MARKUSI 7

Fəŋnyə̀ cəcɑ̌ Yeso pu a pɑ Farisai nə mà gùŋ

(Mt 15.1-9)

1Pɑ Farisai pu a shɑ pɑ zhyə́ mco' pyə́ wap lə fɑ́ Yerusalɛm a lə cú'tə bəŋ Yeso. 2Wap lə bɑwə jɔ gɑ shɑ pɑkhʉ̌ Yeso dzʉ ywə́ yap pu a bǔ mviŋ, yəŋ la'tə gɑ́ bú tə sɔk. 3Nə pa' pɑ Farisai pá' guŋ pɑ Yudea a, tə́ dzʉ́ ywə tə́ cəŋtə́ sɔ́k bú map pɑ́, bɑ gə po'o nə́ nə nthɔ́m mà pɑ́ dzə̀. 4Wap tə fɑ sìm dzʉywə tə sɔk nɑ pɑ; bɑ wap piŋ nthɔm shɑ nthinthǐ mnwə myə a bɑ nwə mà? gùŋ a: Yap nthi nə sɔk mthǔ', ba mghʉ̌ɔ pu a mkɛ̌. 5A lə pɑ̌ po'o pɑ Farisai pu a pɑ zhyə́ mco' həŋtə́ Yeso gɑ: Nwə kɑ la' pɑkhʉ pǔ ghiŋ nə mà pɑ dzə̀? Wap dɑ bu mvíŋ dzʉ́ ywə́. 6Yeso ghɔm bi pu gɑ: Esaya gɔm ghɔm Si lə́ cəŋtə́ gɔmnwə nə po, pɑ tsɛbǔ, nə pa' a bɑ pu və gɑ:

Pɔ pɔ gɑ gə mkù' mə̌ pɑ́ shyə shwə̀

da' gɑ́ tʉ́m tsap pɑ tə́ gʉə sʉəsʉə nə́ m̀;

7Wap shu'tə sé a pɑ pɔpɔ

nə pa' ywə yə wap ji'tə bi pɔmnəŋ a

bɑ pɑ́ nwə monəŋthə́.

8Pǒ bak ywə yə Si jap a hɑ jʉ̀m, biŋ bɑ́ da nɑ́ pɑ́ nə́ mà pɔmnəŋ.

9E lə kwi' gɔm bi pú gɑ: Pǒ shəŋtə ŋkhəŋnyə mco' myə Si jap a, bɑ nthɔm pɑ́ mà yɔ́. 10Nə pa' Mosɛ lə ghɔm gɑ: Ghə mku' tɔ̌ pú mɔ̌; biŋ gɔm gɑ: Mo wak tap e pu map e bɑ pu gɔ nyəŋ shɛ thə e, zhwe e. 11Da' gɑ́ po gɔm gɑ: Mo ghɔm bi tap e kɑ bi map e lə gɑ: Ywə nə ŋkwitə́ o yə o bɑ gɔ pyap bəm a zhi korban, yəŋ la'tə gɑ tsə pwɔ' dɔlɔ̌, 12bɑ pǒ biŋ bi e gɑ e kɑ́ piŋ gə sɔmywə bi tap e kɑ bi map e lə. 13Pǒ dɑ po'o má guŋ yə pǒ ji'tə a nə bɔptə ghɔm Si. Pǒ biŋ gə shɑ nthi mnwə po'o tə a yɔ́m.

14E lə pǐŋ ŋkhe pɔmnəŋ gɔm bi pú gɑ: Po teŋtə mtəŋ guŋ yɔ awɛ ju' a. 15Sɔmywə yə a fɑ m dzʉ̌ ŋkho nə mo bviŋ e a tə bɑwə pɑ; ywə yə a nthəm mthʉ̌m nɑ́ mo a nə bviŋ mò. 16-17E lə cwə̌ tə́ ŋkho dyə, nə́ tsʉ' gʉɔ sʉəsʉə nə pɔmnəŋ, pɑkhʉ̌ pyə́ həŋtə e nwə nə tsɔ ghɔm tə́ tútə̀. 18E ghɔm bi pu gɑ: Ba wɔ yɔ́ bɑ po ka ghə zhyənwə a? Po ka zhyə́ gɑ́ pɑ sɔmywə lə fɑ m dzʉ̌ ŋkho nə mo tə bviŋ é a? 19Nə pa' ywə bɔ tə ŋkho nthʉm tʉ́m tsyə pɑ́, a ŋkho m vam é, biŋ shyə gɔ m kwa. E lə́ gɔm po'o gɑ guŋ ywətsʉ awɛ bɑ ǎ puŋ. 20E lə gɔm gɑ: Ywə yə a nthəm nə mo a nə bɑ ywə yə a bviŋ e a. 21Nə pa' ywə yə a nthəm nə mo a, nthəm nthʉm tʉm é, bɑ mkwɛnyə cwəpùŋ, ghiŋ cwəpùŋ, cǔŋ, nə zhwə mo. 22Ghap, nə cəŋ fʉ', yǎpnwə̀, fʉ̌, nwə cʉ̀', ghi'nyə, mcàp, ŋa'nɑ́, nwə tə ŋkhɛ̀. 23Guŋ nwə cwəpuŋ bɔ nthəm m nthʉ̌m tʉ̀m mo, bviŋ è.

