Matɨyu 9

Jisas hwe sɨfe aho pe'nnyo sohumo wopɨngo umokumentisofoho.

(Mak 2:1-12; Luk 5:17-26)

1Jisas yofayokinomo kotasonto ayo momɨngo somo ku'mokwawento kakoe ango hwapɨngo sopo i'mofamentisofoho. 2I'mofaohwahonɨngki a'amuso hofɨko hwe nom'ne sɨfe aho pe'nnyo sohwo kakoe ijempohopo'nohini saho fosyawowo'nɨngkiso sohumo Jisasɨyepono itokwopmmentohofofoho. Itokwopahonɨngkofi Jisas kako uhwonɨmentisoso hofɨko kakine'no sɨmeho hi'ntnnono yokumpohn'nyo uyohonɨngkofi uhwononto Jisas oso a'amu mnokino'njo sohumo ulɨmento, Nje hwomu sohwosi, kɨko iyoho kinɨngkuhwoloho. Ngko jɨje honɨngkano wonyoso wae nto yakumofohono.

3Ose ulahonɨngki a'amu honɨngkano hungkuno lutɨhwamotofo sohwa nohumantɨfi ole hnnɨmentohofi, Olo hwe lohwo sohwo kako Anɨtu pa'nyo pojiyalofoho.

4Ose hnnɨngkahonɨngkofi, hofɨkoe hunoso Jisas kako huno moi'wonoho. Oso'no Jisas ulɨmento, Sekwoe sɨmeho mo'mo huno wonyoso peho'no syonɨfɨsyantokwofo. Ole losyonɨfɨsyantɨkwofo, ngko a'amufe wonyo wae meeofonehoho losyonɨfɨsyantɨkwofo. 5-6Anɨtu kako ngkimo a'amumo ufo'mayo'ne nɨhwatɨmentiso sohwo'ni olo hwaho lopo a'amufe honɨngkano wonyo wae yaofo'ne yokumpohn'nyoso hi'njo hwo'nyoho. I oso'no a'amu fihwo jɨje honɨngkano wonyo wae weekumo'mo loso sohwoe hungkuno somo ne imo'nyo so'no sekwo sɨmeho mo'mo muhwonɨfitnne kuyoho. Oso yokumpohn'nyo ngko seloheso hi'njo sohwo'ni utɨhwa'nyopo setɨhwahm'me'no hungkuno nom'ne kengoso hwe lohumo ulɨmonne'no yohono. Hofɨkimo ose ulonto kako hwe mnokino'njo sohumo ulɨmento, kɨko nolɨkafohoji jɨje ijempohoso nomahoji jɨje angopo ne'no mpano. 7Ose ulahonɨngki hwe huhwo sohwo nolɨkafonto kakoe angomno umentisofoho. 8Nowahonɨngki hwe moya'miso nuhwonontɨfi iyoho unɨngkahonɨngki hofɨko ole lɨmentohofi, Anɨtu kakoe yokumpohn'nyo engoso olo pa'nyo loso hwe lohumo uyohoho. Huno ose uyahonɨngki hofɨko Anɨtuye yofe ho'noma'mentohofofoho.

Jisas Matɨyumo uhwosopo'mentisofoho.

(Mak 2:13-17)

9Oseso Jisas hano wento uhwonɨmentisoso hwe fihwo hamniyoho mayo syoho'njo sohwo kakoe ango somo humamentisofoho. Oso hwe huhwo sohwo kakoe yofe Matɨyu. Oso hwe huhwo sohumo Jisas nuhwononto ulɨmento, Kɨko ngkimo tɨfi nnɨngkape. Ose ulahonɨngki Matɨyu nolɨkafonto tɨfi inɨngkamentisofoho.

10Jisas Matɨyuye angomo nohumentanɨngki a'amu nom'ne hamniyoho mayo syoho'njo honɨngkano wonyo'njo sohwanji a'amu wonyo honɨngkano'njo nom'ne so'nji nohumentanɨngkofi hofɨko Jisasɨ'nji kakoe inomokomoyo sohwanji wopayo nɨmentohofofoho. 11Nonontanɨngkofi a'amu Falisi fehohnjo sohwa nuhwonontɨfi Jisasɨye inomokomoyo sohwamo ulɨmentohofi, Sekwoe Hwe Engo lohwo kako a'amu hamniyoho mayo syoho'njo lohwanji a'amu wonyo honɨngkano'njo lo'nji wopayo peho'no nalofoho.

12Ose ulahonɨngkofi Jisas nupa'nonto pahnnɨmo hungkuno ulɨmento upa'nɨmno. A'amu mnokino ane'njo wopɨngo humalofoso hofɨko a'amu uyohofahosiyo'njo sohumo mu'mapitnnehofo. O'o, a'amu mnokino'njo so'nohini u'mantɨfeho. 13Oso pa'nyoso ngko a'amu honɨngkano wopɨngo'njo hwona'nyoho lɨwo'nɨngkohofo somne'no joho lutɨmayo'ne pmmentohe hwonɨ'maho. O'o, ngko a'amu honɨngkano wonyo'njo somne'no pmmentohe hwo'nyoho. Sekwo Anɨtuye hungkuno somne'no huno waseyono. Hungkuno ole, Sekwo nom'ne somne'no hitoho ulofo so'no nɨmo'nɨngkohoho. I sekwo ngkine'no hwomtame ko ntohofontɨfi nom'ne a'amu somne'no hitoho mulofe'njo'manji ngkilaho. Oso hungkuno somne'no huno waseyono.

