Luku 9

1Peŋka'po ŵaliŵetile aŵo ikumi naŵaŵili nekuŵapela amakosa neŵukulu pafiŵanda fyonse nebwakulukuŵusya aŵalwele. 2Lomba ŵaliŵatumine mukutulisya Uŵufumu bwaŵaLesa, nekulukuŵusya aŵalwele; 3nekulaŵila kuli ŵo ati: Tekupinta-fintu fyalwendo lwenu, neli kasako, neli litumba, neli nisiŋkwa, neli nindalama; kaŵili tekulukuli neminjila iŵili. 4Popele mumananda onse, umu mukenjila, mukalukwikalo' mo, emu mukalukufuma, 5Nakaŵili ŵonse aŵakuŵulo'kumupokeni, pakufuma-mo mumusi uyo, mukalikunte ikuŋgu kumakasa enu, koti niŵumboni kuli ŵo. 6Naŵo ŵalikumbulucile, nekulukupitana ponse pamisi, ili ŵatulisya iceŵo iciweme, nekulukuŵaŵusya aŵantu ponse ponse.

7Peŋka'po naElode, impemba, yaliumfwile fyonse ifyacitilwe; nayo nekukaŋkamikwa ukwakuti, pakuti ŵambi ŵalukulawila ati niYoane uwaŵuka paŵafwile; 8naŵambi naŵo ati, Elaija aŵoneka! Ŵambi naŵo ati, Umbi uwakusimika uwakale ewaŵuka. 9Lomba Elode alilaŵile ati: Yoane nalimutetele umutwi; sombi mbaninani uyu ifyakwe ifi naumfwa ifyakuŵe'fi? Naye alifwaile ukuŵaŵona.

10Lomba nentanjisi, ili syabwelele, syaliwawulile ifintu ifyo ifi syacitile. Naŵo ŵalisitwite kumpelo, nekukumbuluka nasyo ukuya kumusi umbi uwaBesaida. 11Sombi amaŵumba aŵantu alibwenefyo, nekulukuŵalonda: naŵo ŵaliŵasekelele bwino, nekulukwambala naŵo ifya Ŵufumu bwaŵaLesa, nekuŵaŵusya aŵo awalukupeŋgelo'kuwusiwa. 12Lomba nekasuŵa nekutatiko'kuwa; peŋka aŵo ikumi naŵaŵili ŵaliisile nekulaŵila kuli ŵo ati: Mwatume amaŵumba aŵantu ati ŵenjile mumisi namumitala Isijŋgulucile, ŵalukwikala, ŵapoke'fyakulya, pakuti pano tuli pampaŋga lukoso. 13Sombi naŵo ŵalilaŵile kuli ŵo ati: Muŵapele ukulya! Kumfwa ŵo ati: Tuli nawasiŋkwa ŵasanu weŋka, nesaŵi liŵili lyeŋka, kansi tesi tuye mukuŵolila ifyakulya aŵantu aŵa ŵonse.

14Pakuti ŵo ŵalikumene aŵalalume koti masausande asanu. Peŋka ŵalilaŵile kuŵasambile ŵaŵo ati: Ŋgamuŵekalike pansi mufipani fyaŵo, mucipani cimo aŵantu koti makumi asanu. 15Naŵo ŵalicitile'fyo, nekuŵekalika pansi ŵonse. 16Popele naŵo ŵaliŵulile wasiŋkwa ŵosanu, nesaŵi ilyo liŵili, nekutontomeka kwiulu, nekuficindika, nekufikumala: nekuŵapela awasambile ati ŵaaŵanye kumaŵumba aŵantu. 17Naŵo ŵalilile, nekwikuta ŵonse; peŋka'po ŵalitolele ifyakumacile-ko, ifyasyele-po, ututundu ikumi natuŵili.

18Lomba pakulukutembela ŵeŋka ŵaYesu, paliŵele ati aŵasambile naŵo epo ŵali; lomba ŵaliŵepwisye ati: Mbamaŵumba aŵantu walukuŋgewa neŵo ati ninenani? 19Naŵo ŵaliasucile ati: NiYoane uwakuŵatisya; sombi ŵambi ati niElaija; naŵambi naŵo ati niumbi uwakusimika wakale ewaŵuka. 20Eli ŵalaŵile kuli ŵo ati: Sombi mbamweŵo mulukulaŵila ati ninenani? Peŋka Petilo aliasucile ati: NimweŵaKlistu ŵaŵaLesa. 21Lomba ŵaliŵacenjesye, nekuŵafunda ati: Tekuŵaŵule'fyo aŵantu ŵonse neli umo. 22Naŵo ati: Ukumwelelwa Umwana waMuntunsi ukusomenwa kufintu ifinji, nekulukukanwa kuŵakulu nakuŵapapatilisi aŵakulu nakuŵalembesi, nekwipaiwa, nekuŵusiwa pakasuŵa kaŵusitatu.

