Mak 12

U haharuei turu katuun u omi ti tara kapiin a kuin grep

(Matiu 21:33-46, Luk 20:9-19)

1Be Iesu e tanian ranga merena u katuun turu haharuei. “A töa katuun e lebei a kuin grep me ololo hahis kakap nanen, me kaho hasena a kiou tegi pots naia u grep. Nonei e hatakei hasi a luma a pia tegi pepeito kap naia a kuin grep teka. Ba nonei e hakuin moni nanen me lauana tara taina a han. 2Pöata te tangohoia u grep ba nonei e tula nelala a katunun kukui puku i tanen tegona lu menaien a pal grep i tanen turu katuun te hapepetokap rameien a kuin grep i tanen. 3Kaba nori i pile kap naien me lahuse ren ba nori e hakopis pukpuku poutse ren. 4Be tamana kuin grep e hala lel nenama a tana katunun kukui puku i tanen, ba u katuun ti taratarakapin a kui e singater a bakunen me ranga hohomi naren. 5Ba nonei e tula lel nalala a tana katunun kukui puku i tanen ba nori e atung hamate haseren. A para katuun ti tula nela i markato las merai teka, a palai i atungir na palai i kato hamatir. 6Nonei e ka noa mei a töa patu a katuun tego tula naien, a pien tson i tanen te ngil korueien. Nonei e tula hamurimuri nalen me poeiena, ‘Nori ena tara marei riou a pien tson i tar.’

7“Kaba u katunun taratarakap i tari a pien tson teka, ba nori e hiararangar me poeier, ‘Nonei a pien tson tere tamana kui teka te lue nou a kuin grep. Aragi atung hamateien bara te lue riou a kui i tanen.’ 8Ba nori e pile kap naren me atung hamate ren me lapo ba narien ielesala tara kuin grep.”

9Be Iesu e rangatana me poeiena, “Gaha te katoe nou e tamana kuin grep? Nonei emi atung hamate ranou u katuun teka bate hataratara kap ranei a kuin grep teka u katuun u niga. 10Alimiou u taratara haniga haseiam u raranga teka?

‘A hatu ti raman u katunun kui tara luma me hapiraka ba naier,

nonei a hatu te niga balana tara toukuina tara luma.

11A ka teka a Tsunono te katoeien,

bara te tara here narien a ka a kapan koru teka.’”

12Pöata ti tara mareien u haharuei e sakasaka raien, nori i ngilin na hakarabus koru naien. Kaba nori i matoutir u katuun ba nori e laba naren.

U harangata na tara takis tara gamman

(Matiu 22:15-22, Luk 20:20-26)

13Ba nori e tula rarima a palair u Parasi na palair u katuun tere Herot tegimi maman gamo menaien e Iesu ba nonei te ranga nena tu ranga tu omi tegi kout meien e Iesu. 14Ba nori e la uarima i tanen memi poeier, “Tson Hihatuts, alam e atei silem alö a katununa turu mana. Alö ema hakats silemi a ka te ranga ner u katuun, taraha alö ema hakats nami a nitsunono tara katuun. Alö e hihatuts hamana nem a maroro tere Sunahan. Bara, a Lo i tarara e hapiou nena tegi hala menai ra a takis tere Sisa a gamman pan, tsi e möa? 15Aragi hol a takis tsi ara gima holeien?”

Kaba e Iesu e atei sil u gamo i taren me poeiena, “Taraha ba limiou te katsin torohane mou lia? Hale mume lia ta denarius#12:15 A denarius, a mar moni ti holei a toukui tara katuun turu töa u lan. moni ba lia te taragu.”

16Ba nori e hale rien a töa moni ba nonei e rangata ranen me poeiena, “U baku teresi na solo teresi teka?”

Ba nori e ranga palise ren, “E Sisa.”

17Be Iesu e poeiena, “Bara, halemi e Sisa a manka i tanen, bate hala hasemi e Sunahan a manka te ka uana i tanen.”

Ba nori e asingoto koru ner ti hengo menaien a ka te rangein e Iesu.

Pöata te töatöa pouts ria romana u katuun

(Matiu 22:23-33, Luk 20:27-40)

18U Sadiusi i la uama tere Iesu. Nori u katuun teka te rangar bate poeier u katuun ema takei pouts roi i murina a tou mate i taren. 19Ba nori e poeier i tanen, “Tson Hihatuts, e Mosis e koloto berai ra a lo teka: ‘Tego mate ba naia a tson a tahol i tanen bate moana ta pien, ba toulana tson teka te tatei tölena a amoaba, ba nori te hatuhaner romana ta pien te lue nou a makum tara tson te mate.’#12:19 A pien, a hamua turu mun tahol u tsimus teka te tatei lui a mamanaka turu hatamana i tanen te mate. 20Bara, e ka mei u tönomo u munmun toulana. A hamua e hitöl me matena bate möana ta pien i tanen. 21Ba hahuol e tölo lelena a amoaba ba nonei e mate lel hasina bate möa noa hasina ta pien i tanen. Ba hatopisa e kato has uana iesana. 22U mun toulana tohit hoboto i töli a tahol teka me mater, kaba a tahol ti töleien ema kamei ta pien i taren. Ba i murinen ba tahol e mate hasina. 23Ga tara pöata te takei pouts roua u katuun tara tou mate i taren, ba nonei a tahol teka ena tölo tale nou esi? Taraha, nori u mun toulana tohit hoboto i töleien.”

