Aposel 10
10
Ensel natagama Kornilius na'ipana basef
1Anona aman nape Sisaria agilinama Kornilius, anan agilinai kepten numafi soldia 100-peleim. Soldia amama hiami sofalam sa'i soldia Italimi. 2Anan aman nanda' lotu naloma epes hiesi ananisi sape ipat ananinai sanda' lotu ma God. Anan nase'as moni maina esis Juda kwahusi otamba maim a'asi. Ea' la'ela'ef nanda' betena God. 3Anona nemaf wambomota aon nasa 3 klok, anan nati anom amamaga si'i na'oh nandondo'oh mape mataga alihim endilisi. Nati anona ensel Godi nafi'mai anan na'ipana na'i, “Kornilius.”
4Ea' Kornilius natolona umbamahana endilisi na'i, “Dembinai, ine' na'i main?”
Ea' ensel na'ipana na'i, “God name' beten ine'inai ea', okom na'i waf ine' nanda'anai nase'as moni maim nagiambama amam nematawa amamaga a'asi. Ea' God ata' okokomam. 5Dei' ine' nesapa' anom amam mofo'o Jopa mogolopa anona aman agilinama Saimon agel wa'ana Pita. Mi'ipana nifi'i na'ae. 6Aman anama nape ipat Saimoni, anan nandondomba agwafuh bulmakaumi. Ipat ananinai notawa felefele'ma naoh mafe' motambela.”
7Ensel na'ipa Kornilius ea' nafe'. Ea' Kornilius nofalai amam biam ananimi manda'mana maoli maloma anona soldia. Soldia anama nanda' lotu ma God la'ela'ef nape nanda' maola Kornilius. 8Ea' Kornilius na'ipa amam amama wanom andeande'ma basef amama hi'alam ea' nasapa'am mafe' wambel anama Jopa.
Pita nati anom amamaga misila'i heveni si'i nandondo'oh
9Ea' amam wanom mohafel mafe' ma'oh eaf. Lala mohafel mafe' mataga felefele'ma Jopa. Nogota anama aon nahagasom Pita nalata natoma ipat ande' ilifa nanda' beten. 10Ea' nolomahana na'i nea' gwa'aimi ea' esis ata' sanda'am. Ea' anom amamaga matagamana si'i na'oh nandondo'oh. 11Nati otaga ilif nandawisi' ea' anom amamaga si'i lowaf lu'unai endilisi misila'i ilif mowalai. Anom amamaga mahapila da'malifinama biefigin biefigin malana nisila'i. 12Amamaga mala lowaf anama nomoni, mafis amamaga hiami, amiguf mamumami mape aolopi, maloma iguf mamumami hiami. 13Ea' anona maf na'ipa Pita na'i, “Pita, ine' hafel neha mafis nea'am.”
14Ea' Pita na'ipana na'i, “Dembinai, ae' owa' endilisi. Ae' ina a' anom mafis ape' Juda ma'i awami, owa'.”
15Ea' maf anama na'ipana wapoti' na'i, “Amamaga God na'i bu'wami, amama ina ni'i awami, owa'.”
16Amama matagamana wenif na'ama ea' mehip motanima malata otaga heven ilif wapoti'.
17Ea' Pita okom natanea ma amamaga amama si'i na'oh dondo'oh, na'i, “Amama ae' atulumi ofagema main de'im?”
Anan okom natanea nape ea' amam amama Kornilius nasapa'am mafi'i mataga mahali'asa ipat Saimon napeinai. Ea' mowala mafi'i maitu uta. 18Ea' mofalana ma'i, “Saimon agel wa'ana Pita anan nape na'ae?”
19Pita ata' nape okom natanea nape ma amamaga amama ea' Ambal Bu'unai Godi na'ipana na'i, “Neme'! Amam amama wanom ma'i mogolopa ine'. 20Ine' hafel nisila' nefe' nelomom. Ine' owa' okom nope hiahiana, owa'. Ae' asapa'am mafi'i.”
21Ea' Pita nisila'ma amam amama na'ipam na'i, “Aman anama ipe' pagolopanai ae' ea' ma'uwi. Ipe' pafi'mai main?”
22Ea' ma'ipana ma'i, “Kornilius anan kepten dembinai numafi soldia 100-peleim hiami, nasapa'afa wafi'i. Anan aman nanda' waf bu'unai nanda' lotuma Godi. Esis Juda hiesi sa'i, ‘Anan aman bu'unai.’ Anona ensel Godi na'ipana ma nofalena nefe' ipat ananinai, ma ata' nome' anom basef ine'imi.”
23Ea' Pita na'ipam mawis ipat nomon nao'wam numafiam mape owamb anama. Wafilu nohafel nafe' nalomam. Anom amam Kristen Jopaimi mafe' malomana. 24Amam mohafel mafe' ma'oh owamb atotona eaf ea' mafe' mataga Sisaria. Ea' Kornilius nape nahafa amam. Anan nali' nofalai esis wambota ananinai saloma alupusi ananisi endilisi sondowa'anima sape.
25Ea' Pita nafi'i na'i nuwisi ipat ea' Kornilius nafi'i natagamana nindiwa nembawa felefele'ma bo'wagah Pitai na'i nefela agel ananinai. 26Ea' Pita nafelona na'ipana na'i, “Ine' hafel. Ae' wapoti' epen atowe si'i ine'.”