23Peŋka ŵalilaŵile kuli ŵo ŵonse ati: Aŵantu ŵonse ulukufwayo'kundonda, ŋgaalikanye, alukupinta nemutaliko wakwe insiku syonse, nekulukundonda. 24Pakuti aŵantu ŵonse ulukufwayo'kupulusya umweo wakwe, akaulufya; sombi aŵantu ŵonse ukalufyo'mweo wakwe pakuti pali neŵo, uyo wopele eukaupulusya. 25Pakuti umuntu aŋgasyuka syani, kani alukubwena-po icalo conse icapansi, nekulilufya, neli kuli posa umwine? 26Pakuti aŵantu ŵonse ukaŵa nensoni pakuti pali neŵo nemasiwi anji, pakuti pali woyo neMwana waMuntunsi naye akaŵa nensoni, pakwisa muŵuleme bwakwe namuli ŵoŵo ubwaŵaWisi, nawowo ubŵaŋkalamba isiswetelele. 27Sombi ndukumuŵuleni ifyacine ati ŵambi aŵemakene pano taŵakomfwa-po imfwa neli panini, ili tawaŋgaŵuŵona Uŵufumu bwaŵaLesa.

28Lomba pakusila amasiwi ayo, ili syapitile insiku koti sisanu nasitatu, paliŵele ati ŵalipintile Petilo naYoane naJakobo, nekunina kulupili mukutembela. 29Peŋka ili ŵalukutembela, amekalilo apamenso aŵo alialucile, nefyakufwala fyaŵo nafyo fyalituŵile, nekulukusasamuka. 30Lomba ŵalukwambala naŵo aŵantu ŵaŵili, niMose naElaija; 31aŵabwenekele muwuleme, nekulaŵila ifyakufuma kwaŵo, uko uku ŵali apepi ukukonsya kuJelusalemi. 32Lomba Petilo naŵaŵo aŵo ali naŵo ŵalilemene mutulo; sombi, ili ŵaŵucile icine, ŵalibwene uŵuleme bwaŵo neŵantu aŵo ŵoŵilo aŵaimakene naŵo. 33Peŋka pakulukufuma aŵo kuli ŵo, Petilo alilaŵile kuli ŵaYesu ati: MweŵaSikulu, cawama ati tulukuli kuno; ŋgatwiŵake imitanda itatu: umo wenu, umbi waŵaMose, naumbi nawo waŵaElaija. Pakuti taafiisiŵilepo ifyo ifi alukulawila. 34Sombi ili acilaŵile' fyo, lyaliisile nekumbi, nekuŵasesemucila; naŵo ŵalitinine pakwinjila mwikumbi. 35Peŋka'po nesiwi lyalifumine mwikumbi ati: Uyu Mwana wanji, usalulwilwe kuli neŵo: mulukumumfwal 36Pakufika isiwi ilyo, lomba ŵaYesu ŵalibwenekele ŵeŋka. Peŋka aŵo ŵaliikele celele, taŵaŵaŵulile-po aŵantu ŵonse neli umo insiku isyo ifyafintu ifyo ifi ŵabwene neli cimo.

37Popele ŋgamailo, ili ŵaselucile kulupili, iŵumba ilikulu lyaliŵasanjile ŵaYesu. 38Lomba umuntu umbi uwamwiŵumba aliŵilicisye ati: MweŵaSambisi, ndukumukombeteleni ati mumuŵone umwana wanji umwalalume, pakuti ye eufyelweeŋka; 39lomba umupasi nekumwikata, naye nekupulililo'kwauka; peŋka nekumukwamuna pakusaika, popele nekukatasyo'kufuma-mo muli ye, ili umuleŋgele'mikakambo. 40Lomba nakombetela aŵasambile ŵenu, ati ŵaufumye; sombi taŵaisiŵile-po. 41Lomba ŵaYesu ŵaliasucile ati: Mweŵacitentekwa icakuŵulo'kucetekela, mweŵacikaka, mbanjikale nenu impindi yasyani nekulukumusumineni? Leta kuno umwana woŵe! 42Lomba, ili aciisa, iciŵanda calimuwisisye pansi, nekumukwamuno'kwakuti. Sombi ŵaYesu ŵaliukenye umupasi uŵipile, nekumuŵusyo'musaŋkwa, nekumubwesesya kuli ŵawisi. 43Peŋka ŵonse walikaŋkamene pakuti paŵuleme bwaŵaLesa.

