Aposel 2
2
Ambal Bu'unai Godi nafi'i
1Nemaf anama lu'unai Pentikos nataga, esis hiesi sembale'efana sandatama etifigin sape ipat atotona. 2Ea' dei' atef same' anona maf lu'unai nanda'am nafi'i heven. Maf anama name' si'i uf la'ifinai naluwi ea' ipat anama esis sapeinai si'inama maf anama. 3Ea' sati nif ilelowa si'i melisigah pepe'atam mafe' matoma esis hiesi atona etin hi'alas. 4Ea' Ambal Bu'unai Godi nape si'inama esis atona etin hi'alas, sa'i basef Godi ma diga naninani wambel hiagoma. Ambal Bu'unai Godi anama nanda'am mataga malogof asasimi.
5Ea' enis Juda sanda' lotuma Godi safi'i ganima etap hiagoma safi'i sape Jerusalem. 6Esis hiesi same' maf anama ea' enis amam nematawa hiesi safi'i sondowa'anima sape. Ea' epes isima hiesi atona etin same' esis sembale'efanai sa'i basef Godi ma diga naninani hianai. Ea' sohafel gegelalasis kwapete'as endilisi ma same' diga asasinai. 7Esis sohafel gegelalasis kwapete'as ea' ukup matamea hiahiam. Ea' sa'iam sa'i, “Amam amama Galilimi atom, ea' dei' ma'i diga ape'inai atona etin. 8Dei' maina ape' hiapai atona etin mame' amam ma'i diga ape'inai dende' si'i ape' mame'ama mamasapa ape'isi? Ape' mafi'i etap anama hiagoma anama, 9-10Partia, Midia Elam ea' Judia, Kapadosia naloma Pontus Esia Frigia Pamfilia Isip ea' ape' anona etap hiagoma Mesopotamia ea' esis ganima Libia felefele'ma wambel Sairini. Ea' anepa ape' wambel Rom mafi'i mape na'ae. 11Ape' Juda maloma enis epes maila waf esis Juda sanda' lotuwanai ea' ape' etap hiagoma Krit Arebia, ape' hiapai mame' amam mawalapa basefa pepel maol Godi ma diga hianai naninani.”
12Ea' esis hiesi sohafel gegelalasis kwapete'as, esis ukup matamea mape hiahiam. Esis etis sandahali'ma sa'i, “Amamaga amama mataga ma'imama?”
13Ea' enis sanda' iafam sa'i, “Amam ma' embel wain hianai ea' mahaga magaol dei' ma'i basef mamumami.”
Pita nawalapa basef na'iam
14Ea' Pita nohafel naitu naloma amam aposel 11-peleim ea' noga na'i mehip nawalapa basefa esis amam nematawa hiesi na'i, “Ipe' Juda alupipei paloma ipe' amam nematawa hipei ipe' pape Jerusalem, ipe' pembe' aligaha basef ae'ami, ma pegawa amamaga amama. 15Ipe' pa'i amam amama manda' spak, owa'. Dei' ata' kuhimbita aon ata' natefi nail etin si'i 9 klok. 16Ea' amamaga amama mataga si'i anona profet Joel fowa' gani na'i, 17‘God na' i,
felefele' ma nimeguf akutaimi Ae' ese'as Ambal Bu'unai Ae'anai nope amam nematawa hiesi. Ea' efela esis batawisipa ipe'isi sowalapa basef si'i amam profet ma'iam. Ea' ihi'amba amam so'umi ipe'imi mondanda'oh motolom naep mose'am mope motolom, ea' ese'ama mo'oh mondanda'oh motolom amam hagami ipe'mi ma ihi'ambam waf ae'anai.
18Nimeguf amama ae' ese'asa Ambal Bu'unai ae'anai nope esis amam nematawa ae'asi sanda' maol ae'anai nefelas sowalapa basef Ae'ami si'i fowa' amam profet manda'ami.
