Mak 10
10
E Iesu e hihatutsin a markato te peko menari a hitöl
(Matiu 19:1-12, Luk 16:18)
1E Iesu e laban i Kapenium me la uana tara provins i Judia, me arohena a Ramun olo i Jodan me la noa talasina. U katuun u parpara i kukute noa laseien mena gonogono lelria i tanen, ba nonei e hihatuts lel na i taren te roron markato uaien.
2A palaira u Parasi i lama bemi torohane ren me rangate ren, “A Lo i tarara e haniga nena tego laba menai a tson a tahol i tanen?” 3Be Iesu e rangata palis ranen, “E Mosis emar ranga uu ime tara ka teka?”
4Ba nori e ranga paliseren me poeier, “E Mosis e hanigein tego koloto menai a tson u pepa te pekoenen a hitöl, ba nonei te laba nena a tahol i tanen.” 5Be Iesu e ranga mera nen, “E Mosis e koloto berai limiou a Lo teka taraha, alimiou uma hengoemi u ranga. 6Kaba i mam koru tara pöata te habuteia e Sunahan a mamanaka, ba nonei e katoeiena a tson na tahol. 7‘Tara markato teka ba tson te laba nena e tamanen na e tsinanen ba tena ka gono mena a tahol i tanen.#10:7 Taraia turu Tantania 2:24. 8Ba nori a huol te katoeier a töa katuun.’ Ba nori tema here lel ri a huol, kaba a töa puku a katuun. 9Na ka te kato hakapelala e Sunahan e möa ta katuun ega antunan purese leleien.”
10Pöata tina ka poutsien i luma, ba u katunun tsitsilo ena rangateri e Iesu a ka teka. 11Ba nonei e ranga palis ranen me poeiena, “A katuun te pekoena a hitöl i tanen ba tena tölena a tana tahol e tsikolona, nonei e kato homina. 12Na te laba has nena a tahol a tson i tanen ba tena hitöl mena tana tson, nonei e kato homi hasna tara hitöl.”
E Iesu e kalala rena a galapien
(Matiu 19:13-15, Luk 18:15-17)
13U katuun i la merema a galapien tere Iesu tegomi sebele meraien bate kalala ranen, kaba u katunun tsitsilo i hapiou raien. 14Be Iesu e tarena ti markato uaien me raharaha koruna me poeiena turu katunun tsitsilo i tanen, “Haka ba raiam a galapien egi la uama i tar, alimiou goma hapiou ramien. Taraha, a Nipepeito tere Sunahan e kana tara markato te kato uana teka. 15Alia e hatei hamana koru ragou limiou, a katuun tema hengo hanige nei u raranga tere Sunahan temar hengo uana a pien, a katuun teka ema antunan tasu nei tara Nipepeito tere Sunahan.” 16Ba nonei e lukutu rena a galapien me hatakopena a limanen i taren me kalala ranen.
A tson moni
(Matiu 19:16-30, Luk 18:18-30)
17E Iesu e hatania leli a nilala i tanen ba töa tson e piata uanama i tanen memi hatukun na i matanen me rangate nen, “Tson Hihatuts a niga, aha tego kati lia ba lia te luegou a nitöatöa te ka nitöana?” 18Be Iesu e rangate nen, “E hana balö te ngoe milia a niga? E möa ta töa ta katuun tega niga. E Sunahan puku lasi te nigana. 19Alö e atei silem u Maloto u Raranga tere Sunahan. E markato uana teka: ‘Alimiou goma hihipulimi. Na egoma tsikolomi. Na egoma kopkopmi. Na egoma gamogamomi. Na egoma gamo nami a manka tara tana katuun bate luemen. Hapaneiam e tamamilimiou na e tsinamilimiou.’”
20Ba tson e poeiena, “Tson Hihatuts, pöata tu tetenei noama lia, alia u hengo haniga korui a manka teka.” 21Be Iesu e tara uana i tanen me ngil korue nen me poeiena, “A töa patu a ka tego kati lö. Alö gona haholin a mamanaka hoboto i tamölö bate lueiem a moni bate hala ramien u katuun ti möa ta moni balö te kukute mumoulia. Balö tena ka memou romana a mamanaka a niga koruna i Kolö.”
