MARKUS 15

Yesus Doshki’d Ibwambor ma Bilaaṯus mo

1Dhali ki jahanne/ ki mo ta mon’thamo/ mo tani igasiis kun can mo dhali ’kwaniŋ gwanyjaḵa/ mo dhali iman’kwar to mo dhali aris ’kwani gi montul is buni mo tani uni tulki is mo mmoganan gwo ’kup̱ mo. Dhali uni ki deḵa Yesus mo dhali sus a’di mo mmoc̱ika Bilaaṯus mo be. 2Dhala Bilaaṯus ki doṯ a’di gwo mo ki: Ki /e de itana maliḵ gi ’Kwani Yahuuda/ mo de? Dhali a’di ki thoḵ a’di gwo mo ki: /E si’da/ on wakansan mo be. 3Dhali igasiis kun can uni yerki a’di is ki gway ki to ka ris mo. 4Dhala Bilaaṯus ki doṯ a’di mo doḵ/e ki: /E bunya/ mini diki thoḵ ’twaŋ kamu/ mo ’taa? Hili ma, ama’diny gwo wana risa kun okina uni ap̱o/ /e mo. 5Hila Yesus diki thoḵ a’di gwon ṯal ’deŋ kamu/ mo. Gom mii gi wakan mo tani aBilaaṯus merki’d mo be.

Yesus Torkunu Gwo ’Twa/a ’Cesh mo Mmowu mo

6Dhali ki mii jin tuluwa tul ’kup̱ mo tani miim piti isa yempa/ ta mii mmo’cuḵki uni jan ’de/ ’peni ’kwani habuus mo a’di jin doṯkina uni mo be. 7Dhali wathi/ di’d jin yuḵkunu gway ka Baraabas mo jin diki’di bwam uni eya sijin mo, a’di jin ’koshki’da mee mo e mii jin miinu gom gwo jin onuwa ’cesh gom bampa/ mo be. 8Dhala waambuhany ’kwani p̱u’dkin mo dhali ṯel mii ’pen mo mmodoṯa Bilaaṯus gwo mo mmomii to jin miina a’di isa yempa/ gom uni mo. 9Dhali a’di ki thoḵ uni gwo mo ki: Um ŋap̱ki aha/ mmo’cuḵki um aMaliḵ gi ’Kwani Yahuuda/ mo ’taa? 10Haali/ a’di nyiṯẖki dhap̱an jin takina igasiis kun can mo gom a’di mo mmoc̱i a’di wakan mo. 11Hili igasiis kun can c̱i’thkina waambuhany ’kwani is ki mii mo ki a’di midi ’cuḵki uni aBaraabas mo ’te/. 12Dhala Bilaaṯus ki o uni gwo mo doḵ/e ki: Dhali aha/ mina miiya ta ki wathi/ jin yuḵa um ka Maliḵ gi ’Kwani Yahuuda/ mo? 13Dhali uni cuukin kagahara mo doḵ/e ki: ’Koshi a’di ki cwany’ciṯẖan dhul mo. 14Dhala Bilaaṯus ki thoḵ uni gwo mo ki: Gomatinta sa/? Tonthus gi wakatinta imiikina a’di mo? Hili uni ’baar mo ḵumki cuuwa/ mo ki nyanye/ mo mmo/o gwo mo ki: ’Koshi a’di ki cwany’ciṯẖan dhul mo. 15Wakan Bilaaṯus mmodikina a’di gwo ibwa mo mmoṯeya waambuhany ’kwani ki gwo mo tani a’di ki ’cuḵki uni aBaraabas mo dhali ki a’di dorki’da Yesus ki yis bip̱ mo tani a’di ki c̱iki a’di ki uni mo mmo’kosh ki cwany’ciṯẖan dhul mo be.