27Ea' Pita naloma Kornilius ma'i ea' mawis ipat nomon nati amam nematawa hiesi sandatama etifigin sapan.
28Ea' Pita na'ipas na'i, “Ipe' pegawa ea' mi'uli ape' Judai ma'i owa' ma ape' mefe' muwis ifagw o mope moloma enis epes owa' Judaisi, owa'. Ea' God nihi'ambe ma enis epes owa' Judaisi si'i ipe' na'ae na'ipi na'i, ‘Ina nendafa'ma enin epen ni'i enin nanda' waf aonai, owa'.’ 29Ea' ae' ina esambala basef amama God na'ipiami, owa'. Ea' ame' fala ipe'inai afi'i. Dei' a'i ihali'ipa, ‘Ipe' pefale afi'i ma main?’ ”
30Ea' Kornilius nagwamana na'i, “Amamaga natagama ae'i ma dei' nimeguf wenif mafe' ea', amama na'ama. Ae' ape anda' beten ipat ae'anai nogota aon nasa 3 klok. Nogota ea' na'ama etin si'i dei'. Anda' beten ape ea', ati anona aman naitu felefele'ma naep ae'ami, luwaguf maim ananimi mafifil endilisi. 31Ea' nofale na'i, ‘Kornilius, God name' beten ine'inai ea', okom na'i amamaga hiami ine'imi nase'asam epes isima amamaga a'asi. 32Ea' ine' nesapa' anom amam mofe' Jopa mofalai Saimon agel wa'ana Pita. Aman anama nape naloma anona aman Saimon ipat ananinai, nandondomba agwafuh bulmakaumi. Anan nape felefele'ma naoh mafe' motambela.’
33Ea' dei' atef ae' asapa' anom amam mafe'mago ine' ea' dei' ine' nanda' waf bu'unai nafi'i. Dei' ape' hiapai mafi'i mape na'ae ma naep Godi ma meme' basef hiami Dembinai nasi'inami ma ni'ipapam.”
Pita na'i basef ipat Korniliusi nomon
34Ea' Pita na'iam na'i, “Endilisi, dei' ae' egawa okom Godi anan ina okom na'i wambota epes hiesi Judai etis, owa'. 35Anan okom nainaila emi egafis sanda' lotuma anan sanda' waf bu'unai. 36Ipe' pegawa basef amama God na'iam mafe'ma ape' epes hiesi Israeli. Anan nawalapa basef bu'wami Jisas Kraisi, Anan Dembinai ma amamaga hiami maloma epes hiesi nanda'apa mataga ukup etifim maloma God opalef mape awanem malomana. 37Ipe' pegawa, fowa' Jon nawalapa basefa esis samboma opalefa waf aonai ma sefa' baptais. Nogota anama basef mafe' etap hiagoma Galili ea' mataga anama etap hiagoma Judia. 38Basef amama, basef Jisas Nasaretinai. God nandandepana na'ama. Anan nase'ana Ambal Bu'unai Ananinai naloma pepel lu'unai Ananinai. Ea' nafe' wambel hiagoma ganigani nagiambama esis amam nematawa. Ea' dei' God nape nalomana nanda' epes hiesi saila pepel Satani ambo'wes wapoti'.
39Ea' ae' afi'i aloma amam wanom afa' wawalapa basefa amamaga amama pepel anan nanda'anai gani Jerusalem naloma etap anama hiagoma ape' Juda mapoma. Ea' esis saundana lawag sahana naga' ma waf anama. 40Nimeguf biam hi'alam ea' mafe'ma wanomi God nafelona nohafel wapoti' nawalapana alihina. 41God ina nihi'ambasana Juda hiesi satolona, owa'. Nihi'amba afa' atofa fowa' God nandandepafa ma owalapa basef ananimi. Anan notanima nohafel hi'agif wapoti' ea' wa' gwa'aimi walomana. 42Anan na'ipafa basef la'ifimi ma wi'ipa esis amam nematawa owalapa basef alihim na'ama. God nandandepa aman anama ma nope aman nonda'masa basefa epes isima sape namisi soloma isima saga' ea'i. 43Amam profet hiami ma'iama anan na'ama ma'i, ‘La'ifimi agel ananinai atona God nakwaha waf aonai esis amam nematawa emi egafis sembale'efanai.’ ”
Epes isima owa' Judasi sofa' Ambal Bu'unai Godi napais
44Pita ata' na'i basef amama atom, Ambal Bu'unai Godi nafi'mai ma amam nematawa hiesi same' basef Godi napais. 45Amam amama Judaimi mombale'efi mafi'i malumai Pitai mohafel gegelalasom kwapete'am ma mati God nase'asa Ambal Bu'unai Ananinai etin si'i presena esis amam nematawa owa' Judaisi wapoti'. 46Amam Juda mame' esis sa'i diga naninani safela agel Godi ea' amam gegelalasom kwapete'am.
Ea' Pita na'i, 47“Ina enin epen la'ifina nindaiwa'ma sipisi' amam nematawa isima embel, owa'. Esis sofa' Ambal Bu'unai Godi na'ama etin si'i ape'.”
48Ea' na'ipasa basef la'ifimi ma esis na'i, “Ipe' pefa' baptaisa agel Jisas Kraisi.”
Ea' sa'ipana sa'i, “Ine' ata' nepe nelomapa anom nimeguf wapoti'.”
Currently Selected:
Aposel 10: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