Pǐŋnthʉm mjwǐ Sirofenikia

(Mt 15.21-28)

24Yeso lə lǔ tsʉ'u gɔ nthʉm gùŋ Tiro. E lə kó nə mu' dyə́ la' e pɑwə ŋkhúŋ gɑ mo zhyə; da' gɑ a lə pɑ̌ bi a pɑ pu lə cyə́ tə zhyə̀. 25Mu' mjwǐ yə́ gò e lə bɑ́ bɑ zhwenyə cwəpúŋ ko nə e á lə wuŋ nə yu' pa' pú gɔmnwə nə e a, sɔ' bvʉ́ nə mkwə myə́. 26Mjwǐ bɔ lə bɑ tə pɑ yə Yudea, bɑ yə Siro Fenikia nə nə́ tsə é. E lə bɑwə dó bi Yeso gɑ e zhəŋ zhwenyə cwəpuŋ nə mu e. 27Yeso lə ghɔm bi e gɑ: Cu' kwa' pǒ zhwyə́, nə pa' a ka púŋ nə pé msɛ̌ pó ma' bi pǒ bvʉ́. 28Mjwǐ bɔ lə pa' bi Yeso gɑ: A nyə́nyɔ m Cyəpɔ, da' gɑ́ pǒ bvʉ́ bɑ to tɑpe pfɑ́ msəsia ywətsʉ pó. 29Yeso ghɔm bi e gɑ: Shyə m nə ghɔm bǎ, ghɔ̌, zhwenyə cwəpuŋ tə́m nə gò o. 30Mjwǐ bɔ lə pɑnyə la' e, biŋ jɔ mú e bɑ ě nuŋ kodyə, bɑ zhwenyə cwəpǔŋ təm nə é.

Nə yɛ̀ mu' tə ghɔm bǔ'mtəŋ

31Yeso lə́ tə̌m nthʉ́m gùŋ Tiro nə pɑnyə ghəŋ shyə lɑpʉə Galilea shyə́ m Sidon, ntwɔk nthʉ́m Dekapoli. 32Pú lə lɑ́ mu' bu' mtəŋ e piŋ bɑwə́ gɔm kəkɔ sɔ' bi e, biŋ shwyɛ'nyə e gɑ́ e yap bú nə e. 33Yeso lə lɑ e fɑ cəcɑ̌ pɔmnəŋ nthəm, gɔ tə́ jʉ̀m, tsʉ' tsìŋ, ntwɔk nthə́ bú myə́ mtə́ŋ e, nthətə́ mti, jap nə tʉm e. 34Biŋ bʉ' mnyə myə́ dé kɛbə̀ŋ, mpfə̌ biŋ gɔm bi mo bɔ gɑ: Efata, à pɑ da'tə gɑ ghyɛ'. 35Mtəŋ myə́ lə wuŋ gyɛ', tʉm é kyɛ' e piŋ gɔmnwə̀ pɑpúŋ. 36Yeso co' bi pú gɑ́ wap kɑ́ ghɔmnwə bi sɔm mò; da' gɑ́ e lə bɑ sho' bi pú po'o, tə wap pɑ́ shyanyə nwə bɔ. 37Nwə̀ pɑ shyə wáp, wap pɑ́ gɔm gɑ: Ě cəŋtə gə gùŋ ywə awɛ pɑ pɑpúŋ; e gə mbu' mtə̀ŋ yu' nwə̀, tə ghɔm pɑ́ gɔm.

Currently Selected:

MARKUSI 7: NTGomala

Highlight

Copy