I/askar Miikina Yesus ka Maḵ mo

16Dhali i/askar ki sus a’di mo e bwam mo ma mudhiir mo, a’di jin ta gu’b jin c̱a’ba a’di nycine/ mo. Dhali uni ki yuḵ i/askari ’baar mo ka tul ’kup̱ mo. 17Dhali uni ki hi’thki a’di burrinyen duḵ is mo jin ta jam p̱o/ mo dhali uni ki ṯo’d toŋ’kup̱ ’pena ’de/ mo mmokar a’di i’kup̱ mo be. 18Dhali uni ki ṯel mii ’pen mo mmothe a’di me’d mo mmo/o gwo mo ki: Hayy Maliḵ gi ’Kwani Yahuuda/ mo. 19Dhali uni ki dor a’di ’kup̱ ki cwa mo dhali ’taḵ a’di manya/ i is mo dhali uni ki luŋ ki jiŋ ’kup̱a ’dup̱uni bwambori a’di mo mmowu is ka ’cesh mo. 20Dhali ki uni miiki a’di ka maḵ mo tani uni ki ’cuḵ a’di burrinyen duḵ is jin ta jam p̱o/ mo dhali uni ki hi’thki a’di burrinyem piti i is mo. Dhali uni ki sus a’di ka pije/ mo mmo’kosh ki cwany’ciṯẖan dhul mo be.

Mo gi ’Koshuwa ’Kosh ki Cwany’ciṯẖan Dhul mo

21Dhali uni ki budha Simaan gi Paŋ Kerawaan ki ’bi’th mo a’di jin ta CoAlaksandarus mo dhala Rup̱us mo, a’di jin yaki yampe mo, a’di jin yayi’d ’peni bampa/ mo, mmoḵal cwany’ciṯẖan dhul piti mo. 22Dhali uni suski a’di mo e mo jin yuḵu gway ka Gulguṯẖa mo (jin ta ’pemen gwo jin onu mo ki: mo ma simaŋ ’kup̱ mo be.) 23Dhali uni c̱iki a’di yimana mura’th jin ’koshu e ki yiman cwa jin ta’da murr mo be. Hili a’di diki bu’th a’di mo be. 24Dhali uni ’koshki a’di ki cwany’ciṯẖan dhul mo dhali uni ki ḵwa/ burrinyem piti bwa mo e bwam uni mo mmoṯa’k to mo gom uni mo mmopi gwo ’pen ka pije/ mo, gom to jin mina uni ’baar mo ka ’deṯe/ ’deṯe/ ’taki bu’th mo be. 25Dhali ki mo ta’da tente/ pedoŋon mo tani uni ’koshki a’di ki cwany’ciṯẖan dhul mo be. 26Dhali gwo jin onu ap̱o/ a’di jin ’kwarkunu mo, a’di jin deŋkunu e mo tani o’d ka: Maliḵ gi ’Kwani Yahuuda/ mo be. 27Dhali nyaḵki a’di mo tani uni ki ’kosh ’kwanin ’di/ isu/ ki cwany’ciṯẖan dhul mo, jan ṯal ’de/ ki me’da bim poros piti mo dhali jaŋ kamu/ ki me’da biny cam piti mo be. 28Dhali Gwo ma Arumgimis jin ’kwarkunu mo thimkunu mo, a’di jin o gwo mo ki: A’di karkunu mo nyaḵki imandhaŋ gwo mo. 29Dhali uni gwansan kun iikin ki iimpe mo tani uni c̱iki a’di gura/ mo dhali pir ’kup̱ buni mo dhali o gwo mo ki: Ayy. /E jin mini ’taki ’kosh gu’b gi mondheleladhelel mo dhali nyaŋ a’di ka cim kwara mo tani 30woṯẖi/ is pini mo ma, dhali thulu/ ka ’cesh ’pena p̱o/ cwany’ciṯẖan dhul mo. 31Wakan si’da/ igasiis kun can miiki a’di ka maḵ mo ka rem ’kup̱ nyaḵki iman’kwar to mo mmo/o gwo mo ki: A’di mishi tiya woṯẖ mo tani hili a’di molki is piti woṯẖ moyi. 32Dhalka Ḵrisṯẖos jin ta’da Maliḵ gi ’Kwani ma Israyiil thulu’d ka ’cesh shwane’dan ’pena p̱o/ cwany’ciṯẖan dhul mo ki ana mina p̱ar e mo dhali gam gwo is mo. Dhali uni gwansan kun nyaḵkunu ’kosh ki a’di ki cwany’ciṯẖan dhul mo tani uni si’da/ sorki a’di mo be.

