Matyu 3

Jon yansnjro qaji a wadau sawaq dia tamo uŋgasari naŋgi Qotei aqa anjam palontosiq minjroqnej

1Ariya bunuqna Jon yansnjro qaji tamo a Judia naŋgo wadau sawaq di brantej. Brantosiq di sosiqa tamo uŋgasari naŋgi Qotei aqa anjam palontosiq minjroqnej. 2A naŋgi endegsi minjroqnej, “Qotei a nuŋgo Mandor Koba sosim niŋgi taqatŋgwajqa bati jojomqo. Deqa niŋgi are bulyiye.” 3Jon a qa nami Qotei aqa medabu o qaji tamo Aisaia a endegsi marej, “Tamo bei a wadau sawaq di tigelosimqa a tulaŋ koba leleŋosim tamo uŋgasari naŋgi endegsi minjroqnqas, ‘Tamo Koba a bqajqa gam gereiyetiye. Gam tingitetiye.’”

4Jon a wadau sawaq di sosiqa a gara jugo kamel aqa juŋgum na gereiyo qaji di jugoqnsiqa alalag na siŋgilatsiq laqnej. A iŋgi uyqa saiqoji deqa a sis ti bisim qaq ti uyoqnej. 5Bati deqa tamo uŋgasari Jerusalem qureq di soqneb qaji naŋgi ti Judia sawaq di soqneb qaji naŋgi ti qure kalil Jordan ya qalaq di soqneb qaji naŋgi ti tigelosib Jon aqa areq boqneb. 6Boqnsibqa naŋgo une kalil palontekriteqnab Jon na Jordan yaq di yansnjroqnej.

7Bati deqa Farisi tamo ti Sadyusi tamo ti tulaŋ gargekoba naŋgi Jon na yansnjrqa marsibqa aqa areq beqnabqa unjrsiqa naŋgi endegsi minjroqnej, “Niŋgi amal uge bul. Qotei a niŋgi qa minjiŋ ani oqetqo deqa a na niŋgi ŋolawotŋgwas. Yai na niŋgi merŋgwoqa Qotei aqa minjiŋ nuŋgoq aiaim deqa ulaosib ijoq bonub? 8Niŋgi are bulyqa marsibqa kumbra bole bole babtoqniye. Yim tamo naŋgi unsib marqab, ‘Bole, niŋgi are bulyonub.’ 9Niŋgi endegsib are qalaib, ‘Abraham a gago moma utru. Deqa iga Qotei aqa ŋamdamuq di tamo bole.’ Niŋgi degsib are qalaib. Niŋgi quiye. Qotei na marimqa meniŋ kalil endi dego tamo bulyosib tigelosib marqab, ‘Abraham a gago moma utru.’ 10Tapor qalat agi Qotei na ŋam utruq di qomqajqa ojsiqa tigelejunu. Deqa ŋam kalil gei boletosaieqnub qaji di Qotei na qomeleŋosim ŋamyuoq di breinjrqas.

11“Niŋgi are bulyqajqa deqa e ya na niŋgi laŋa yansŋgeqnum. Ariya Tamo Koba a bunuqna ijo qoreq na bqas. A tamo siŋgila koba. Ijo siŋgila aqa siŋgila ti keresai. Deqa e a kaŋgalyqajqa e tamo bolesai. A bosimqa Qotei aqa Mondor aqa siŋgila na ti ŋamyuo na ti niŋgi yansŋgwas. 12Aqa baŋq di a savol ojejunu. A bosim savol dena wit ñoqoryosim damu eleŋosim aqa talq di atqas. Ariya a suwi olo eleŋosim ŋamyuo gaigai yuejunu qaji dia breinjrimqa yuekritqab.”

Jon na Yesus yansej

13Bati deqa Yesus a Galili sawaq dena tigelosiqa walwelosiq Jordan yaq gilej. A Jon na yansqa marsiqa aqa areq gilej. 14Gilnaqa Jon na saidyosiq minjej, “Ni na e yansbqam di kere. Kiyaqa e na ni yansmqa marsim ijoq bonum?” 15Onaqa Yesus na kamba minjej, “Uŋgum. Ni ijo anjam dauryosim yansbe. Yimqa kumbra dena iga Qotei aqa areqalo kalil keretosim dauryqom.” Onaqa Jon a Yesus aqa anjam di dauryosiqa a yansej.

16Yesus yansonaqa a yaq na gogetosiqa bati di a tarosi laŋ goge koqyonaqa laŋ waqej. Laŋ waqonaqa Qotei aqa Mondor binoŋ bulosiq laŋ goge dena aisiq Yesus aqa jejamuq di awoonaq unej. 17Unnaqa laŋ goge dena Qotei a anjam marnaqa tamo uŋgasari naŋgi aqa kakoro queb. A endegsi marnaq queb, “Di ijo aŋgro qujai. E na a tulaŋ qalaqalaiyeqnum. E a qa tulaŋ areboleboleibqo.”

Currently Selected:

Matyu 3: bojNT

Highlight

Copy