MATIO 28

Yeso yam nə vʉ̌

(Mk 16.1-10; Lk 24.1-12; Yhn 20.1-10)

1Sabat lə cyə̌, a pɑ mɑ mpʉm dzʉ́ nə dəŋdzə tyɛ'dzʉ́ nə gap dzʉ, Maria yə Makdala pu yə mu' Maria ghɔ jɔ thəsì Yeso. 2A lə pɑ po'o cǎ' cʉ'nyə té' o: Aŋgəle Cyəpɔ fi' fɑ thə kɛbəŋ sɔ' ŋkhəŋnyə gwɔ' shwə́ dəm o. 3E lə bɑwə hwə pa' pəpa' bəŋ a, dzə tsyə piŋ bɑwə fɔk pa' mwe bəŋ a. 4Pɑ pyap thəsì lə pwɔk tə shʉ' pa' pɔ pyə wap pfʉ a. 5Da' gɑ aŋgəle lɑ ghɔm gɔm bi pɑjwǐ gɑ: Ka po pwɔk. Gɑ̌ zhyə gɑ́ po shəŋ Yeso yə pu kɑ kam e thə́ bɛnyəpɛnyə a. 6E tə̌ tsɔ'ɔ pɑ̀ nə pa' a bɑ e yam nə vʉ̌ pa' e lə ghɔm a. Po sɔ' jɔ tsʉ' yə a kɑ bɑ e nuŋ nə a. 7Po khʉdʉ gɔ gɔm bi pɑkhʉ pyə gɑ: E yam nə vʉ̌. Po kwyatə e Galilea; po gɔ ko wə yɔ e. Gɑ siŋ wɔ. 8Wap lə wuŋ nthəm thəsì, bwɔk, da' gɑ́ ŋwɛnyə ŋkhʉdʉ gɔ nə siŋ pɑkhʉ̌ pyə́. Cùŋ bɔ. 9A lə pɑ̌ po'o Yeso piŋ sɔ' pu a pu yu'tə e ghɔm bi pu gɑ: Gɑ̌ ca'tə wɔ. Wap lə sɔ' nthɔm mkwə myə́, ŋkham mkwi'tə dzə e. 10A pɑ po'o Yeso ghɔm bi pu gɑ: Ka po pwɔk, po ghɔ siŋ mfɑ pɑ̌ gɑ wap gɔ ghɔ Galilea; a tsʉ' yə wap gɔ yɔ a nə a.

11Cwə yə pɑjwǐ lə pɑ məjyə a, shɑ pɔ nə́ pɑ pyap sɔ' tisuŋ siŋ mkamsi gwyəgwyə guŋ mnwə myə a shya. 12Wap pu a mghətso lə cu'tə cwəlɔ, shɔm hɑ ŋkhap bi msəŋwi tə a yɔm, 13gɔm bi pu gɑ: Po ghɔm gɑ: Pɑkhʉ pyə ke sɔ' mtsʉ', pyə pɑwə di wap zhʉ e. 14Bi a pɑ a tam təŋ gɔpna', bɑ pyə gɔ ghə e lɛtə, pyə piŋ gə tə e lə ghə́ sɔmywə nə po.

15Wap lə kwi ŋkhap, gə pa' pu gɔm bi pu a; nwə bɔ bɑ ǎ sɛ cəcɑ̌ pɑ Yudea tə ŋkhəm tyɛ' ɔ.

Yeso nthəm pɑkhʉ̌ pyə

16Sɔ' m nə pɑkhʉ shwɔp a mu' mgham, wap lə ghɔ Galilea, nə kúŋ yə Yeso lə ghɔm gɑ wap ghɔ nə a. 17Wap lə nə yɔ e, ŋkham mkwi'tə si da' gɑ shɑ pɔ zhʉ'nyə. 18Yeso sɔ' bəŋ pu gɔm bi pu gɑ: Tá hɑ guŋ tʉ̀ɔ bəm awɛ kɛbəŋ ba m dəmcǎ'. 19Po ghɔ, dɑ guŋ mguŋ awɛ gə pɑkhʉ, bɑ nu' wap shyə nə tsǒ Tá ba Mù, ba Zhwenyə Dɔlɔ̌. 20Bɑ ji'tə wap nə tɔm guŋ ywə awɛ yə gɑ jap bi po a. Sɔ' m nə m̀ pɑ gɔ pəmtə pɑ́ pɑ tə kəm nə cwə yə dzʉ̌ gɔ mi a.

Currently Selected:

MATIO 28: NTGomala

Highlight

Copy