MARKUSI 1

Yohane nu' pɔ shyə

(Mt 3.1-12; Lk 3.1-18; Yhn 1.19-28)

1Nə́ zhi Cuŋ pɑpuŋ Yeso Kristo, Mu Si; 2dəŋdəŋ pa' a bɑ́ pu və nthʉ́m ŋwa'nyə gɔm ghɔm Si Esaya gɑ:

Yɔ, gɑ̌ tə́m shwiŋkhʉɔ a dzə o,

gɑ e nyaptə́ məjyə̀ o.

3Gì mo ghakgo shwé gɑ:

Po nyaptə́ məjyə̀ Cyəpɔ.

Po ghə mpim jyə̀ tiŋnyə dəŋdəŋ.

4Yohane nu'pɔ shyə lə təm ghakgo bɑ siŋ nwə́ kwishyə pʉɔtʉ́m nə́ nə lɑ mhɔ mo shwyɛ' e. 5Gùŋ guŋ Yudea awɛ ba guŋ pɑ Yerusalɛm awɛ lə ghɔ bə́ŋ é, bɑ gə e nu' wap shyə Yurdɛŋ, wap pɑ̀ biŋ mhɔ máp. 6Yohane lə́ bɑ ě kwadzə́ mnəŋ kamelo, gə tap gwɔp vʉ' e; e lə́ pfɑ́ pɑ gǎmmthɔ biŋ dzʉ ŋwa' gó. 7Yohane lə́ bɑ siŋ gɑ̀: Mo yə ě ghə tʉɔ shyə́ á a wə sɔ' jʉ̌m m̀, bɑ ŋ kha kú' nə pɔnyəsi ŋkhyɛ' ŋkhə nə mthap myə́. 8Kwa' myə̀ gɑ̌ bɑ gɑ̌ nu' wɔ pɑ shyə, tə́ yʉ́, e gɔ la' nu' wɔ nthʉm Zhwenyə Dɔlɔ̌.

Kwǐshyə Yeso

(Mt 3.13—4.11; Lk 3.21-22; 4.1-13)

9A lə pɑ̌ nə mtyɛ'dzʉ́ bɔ, Yeso fɑ́ Nazarɛt m Galilea sɔ' gə Yohane nu' e shyə Yurdɛŋ. 10E lə pɑ̌ nthəm shyə, jɔ kɛbəŋ ghyɛ', Zhwenyə piŋ fi' pá' səngɔpfo a sɔ' nə é. 11Pu piŋ jú' gi mo fɑ kɛbəŋ gɔm gɑ: O bɑ Mú a yə gɑ̌ ŋkhuŋ e a, ǎ púŋ a nə cwɔ' o.

Mləŋtə Yeso ghakgo

12Zhwenyə lə wuŋ nthə́ Yeso shya e ghakgo. 13Sata lə́ lə̌ŋtə́ e nə tyɛ'dzʉ́ mghappfʉə. Pu a mnɔm go nə lə́ bəmtə bɑ́, pɑ aŋgəle piŋ bɑ fa' bi e.

Yeso siŋ Cùŋ pɑpuŋ Galilea

(Mt 4.12-22; Lk 4.14-15; 5.1-11)

14Pú lə cwə̌ tə́ hɑ Yohane, Yeso sɔ' Galilea. E lə bɑwə siŋ Cùŋ pɑpuŋ Si bɑ gɔm gɑ: 15Cwə̌ ku', Nəfo Si ghɔptə́: Po pʉɔtʉ́m tsɔ́ biŋ bíŋ Cùŋ pɑpúŋ.

Yeso ke pɑ ghəm bapgu pɔ papfʉ̀ə

16Yeso lə pɑ̌ shyə́ giŋnyə shyə lɑpʉə Galilea, jɔ́ Simon pu Andreya fɑ e. Wap pɑwə ma' nthənthɔm shyə lɑpʉə nə pa' wap lə bɑ pɑ ghəm bapgu a. 17Yeso ghɔm bi pu gɑ: po ntham jʉ̌m m̀, a biŋ dɑ wɔ gə pɑ ghəm pɔmnəŋ. 18Wap lə wuŋ nthak mnthənthɔm map jap jʉ̀m e. 19E lə na' giŋ, jɔ́ Yakop, mu Zebede pu fɑ e Yohane wap pɑ́ nthʉm kənu' yap bɑwə nyaptə mnthənthɔm map. 20E lə wuŋ ŋkhe wap. Wap lə tǎk tá yap Zebede pu a mghɛ fa' nthʉm kənu', jap jʉ̀m e.