Sombi ili ŵalukukaŋkamana ŵonse pakuti pafintu ifyo ifi ŵacitile, ŵalilaŵile kuŵasambile ŵaŵo ati: 44Amasiwi aya ŋgaenjilisye mumatwi enu; pakuti Umwana waMuntunsi akaloŵelwa kuminwe yaŵantu. 45Sombi naŵo taŵaesiŵile amasiwi ayo; alifisilwe kuli ŵo, weŋgesa mukwesiŵa amasiwi. Lomba ŵalitinine ukuŵepusya ifyamasiwi ayo.

46Peŋka'po kwaliŵucile nekupicisya pakati pali ŵo, ati pali fweŵo mba ninani alicilile? 47Sombi ŵaYesu, ili ŵabwene ukulukulaŋguluka ukwamumitima yaŵo, ŵalipokele umwanice, nekumwikalika muceni caŵo, 48nekulaŵila kuli ŵo ati: Aŵantu ŵonse ukamupoka umwanice uyu mwisina lyanji, akampoka neŵo: kaŵili aŵantu ŵonse ukampoka neŵo, akapoka neŵantumine; pakuti uyu ucepele lukoso pakati pali mweŵo, wopele emukulu.

49Lomba Yoane aliŵaasucile ati: MweŵaSambisi, twalimubwene umuntu uwalukufifumya ifiŵanda mwisina lyenu; peŋka twalimukenye, pakuti taalukulonda pamo nafweŵo. 50Sombi ŵa Yesu ŵalilaŵile kuli ye ati: Tekukanya; pakuti utaali mupate wenu ciŵusa cenu.

51Peŋka'po, pakupalamina insiku isyo isyelelwe ukupokwa kwiulu ŵo, ŵalisiŋkamicile amenso aŵo ukulukuya kuJelusalemi; 52nekutuma neŋkalamba isyakuŵatanjilila; nasyo syaliile nekwinjila mumusi umbi waŵaSamalya mukuŵaansicila. 53Sombi aŵo taŵaŵapokelele, pakuti amenso aŵo alisiŋkamene ukuya kujelusalemi, 54Peŋka aŵasambile ŵaŵo, Jakobo naYoane, pakuŵone'fyo, ŵalilaŵile ati: MweŵaSikulu, ŋgatuwite umulilo uwakuseluka kwi ulu, uŵoce? 55Sombi naŵo ŵalialucile, nekuŵakanya. 56Lomba ŵaliile kumusi umbi.

57Peŋka ili ŵalukwenda munsila, umuntu umbi alilaŵile kuli ŵaYesu ati: Nakulukumulondeni uko konse uku mulukuya. 58Naŵo ŵaYesu ŵalilaŵile kuli ye ati: Ŵamumbwe ŵali nemena, nefyuni fyamwiulu nafyo fili nefinsa; sombi Umwana waMuntu nsi taakwete apakusamina umutwi wakwe. 59Nakaŵili ŵalilaŵile kuli umbi ati: Ŋgaundonde. Sombi naye ati: MweŵaSikulu, munsumine ati tanje inje muku sika ŵaTata. 60Sombi naŵo walilawile kuli ye ati: Ŋgoŵasye aŵafwile, ŋgawawasike aŵafwile ŵaŵo aŵene! Sombi weŵo, koya, uŵutulisye ponse ponse Uŵufumu bwaŵaLesa. 61Lomba naumbi naye alilaŵile ati: Naneŵo nakulukumulondeni, mweŵaSikulu; sombi munsumine ati tanje mbalaye aŵali kwesu. 62Sombi ŵaYesu ŵalilaŵile kuli ye ati: Aŵantu ŵonse uwikete muminwe yakwe Icakulima-ko, peŋka nekusyolokela kunuma, uyo telelwe Uŵufumu bwaŵaLesa.

Currently Selected:

Luku 9: AAL59

Highlight

Copy