ṮAKWIIN 14
14
1Ka tee ma Amraap̱al jin ta’da maliḵ gi Pan Shinaar mo dhala Aryuuk jin ta’da maliḵ gi Pa Allasar mo dhala Kadarla/oomar jin ta’da maliḵ gi Pa Iilaam mo dhala Tid/aal jin ta’da maliḵ gi Pa Juyim mo tani 2imaliḵ gwansan miiki mo/as ap̱owa Baara/ jin ta’da maliḵ gi Pan Saduum mo dhala Birshaa/ jin ta’da maliḵ gi Paŋ Gamuura mo dhala Shin/aab jin ta’da maliḵ gi Pa Admah mo dhala Shim/iibar jin ta’da maliḵ gi Pan Sabuyiim mo dhali a’di jin ta’da maliḵ gi Pam Baala/ mo (yansan ita Pan Suugar mo). 3Dhali aris ’kwani ma mee gwansan gamki ’twa/ ’kup̱ mmonṯal ’de/ mo e Embul ma Siddiim mo (yansan ita a’di jin ta Al#14.3 Al Wu ’Doŋkoro/ mo). 4Dhali yil ’koni ’kume’d i’ce’dka su/ mo kun miikina uni to mo goma Kadarla/oomar mo, hili ki yil ’koni ’kup̱i ’kume’d i’ce’dka kwara mo tani uni pishki is ka le’d mo. 5Dhali ki yil ’koni ’kup̱i ḵarpa’c aṯẖ ’de/ mo tani Kadarla/oomar dhali imaliḵ kun nyaḵ ’ko ki a’di mo p̱u’dkin mo dhali ’dap̱ki uni e bwaŋ’kwariny buni mo uni gun ta ’Kwani Rap̱a e Pa Ashtaruṯẖgarnaayim mo dhali ’Kwani Suus e Pa Haam mo dhali ’Kwani Iim e Pan Shawagiryataayim mo 6dhali ’Kwani Hur e Wosh Si/iir buni mo ntagi Pam P̱aran mo e mo jin di’d e gwayu/ gi mombwaasho mo. 7Dhali yan’ko’d mo tani uni doḵkin ka nyaŋ’ko’d mo e Pa Eenmishp̱aath (yansan ita Paŋ Kaadish mo), dhali uni ’dap̱ki aris bampa/ gi ’Kwani gi Pa Amaliik e bwaŋ’kwariny buni mo ki ’Kwani gi Pa Amuur ilu/ mo uni gun ’kokin mo e Pa Hassuun Tamar mo. 8Dhali yan’ko’d mo tani maliḵ gi Pan Saduum mo dhala maliḵ gi Paŋ Gamuura mo dhala maliḵ gi Pa Admah mo dhala maliḵ gi Pan Sabuyiim mo dhala maliḵ gi Pam Baala/ mo (yansan ita Pan Suugar mo), uni iikin ka pije/ mo dhali uni gamki ’twa/ ’kup̱ mo e mo ma mee mo e Embul ma Siddiim mo 9uni nyaḵka Kadarla/oomar jin ta’da maliḵ gi Pa Iilaam mo dhala Tid/aal jin ta’da maliḵ gi Pany Juyim mo dhala Amraap̱al jin ta’da maliḵ gi Pan Shinaar mo, dhala Aryuuk jin ta’da maliḵ gi Pa Allasar mo, uni gun ta imaliḵ kun ’koni doŋon mo ap̱o/ imaliḵ kun ’koni mudhe’d mo be. 10Dhali Embul ma Siddiim mo tani a’di i’tu’dkunu ki jis ma dena ma sip̱ti mo, dhali me’d jin soyina maliḵ gi Pan Saduum mo dhala maliḵ gi Paŋ Gamuura mo tani kun tiya ṯa’kkin e uni mo, dhali kun tiya sokin mo e ’kuwosh mo. 11Wakan mo tani uni kun ta ’kup̱ gi uni mo tani uni ki budha ris to kun tana ’Kwani gi Pan Saduum mo dhali ’Kwani gi Paŋ Gamuura mo dhali aris tonṯem buni gom bway mo, dhali uni iikini bway buni mo. 12Dhala Luuth si’da/ ibu’thkina uni mo, a’di jin ta ya/ ma kam ma Abraam mo, a’di jin c̱a’bki’d mo e Pan Saduum mo dhali aris tom piti bu’thkina uni mo dhali uni iikin mo be.