19Ea' enda' anona ikwaf notaga gani otaga ilif, enda' anona ikwaf notaga na'ae etap. Anama na'ama. Enda' nogoh hiami otaga, enda' esimbel, nif fandumi mataga etap anae'.
20Ea' emboma aon alipunai notaga owamb owambunai notaga akwahina si'i esimbel. Ea' enda'am i'i nemaf Dembinai nigi' notaga. Nemaf anama ananinai lu'unai endilisi. Dembinai nihi'ambapa pepel nafifili Ananinai.
21Nemaf anama ata' owa' neataga emi egafis sofala agel Dembinai, nofa'as sotanimani.’ ”
22Ea' Pita na'ipas wapoti' na'i, “Ipe' epes Israelipei, ipe' peme' basef amama. Dei' i'ipipa aman anama Jisas Nasaretinai. Ipe' pegawa maol ahalomana la'ifinai naloma pepel anama God nanda'anai la'afena ipe' ma lagel aman anama. Amama mihi'ambepa andeande' aman anama God nasapa'ana nafi'i. 23Fowa' gani God nogawa ea' nail okom Ananinai atona nanda' aman anama nefe' nope lagof ipe'imi. Ea' amam amama mololama mi'uli Godi sanda' waf aonai, amam magiambama ipe' pembale'ana paundana nail lawag usi'inai tu'wanainai ea' pahana naga'. 24Ea' God nafelona nohafel wapoti' nakwaha ekep pahana ma naga'i. Dei' main, ga' anama ina la'ifina ma nombale'ana, owa'.
25Fowa' gani Devit na'i basefa Jisas na'i,
‘Ae' ati Dembinai ae'anai nape nalome wa'ol lagel ae'anai da'isinai la'ela'ef. Na'ama dei' ina enis epes la'ifisa sanda'me anom nimanimi, owa'. 26Amama atom dei' okom ae'anai nandanifel. Ae' i'i basef bu'wami i'i, ae' egawa endilisi nambimb anona nigiambame epe andeande'. 27Dei' main, anona nemaf ina nekwaha ambal ae'anai nefe' nepe anama epes saga'i sapoma, owa'. Ea' ina nambimb nekwaha aman anama bu'unai nanda' maol ine'inai alop ananinai folo'olana, owa'. 28Ine' nihi'ambe eaf nafe' natagama ambal namunai. Anona nemaf ine' nepe nelome endanifel endilisi.’ ”
29Ea' Pita na'ipas wapoti' na'i, “Ipe' sahope owape ae'ipei, dei' ae' a'i ewalapa basef i'ipipana aman anama akunamapa ape'inai Devit. Anan fowa' gani naga' sawana, dei' hi'agif ananinai ata' nape la'afena ape'. Basef amama Devit ina na'iama anan atona, owa'. 30Aman anama Devit anan profet ea' nogawa God na'i basef la'ifimi na'i endilisi gani ilif na'ama ma anona nemaf nonda' bafalomana Deviti notaga nope dembinai king si'i Devit fowa' nape king. 31Fowa' gani Devit ata' nape, anan nogawa amama God na'i anona nemaf neanda'ami. Na'ama dei' anan na'i dembinai Krais anona nemef noga' notanima nohafel wapoti'. Anan na'iam na'i, ‘Anona nemaf God ina nokwahona nope anama saga'i sapoma hi'agif alop ananinai folo'olana, owa'.’ 32Aman anama Jisas God nafelana notanima nohafel wapoti'. Ea' afa' hiafai wati amama dei' wa'iam. 33Dei' God nafelona nohafel nalata gani heven ilif ea' nape lagel da'isinai Godi. Anan nofa' Ambal Bu'unai Godi ma Ahalomana, si'i fowa' Ahalomana na'ipana na'i endilisi nese'ana. Amama atom dei' Jisas nase'asam esis amamaga amama dei' patolom pame'am ea'. 34Dei' main, Devit ina nalata heven, owa'. Ea' anan fowa' gani na'i basef na'i,
‘Dembinai na'ipa Dembinai ae'anai na'ama na'i, “Ine' nepe lagel da'isinai ae'anai ma nepe Dembinai neloma ae'. 35Nepe na'ama nefe' nefe' enda' naumbih ine'isi sefe' owina bowagah ine'imi ine' nikila'as.” ’ ”
36Ea' dei' Pita na'iam na'ama na'i, “Dei' ape' Israel mogawa isima andeande'. Aman anama Jisas ipe' paundana lawag usi'inai tu'wanainai pahana naga', dei' God nanda'ana nataga nape dembinai anan Krais, God nandandepana nasapa'ana nafi'i.”
