Matiu 10

A maloto na huol a aposol

(Mak 3:13-19, Luk 6:12-16)

1Be Iesu e ngö gögono rena a maloto na huol a katunun tsitsilo i tanen ba nonei e hala raneien a nitagala tegi tsuga ba meraien u liliahanei u omi ba nori te kato haniga pouts raier u katuun te ka mer a mamana mar siki.

2Nonei teka a man solo tara maloto na huol a aposol tere Iesu:

E Saimon ti ngö hasei e Pita.

Ne Endru e toulana e Saimon.

Ne Jemis a pien tson tere Sebedi.

Ne Jon e toulana e Jemis.

3Ne Pilip,

ne Batolomio,

ne Tomas,

ne Matiu te lului a takis,

ne Jemis a pien tson tere Alpius,

ne Tadius,

4ne Saimon a toun Silot,

na e Judas Iskariot a katuun te harötein e Iesu turu katuun ti paköeien.

E Iesu e tuler a maloto na huol a aposol

(Mak 6:7-13, Luk 9:1-6)

5Nonei a maloto na huol a aposol teka e Iesu e tula ralen me poeiena i taren, “Möa tu la uaiam turu katuun tema Jiu ri na tara man han has i Samaria. 6Alimiou go la las uaiam turu sipsipira i Israel te tiar. 7Ba limiou tena habulungana namiou u raranga teka: ‘A Nipepeito tere Sunahan e sukusukuna!’ 8Alimiou go kato haniga pouts raiam u katuun te ka mer a siki na ego hatakei pouts has raiam u katuun ti mate. Ba limiou te kato haniga pouts ramiou u katuun u toba bate tsuga ba has ramiou u liliahanei u omi. Alimiou uma hole mi a nihitaguhu alimiou u lu pukpukuemen, na taguhu tala raiam u katuun bate ma luemi ta hihol. 9Möa tu la meiam ta goul na ta silba na ta kopa. 10Alimiou goma la has memi ta pora na tu sendol na tu tukana tara nilala i tamilimiou. Alimiou go la las meiam u töa puku u hasobö u ngahangaha. Ba u katuun tena taguhu rami limiou tena hanou rariou limiou.

11“Na pöata te la mia limiou bate tasu mia iahana saha taun na saha han, alimiou e tara sakesake mou ta katuun ta niga bate kamia tara luma i tanen antunana tena kopis pouts muma limiou. 12Tara pöata tena tasu mia limiou tara luma teka, ba limiou te hala rami u katuun a masalohana. 13Na te lu raroua limiou u katuun teka, a masalohana i tamilimiou e tatei kana i taren. Kaba tema antunan lu rarouien limiou, a masalohana e tatei la pouts uana i tamilimiou. 14Tema hala narien ta niniganiga i tamilimiou na tema hengo haserien u raranga i tamilimiou ba limiou te tohu ba namiou u köahu i pitapitana a moumilimiou tara pöata te la ba ramien limiou. 15Alia e hatei hamana koru ragou limiou, a nihahuna tara taun teka e pan bala koru nanou a nihahuna tara taun i Sodom na i Gomora.”

A pöata a omi e la nama romana

(Mak 13:9-13, Luk 21:12-17)

16Be Iesu e poeiena, “Hengoiam! Alia e hala here ragoui limiou u sipsip te sila ria i gusura u muki u hie. Alimiou go tarakap here rami u kökötsi, ba limiou te here hase mi a kulu tema tatei kato homie nei ta ka. 17Haneiam, u katuun ena pile kap rariou limiou bate lu mera rilimiou turu kout, ba nori tena lahus raroua limiou turu luman lotu i taren. 18Nori e haka raroua limiou i matar u tsunono na u king te hamana uami limiou i tar, taraha u ngilngil i tar tego hatei meramien limiou u Bulungana u Niga, bate hatei has ramiou u katuun tema Jiu ri. 19Na pöata te kout rarouen limiou, e möa tu hakats haparpara balö te poeiem, ‘Ime tala temar ranga uagou lia? Na, aha tala te pei gou lia?’ Nonei koru has tara tsi pöata teka alimiou e hala raroui a ka tego ranga naiam limiou. 20Ema limiou peisanei te ranga mou. Kaba u Namnamei tere Tamamilimiou e Sunahan te haranga ranou limiou.

21“Na nonei tara pöata, u katuun e hala rariou u toularen tegi kato hamate meraien, ba a palair u katuun te haniga nariou tegi atung hamate merai a galapien i taren. Na palair a galapien e omi has rariou u tsinaren na u tamaren, bate kato hamate has rariou. 22U katuun u parpara koru e omi rariou limiou te hamana uami limiou i tar. Kaba a katuun te hamana nitöa uana i tar, e Sunahan e lu pouts mena noien i tanen. 23Na te kato homi raroa limiou tara töa taun, ba limiou te bus uamiou tara taina taun. Alia e hatei hamana nitöa ragou limiou, alimiou ema hakapa noa hase moi a toukui i tamilimiou tara mamana taun hoboto i Israel, ba lia tu butun Katunuma te la pouts guma romana.

