔ wɔ nə tso tsɑ̌. 10A gɔ sɔ' pɑ po'o pɔ jɔmyɔm pfʉtə́, wap pɑ hɑ nɑ tsǎp wap wap cəcɑ̌ pú pa' mghɛ bo a, piŋ pɑ pɔnyə cəcɑ̌ pú. 11Mfʉtə mghɔm ghɔm Si gɔ sɔ' təm pɑ́ ghə pɔ jɔmyɔm pi. 12Mnwə cwəpuŋ jɔmyɔ̌m gɔ sɔ' ghə ŋkhuŋnyə pɑ mimmim cəcɑ̌ pɔmnəŋ; 13da' gɑ́ mo yə e kaktʉɔ tə ŋkhəm nə miŋ a gɔ sɔ' vɔk. 14Pu gɔ sɔ' siŋ Cùŋ pɑpuŋ yəŋ nə Nəfo nthʉm guŋ dzʉ̌ awɛ. A pɑ mkwinthɛ bi pɑ tə pɑ́ pɑ Yudea. Tɑ dzʉ̌ mi. 15Cwə yə́ po gɔ sɔ' yɔ Bɔkbɔk zhwiŋ tsʉ' yə gɔm ghɔm Si Dania lə ghɔm a bɑ ě cwə́ nə tsʉ' dɔlɔ̌ – ŋkhékě cəŋtə ju'! – 16A pɑ́ cwə o bɔ pɔ pyə wap Yudea a, ŋkhʉ gɔ m dəm mkuŋ gó; 17mo yə e gɔ sɔ' pɑ́ m zhəŋ dyə thə́ a, kɑ fi' gɑ e gɔ m dyə lɑ ywə́. 18Mo yə e gɔ sɔ' pɑ m pě a kɑ pɑnyə jʉ̀m nə lɑ dzə́ e. 19Ghəghʉɔ pɑ jwǐ tsʉm pu a mʉəmvə̀ nə tyɛ'dzʉ́ bɔ! 20Po cwyɛ'nyə gɑ po kɑ sɔ' bɑ gɔ ŋkhʉ cwə ŋʉ́m kɑ tyɛ' Sabat lə. 21Kwa' tiŋ ghəghʉɔ yə a gɔ sɔ' pɑ tyɛ' o a, a la m bɑwə tə́ fɑ pa' pu ghə dzʉ̌ a tə́ gɔ ŋkhəm tyɛ' ɔ, a lə nəŋ gɔ la'tə pɑwə pɑ́. 22Mtyɛ'dzʉ bɔ ka pɑ gɔ sɔ' cwanyə cwanyə a bɑ sɔmmo tə́ gɔ sɔ' vɔk pɑ́; da' gɑ a cyə m nə mci pɔ̀, mtyɛ'dzʉ bɔ ghɔ sɔ' cwanyə cwanyə. 23A pɑ́ po'o, bi a pɑ́ mo ghɔm bi po gɑ: Kristo mtsɔ'ɔ kɑ m gɑ e mtsi'i lɑ, ka po piŋ. 24Nə pa' Kristo nə fʉtə pu a mfʉtə́ mghɔm ghɔm Si gɔ sɔ' təm pɑ ghə mtiŋ pu a msya tə́ shɑ pɔ hɔ məjyə tə́ bɑ mci pɔ̀. 25Tə́ gɑ̌ ləŋdzə gə́ gɑ́ po zhyə́.

Cwə yə Mu mo gɔ sɔ' sɔ' a

26Pú la' gɔm bi po gɑ: E yəŋ gɑ m ghǎk gó, ka po ghɔ tsʉ'ʉ. Kɑ m gɑ: E yəŋ tsʉ' tsìŋ, ka po piŋ. 27Nə pa' dəŋdəŋ pa' pəpa' bə̀ŋ nthəm ghəŋ nthəm nam ŋwɛ ŋkhəm bi nam a, a gɔ sɔ' pɑ nə Mú mo pɑ́ po'o nə cwə yə e gɔ sɔ' a. 28Tsʉ' yə pfə ywə nə a, mghə́m mpfə tsə́ shu'tə tsʉ'. 29Ghəghʉɔ tyɛ'dzʉ́ bɔ gɔ sɔ' nə cyə̀, a nam sonyə, mɑŋwə́ pi, msɛ fɑ kɛbəŋ bvʉ́tə́, guŋ mtʉɔ kɛbəŋ cʉ'nyə. 30A pɑ́ po'o mtiŋ Mu mo təm kɛbəŋ, a guŋ gwya monəŋ dəmca' tsɔp kəkɔp yap jɔ pa' Mu mo fɑ kɛbəŋ dəm mlwa a bɑ gʉ̌' lo nə e a, bɑ e ghu'. 31E gɔ sɔ' təm pɑ aŋgəle pyə́ pu a mthɛ gwyə́gwyə́, wap cu'tə pɔ pyə pu ci wap nə dzʉ́ msak pfʉ̀ə a. 32Po yu' fo' nə thə nthɔmthə, bú myə́ shwə tə́ ntwɔp tə́ gə mhwə, po zhyə gɑ́ shwɔ'dzʉ̌ wə sɔ̌'. 33Dəŋdəŋ po'o, ba wɔ la' tə́ jɔ mtiŋ bɔ po zhyə gɑ́ Mù mo ghɔptə bəŋ po, gɑ e jyədyə̌ po. 34Kwa' nyənyɔ gɑ siŋ wɔ gɑ́ pɔ nə wɔ̌dzʉ̀ yəŋ tə̀ gɔ sɔ' cyə tə́ mnwə bɔ sɔ' pɑ́. 35Kɛbəŋ pu cǎ' gɔ sɔ' mi, tə́ mghɔm mə̌ tə gɔ la' mi pɑ.

