Aposel 13
13
Esis Kristen sasapa' Barnabas naloma Sol mafe' manda' maol Godi
1Esis amam nematawa Kristen sape Antioki anom amam mawalapa basef bu'wami Godi mape. Anom profet maloma anom tisa mawalipasa basef Godi isima sembale'efanai. Agof amamumi amama. Barnabas naloma Saimon agel wa'ana Niger, Lusius, anan wambel Sairininai maloma Sol maloma Manain anan alupunai Heroti gavman dembinai. 2Esis Kristen sakwaha gwa'aimi sanda' lotuma God atona sape. Ea' Ambal Bu'unai Godi na'ipas na'i, “Ipe' pendandepa Barnabas naloma Sola maol anama ae' efalam andandepam meanda'anai.”
3Ea' esis sakwaka gwa'aimi sanda' beten, sawamona lagofa amam biam sasapa'am mafe'.
Barnabas naloma Sol mawalapa basef bu'wami Godi anona ailan Saiprus
4Ambal Bu'unai Godi nasapa' amam biam mafe' makini' anona wambel Selusia. Ea' malata anona sip mefa'am mafe' anona ailan Saiprus. 5Ea' mataga Salamis, mawis nomon ipat esis Juda sa'i basef sapeinai ma'ipasa basef bu'wami Godi, Jon Mak wapoti' nape nalomam nagiambamam.
6Amam mafe' mataga wambel hiagoma nape ailan anama Saiprusi, ea' mafe' mataga wambel Pafos nape di'inai. Ea' mati anona aman anan Judainai. Anan nanda' ambagof nanda' amamaga mamumami baso'maimi. Anan profet nambaso'ma esis hiesi, agilinama Barjisas. 7Anan alupunai ma dembinai gavman agilinama Sergius Paulus. Sergius Paulus anan nomonas okom bu'unai napainai. Anan nofalai Barnabas naloma Sol mafi'i ma anan neme' basef Godi ma amam. 8Ea' aman anama agel ananinai diga Griki sa'i Elimas, nanda' ambagofi nasambala basef amam biam ma'iami. Na'i nomboma okom gavman anama dembinai ma ina nambimb nembale'efa basef Godi. 9Ea' aman anama Sol, sofalana Poli, anan pepel la'ifinai Ambal Bu'unai Godi napainai. Ea' anan natiti Elimas na'ipana na'i, 10“Ine' awani nogaloma Satani! Ine' naumbih ma waf anama hianai bu'unai! Waf anama baso'mainai hianai aonai si'ina ma ine' endilisi! Ine' nimeguf hiami nambomefa basef endilisimi bu'wami Dembinai mataga baso'maimi. Dei' maina ine' nandaiwa'ma nekwaha waf aonai ine' nanda'anai? 11Ea' dei' ine' neme'. Dei' Dembinai nehena lagel ananinai ea' atuwasi naep ine'imi mose'ena. Ea' ine' atuwasi niti aon alipunai, owa'. Ea' nepe na'ama etin anom nimeguf.”
Pol na'iam na'ama ma ea', mehip anom amamaga si'i elagw owamb nasopama naep Elimasi. Ea' naha ganigani nafe' nogolopa enis epesa sohapila lagof ananimi ma sihi'ambana eaf. 12Ea' gavman anama dembinai nati amamaga amama gegelalasona endilisi ma basef Dembinai ea' dei' nembale'efa Jisas.
Pol naloma Barnabas mafe' mataga wambel Antiok nape etap hiagoma Pisidia
13Pol naloma amam malomanai makwaha wambel Pafos ea' mefa' nefa'am mafe' anona wambel Perga nape anona etap hiagoma Pamfilia. Ea' aman anama Jon nakwaha amam notanima nafe' Jerusalem. 14Ea' makwaha wambel anama Perga mafe' mataga anona wambel Antiok nape etap hiagoma Pisidia. Anom nimeguf mafe'ma ea', nemaf anama Sabat esis Juda sapoma noma'wanai amam mafe' mawis ipat Juda sa'i basef sapeinai ea' matoma balata. 15Ea' anona aman natalifa basefa mi'uli God naso' Mosesanai maloma basef amam profet ma'iami ea' amam agufumi Judai masapa' basef mafe'ma Pol naloma amam manda' maol etini ma'iam ma'i, “Alupipei, ipe' i'i anom basefa monda' ukup esis amam nematawai motaga la'ifim, ipe' awi kiam.”
