Genesis 43
43
Midlikù diyà te Ehipto is menge Suled ni Jose
1Ne utew en mid-iseg haazà is bitil ziyà te Canaan. 2Ne hein naamin dan en is egkeenen he migkuwa zan diyà te Ehipto migkaǥi si Jacob diyà te kandan te, “Hendiyè kew en maan wey kew mekepemasa te egkeenen tew minsan deisey zà.” 3Ne midtavak si Juda te, “Haazà is gubirnedur, mibpeketelteleenan key zin he kenà egkehimu he ebpekeetuvang key ziyà te kandin emun kenè dey egkezuma is hazi zey. 4Ne emun ibpezuma nu si Benjamin edhendiyè key ne ebpemasa key te egkeenen tew. 5Iyan, emun kenè nu ibpezuma, ne kenè key zaan edhendiyà su migkaǥi sikan is gubirnedur he emun kenè dey egkezuma is hazi zey ne kenà egkehimu he ebpekeetuvang key ziyà te kandin.”
6Ne migkaǥi si Jacob te, “Maan is midhimu niw he utew a meseeng? Maan is migkaǥi niw kandin he zuen niw pa hazi?” 7Ne midtavak dan te, “Geina te mibpeniguduwan key zin insai mehitenged te pemilya tew. Ke sikandin te, ‘Uuyag pe be is amey niw? Duen niw pe be hazi?’ Umbe intug-an dey su wazè dey isipa he egkeǥiyen din he kinahanglan he edumahan dey pa is hazi zey ziyà te Ehipto.”
8Ne zutun migkaǥi si Juda ziyà te amey zin he si Israel te, “Isarig nu kediey si Benjamin ne egenat key en guntaan su wey kiw kenà meumes te vitil. 9Iyan a ebantey kandin ne iyan a ebpesarig kenikew he emun kenè ku sikandin igkeulì dini te etuvangan nu ne kediey he salà diyà te kenikew te wazà pidtemanan. 10Angin ke wazè key mesanggen su kezezuwa key en pezem mekehendiyà wey mekeulì dini.”
11Ne migkaǥi zutun is amey zan te, “Emun iyan en heeyan egkeulaula su wazà duma he paaǥi, ne zeyzey ke zuen edtinesen niw he menge meupiya he igasa he zini ebpuun te kenitew wey niw meuwit diyà te egalen dan. Uwit kew te menge bawì, teneb, penaket, menge perehemut, wey menge veǥas te kayu he pistasyu wey almindru. 12Tekepa niw is selapì niw wey niw ikeulì haazà is selapì he neketaǥù diyà te menge saku niw su kela ke nesayep dan dà. 13Ne zumaha niw zaan is hazi niw ne ǥaanggaan kew likù dutun te gubirnedur. 14Berakat he pengelinteuwi te Mekeǥeǥehem he Megbevayà he mehizuwi kew zin su wey ituǥut din he mekeulì si Simeon wey si Benjamin. Ne siak, emun iyan imbanglis kediey he egkeewaan e pa te menge anak ku ne kinahanglan he ed-entusen ku.”
15Ne zutun mibpenines dan is menge igasa zan ne midtakep dan is selapì dan. Migenat dan ne miduma zan si Benjamin pehendiyà te Ehipto, ne mibpekid-ehè dan te ki Jose. 16Hein naahà sikandan ni Jose he nezuma zan si Benjamin, migkeǥiyan din is suluǥuen din te, “Dumaha nu heini is menge etew ziyà te valey ku. Lapè ka te uyaǥen wey susuba ka, su kayi sikandan ebpeniudtu zuma kedì.” 17Ne midtuman dutun te suluǥuen is insuǥù kandin. Ne miduma zin sikandan diyà te valey ni Jose.