Mowu ma Yesus mo

33Dhali ka tente/ p̱u’dki’di bwaŋ ’kup̱ mo tani adhan mondhurumi’d p̱u’dki’d ap̱o/ mony’ceshi ’baar mo ntaga tente/ ibum ’ban mo be. 34Dhali ka tente/ ’koni kwara mo tani Yesus cuuki’d ki dhan ’twa/ jin caaca mo ki: Iluwi, Iluwi, lama sabaktani, a’di jin ta ’pemen gwo jin onu ka: Arumgimis pem, Arumgimis pem, atinta dhalkina /e aha/ ’pen kan mo? 35Dhali unin tiya kun doshkin ki ’dishe/ ciḵki a’di mo dhali o gwo mo ki: Hili mo mo ma. A’di yuḵki’da Iliyya mo be. 36Dhali jan ṯal ’deŋ kamu/ guski’d mo dhali ’tu’da lip̱a/ ki yiman tom ’pac̱a’d mo mmokar a’di e cwa mo dhali c̱iki a’di mmop̱i mo mmo/o gwo mo ki: C̱ora ma. Dhalki ana p̱ara e mo waḵki/ Iliyya midi p̱u’du/ mo mmo’cuḵ a’di ka ’cesh mo. 37Dhala Yesus cuuki’d kagahara mo dhali a’di ki c̱i shi/in piti jiŋ ’ko’d mo be. 38Dhali burrinye/ jin di’d e gu’b gi mondheleladhelel mo tani a’di dherkunu bwa mo ka ’ban su/ mo ’peni buŋ’kup̱ mo ntagi bum’pen mo be. 39Dhali ka mancil ma askar iss ’kwanimpa imudhe’d, a’di jin doshki’d ka ḵarambuye/ i a’di mo tani p̱arki a’di e mo mmoko wakan mo dhali mmoc̱i shi/in piti jiŋ ’ko’d mo tani a’di ki o gwo mo ki: Ka jiŋ gana/ wathi/ yansan ta Ya/ ma Arumgimis mo be.

40Dhali up̱ ’kokin mo mmun si’da/ mo kun hilki mo mo ’pena dhana/ mo. Uni gun ’koni bwaman uni mo tani ta iMariyam Magdaliyya mo dhala Mariyam jin ta KoYakuub mo jin ta a’di jin ta dhuru’c mo dhala Yusi mo dhala Saluuma mo be. 41Uni gun baṯẖki a’di nsho’k mo me’d jin dikina a’di e Pany Jaliil mo dhali mii a’di to mo. Dhali up̱ tana ris ka ris si’da/ kun p̱u’dkin mo kun nyaḵki ii ki a’di mo e Pa Urushaliim mo be.

Mo jin Kanuwa Yesus mo

42Dhali ki mom’pimpili/ p̱u’dki’d mo me’d jin tana a’di atee jin Thosonkunu to mo tani a’di jin ta’da tee jin ṯwa/a/ ka cim ma pesu/ mo tani 43aYuusup̱ gi Pa Arraama a’di jin taḵu mo jin ta jan ṯal ’de/ gi montul is buni mo, a’di ki is piti si’da/ jin c̱orki Bampa/ ma Arumgimis mo, a’di bu’thki’da du mo dhali yaa Bilaaṯus mo dhali doṯ a’di gwo mo gom buŋgwar is ma Yesus mo be. 44Dhala Bilaaṯus merki’d mo waḵki/ a’di midi ’taki wu ki jahanne/ kan mo. Dhali a’di ki yuḵa mancil ma askar iss ’kwanimpa imudhe’d mo mmodoṯ a’di gwo mo waḵki/ a’di wuki’d hila/ mo walla a’di kap̱ki wu mo. 45Dhali ki a’di da/arki gwo ’pena mancil ma askar iss ’kwanimpa imudhe’d mo gom jwa jin wukina a’di mo tani a’di ki dhala Yuusup̱ bway mo mmoḵal buŋgwar is piti mo be. 46Dhali a’di yolki burrinyen dhiny e jin kanuwa kan mo dhali a’di ki thul a’di ka ’cesh mo dhali ’tham a’di is ki burrinyen dhiny e jin kanuwa kan mo dhali ’thi a’di mo e jis wosh jin ’kolkunu mo dhali ’daŋkal dhan wosha caaga/ mo mmomu’th ’twaman jis jwa ’twa/ mo be. 47Mariyam Magdaliyya dhala Mariyam jin ta KoYusi p̱arki mo e mo, mo jin ’thikunu a’di nycine/ mo be.

Currently Selected:

MARKUS 15: Udk

Highlight

Copy