22Ba pöata te hengoeien u raranga teka ba nonei e mata papala koruna me la poutsuna me taatagi koruna, taraha nonei e ka mei a mamanaka a parpara koru. 23Be Iesu e habirits uana turu katunun tsitsilo i tanen me poeiena i taren, “U katuun te ka mer a ka a parpara koru e palpal koru riou tegi tasu uaien tara Nipepeito tere Sunahan.” 24Bu katunun tsitsilo e asingoto koru ner u ranga i tanen. Kaba e Iesu e ranga lel me poeiena, “A matsi galapien, e palpal koruna tegi tasu uu tara Nipepeito tere Sunahan. 25E hahan ka koruna tara kemol tega sipi uaien tara tabutuna a salim kaba e palpal koruna tega tasu uu a tson moni tara Nipepeito tere Sunahan.”
26Nori i asingoto koru me rangatar, “Gesi te antunan lue riou?” 27Be Iesu e tara uana i taren me poeiena, “Tara katuun tuun ema antunanei, kaba tere Sunahan e antunana. E Sunahan e antunana tara mamanaka hoboto.”
28Be Pita e poeiena i tanen, “Alam u laba nema a mamanaka hoboto i tamulam me kukutie mumoulö.” 29-30Be Iesu e poeiena, “Alia e hatei hamana ragou limiou, a katuun te laba nenama a luma i tanen tsi u toulanen na u hahinanen na e tsinanen ne tamanen na galapien i tanen na u tsiktsiki i tanen tara solo i tar na turu Bulungana u Niga, a katuun teka ena lu poutsena romana a mamanaka te para bala nanou a luma na u toulanen na u hahinanen na u tsinanen na galapien i tanen na u tsiktsiki i tanen. Na nonei ena kamits be hase nou lia romana. Ba tara pöata te la nama i murimuri, ba nonei tena lue nou romana a nitöatöa te ka nitöana. 31Kaba a parpara te panir ena katuun papala riou romana, na pala te katuun papalar i romana ena pan riou romana.”
E Iesu e ranga hatopisein a tou mate na tou takei pouts i tanen
(Matiu 20:17-19, Luk 18:31-34)
32-33Nori i tataalaia i maroro te la uu i Jerusalem, e Iesu e mam raien kaba u katunun tsitsilo i tanen i hatutu hoboto na u katuun ti murimurima i matout hoboto. Be Iesu e lu halhal lel rena a maloto na huol a katunun tsitsilo i tanen be hatei raneien a manka tegona butuia i tanen me poeiena, “Hengoiam, ara e la uara i Jerusalem, na Alia tu Butun Katunuma ena hala naroua turu pris pan na turu tson hihatuts tara Lo. Ba nori tena kout sile riou lia tegona mate uu lia bate hala naroua lia tara pala tema Jiu ri. 34Nori ena hahakos nariou lia romana bate kahuse riou lia bate lahuse riou lia bate atung hamatie riou lia. Ba i murina u topisa u lan ba lia te takei pouts gou.”
E Jemis na e Jon i rangatein tegi pan uaien
(Matiu 20:20-28)
35E Jemis na e Jon a galapien tere Sebedi i la uama tere Iesu me poeier, “Tson Hihatuts, alam e ngilem alö go kato bera mei lam a ka te rangata nemulam.” 36Be Iesu e rangata ranen, “Aha te ngile milimiou tego kato bera ii lia alimiou?”
37Ba nori e ranga palise ren me poeier, “Alö go hatangana, tena gum moa lö turu Gumgum u Göagono i Tamölö, ba lam tena gum gono memou lö, a töa tara pal matou na tai tara pal keruka.” 38Be Iesu e poeiena i taren, “Alimiou ema atei silemi a ka te harangata na milimiou. Alimiou ena antunan ua moa tara kap tena ua goua lia tsi alimiou ena antunan söate mou a mar nikamits tena sagohe gou lia?”
39Ba nori e poeier, “Alam e antunam.” Be Iesu e poeiena i taren, “Aa, alimiou e na ua moa tara kap tena ua goua lia, na limiou e na sagohe mou a mar nikamits tena sagohe goulia. 40Kaba tegona gum mia limiou tara pal matou tsi tara pal keruka i tar, ema ka uanei i tar tego halanaien. E Sunahan puku te hala nanou a man gumgum teka turu katuun ti kato taatago beraien.”