18Ne utew sikandan nahandek dutun te kedumaha kandan diyà te valey ni Jose su neisip dan is, “Kela ke iyan indumaha kenitew kayi is tenged te selapì he neketaǥù diyà te menge saku tew zutun te nehuna he kedhendini tew. Kela ke edekepen kiw ne ed-uripenen kiw ne egkuwaan dan is menge asnu tew.” 19Ne tenged dutun mid-uvayan dan haazà is suluǥuen ni Jose ne mibpekidlalag dan diyà te ǥemawan dutun te valey. 20Ke sikandan te, “Datù, midhendini key zengan su mibpemasa key te egkeenen. 21Piru hein nezukileman key ne nekehulavung key ziyà te sevaha he lugar, ne mibengkasan dey is menge saku zey, ne neehè dey zutun te menge saku zey sikan is selapì he impemasa zey te egkekaan. Heini zed, id-ulì dey. 22Ne zuen selakew en maan he selapì dey ǥuntaan he ibpemasa te egkeenen. Wazè dey metueni ke hentei is midtaǥù te selapì diyà te menge saku zey.” 23Ne midtavak is suluǥuen te, “Wazà kinahanglan he igkeseeng niw heeyan. Kenè kew mahandek. Is Megbevayè niw he Megbevayà te amey niw, iyan buwa mibeǥey keniyu te selapì diyà te menge saku niw, su nezawat ku man is selapì niw.” Ne mid-uwit din diyà te kandan si Simeon.
24Impeseled din dutun sikandan te valey ni Jose ne mibeǥayan din sikandan te wahig he ibpenlùlù te menge paa zan. Ne migkumpayan din daan is menge asnu zan. 25Ne mid-andam dan dutun is menge igasa zan ki Jose ke ed-ulì te meudtu su nezineg dan he ziyè din sikandan ibpekaan te valey zin.
26Ne hein nekeuma si Jose, midluhud dan he iyan kedtahud dan kandin ne imbeǥey zan is menge igasa zan. 27Ne nenginginsà si Jose kandan ke egkemenumenu zan en. Ne nenginginsè en maan sikandin te, “Egkemenumenu en is amey niw he meǥurang en he midtudtul niw zengan kedì? Uuyag pe be sikandin?” 28Ne midtavak dan te, “Uuyag pa is amey zey wey meupiya zed daan sikandin.” Ne mid-uman dan medluhud su ibpeehè dan is kedtahud dan kandin.
29Hein naahà ni Jose si Benjamin is lumunè din en te ǥetek, ke sikandan te, “Iyan be heini sikan is hazi niw he migkaǥi niw zengan kedì?” Ne migkeǥiyan din si Benjamin te, “Mama, berakat he tuvazi ka te Megbevayà.” 30Ne zutun utew si Jose nerurunù te kebulunga zin te hazi zin. Migaanggaan sikandin med-awà dutun ne midseled diyà te ruǥu zin ne ziyà medsineǥew. 31Ne hein netegteǥaad, mibpendapug ne midlikuan din is menge suled din ne midtigker zin is gehinawa zin ne ke sikandin diyà te menge suluǥuen te, “Isavuk niw en is egkeenen.”
32Impedsisivey zan is egkeenan: is egkeenan ni Jose, is egkeenan te menge suled din, wey is egkeenan te menge etew zutun he tig-Ehipto. Su is menge tig-Ehipto kenè dan ebpekidtuǥen te menge Hebriyuhanen su utew haazà supak te menge vetasan dan. 33Impemepinuu is menge suled ni Jose sumalà is idad dan puun duen te kakey kandan pehendiyà te hazi ne tenged dutun mibpetengtengtengè dan su utew zan nengeinuinu. 34Duen menge idsezà he ebpuun te lemisahan ni Jose he impehated din diyà te kandan ne is imbeǥey ki Benjamin, ne kelelima metakep te kezekelà te imbeǥey ziyà te menge kakey zin. Ne migkaan dan ne mid-inum dan duma ki Jose ne mibmeupiya is gehinawa zan.