Sɔmmo ka zhyə tyɛ' e

(Mk 13.32-37; Lk 17.26-30,34-36)

36Da' gɑ́ sɔ' m nə tyɛ'dzʉ́ bɔ, ba nə cwə dzʉ̌ bɔ, bɑ sɔmmo ka zhyə́, kɑ pɑ aŋgəle kɛbəŋ, kɑ Mú lɑ́, sɔmmo, tə́ ně da' Tá yʉ̀ dò e. 37Dəŋdəŋ pa' a lə pɑ nə cwə Noe a, nwə Mu mo gɔ sɔ' pɑ́ pɑ po'o. 38Nə pa' dəŋdəŋ pa' a lə pɑ nə cwə dzʉ̌ yə dɔmnyə bəŋ mwé lə jɑ tə wɛ dù a, pu pɑ́ dzʉ́, biŋ nwə́, bɑ ŋkho m jwǐ biŋ bɑ hɑ m jwǐ lɔmdyə tə́ ŋkhəm nə tyɛ'dzʉ yə Noe lə kǒ kənu' a, 39pɔmnəŋ lə pɑwə shɔ́m sɔmywə, tə́ dɔmnyə bəŋ mwé lù ŋkwa wap nə gɔtə awɛ: tyɛ' nə sɔ' Mù mo gɔ sɔ' pɑ̀ po'o. 40A gɔ sɔ' pɑ cwə o bɔ pɑbɛ pɑpʉə pɑ́ pé pu lɑ tá' mo nthak ta' mo 41pɑjwǐ pɑpʉə gɔ sɔ' pɑ ləŋ msɛ, pu lɑ ta' nthak ta'. 42Po pɑ̀ di tə́ ti nə pa' po ka zhyə tyɛ'dzʉ́ yə Cyəpɔ gɔ sɔ' sɔ' nə a. 43Po zhyə gɑ́ gɛ lǎ' lá' pé' e bɑ jyə cwə yə shwǔŋ gɔ sɔ' nə̀ a, ba e di tə ti, e lə tak dyə e shwuŋ tù pɑ. 44A po'o tə̀ ba wɔ yɔ pɑ́ byap nə pa' Mu mo gɔ sɔ' pɑ nə cwə yə po kɑ zhyə a.

Gɛfa' nyənyɔ́

(Lk 12.41-48)

45Wɑ́ bɑ gɛfa' nyənyɔ, jyənwə yə tap e jap e dzə́ la' é nə pɔ gɑ e pɑ́ ŋkhim wap nə́ cwə yə e jap á? 46Buŋtsé gɛfa' bɔ yə tap e gɔ nə sɔ' e pɑwə fá' fa' bɔ a. 47Gɑ̌ siŋ wɔ kwa' nyənyɔ gɑ tap e gɔ lɑ e nə ghə tadyə nə guŋ tsə tsyə awɛ. 48Da' gɑ́ gɛfa' cwəpuŋ bɔ ghɔm nthʉm tʉm e gɑ: Ta á gɔ nə sɔ' cwə 49biŋ ntho' pɑ nə cwɔ msǒ fa' pyə, bɑ dzʉ́ biŋ nwə pu a mnwə̌ mlu', 50bɑ tá gɛfa' bɔ gɔ sɔ' nə tyɛ'dzʉ yə e tə́ wə byap e a pɑ, nə cwə yə é ka zhyə a; 51a zhəŋ e, yap e nə tsʉ' mtsɛbú, tsʉ' yə lɔ̀ pu a nə pfɑ msùŋ bɑ́ nə a.

Currently Selected:

MATIO 24: NTGomala

Highlight

Copy