Jisas kakoe yahino songo'nji hohontajo yahino so'ntnne'no ulɨmentisofoho.

(Mak 2:18-22; Luk 5:33-39; Joun 3:29-30)

14Oso hohosohonta Joun A'amumo Mijo Kiyoma'mojo sohwoe inomokomoyo sohwa Jisasɨmo u'ma'mentohofofoho. Nu'mantɨfi ulɨmentohofi, Nakwo'nji a'amu Falisi sohwanji wopayo manyo'njo humayoso Anɨtumo jomo ujo'ne yahinoso inɨngkawowo'nɨngkuhwonefoho. I oso'no jɨje inomokomoyo sohwa hofɨko wosopayo manyo'njo humayo yahino somo minɨngkayo'njo peho'no yalokwofo.

15Ose ulohonɨngkahonɨngkofi Jisas pahnnɨmo hungkuno ulɨmento, Hwe fihwo kako ape songo mayo sohonta osohwo kakoe a'amu'nji nohumahwosi hofɨko sɨmeho tango'nji wohumantɨfi taho. Awonoho. Hofɨko sɨmeho wopɨngo'nji wopayo engo wonantɨfeho. I oso'no hwangku oso hwe ape maso huhwo sohumo a'amu nom'ne sohwa hofɨko kakoe a'amu mta'ni kompemafɨkuji fonjasyɨkujo'no kakoe a'amu hiso kako ane humafɨkujoso sɨmeho tango'njo humafɨkuji wosopayo manyo'njo uyantɨfeho. Ose ulonto pahnnɨmo hungkuno nom'ne ulɨmento,

16Hwe fihwo manji'mofo tontamo imo'nnyo sohwo kako hwapɨfe nom'ne songo we'eso nomahwosi tontamo somo lojwohofojasi lohofɨhwosi yakɨfe uyɨmtolaho. Awonoho. Engo womnahotɨ'montonoho.

17Ose ulonto pahnnɨmo hungkuno tɨfinjoso ole ulɨmento, Ou, a'amu fihwo kako mijo iloho uyɨmo lɨhwosi te fisɨyo woma'montolaho. O'o, awonoho. Kako te fisɨyo mahwosi mijo ihm'mofɨhwosi iloho yososo mijo wahumpo'montonoho. Te fisɨyoso nɨhu'nahone wonyo umo'nɨmontonoho. U, hwe huhwo sohwo kako te songoso mahwosi mijo ihm'mofɨhwosi iloho yososo mijo ito'no wolɨfawo'montonoho. Ihwoni. Yahino hohontajo so'nji songo so'nji nem'no hu'mɨngoso ito'nohino'maho.

Jisas hwe yofe engo'njo sohwoe mumo songo ulɨka'mentisoso a'mu fisi kako Jisasɨye manji'mofomo pm'mokumentisosi'nji wopɨngo umokumentisofoho.

(Mak 5:22-43; Luk 8:41-56)

18Jisas oso hungkuno hiso ulontanɨngki hwe yofe engo'njo sohwo Jisasɨmo u'manto hwomtame ulohofonto ulɨmento, Nje mu olohonta nto pe'nɨngkohoho. I oso'no kɨko nopohoji kakimo jɨje ahoso fɨkisyusyo. Kako apa'no songo wolɨkafono. 19Ose ulahonɨngki Jisas nolɨkafonto kakoe inomokomoyo sohwanji hwe huhwo sohumo tɨfi inɨngkamentohofofoho.

20-21Nowentanɨngkofi nom'ne a'musi Jisasɨmo inɨngkawomentisofoho. A'musi imoiho ne'no yontanɨngki soswo aho hufa'u hopi'nono sɨfe mta'ni hufa'u uyakolo'mojofoho. Oso a'mu hisi kako Jisasɨmne'no hnnɨmento, Ngko olo hwe lohwoe manji'mofo somo aho kisahumeso ngko wopɨngo umo'nɨmonnoho. Ose hnnonto kako Jisasɨye hohujo hohnta'ni u'manto kako Jisasɨye hwapɨfe tokwajo somo aho upm'mokumentisofoho. 22Nopm'mokahonɨngki Jisas ikinjamo lohofonto a'mu simo nuhwononto ulɨmento, Nje mufo, jɨje sɨmeho wopɨngo wakumo'nono. Kɨko ngkimo sɨmeho hi'ntnnono ntapohino so'no wopɨngo nto imo'nɨngkino kiyoho. Ose ulahonɨngki oso hohosohonta a'musi wopɨngo imo'nɨmentisofoho.