Currently Selected:
Genesis 43: mbbOT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
Genesis 43
43
Midlikù diyà te Ehipto is menge Suled ni Jose
1Ne utew en mid-iseg haazà is bitil ziyà te Canaan. 2Ne hein naamin dan en is egkeenen he migkuwa zan diyà te Ehipto migkaǥi si Jacob diyà te kandan te, “Hendiyè kew en maan wey kew mekepemasa te egkeenen tew minsan deisey zà.” 3Ne midtavak si Juda te, “Haazà is gubirnedur, mibpeketelteleenan key zin he kenà egkehimu he ebpekeetuvang key ziyà te kandin emun kenè dey egkezuma is hazi zey. 4Ne emun ibpezuma nu si Benjamin edhendiyè key ne ebpemasa key te egkeenen tew. 5Iyan, emun kenè nu ibpezuma, ne kenè key zaan edhendiyà su migkaǥi sikan is gubirnedur he emun kenè dey egkezuma is hazi zey ne kenà egkehimu he ebpekeetuvang key ziyà te kandin.”
6Ne migkaǥi si Jacob te, “Maan is midhimu niw he utew a meseeng? Maan is migkaǥi niw kandin he zuen niw pa hazi?” 7Ne midtavak dan te, “Geina te mibpeniguduwan key zin insai mehitenged te pemilya tew. Ke sikandin te, ‘Uuyag pe be is amey niw? Duen niw pe be hazi?’ Umbe intug-an dey su wazè dey isipa he egkeǥiyen din he kinahanglan he edumahan dey pa is hazi zey ziyà te Ehipto.”
8Ne zutun migkaǥi si Juda ziyà te amey zin he si Israel te, “Isarig nu kediey si Benjamin ne egenat key en guntaan su wey kiw kenà meumes te vitil. 9Iyan a ebantey kandin ne iyan a ebpesarig kenikew he emun kenè ku sikandin igkeulì dini te etuvangan nu ne kediey he salà diyà te kenikew te wazà pidtemanan. 10Angin ke wazè key mesanggen su kezezuwa key en pezem mekehendiyà wey mekeulì dini.”
11Ne migkaǥi zutun is amey zan te, “Emun iyan en heeyan egkeulaula su wazà duma he paaǥi, ne zeyzey ke zuen edtinesen niw he menge meupiya he igasa he zini ebpuun te kenitew wey niw meuwit diyà te egalen dan. Uwit kew te menge bawì, teneb, penaket, menge perehemut, wey menge veǥas te kayu he pistasyu wey almindru. 12Tekepa niw is selapì niw wey niw ikeulì haazà is selapì he neketaǥù diyà te menge saku niw su kela ke nesayep dan dà. 13Ne zumaha niw zaan is hazi niw ne ǥaanggaan kew likù dutun te gubirnedur. 14Berakat he pengelinteuwi te Mekeǥeǥehem he Megbevayà he mehizuwi kew zin su wey ituǥut din he mekeulì si Simeon wey si Benjamin. Ne siak, emun iyan imbanglis kediey he egkeewaan e pa te menge anak ku ne kinahanglan he ed-entusen ku.”
15Ne zutun mibpenines dan is menge igasa zan ne midtakep dan is selapì dan. Migenat dan ne miduma zan si Benjamin pehendiyà te Ehipto, ne mibpekid-ehè dan te ki Jose. 16Hein naahà sikandan ni Jose he nezuma zan si Benjamin, migkeǥiyan din is suluǥuen din te, “Dumaha nu heini is menge etew ziyà te valey ku. Lapè ka te uyaǥen wey susuba ka, su kayi sikandan ebpeniudtu zuma kedì.” 17Ne midtuman dutun te suluǥuen is insuǥù kandin. Ne miduma zin sikandan diyà te valey ni Jose.