41Pöata ti hengo naia a maloto a katunun tsitsilo a ka teka ba nori e raharaha raier ere Jemis mere Jon. 42Be Iesu e ngö gögono ranen me poeiena, “Alimiou e atei silemiou a markato turu katuun tema Jiu ri. U katuun te ngö rarien u tsunono e ranga hamal ria i taren, na pal kapan i taren e pepeito kap hatagala raren. 43Kaba alimiou goma kato uami teka. Esi ta katuun i gusumilimiou te ngilin pan na i tamilimiou ego kato herenaia a peisanen a katunun kui i tamilimiou. 44Na esi ta katuun te ngilin mammam na i gusumilimiou ego kato herenaia a peisanen a tsi katuun papala. 45Alia tu butun Katunuma uma la sile mei tegomi hakui mera ii u katuun. E moa. Alia u la silema tegomi kui be mera ii u katuun, na tegomi sakahis menai lia u katuun u parpara tara tou mate i tar.”
E Iesu e kato haniga poutsi a katuun a matakiou
(Matiu 20:29-34, Luk 18:35-43)
46Nori i tukuia tara taun i Jeriko. Ba pöata te laba neia e Iesu na u katunun tsitsilo i tanen na u katuun u parpara has a taun teka, ba töa katuun a matakiou a solonen e Batimius, a pien tson tere Timius te roron singo hataatagi sil ta moni te gum na i rehina kalana. 47Ba pöata te hengoeien te la uama e Iesu na i Nasaret ba nonei e tanian ku hapanina me poeiena, “O Iesu a Hatutubunei tere Devit a King, alö go taatagi namoulia.” 48Ba u katuun u parpara e ranga hapiou meren me poeier, “Kakamoto.” Kaba nonei e ku hapan hasoala bate poeiena, “Hatutubunei tere Devit, alö go taatagi namoulia.” 49Be Iesu e tuoluna me poeiena, “Ngöe muma.” Ba nori e ngöeier a katuun a matakiou me poeier i tanen, “Nigana ba! Takei tala. Nonei e ngöe noulö.” 50Ba nonei e his ba nena u hasobö u ngahangaha i tanen me supatakeina me la uanama tere Iesu. 51Be Iesu e rangate nen, “Alö e ngilem alia go kato be ii lö aha?” Ba katuun a matakiou e ranga palisenen me poeiena, “Tson Hihatuts, alia e ngilin tara poutsugu.” 52Be Iesu e poeiena i tanen, “La tala. A nihamana i tamölö e kato haniga poutse lalou lö.”
Ba i murina pouts te rangaia e Iesu banonei te tara sokö pouts hasina, ba nonei e kukuteiena e Iesu i kalana.
Currently Selected:
Mak 10: HLA 2020
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
Mak 10
10
E Iesu e hihatutsin a markato te peko menari a hitöl
(Matiu 19:1-12, Luk 16:18)
1E Iesu e laban i Kapenium me la uana tara provins i Judia, me arohena a Ramun olo i Jodan me la noa talasina. U katuun u parpara i kukute noa laseien mena gonogono lelria i tanen, ba nonei e hihatuts lel na i taren te roron markato uaien.
2A palaira u Parasi i lama bemi torohane ren me rangate ren, “A Lo i tarara e haniga nena tego laba menai a tson a tahol i tanen?” 3Be Iesu e rangata palis ranen, “E Mosis emar ranga uu ime tara ka teka?”
4Ba nori e ranga paliseren me poeier, “E Mosis e hanigein tego koloto menai a tson u pepa te pekoenen a hitöl, ba nonei te laba nena a tahol i tanen.” 5Be Iesu e ranga mera nen, “E Mosis e koloto berai limiou a Lo teka taraha, alimiou uma hengoemi u ranga. 6Kaba i mam koru tara pöata te habuteia e Sunahan a mamanaka, ba nonei e katoeiena a tson na tahol. 7‘Tara markato teka ba tson te laba nena e tamanen na e tsinanen ba tena ka gono mena a tahol i tanen.#10:7 Taraia turu Tantania 2:24. 8Ba nori a huol te katoeier a töa katuun.’ Ba nori tema here lel ri a huol, kaba a töa puku a katuun. 9Na ka te kato hakapelala e Sunahan e möa ta katuun ega antunan purese leleien.”
10Pöata tina ka poutsien i luma, ba u katunun tsitsilo ena rangateri e Iesu a ka teka. 11Ba nonei e ranga palis ranen me poeiena, “A katuun te pekoena a hitöl i tanen ba tena tölena a tana tahol e tsikolona, nonei e kato homina. 12Na te laba has nena a tahol a tson i tanen ba tena hitöl mena tana tson, nonei e kato homi hasna tara hitöl.”
