Aposol 8

E Sol e kato homir u kristen

1E Sol e hanigein te mate uu e Stiven. Nonei turu lan teka, ti tanian kato homi koru raia u kristen ti kaia i Jerusalem. I markato uu teka bu kristen hoboto e sata uaier tara man han iahana provins i Judia na i Samaria. U aposol puku ti ka noaia i Jerusalem. 2A pal katuun ti hamana hatagala koru ti kahoein e Stiven, ba nori e tabe hapan koru mer a nitaatagi tere Stiven.

3Kaba e Sol e kato homi korur u kristen te tasu menaien a man luma turu katuun bate las me ranei a pal tson na touhaliou has tara karabus.

U Bulungana u Niga i hahatei naia i Samaria

4U kristen ti sata i la uu turu han hoboto me hahatei laner u Bulungana u Niga. 5E Pilip e la uu tara taun i Samaria me hatuts ranei u katuun i Samaria e Mesaia. 6U katuun u para koru i hahengo hoboto hanigan töaia tere Pilip, nori i hahengo hanigan töa bate tara haseier a man mirakol te katoe e Pilip. 7U liliahanei u omi i ku hapan koru bate lakasa ba raruma u katuun u para ti ka ien. Na u katuun u para ti matekata na ti mou omi i kato haniga pouts hasir. 8Ba nisasaala pan e butuna tara taun i Samaria.

9A töa katuun e kaia tara taun teka a solonen e Saimon. I manasa nonei e roron kato a matuna na hirakö. Ba u katunur i Samaria i roron asingoto koru ni a manka te katoeien. Nonei e roron pei, “Alia a katuun pan.” 10Ba u katuun tara taun teka te taniama turu katuun ti möa ta solo na pala ti kamei a solo, nori hoboto i tagala koru mei ti hengo menaien e Saimon. Nori i poei, “A katuun teka nonei a nitagala tere Sunahan te ngöeri a Nitagala Pan.” 11Nonei e solon hatara rarien a para a ka ba nori e hahengo haniga koruria i tanen. 12Kaba ti hamaneien a manka te hatein e Pilip turu Bulungana u Niga tara Nipepeito tere Sunahan na solona e Iesu Kristo, ba nori hoboto a pal tson na touhaliou e habaptaisir. 13Na e Saimon e hamana has me habaptaisina. Ba nonei e ka gono nitöa mena e Pilip me asingoto koru nena a man mirakol pan te kati e Pilip.

14Tara pöata ti hengoeia u aposol ti kaia i Jerusalem u katunura i Samaria i hanigei u raranga tere Sunahan, ba nori e hala merari ere Pita mere Jon i taren. 15Tara pöata ti tuku ien, ba nori e singo uaier tere Sunahan me singo siler u kristen tegi lu menaien u Namnamei u Göagono. 16Taraha, u Namnamei u Göagono ema koul noa uamei i taren. I manasa nori i habaptais tuun mei a solona Tsunono, e Iesu. 17Bere Pita mere Jon e hatakope ria a limaren i taren, ba nori e töan luer u Namnamei u Göagono.

18-19Ba pöata te tareia e Saimon ti hatakopo menai u aposol a limaren turu katuun ba nori te luer u Namnamei u Göagono, ba nonei e torohanan hala ranei ere Pita mere Jon a moni me poeiena, “Alimiou go hala hase mei lia a nitagala teka, ba lia te tatei hatakopo hase goua a limar turu katuun ba nori te tatei lu haser u Namnamei u Göagono.”

20Kaba e Pita e pei i tanen, “Na taia gono mei a moni i tamölö, taraha alö e poeiem alö e antunan holemi a kaan halhala puku tere Sunahan a moni! 21E möa koru, alö u möa ta pala tara manka teka, taraha a torimölö ema matskö neia i matana e Sunahan. 22Palis ban u hakats u omi teka, ba lö te singo uam tara Tsunono tego ngil uaien ba nonei te luba nena u ngilngil u omi i torimölö. 23Taraha, alia e taregu a torimölö e omi koruna, balö te heremi a karabus te kitsna tara markato a omi.”