23Oseso Jisas kako nowento hwe engo sohwoe angomo swonto uhwonɨmentisoso a'amu hofɨko te somo hmpehmpe lontanɨngkofi a'amu wosofe ho'nowentanɨngki nuhwononto 24Jisas ulɨmento, Sekwo mpanɨmno. Mu we'esi poyo'maho. Kako saho fosyaweho. Ose ulahonɨngki hofɨko Jisasɨmne'no tɨkafo ujɨmentohofofoho. 25Tɨkafo ujɨmentohofoso Jisas hofɨkimo mempo hohnta'ni uhwajonto humentisofoho. Noswonto oso mu sopiye ahomo nomahonɨngki mu sopi lɨka'mentisofoho. 26Lɨka'mentiso so'no oso hungkuno hiso ango'meemo ho'nɨmmentisofoho.

Jisas hwe tɨmpi'nyo sohwa'umo wopɨngo umokumentisofoho.

27Jisas oso ango hopo sopo nulɨko'manto nowentanɨngki hwe tɨmpi'nyo sohwa'u Jisasɨmo tɨfi inɨngkawenji joho ole ulɨmentisi, Ntefitɨye Imu sohwosi, nekumne'no hitoho wakilofono. 28Ose ulahonɨngki Jisas kako angomo swahonɨngki oso hwe tɨmpi'nyo sohwa'u Jisasɨmo u'mahonɨngki Jisas ulɨmento, Ngko sikimo wopɨngo semokiyo so'no sɨmeho hi'ntnnono lontapisiyo. Ose ulohonɨngkahonɨngki ulɨmentisi, Ou, Hwe Engofo, eno. 29Ose ulahonɨngki Jisas sikoe tɨmopo aho kisasyonto ulɨmento, Siko ngkimo sikoe sɨmeho hi'ntnnono ntapisiyo'manji yo'mayo siko nosemo'nɨngkisoso wose'mano. 30Ose ulahonɨngki sikoe tɨmo honɨmentisiyefoho. Oseso Jisas sikimo hungkuno yokumpohn'nyo ole ulɨmento, Upa'ninyo. Wopɨngo semokohe so'no nom'ne a'amu fihumo nulohosiloho. Ose ulɨmentisofoho. 31I oso'no siko mempo hohnta'ni noswonji yo'mayo Jisas imentiso so'no hwaho ae'mo a'amu somo ulɨmentisiyefoho.

Jisas hwe iloho'nnyo sohumo wopɨngo umokumentisofoho.

32Oso hwe huhwo sohwa'u nosontanɨngki a'amu nom'ne sohwa hofɨko hwe iloho'nnyo towahuno wonyo ehuhnnamo'nnyo sohumo ipemotapontɨfi Jisasɨyepono umentohofofoho. Oso towahuno wonyo huhwo sohwo hwe sohumo mampi'nyo mesyɨmokumentisofoho. 33Oseso Jisas oso hwe sohwoe towahuno wonyo wae yaofahonɨngki kako hungkuno lɨmentisofoho. Hungkuno lahonɨngki hwe moya'mi hofɨko yomo yontɨfi huno pi'nɨngo syafɨhu'mentohofi, Hohonta olo yahino loso a'amu Isɨlael hn'nɨmo m'mofape'njo imojofoho. 34Ose lahonɨngkofi a'amu Falisi sohwa ole lɨmentohofi, Towahuno wonyo hopi'nohino sohwafe hwe engoso Setenɨyoho. Oso humta'ni Jisas kako yokumpohn'nyo nomanto towahuno wonyo homo somo wae yaofalofoho. Ose ulɨmentohofofoho.

Jisas kako hwe moya'mimne'no hitoho ulo'mentisofoho.

35Oseso Jisas ango'meemo nowento a'amu sofe tajo ango somo kakoe hungkuno Anɨtu a'amumo umokosyohumayo so'no lutɨhwanto a'amu wonyo'wonyo mnokino'njo somo wopɨngo umokumentisofoho. 36Jisas hwe moya'mi pi'nɨngo engo somo uhwonɨmentisoso yo'mayo tango engo'njo a'amu somo u'mahonɨngki yokumpohn'nyo ufo'ma'nyo'neso anefoho. Yahu kakwo'yohwo ane pa'nyofoho. Ose uhwononto kako hitoho ulo'mentisofoho. 37Hitoho ulofahonɨngki Jisas kakoe inomokomoyo sohwamo pahnnɨmo hungkuno ulɨmento, Wopayo syoho soponjo pi'nɨngo engoso toyo nto imaho. I oso hiso'no a'amu wopayo toyo mjiyo'ne syoho'njo sohwa hopoenohino hwa'maho. 38Oseso sekwo olo syoho loso mokosyohumawo'nɨngkiso kakwo'yohumo jomo ulɨkujo'no kako oso wopayo toyo homo somo mjiyo'ne a'amumo lɨhwajiyo'ne jomo ulɨmno. Ose ulɨmentisofoho.

Currently Selected:

Matɨyu 9: apzNT

Highlight

Copy