18Ne utew sikandan nahandek dutun te kedumaha kandan diyà te valey ni Jose su neisip dan is, “Kela ke iyan indumaha kenitew kayi is tenged te selapì he neketaǥù diyà te menge saku tew zutun te nehuna he kedhendini tew. Kela ke edekepen kiw ne ed-uripenen kiw ne egkuwaan dan is menge asnu tew.” 19Ne tenged dutun mid-uvayan dan haazà is suluǥuen ni Jose ne mibpekidlalag dan diyà te ǥemawan dutun te valey. 20Ke sikandan te, “Datù, midhendini key zengan su mibpemasa key te egkeenen. 21Piru hein nezukileman key ne nekehulavung key ziyà te sevaha he lugar, ne mibengkasan dey is menge saku zey, ne neehè dey zutun te menge saku zey sikan is selapì he impemasa zey te egkekaan. Heini zed, id-ulì dey. 22Ne zuen selakew en maan he selapì dey ǥuntaan he ibpemasa te egkeenen. Wazè dey metueni ke hentei is midtaǥù te selapì diyà te menge saku zey.” 23Ne midtavak is suluǥuen te, “Wazà kinahanglan he igkeseeng niw heeyan. Kenè kew mahandek. Is Megbevayè niw he Megbevayà te amey niw, iyan buwa mibeǥey keniyu te selapì diyà te menge saku niw, su nezawat ku man is selapì niw.” Ne mid-uwit din diyà te kandan si Simeon.
24Impeseled din dutun sikandan te valey ni Jose ne mibeǥayan din sikandan te wahig he ibpenlùlù te menge paa zan. Ne migkumpayan din daan is menge asnu zan. 25Ne mid-andam dan dutun is menge igasa zan ki Jose ke ed-ulì te meudtu su nezineg dan he ziyè din sikandan ibpekaan te valey zin.
26Ne hein nekeuma si Jose, midluhud dan he iyan kedtahud dan kandin ne imbeǥey zan is menge igasa zan. 27Ne nenginginsà si Jose kandan ke egkemenumenu zan en. Ne nenginginsè en maan sikandin te, “Egkemenumenu en is amey niw he meǥurang en he midtudtul niw zengan kedì? Uuyag pe be sikandin?” 28Ne midtavak dan te, “Uuyag pa is amey zey wey meupiya zed daan sikandin.” Ne mid-uman dan medluhud su ibpeehè dan is kedtahud dan kandin.
29Hein naahà ni Jose si Benjamin is lumunè din en te ǥetek, ke sikandan te, “Iyan be heini sikan is hazi niw he migkaǥi niw zengan kedì?” Ne migkeǥiyan din si Benjamin te, “Mama, berakat he tuvazi ka te Megbevayà.” 30Ne zutun utew si Jose nerurunù te kebulunga zin te hazi zin. Migaanggaan sikandin med-awà dutun ne midseled diyà te ruǥu zin ne ziyà medsineǥew. 31Ne hein netegteǥaad, mibpendapug ne midlikuan din is menge suled din ne midtigker zin is gehinawa zin ne ke sikandin diyà te menge suluǥuen te, “Isavuk niw en is egkeenen.”
32Impedsisivey zan is egkeenan: is egkeenan ni Jose, is egkeenan te menge suled din, wey is egkeenan te menge etew zutun he tig-Ehipto. Su is menge tig-Ehipto kenè dan ebpekidtuǥen te menge Hebriyuhanen su utew haazà supak te menge vetasan dan. 33Impemepinuu is menge suled ni Jose sumalà is idad dan puun duen te kakey kandan pehendiyà te hazi ne tenged dutun mibpetengtengtengè dan su utew zan nengeinuinu. 34Duen menge idsezà he ebpuun te lemisahan ni Jose he impehated din diyà te kandan ne is imbeǥey ki Benjamin, ne kelelima metakep te kezekelà te imbeǥey ziyà te menge kakey zin. Ne migkaan dan ne mid-inum dan duma ki Jose ne mibmeupiya is gehinawa zan.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.