24Be Saimon e poeiena, “Pua, alimiou go singo bemumoulia tara Tsunono ba manka te ranga nemulalö tema tatei butu noi i tar!”

25Ba pöata te hatei hakapa naia e Pita mere Jon u raranga tara Tsunono, ba nori e kopis pouts uaier i Jerusalem me hahatei lala na lila u Bulungana u Niga tara man han a man parpara tara Provins i Samaria.

E Pilip na tson a malapei na i Itiopia

26Ba töa angelo tara Tsunono e poeiena tere Pilip, “Takei balö te la uaiem tara maroro te laba nena i Jerusalem, bate gala uana tara taun i Gesa.” A maroro teka e kaia tara makum a palaka. 27Be Pilip e takeina me lana. Tara maroro teka e laia a töa toun Itiopia a malapei. Nonei a töa tson pepeito a kapan te pilein a toukui tara tetahol panina i Itiopia a solonen e Kandesi. Nonei e taratara kapiin a mamanaka a niga tere Kandesi. A tson teka e la silema egomi lotuia i Jerusalem. 28Nonei e lotu hakapa me katsin hakopis pouts hamanasana. Nonei e osaia tara karis i tanen bate ritena u buku te kolotein e Aisaia a propet. 29Ba u Namnamei tere Sunahan e ranga mena e Pilip me poeiena, “Alö go la hasukusuku uala tara karis balö te tataala gono memen.” 30Be Pilip e piata hasukusuku lala mena hengoena te rit menai a katuun teka u buku te kolotein e Aisaia a propet. Be Pilip e poeiena, “Alö e atei silem a mouna u raranga te tare mölö?”

31Ba katuun teka e kato uana, “Tema hale noi lia ta katuun ta niatei, ime temar atei uagou lia?” Ba nonei poeiena tere Pilip, “Alö go seima balö te gum gono memou lia.” Be Pilip e seina me gum gono menen. 32A makumun ranga turu Buku u Göagono te tareien e markato uu teka:

“Nonei a katuun e here nei a sipsip tena piou ner tara makum te atung hamate raria u sipsip.

Nonei e here nei a tunan sipsip tena tuol hakakamotona tara makum te kotskotseria u hulu tara sipsip batema ngala nei.

Na nonei ema ranga has nei.

33Nori e pitaputa korue ren batema katoeri tu kout tu niga i tanen.

Esi te tatei rarariena u hatutubunei i tanen?

Taraha, a nitöatöa i tanen i luba hakapa naia u puta.”

U Buku u Göagono temar ranga uu teka.

34Ba malapei teka e rangatena e Pilip me poeiena, “Alia e rangate goulö, a propet e rangein esi ba nonei te katoena u raranga teka? Nonei e rangein a peisanen, tsi e rangein a tana katuun?”

35Be Pilip e tania na tara makumun raranga teka te kaia turu Buku u Göagono, me hatei nena u Bulungana u Niga tere Iesu. 36-37Pöata ti la noaien i maroro ba nori ena butu ria tara töa ramun, ba tson pepeito teka e poeiena, “Röto, a ramun teka. Aha te hatu kap na noulia tego habaptais uu lia?” Be Pilip e poeiena, “Te ka memialö a nihamana i torimölö, alö e antunan habaptaisim.”

Ba nonei e ranga palisina me poeiena, “Alia e hamanegu e Iesu Kristo nonei a Pien Tson tere Sunahan.”

38Ba nonei e hagumena a karis, be Pilip na nonei a tson pepeito e koul uaier tara ramun, be Pilip e baptais nen. 39Pöata ti la sei pouts men tara ramun, ba u Namnamei tara Tsunono e luba pouts nena e Pilip me la menen. A malapei ema tara lele ii e Pilip, kaba nonei e sasaala koru noahas, be la uana te la uaien. 40E Pilip ena butuia tara taun i Asdot te tataala silaien ba nonei e hatei lanena u Bulungana u Niga tara mamana taun, antunaia te na butuien tara taun i Sisaria.

Currently Selected:

Aposol 8: HLA 2020

Highlight

Copy