E Iesu e kalala rena a galapien
(Matiu 19:13-15, Luk 18:15-17)
13U katuun i la merema a galapien tere Iesu tegomi sebele meraien bate kalala ranen, kaba u katunun tsitsilo i hapiou raien. 14Be Iesu e tarena ti markato uaien me raharaha koruna me poeiena turu katunun tsitsilo i tanen, “Haka ba raiam a galapien egi la uama i tar, alimiou goma hapiou ramien. Taraha, a Nipepeito tere Sunahan e kana tara markato te kato uana teka. 15Alia e hatei hamana koru ragou limiou, a katuun tema hengo hanige nei u raranga tere Sunahan temar hengo uana a pien, a katuun teka ema antunan tasu nei tara Nipepeito tere Sunahan.” 16Ba nonei e lukutu rena a galapien me hatakopena a limanen i taren me kalala ranen.
A tson moni
(Matiu 19:16-30, Luk 18:18-30)
17E Iesu e hatania leli a nilala i tanen ba töa tson e piata uanama i tanen memi hatukun na i matanen me rangate nen, “Tson Hihatuts a niga, aha tego kati lia ba lia te luegou a nitöatöa te ka nitöana?” 18Be Iesu e rangate nen, “E hana balö te ngoe milia a niga? E möa ta töa ta katuun tega niga. E Sunahan puku lasi te nigana. 19Alö e atei silem u Maloto u Raranga tere Sunahan. E markato uana teka: ‘Alimiou goma hihipulimi. Na egoma tsikolomi. Na egoma kopkopmi. Na egoma gamogamomi. Na egoma gamo nami a manka tara tana katuun bate luemen. Hapaneiam e tamamilimiou na e tsinamilimiou.’”
20Ba tson e poeiena, “Tson Hihatuts, pöata tu tetenei noama lia, alia u hengo haniga korui a manka teka.” 21Be Iesu e tara uana i tanen me ngil korue nen me poeiena, “A töa patu a ka tego kati lö. Alö gona haholin a mamanaka hoboto i tamölö bate lueiem a moni bate hala ramien u katuun ti möa ta moni balö te kukute mumoulia. Balö tena ka memou romana a mamanaka a niga koruna i Kolö.”
22Ba pöata te hengoeien u raranga teka ba nonei e mata papala koruna me la poutsuna me taatagi koruna, taraha nonei e ka mei a mamanaka a parpara koru. 23Be Iesu e habirits uana turu katunun tsitsilo i tanen me poeiena i taren, “U katuun te ka mer a ka a parpara koru e palpal koru riou tegi tasu uaien tara Nipepeito tere Sunahan.” 24Bu katunun tsitsilo e asingoto koru ner u ranga i tanen. Kaba e Iesu e ranga lel me poeiena, “A matsi galapien, e palpal koruna tegi tasu uu tara Nipepeito tere Sunahan. 25E hahan ka koruna tara kemol tega sipi uaien tara tabutuna a salim kaba e palpal koruna tega tasu uu a tson moni tara Nipepeito tere Sunahan.”
26Nori i asingoto koru me rangatar, “Gesi te antunan lue riou?” 27Be Iesu e tara uana i taren me poeiena, “Tara katuun tuun ema antunanei, kaba tere Sunahan e antunana. E Sunahan e antunana tara mamanaka hoboto.”
28Be Pita e poeiena i tanen, “Alam u laba nema a mamanaka hoboto i tamulam me kukutie mumoulö.” 29-30Be Iesu e poeiena, “Alia e hatei hamana ragou limiou, a katuun te laba nenama a luma i tanen tsi u toulanen na u hahinanen na e tsinanen ne tamanen na galapien i tanen na u tsiktsiki i tanen tara solo i tar na turu Bulungana u Niga, a katuun teka ena lu poutsena romana a mamanaka te para bala nanou a luma na u toulanen na u hahinanen na u tsinanen na galapien i tanen na u tsiktsiki i tanen. Na nonei ena kamits be hase nou lia romana. Ba tara pöata te la nama i murimuri, ba nonei tena lue nou romana a nitöatöa te ka nitöana. 31Kaba a parpara te panir ena katuun papala riou romana, na pala te katuun papalar i romana ena pan riou romana.”
E Iesu e ranga hatopisein a tou mate na tou takei pouts i tanen
(Matiu 20:17-19, Luk 18:31-34)
32-33Nori i tataalaia i maroro te la uu i Jerusalem, e Iesu e mam raien kaba u katunun tsitsilo i tanen i hatutu hoboto na u katuun ti murimurima i matout hoboto. Be Iesu e lu halhal lel rena a maloto na huol a katunun tsitsilo i tanen be hatei raneien a manka tegona butuia i tanen me poeiena, “Hengoiam, ara e la uara i Jerusalem, na Alia tu Butun Katunuma ena hala naroua turu pris pan na turu tson hihatuts tara Lo. Ba nori tena kout sile riou lia tegona mate uu lia bate hala naroua lia tara pala tema Jiu ri. 34Nori ena hahakos nariou lia romana bate kahuse riou lia bate lahuse riou lia bate atung hamatie riou lia. Ba i murina u topisa u lan ba lia te takei pouts gou.”