Amam nematawa hiesi samboma opalef saila God ea' sofa' baptais
37Esis same' basef amama, maha opalef asasimi endilisi. Ea' sa'ipa Pita naloma anom aposel sa'i, “Ipe' sahopapa, dei' ape' monda' maina mope andeande'?”
38Ea' Pita na'ipas na'i, “Ipe' hipei pemboma opalef ipe'imi pila God ea' ipe' hipei atona etin pefa' baptaisa agel Dembinai Jisas Krais ma God nokwaha waf aonai ipe'inai. Ipe' penda'am na'ama, nambimb God nese'epa Ambal Bu'unai Ananinai nope nolomepa. 39Fowa' gani God na'i basef la'ifimi endilisimi atom na'i nese'epa Ambal Bu'unai Ananinai nope noloma ipe' peloma awasi ipe'isi soloma esis amam nematawa hiesi ata' sape lauguni anona nemaf sigi' seatagai. God Dembinai ape'inai na'iam ma nose'as Ambal Bu'unai Ananinai nope noloma epes isima. Epes amama atom anona nemaf Anan nofalas sotanimani.”
40Pita ina na'ipasa basef amama atom, owa'. Na'ipasa anom basef hiami wapoti' na'ipas basef la'ifimi ma nafela ukup asasimi na'i, “Ipe' pindumafuma andeande'. Na'ama pefa' nimanimi lu'wami peloma amam nematawa dei'isi sanda' waf aonai.”
41Ea' epes emi egafis sofa' basef Pitai sombale'efam, esis sofa' baptais. Nemaf anama God nowa'ani epes hiesi wambota ananinai sataga hias 3,000-peleis sataga Kristen, ea' sape saloma esis isima amam nematawa sombale'efanai.
Esis Kristen sombale'efanai sanda' waf bu'unai
42Amam nematawa isima sataga Kristen dambaisi esis la'ifis endilisi ma same' basef amam aposel mawalipasami sandagiambanama etin enis sahin owan sape etifigin etin sa' gwa'aimi sanda' beten etifigin atogon. 43Nimeguf hiami God nanda' ikwaf lu'unai ma pepel hianai nataga lagof amam aposeli. Ea' amam nematawa hiesi umbamahas endilisi sape. 44Ea' esis hiesi sombale'efa Kraisi sandatama etifigin atogon. Amamaga asasimi gwa'aimi maim hiami, ina asasimi atona etin, owa'. Amamaga amama hiesi atom. 45Ea' esis sombale'efanai enis sase'asa etap asasinai naloma anom amamaga asasimi mafe'ma enis epes satalamasam. Ea' sofa' otamba ma amamaga sotambel sanda'am sase' epes isima gwa'aimi a'asi kwahusi. 46Ea' esis hiesi nimeguf la'ela'ef safe' ipat lu'unai Godi sanda' lotuwanai. Ea' safe' sa' gwa'aimi ifagw asasimi atona etin. Esis sandanifel ukup bo'om sose'as gwa'aimi ma sigiambama enis epes ea' sandanifel sa' gwa'aimi etifigin. 47La'ela'ef esis safela agel Godi lu'una, ea' opalef esis amam nematawa hiesi sape andi'i bo'oma esis Kristen nimeguf hiami. Ea' nimeguf la'ela'ef Dembinai nofa' enis amam nematawa sotanimani sape saloma epes hiesi isima sombale'efanai.
Currently Selected:
Aposel 2: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