Yeso la'tə tʉ̀ɔ é

(Lk 4.31-37)

21Wap lə kǒ tisuŋ Kapɛrnaum, a nə pɑ̌ tyɛ' Sabat, Yeso ko Sinagogə bɑ̀ ji'tə́ ywə bi pɔmnəŋ. 22Ywə yə e lə́ bɑwə ji'tə wap a pɑ shəŋtə ŋkhonyə wap shyə m nə yə́ nthi nə ji'tə́; nə pá' e lə́ bɑwə ji'tə pa' mo yə́ e ghə tʉɔ á, la' e zhi'tə m pa' pɑ zhyə mco' a. 23Mu' mbɛ lə guŋ bɑ sinagogə pú pɑ́ cwə o bɔ, zhwenyə cwəpuŋ pɑ nə e; mo bɔ cwé gɑ: 24A yɔk pɑ̀ kʉ? Yeso yə Nazarɛt. O sɔ' m nə ghə gɑ́ pyə́ pí. Gɑ̌ zhyə́ mo yə o bɑ yʉ́ a: O bɑ̀ Dɔlɔ̌ Si. 25Yeso paptə e gɑ: Lɛtə́ biŋ nthəm nə bɛ yə̌ŋ! 26Zhwenyə cwəpuŋ bɔ lə lɑ̌ bò shʉ'nyə bɛ bɔ, biŋ nə təm nə́ é bɑ shwé tə́ thə́. 27Nwə̀ lə cyə̌ wap té' o, wap pɑ́ gɔm cəcɑ̌ pu gɑ: Yəŋ nwə bɑ m gɑ́ kɑ? Yɔ mu' nə zhi'tə̀ yə̌ sə́, tʉɔ pɑ bɑ ǎ ló nə́! E gɔmnwə ba m bi mzhwenyə cwəpuŋ, wap yu'nyə bi e! 28Tso tsyə́ lə wuŋ sɛ nə́ guŋ mtsʉ' awɛ ghə́ŋ Galilea.

Yeso yɛ̀ ma jwi Simon

(Mt 8.14-17; Lk 4.38-41)

29Wap lə́ wuŋ nə təm sinagogə, wap pu a Yakop ba Yohane ghɔ dyə́ Simon pu Andreya. 30A lə́ nə pɑ̌ po'o ma jwi Simon pɑ̀ wə bɑ ě nùŋ, mhwi pɑ̀ nə́ e; pu lə wuŋ gɔm bi Yeso. 31Yeso lə́ sɔ' bəŋ e, nthɔm pú e nə́ bʉ' e, mhwi tə̀m nə e, e to' nə fa' bi pú.

Sabat cyə̀, Yeso yɛ́ shɑ pɔ

32A lə pɑ̌ bwadzʉ̌, tə bɑ nǎm pi, pu pɑ́ dɑ guŋ mghɛ gho awɛ ba pɑ ghə zhwenyə cwəpuŋ sɔ' bi e. 33Guŋ tisuŋ awɛ lə bɑ a cu'tə jyədyə̌ tisuŋ. 34E lə yɛ̌ mghɛ gho tə wap yɔm, nthinthi mgho pɑ́ nə pú, biŋ jə́ŋ mzhwenyə cwəpuŋ jɔmyɔm, tɑ́ pǐŋ gɑ wap ghɔmnwə nə pa' wap lə bɑ wap zhyə é a.

Yeso təm Kapɛrnaum

(Lk 4.42-44)

35A lə pɑ fɔkdzʉ̌, tə dzʉ̌ yɑwə sonyə sonyə, Yeso lusi, nthəm gɔ tsʉ' tsìŋ bɑ tsʉ'u shwyɛ'nyə Si. 36Simon pu a mso fa' pyə to' nə cəŋ é biŋ jɔ é. 37Gɔm bi e gɑ: Guŋ pɔ awɛ bɑwə shəŋ o. 38E ghɔm bi pu gɑ: Pɑ ghɔ nə mu' tsʉ', nthʉ́m shɑ mtisuŋ, a siŋ Cuŋ pɑpúŋ ba m wə, nə pa' a bɑ mə̌ mnthə̌mdyə́. 39E lə pǐŋ gɔ nə guŋ Galilea awɛ, bɑ siŋ Cuŋ pɑpuŋ nthʉm msinagogə biŋ bɑ jə́ŋ mzhwenyə cwəpuŋ.

Nə yɛ̀ mu' gɛ ka'pap

(Mt 8.1-4; Lk 5.12-16)

40Mu' ta' gɛ ka'pap lə sɔ' bəŋ Yeso shwyɛ'nyə e, biŋ ŋkham mkwi'tə myə́ si gɔm gɑ: O kùŋ bɑ ǒ ku' nə ghə ŋ dɔ́. 41Mtso myə́ lə kù e, e nya pú ě, ŋkwak e, gɔm bi e gɑ: gɑ̌ kùŋ, lɔ́. 42Ka'pap lə wuŋ nthəm nə e pɑ cwə o bɔ, e lɔ́. 43Yeso lə wuŋ shaktə nɑ e nə é, jəŋ é. 44Gɔm bi e gɑ: Pɔm tə́ ghɔm sɔmywə bi sɔmmo, da' gɑ ghɔ da'tə nɑ o bi ŋkhamsi, biŋ hɑ ywə yə́ Mosɛ lə yap a, nə pa' o dɔ́ a, a nə́ bɑ́ bi pú bɑ mtìŋ. 45Da' gɑ mo bɔ lə cwə̌ tə́ gɔ̌, guŋ bɑ siŋ tə́ thə́, bɑ sɛ mcuŋ bɔ, tə bi a pɑ Yeso lə piŋ ŋkho nthʉm sɔm tisuŋ dəŋdəŋ, bɑ shwə pɑ m jʉ̀mdzʉ̌, nə mtsʉ' tsìŋ, pu pɑ fɑ ba'bà' sɔ' bi e.

Currently Selected:

MARKUSI 1: NTGomala

Highlight

Copy