Aposel 11
11
Pita nawalapa basef na'ipasam esis Kristen sape Jerusalemi
1Ea' amam aposel maloma esis sahin owan sombale'efanai sape anama Judia hiagomai same' basef amama ma enis amam nematawa owa' Judaisi wapoti' sefa' basef Godi sembale'efana. 2Ea' Pita notanima nondowasa' Jerusalem, enis epes Juda sombale'efa basef Godi sape. Esis saila waf fowa'inai la'ifisa sa'i amam hiami mombale'efanai mila mi'uli esis Judai ma motopa' alop amamunai. Ea' sasambalana mehipa basef ananimi. 3Ea' sa'ipana sa'i, “Ine' nafe' nawis ifagw amam owa' Judaimi meatopa' alopi na' gwa'aimi nalomam.”
4Ea' Pita na'ipasa basef ma amamaga amama hiami mataga. Nali' na'ipasa basef dambadamba mali'i nailam nafe' nafe' nambefam. Ea' na'i, 5“Ae' ape taun Jopa anda' beten ape ea' okom ae'anai nandamboma ati anom amamaga si'i andondo'oh. Anom amamaga lu'wami misila'i ilif si'i lowaf launai endilisi. Amamaga mahapila lowaf anama da'malifinama biefigin biefigini mahapilana malana nisila'i heven ilif ea' nafi'mai ae'. 6Ea' ae' a'i ata' egawa amama andeande', atologon nomon lowaf anama ati amamaga mamumami hiami mape nomona lowaf anama. Ati mafis hiamu mamumami maitu etapi mafis aolopumi maloma iguf amiguf amamaga mape aolopi. 7Ea' ame' anona maf na'ipi na'i, ‘Pita, ine' hafel neha anom mafis nea'am.’
8Ea' a'ipa Dembinai a'i, ‘Dembinai, ae' andaiwa' endilisi! Fowa' ae' ata' so'uso'win afi'i ataga dei' ae' ina agwa' anom amamaga awami, owa'.’
9Ea' maf anama nafi'i ilif wapoti' bif na'i, ‘Amamaga God nanda'am mataga bu'wami, amama ina ni'i awami, owa'.’ 10Amamaga amama matagama ae' wenif ea' motanima malata heven ilif hi'alam.
11Dei' atef amam amama wanom mafi'i mataga ipat anama afa' wapeinai. Anona aman nape Sisariai nasapa'am mafi'mai ae'. 12Ea' Ambal Bu'unai Godi na'ipi na'i, ‘Ina okom netanea, owa'. Ine' fo'o noloma amam.’ Amam sahope amama wanom wanom mafe' malome. Ea' afa' wafe' wawis ipat aman anama 13na'ipafa ma nati ensel naitumana nomon gani ipat ananinai na'ipana na'i, ‘Ine' nesapa' anom amam mefe' Jopa mi'ipa Saimon agel wa'ana Pita ma nifi'mai ine'. 14Ama ni'ipina anom basef ine' ma basef amama etoma God nigiambama ine' neloma esis wambota ine'inai soloma esis sanda' maol ine'imi ma nofa'epa petanimani.’
15Ea' ae' afela basef a'iam, Ambal Bu'unai Godi nisila'mai esis, nafi'i na'ama etin si'i nali' nafi'mai ape' Juda dambadamba. 16Ea' ae' okokoma basef amama Dembinai wapoti'. Amama ma'i, ‘Jon napisi'as embel ea' ina embel atom, owa'. Atuwasi pefa' Ambal Bu'unai Godi nupaipa.’
17Fowa' ape' mombale'efa Dembinai Jisas Krais ea' God nase'apa Ambal Bu'unai Ananinai ape' si'i presen. Ea' dei' ae' emi egafuwi ma la'ifiwi i'ipa God niapani?”
18Esis same' basef amama Pita na'ipasami ea' ukup mase'asa basef amama asasimi safela agel Godi sa'i, “Dei' ape' mogawa God namboma opalef esis amam nematawa owa' Judaisi ma esis wapoti' safe'ma anan sope ambagof namumi.”
Esis amam nematawa Antiokisi sataga Kristen dambaisi
19Fowa' amam maha Stiven naga'i manda' nimanimi lu'wami matagama esis Kristen amam nematawa mahas. Ea' esis sembale'efanai safa' safe' ganigani ea' sataga anona wambel Antiok safe' anona etap hiagoma biefigin Saiprus naloma Fonisia sawalapa basef Godi ma esis Juda etis. 20Ea' anom amam Saiprusimi maloma anom Sairinimi mafe' Antiok mawalapa basef amama ma esis Grik wapoti'. Amam mawalapa basef bu'wami ma dembinai Jisas Krais. 21Ea' pepel Dembinai atona nape naloma amam, amama atom dei' amam nematawa hiesi samboma opalef safi'mai Dembinai.
22Ea' esis amam nematawa Kristen sape Jerusalemi same' basef amama ea' sasapa' Barnabas nafe' Antiok. 23Anan nafe' nataga nati God nanda' esis bo'wesa waf bu'unai numafias nandanifamas. Nafela ukup esis amam nematawa hiesi ma sope la'ifis sila Dembinai. 24Barnabas anan aman bu'unai, Ambal Bu'unai Godi napaina nembale'efa God andeande'. Ea' nagiambama esis amam nematawa hiesi ma sembale'efa Dembinai ea' sawisi epes hiesi Godi.
25Ea' Barnabas nafe' Tarsus nagolopa Sol. 26Natolona ea', nofa'ana nafi'i Antiok. Ea' amam biam mape afagel atotona maloma esis Kristen amam nematawa sape Antioki mawalipa epes hiesi ma basef Godi. Ea' esis amam nematawa saila Jisasi, enis epes sofalas agel anama Kristen dambadamba wambel anama Antiok.
27Nogota anama anom profet mape Jerusalemi makini' Antiok. 28Anona profet esis sofalana sa'i Agabus, Ambal Bu'unai Godi napaina ea' nawalipasa basefa nolomeahas lu'unai nambimb neataga etap wambel anama hiagoma.
Anom nimeguf mafe'ma ea', aman anama Klodius nataga nape gavman dembinai esis Rom, nogota anama nolomahas nataga si'i fowa' Agabus na'iam. 29Ea' esis amam nematawa saila Jisas Kraisi sa'i basef sandame'mama sefa' anom otamba mefe'ma esis alupusi sahin owan sape Judai ma sigiambas. Esis Kristen atona etin ukup ma'i otamba ma'omasi sawalom sase'asa tu'wanim hiami mafe'ma esis sape Judiai. Enis otamba hiami sase'asa hiami ea' enis otamba kwawie'im sase'asa kwawie'im. Hiesi sanda'am na'ama etin. 30Esis sanda'am na'ama, sasapa' Barnabas naloma Sol mofa' otamba amama mafe'ma amam agufumi mumafi esis Kristen sape Jerusalemi.
Currently Selected:
Aposel 11: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