16Ea' Pol nohafel nafela lagel na'i basef na'i,
“Ipe' Israel hipei paloma ipe' enipa epes panda' lotuma Godi, ipe' peme' basef ae'ami. 17God dembinai esis Israeli, anan nandandepa esis akusapa ape'isi ma nemaf anama esis safe' sailas sapani etap hiagoma Isip ea' anan nanda'as sataga epes hiesi wambota lounai. Anom nemeguf mafe'ma ea', pepel Ananinai atona nofa' esis sakwaha etap anama safi'i. 18Ea' anama wafiguma fatauguma nofa' nimanimi ma waf esis sanda'anai ma afagof amama 40-peleim. 19Ma etap hiagoma Kenan anan nahambombaga lain 7-peleina amam nematawa hiesi ea' nase'asa etap anama nafe'ma esis Israel, 20ea' sahapila etap anama sape afagof amama 450-peleim.
Ea' anan nafela amam dambami esis Israeli ea' amam mumafi esis sape satagama nemaf aman anama profet Samuel nataga. 21Nemaf anama esis sawa salef sa'i sofa' anona king dembinai, ea' God nase'asa anona aman Sol, Kis nogalomana. Aman anama nataga wambota Benjamini. Ea' anan nape king dembinai ma afagof hiami 40-peleim.
22Anom nimeguf mafe'ma ea', God nali'amona king Sol, nanda' Devit nataga nape king asasinai. Anan na'ipasa aman anama Devit na'i, ‘Devit nogalomana Jesi, okom ae'anai nainailana. Anan nambimb nila okom ae'anai atona na'iami.’
23Ea' God nanda'am na'ama si'i fowa' na'iam na'i nonda'am. Ama wambota Deviti owagama God nefela Jisas, aman anama nofa' ape' Israeli. 24Fowa' Jisas ata' owa' nifi'i, nogota anama aman anama Jon nawalapa basef na'ipa esis Israel hiesi ma somboma opalef sokwaha waf aonai sefe'ma Goda sefa' baptais. 25Ea' felefele'ma Jon na'i nonda' maol ananinai hi'ilana, anan na'i, ‘Ipe' ukup ma'i ae' ma'imama? Ae' ina aman anama dembinai ipe' pape pembale'efanai, owa'. Ipe' peme'! Aman anama owagama nila ae' niefi'i, anan bu'unai nikila' ae'. Ae' ina bu'uwei ma etagaha mandelefa su ananimi, owa'.’
26Ipe' sahin owan, ipe' epes hiesi pataga wambota Abrahami, enipa owa' Judaipei panda' lotuma Godi, peme'. Dei' basef amama God nasapa'am mafi'mai ape' hiapai. Basef amama ma anan nambimb nofa'apa mokwaha waf aonai motanimani. 27Ea' esis sape Jerusalemi saloma amam agufumi asasimi, esis ina sogawa aman anama nofa'apa motanimani, owa'. Esis ina sogawa andeande' basef amama amam profet fowa' ma'iami, owa'. Anom agufumi matalifam Sabat nimeguf hiami sapoma noma'wanai. Ea' ina sogawam, owa'. Basef amama atom mataga endilisi nemaf anama esis sanda' kotima Jisas sa'i anan aman aonai ma sahana noga'. 28Esis ina sati anom basef ofagema waf aonai ma sohana noga', owa'. Ea' sofalai gavman dembinai Pailat ma ni'i a'e ma mohana noga' etin. 29Esis sanda'am hi'alam amamaga amama si'i fowa' amam profet ma'i basef manda'am mape buk Baibeli ma'iama anan. Nimeguf wanom mafe'ma ea', esis satagaha anan nisila'i lawag usi'inai tu'wanainai ea' sawana anona hi'agif. 30Ea' God nafelona wapoti'. 31Esis isima hiesi sakwaha etap hiagoma Galili ea' salomana sondowasa' Jerusalemi, esis satolona nimeguf hiami. Dei' epes isima safe' sawalapa basefa ape' Israela anan.
32Ea' ape' dei' ma'ipipa basef bu'wami ipe'. Amamaga amama fowa' God na'iama na'i nose'asas akusipa ape'isi, 33ea' ma'um amama dei' God naso' ape' awasi ananipai ma nafela Jisas nape namunai. Nafela Jisas si'i basef mape buk Baibel Buk Song nafe'ma bifi ma'iam na'ama. God na'i,
‘Ine' nogalome ae'inai. Nemaf dei'inai ae' ataga ahalomena ine'iwei.’
34Dei' God nafelona wapoti' hi'agif, ea' anan ina ata' notanima nofe' hi'agif wapoti' folo'olana, owa'. Ea' na'ama etin si'i God na'iam wapoti' na'i,
'Nambimb ae' igiambamepa i'ipipa basef amama endilisimi Ae'ami. Fowa' basef amama a'iam ea' ma a'i i'ipanam Deviti, amama i'ipipa ma Ae' pepe pe bu'unai.’