24Be Iesu e poeiena i taren, “Alimiou e ranga hatutu memiou, taraha, alimiou ema atei silemi u Buku u Göagono na nitagala tere Sunahan. 25U katuun te takei pouts roua tara tou mate i taren, nori ema hitöl lel roi romana. Tara markato teka nori e here roi u angelo ra i Kolö. 26Na turu rangana turu katuun ti mate hakapa bate takei pouts riou tara tou mate, alimiou toum uma ritemi a makumun ranga iahana u buku tere Mosis te hatei nena u ruei te kulupu? Tara makum teka e Sunahan e ranga mei e Mosis me poeiena, ‘Alia a Sunahan tere Abraham na a Sunahan tere Aisak ne Sunahan tere Jekop.’ 27Nonei ema Sunahan uanei turu katuun u mate kaba nonei e Sunahan turu katuun te töatöar. Alimiou e hakats hatutu korumiou.”

U raranga tutuun u kapan tere Sunahan

(Matiu 22:34-40, Luk 10:25-28)

28A töa tson hihatuts tara Lo e hengo ti hiarangrangata uaien. Ba nonei e hengo sabiena te ranga palis haniga menai e Iesu u Sadiusi, ba nonei e la hasukusuku nama me rangate nen, “U saha u raranga te pan na tara man raranga hoboto tere Sunahan?”

29Be Iesu e ranga palisenen me poeiena, “U raranga te pan bala koruna teka: ‘Hengoiam, u katunura i Israel, E Sunahan a Tsunono i tarara a töa puku a Tsunono. 30A Tsunono e Sunahan alö go ngil koru meien a tori mölö hoboto na u namnamei hoboto i tamölö na u hakats hoboto i tamölö na tara nitagala hoboto i tamölö.’ 31Na u hahuoluna u raranga u pannen teka: ‘Alö go mar ngil koru mei a tana katuun temar ngil koru has mena milö a peisamölö.’ E möa tu tana tu mar raranga tega pan balein u huol u raranga teka.”

32Ba tson hihatuts tara Lo e poeiena tere Iesu, “U mana koru, Tson Hihatuts. Alö e ranga hamana nemula e Sunahan a töa puku, na e möa lel ta tana ta sunahan. 33Na katuun ego ngil korui e Sunahan turu tori hoboto i tanen na turu hakats hoboto i tanen na tara nitagala hoboto i tanen. Na nonei ego mar ngil koru has menai a tana katuun temar ngil koru mena neien a peisanen. Na ka teka e pan bala nena u mamana u haats.”

34E Iesu e hengoe temar ranga palis hanigan töa uu a tson ba nonei e ranga menen, “Alö ema lehana ba nami a Nipepeito tere Sunahan.”

Ba i murinen, u katuun i matoutin rangata lele ii e Iesu tu harangata.

Esi nonei e Mesaia?

(Matiu 22:41-46, Luk 20:41-44)

35Pöata te hihatutsia e Iesu tara Luman Lotu Pan ba nonei e poeiena, “E hana ba u tson hihatuts tara Lo te poeier e Mesaia a hatutubunei tere Devit? 36U Namnamei u Göagono te hale ii e Davit u hakhakats ba nonei e poeiena,

‘A Tsunono e mar ranga uu teka tara Tsunono i tar,

Gum ia tara pal matou i tar,

e antunana tara pöata te hale goi lia lö u katuun te paköe rioulö

ba lö tena pita puta ramouen.’

37“E Devit noahas te ngöei a katuun teka, A Tsunono. Gime temar hatubuna uana e Mesaia tere Devit?”

Kaba e möa ta katuun tega ranga palis.

E Iesu e rangeir u tson hihatuts tara Lo

(Matiu 23:1-36, Luk 20:45-47)

U katuun u parpara koru teka i sasaala mei ti hengo uaien tere Iesu. 38Pöata te hihatuts noaia e Iesu be poeiena, “Hanei sileiam u tson hihatuts tara Lo. Nori e ngilin hula la mer u hasobö u ngahangaha i taren, na nori e ngil haser u katuun te ka ria tara töana egi hapan raien. 39Nori e ngilin gum has ria turu gumgum tara pal kapan i luman lotu na turu gumgum tara pal kapan tara kannou pan. 40Na u tson hihatuts tara Lo e lube tsiponeri a peisaren a manka turu amoaba na tegi tara marei meraien, nori e roron katoeier u singo u ngahangaha. Kato uana teka ba nihahuna i taren te pan koruna romana.”

A amoaba e halan a monin hitaguhu turu lotu

(Luk 21:1-4)

41E Iesu e gum bate tara uana tara sei moni iahana Luman Lotu Pan, bate tara uana turu katuun ti hongi a monin hitaguhu tara sei moni. U katunun moni u parpara ti hongi a man moni pan peisa. 42Kaba a töa amoaba te möa koru ta ka i tanen e lama memi hongena a tsi huol a tsi toea. 43Be Iesu e ngö gögono rena u katunun tsitsilo i tanen me poeiena i taren, “Alia e hatei hamana koru ragou limiou, a amoaba teka e hala nelala a moni te pan saluhe bala nena a man moni te hala nelila u katuun hoboto. 44Taraha, nori hoboto e hala lila tara moni te kurapana tara man moni i taren, kaba a amoaba teka e möa lel ta tsi moni i tanen. A tsi huol puku a tsi toea tega holeien ta tsi kannou te honge la len.”

Currently Selected:

Mak 12: HLA 2020

Highlight

Copy