13Dhali yan’ko’d jan ’de/ jin yeki’d mo tani a’di p̱u’dki’d mo dhali a’di ki ṯora Abraam, a’di jin ta ji Ibraani#14.13 Ibraani jin ta ’pemen gwo jin onu mo ki: Jan ’de/ jin p̱u’dki’d ’peni bwamp̱o/ Yi’deŋ Ḵumma/ Elp̱uraat mo. gwo mo, a’di jin diki’d mmoc̱a’b mo e ’ko’d gwar gi dhan cwa jin wana e ka ’kwaṯṯan ma Mamra mo, a’di jin ta wathi/ gi Pa Amuur mo, jin ta’da kam ma Ashkuul mo dhala Anir mo. Uni ta imangam gwo me’d mo nyaḵka Abraam mo. 14Dhali ka Abraam ciḵki gwo mo ki a’di jin ta’da bas piti ibu’thkunu mo mmota habuus mo tani a’di ki shu ’kwanim piti kun ye’thkunu sho’k ka pije/ mo uni kun dho’thkunu mo e gu’b piti mo, uni kun ’kon ki iss ’kwanimpa ḵarpa’c i’ce’dka ’kume’d i’ce’dka pekwara ap̱o/ mo dhali uni iikin mo mmo/ur uni isho’k mo ntagi Pan Daan mo. 15Dhali a’di ki ḵwa/ ’kwani ma meem piti gun gamki ’twa/ ’kup̱ bwa mo ap̱o/ uni ki mon’thiny mo, dhali a’di uni ki ic̱iŋkinam piti ilu/ mo ’koshki uni mo dhali urki uni isho’k mo ntagi Pan Hubah mo jin di’d ki ’ban ma bim poros gi Pan Dimashk mo. 16Dhali yan’ko’d a’di ki ’doyu aris to ka nyaŋ’ko’d mo, dhali a’di si’da/ ki sus abas piti ka Luuth ka nyaŋ’ko’d mo nyaḵki tom piti mo ki up̱i lu/ mo dhali ’kwani ma mee gara/ mo be.
17Dhali ’ko’di modoḵ piti ka nyaŋ’ko’d mo ’peni mo jin p̱inuwa Kadarla/oomar e mo dhali itap̱a kun nyaḵ ’ko ki a’di mo tani tap̱a gi Pan Saduum mo yaki’d ka pije/ mmogam a’di ’kup̱ mo e Embul ma Shawa (a’di jin onu mo ki, Embul ma Maliḵ mo). 18Dhala Malkisaadag si’da/ jin ta’da maliḵ gi Pan Saliim mo a’di ki ’doyu tonṯe/ ka pije/ mo dhali yimana mura’th jin ḵa/u ki ŋah ŋah mo. A’di ta’da gasiis ma Arumgimis jin Cayaa/ e ki Ca mo. 19Dhali a’di ’borki a’di mii mo dhali oki gwo mo ki:
Mom’bor mii midi di goma Abraam mo ka Arumgimis jin Cayaa/ e ki Ca mo,
a’di jin uḵki momis dhali mony’cesh mo.
20Dhali mom’bor mii midi di si’da/ goma Arumgimis jin Cayaa/ e ki Ca mo,
a’di jin c̱iki uni kun ta ’kup̱ ki /e mo e me’d pini mo.
Dhala Abraam ki c̱i a’di to jin ’dap̱ki’da ’dap̱ ’twa/ ka ’kume’d mo ’peni aris to ’baar mo. 21Dhala maliḵ gi Pan Saduum oki’da Abraam gwo mo ki: C̱iyi aha/ ’kwani mo ma, hili budha ris to gom is piniŋ gana/ ma. 22Hili Abraam oki’da maliḵ gi Pan Saduum gwo mo ki: Aha/ thulkina gwo me’da p̱o/ gom Tap̱a Arumgimis jin Cayaa/ e ki Ca mo, a’di jin uḵki momis dhali mony’cesh mo, 23ki aha/ mina ’taki diki budha thus mo walla wac̱kana ap̱p̱a/ mo walla ma toŋ kamu/ jin ta jim pini moyi, isi ciki/ ki /e mini o gwo mo ki: Aha/ de aha/ ikarkina Abraam mmota pa ki pa mo. 24Toŋ kamu/ miga/ bu’th yisa, hili jasi a’di jin shwakina ’kwanin dhuru’c mo dhali to jin pwaḵkunu bwa mo gom ’kwaniŋ gwas kun nyaḵ ii ki aha/ mo. Dhalka Aanir mo dhala Ashkuul mo dhala Mamra mo bu’th to kun pwaḵkunu bwa mo gom uni mo ma.
Currently Selected:
ṮAKWIIN 14: Udk
Highlight
Share
Copy
Want to have your highlights saved across all your devices? Sign up or sign in
©Society for International Ministries, 2013