35Ea' si'i anom basef mape Buk Sami ma anan wapoti' ma'iam na'ama ma'i,
‘Ina nambimb ni'i a'e ma aman anama nonda' maol ine'inai andeande' folo'olana, owa'.’
36Ape' mogawa Devit nahapila maol naila okom Godi la'afena esis amam nematawa sape saloma anani. Anom nimeguf mafe'ma ea', anan naga' nafe' naloma amam bafapana ananimi ea' folo'walana. 37Ea' aman anama God notanima nafelona wapoti', anan ina folo'walana, owa'. 38Amama atom dei' ae' a'i ipe' sahin owan pegawa basef ape'imi amama. Aman anama nakwaha waf aonai ipe' panda'anai. 39Mi'uli anama God naso' Mosesanai anama ina la'ifina ma nokwaha waf aonai ipe' panda'anai ma pepe wafifipa andeande', owa'. Na'ama aman anama nakwaha waf hianai aonai ma ipe' emi egafipa pembale'efa anan, ma pepe wafifipa bo'wepa ma naep Godi. 40Dei' ipe' pegawa waf ipe' panda'anai andeande' bo'ona o aona? Na'ama amamaga amama awami mifi'mai ipe' si'i amam profet fowa' ma'iami ma'i,
41‘Ipe' panda' basef findiwaimi, ipe' petologon ukup matamea mefe' ea' awepa. Ae' anda' anona maol la'ifinai ma nimeguf ipe' ata' papeimi. I'i enin epen ni'ipipa maol anama, ipe' ina atuwasi pembale'efa maol anama, owa'.’ ”
42Ea' Pol naloma Barnabas ma'i muwis mofe' ea' esis amam nematawa sa'iam na'ama sa'i, “Nemaf anama Sabat nigi'i ape' ma'i ipe' bipa pitanima pifi'i pi'ipapa basef amama wapoti'.”
43Ea' esis sakwaha ipat esis Juda sa'i basef sapeinai sawisi ande' ea' esis Juda hiesi saloma enis epes hiesi sagi'mam. Esis isima saila waf esis Juda sanda' lotuwanai. Ea' amam biam mase'asa basef esis hiesi ma sape la'ifis sembale'efa God nanda' waf bu'unai ma ape' nagiambamapa etin.
44Nimeguf wanom wanom atotona mafe'ma ea' Sabat nemaf nagi'i, amam nematawa sape wambel anamai safi'i sandakolasa same' basef Godi. Amam nematawa isima felefele'ma hi'ilas wambel anama. 45Na'ama esis Juda sati amam nematawa hiesi sandakolasi, ea' ukup kowalam endilisi. Ea' sa'i basef awami ma Pol sa'i anan nambaso'mas.
46Ea' Pol naloma Barnabas ina umbamaham, owa'. Amam la'ifim ma'ipasam alihim ma'i, “Endilisi, afa' ata' wi'ipipa basef Godi ipe' Juda pili'. Ea' ipe' pewa' alafugaha basef amama. Amama ipe' pa'iam pa'i, ‘Ape' mandaiwa'ma mofa' ambal namunai ma mope andeande' la'ela'ef.’
Ipe' pa'i na'ama dei' ipe' peme'. Afa' dei' okwaha ipe' ofe' ugi'ma epes owa' Judaisi wi'ipasa basef amama. 47Dei' main, Dembinai na'ipafa mehipa anom basef mail buk Baibeli ma'i na'ama ma'i,
‘Ae' anda' ipe' si'i howalogon ma enis epes owa' Judaisi. Ama ipe' pigiambama esis amam nematawa sape wambel hiagomai ma etap anae'. Ama owagama efa'as sotanimani.’ ”
48Ea' enis epes owa' Judaisi same' basef amama sandanifel endilisi. Esis sandanifela basef Dembinai safela agel Ananinai. Ea' amam nematawa isima God nosahe'asi ma sope namisi la'ela'ef, isima sombale'efa Jisas.
49Ea' basef Dembinai mafe'agon hi'alagon anama hiagoma. 50Na'ama esis Juda safela anowa nematawa agufuwai wanda' lotuma Godi waloma anom agufumi mape taun anama lu'wagoma saha Poli naloma Barnabas sanda'am kwapete'am. Ea' sagalo'mam wambel asasinai. 51Ea' amam mandila'ma sopof mail bo'wagah amamumi ma mola ikwafa waf aonai napoma esis. Ea' mohafel mafe' Aikoniam. 52Esis alupusi sombale'efa Jisasi sandanifel endilisi ea' pepel Ambal Bu'unai Godi nape si'ina esis.
Currently Selected:
Aposel 13: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