E Jemis na e Jon i rangatein tegi pan uaien
(Matiu 20:20-28)
35E Jemis na e Jon a galapien tere Sebedi i la uama tere Iesu me poeier, “Tson Hihatuts, alam e ngilem alö go kato bera mei lam a ka te rangata nemulam.” 36Be Iesu e rangata ranen, “Aha te ngile milimiou tego kato bera ii lia alimiou?”
37Ba nori e ranga palise ren me poeier, “Alö go hatangana, tena gum moa lö turu Gumgum u Göagono i Tamölö, ba lam tena gum gono memou lö, a töa tara pal matou na tai tara pal keruka.” 38Be Iesu e poeiena i taren, “Alimiou ema atei silemi a ka te harangata na milimiou. Alimiou ena antunan ua moa tara kap tena ua goua lia tsi alimiou ena antunan söate mou a mar nikamits tena sagohe gou lia?”
39Ba nori e poeier, “Alam e antunam.” Be Iesu e poeiena i taren, “Aa, alimiou e na ua moa tara kap tena ua goua lia, na limiou e na sagohe mou a mar nikamits tena sagohe goulia. 40Kaba tegona gum mia limiou tara pal matou tsi tara pal keruka i tar, ema ka uanei i tar tego halanaien. E Sunahan puku te hala nanou a man gumgum teka turu katuun ti kato taatago beraien.”
41Pöata ti hengo naia a maloto a katunun tsitsilo a ka teka ba nori e raharaha raier ere Jemis mere Jon. 42Be Iesu e ngö gögono ranen me poeiena, “Alimiou e atei silemiou a markato turu katuun tema Jiu ri. U katuun te ngö rarien u tsunono e ranga hamal ria i taren, na pal kapan i taren e pepeito kap hatagala raren. 43Kaba alimiou goma kato uami teka. Esi ta katuun i gusumilimiou te ngilin pan na i tamilimiou ego kato herenaia a peisanen a katunun kui i tamilimiou. 44Na esi ta katuun te ngilin mammam na i gusumilimiou ego kato herenaia a peisanen a tsi katuun papala. 45Alia tu butun Katunuma uma la sile mei tegomi hakui mera ii u katuun. E moa. Alia u la silema tegomi kui be mera ii u katuun, na tegomi sakahis menai lia u katuun u parpara tara tou mate i tar.”
E Iesu e kato haniga poutsi a katuun a matakiou
(Matiu 20:29-34, Luk 18:35-43)
46Nori i tukuia tara taun i Jeriko. Ba pöata te laba neia e Iesu na u katunun tsitsilo i tanen na u katuun u parpara has a taun teka, ba töa katuun a matakiou a solonen e Batimius, a pien tson tere Timius te roron singo hataatagi sil ta moni te gum na i rehina kalana. 47Ba pöata te hengoeien te la uama e Iesu na i Nasaret ba nonei e tanian ku hapanina me poeiena, “O Iesu a Hatutubunei tere Devit a King, alö go taatagi namoulia.” 48Ba u katuun u parpara e ranga hapiou meren me poeier, “Kakamoto.” Kaba nonei e ku hapan hasoala bate poeiena, “Hatutubunei tere Devit, alö go taatagi namoulia.” 49Be Iesu e tuoluna me poeiena, “Ngöe muma.” Ba nori e ngöeier a katuun a matakiou me poeier i tanen, “Nigana ba! Takei tala. Nonei e ngöe noulö.” 50Ba nonei e his ba nena u hasobö u ngahangaha i tanen me supatakeina me la uanama tere Iesu. 51Be Iesu e rangate nen, “Alö e ngilem alia go kato be ii lö aha?” Ba katuun a matakiou e ranga palisenen me poeiena, “Tson Hihatuts, alia e ngilin tara poutsugu.” 52Be Iesu e poeiena i tanen, “La tala. A nihamana i tamölö e kato haniga poutse lalou lö.”
Ba i murina pouts te rangaia e Iesu banonei te tara sokö pouts hasina, ba nonei e kukuteiena e Iesu i kalana.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.