24“A katunun tsitsilo ema pan nanei a tson hihatuts i tanen, na katunun kukui puku ema pan has nanei a katuun pan i tanen. 25E nigana te kato here mena nei a katunun tsitsilo a peisanen a tson hihatuts i tanen. Na e niga hasina te kato here mena nei a katunun kukui puku a peisanen a katuun pan i tanen. Alia a katuun pan tara pal katuun i tar. Na a palair u katuun e ngö tsipone rilia e Belsebul. Te markato tala uaren teka, ba nori te ngö raroui limiou u katuun u omi koru, taraha alimiou e pala uamiou i tar.”

Alimiou go matouteiam e Sunahan

(Luk 12:2-7)

26E Iesu e ranga lel me poeiena, “Alimiou goma matout rami u katuun. Taraha, a manka hoboto te hamouser ena butu noua turu ualesala i murimuri. 27U raranga te hatei ragi lia alimiou turu kuhil, alimiou ena ranga namouen turu alesala. Na saha ka te hengoe mölö te hahasi tuun ner, ena ranga hapan namoa limiou i ioluna a pungana. 28Na limiou goma matout rami u katuun te atung hamateier u tuenrei, nori ema atung hamatieri u namnamei. Kaba limiou go matouteiam e Sunahan, nonei te antunan kato homi nitoeiena u tuenrei na u namnamei i hel. 29Alimiou e antunan holemi a huol a apena a 10 toea puku. Kaba e möa koru ta töa tega antunan rus uu i puta tegoma haniga uai e Tamamilimiou. 30-31Na limiou goma matout has rami u katuun, taraha e Sunahan e tara kap ranou limiou, na limiou e niga bala koru ramiou u apena i matana e Sunahan. Na nonei e atei sil hasena u hihase turu hulu hoboto i baku milimiou.”

Alimiou goma holis nami e Kristo

(Luk 12:8-9)

32Be Iesu e poeiena, “Esi te hatei ranei u katuun nonei e pala uana i tar, ba lia te hatei hase gou e Tamar i Kolö nonei a katuun i tar. 33Kaba esi te holis nena te pala uanen i tar i matar u katuun, ba lia te holis has nagoen romana tere Tamar i Kolö.”

E möa ta masalohana, kaba a hiatatung

(Luk 12:51-53, 14:26-27)

34Be Iesu e ranga lenina me poeiena, “Emoa tego pei mena milimiou alia u la silema tegomi hala menai a masalohana turu katunura i puta. Alia uma la memei a masalohana. Alia u la mema a hiatatung. 35Alia u la silema tegomi hahiapalpal merai u katuun

‘a tson e pal nanou e tamanen,

na tahol e pal nanou e tsinanen,

na taholun tölo e pal nanou u halöanabei i tanen.

36U katuun noahas i luma i tamölö tena kato homie rioulö.’

37“A katuun te ngil koruena e tamanen na e tsinanen, batema ngile nei lia, nonei ema katuun hamana uanei i tar. Na katuun te ngil koruena a pien tson i tanen na pien tahol i tanen batema ngile nei lia, nonei ema katuun hamana uanei i tar. 38Na esi tema söatenei a kuruse i tanen bate kukutie noulia, nonei ema katuun hamana has uanei i tar. 39Esi te poeiena e ka peisa mena a nitöatöa i tanen e hatia pouts hase nouen. Kaba esi te hakats nanoulia ba nitöatöa i tanen te taiana, nonei ena sabie nou a nitöatöa hamana i tanen.”

U katuun te lue riou u hamatana u niga

(Mak 9:41)

40E Iesu e ranga lel me poeiena, “A katuun te nigana i tamilimiou e niga hasna i tar. Na katuun te nigana i tar, nonei e niga hasna tere Tamar te hale moulia. 41Na katuun te rarariena u raranga tere Sunahan, bate hanigeiena a toukui i tanen, nonei ena lue nou u hamatana te lu hase nou a katuun te rarariena u raranga tere Sunahan. Na katuun te tarena a katuun te matsköna i matana e Sunahan bate hanigeiena nonei a katuun, nonei ena lu hasenou u hamatana te lu hasenou a katuun a matskö. 42Na lia e hatei hamana nitöa ragou limiou, a katuun te tarena a tsi katuun papala koru i tar bate haue nen a tsi ramun, nonei ena lu korue nou u hamatana u niga tema antunan taia nei.”

Currently Selected:

Matiu 10: HLA 2020

Highlight

Copy